Ekisoda

6 Ndi hone Yehova a tshi amba na Mushe a ri: “Zwino ni ḓo vhona zwine nda ḓo ita Farao.+ Ndi ḓo mu kombetshedza nga tshanḓa tshanga tsha maanḓa uri a vha litshe vha ṱuwe, tshanḓa tsha maanḓa tshi ḓo mu kombetshedza uri a vha pandele shangoni ḽawe.”+

2 Nga zwenezwo, Mudzimu a amba na Mushe a ri: “Ndi nṋe Yehova. 3 Ndo vha ndi tshi ḓivhonadza kha Abrahamu, Isaka na Yakobo sa Mudzimu Ramaanḓaoṱhe,+ fhedzi dzina ḽanga Yehova+ a tho ngo vha dzumbululela ḽone nga vhuḓalo.+ 4 Ndo dovha nda vhofha mulanga navho wa u vha ṋea shango ḽa Kanana, shango ḽe vha dzula khaḽo sa vhatsinda.+ 5 Ndo pfa u gomela ha vhathu vha Isiraele, vhe vha itwa dziphuli nga Vhaegipita, nda humbula mulanga wanga.+

6 “Ngauralo, vhudza Vhaisiraele u ri: ‘Ndi nṋe Yehova, ndi ḓo ni rula mihwalo ye na hweswa nga Vhaegipita, nda ni lamulela vhupulini haṋu,+ ndi ḓo ni vhofholola nga tshanḓa tsha maanḓa na nga khaṱhulo khulwane.+ 7 Ndi ḓo ni ita vhathu vhanga, ndi ḓo vha Mudzimu waṋu;+ ni ḓo ḓivha uri ndi nṋe Yehova Mudzimu waṋu ane a khou ni rula mihwalo ye na hweswa nga Vhaegipita. 8 Ndi ḓo ni isa shangoni ḽe nda ana* uri ndi ḓo ḽi ṋea Abrahamu, Isaka na Yakobo; ndi ḓo ni ṋea ḽone ḽa vha ḽaṋu.+ Ndi nṋe Yehova.’”+

9 Nga murahu Mushe a vhudza Vhaisiraele wonoyu mulaedza, fhedzi vha si mu thetshelese nga nṱhani ha u kulea nungo na vhupuli vhu vhavhaho.+

10 Yehova a amba na Mushe a ri: 11 “Iya u vhudze Farao khosi ya Egipita uri a litshe Vhaisiraele vha ṱuwe shangoni ḽawe.” 12 Naho zwo ralo, Mushe a fhindula Yehova a ri: “Vhaisiraele a vho ngo nthetshelesa;+ Farao u ḓo nthetshelesa hani samusi ndi sa koni u amba zwavhuḓi?”+ 13 Fhedzi Yehova a dovha a vhudza Mushe na Aroni zwine vha fanela u vhudza Vhaisiraele na Farao khosi ya Egipita, uri vha bvise Vhaisiraele shangoni ḽa Egipita.

14 Vharangaphanḓa vha miṱa ya vhokhotsi avho ndi havha: Vharwa vha Rubeni, tanzhe+ ḽa Isiraele, vho vha vhe Hanoxe, Palu, Hetsironi na Karami.+ Heyi ndi yone miṱa ya Rubeni.

15 Vharwa vha Simioni vho vha vhe Yemuele, Yamini, Ohada, Yakini, Tsohara na Shaulo, murwa wa mufumakadzi wa Mukanana.+ Heyi ndi yone miṱa ya Simioni.

16 Madzina a vharwa vha Levi,+ u ya nga vhubvo ha miṱa yavho ngea: Gerisoni, Kehati na Merari.+ Levi o tshila miṅwaha ya 137.

17 Vharwa vha Gerisoni vho vha vhe Libini na Shimei, u ya nga miṱa yavho.+

18 Vharwa vha Kehati vho vha vhe Amuramu, Isara, Heburoni na Usiele.+ Kehati o tshila miṅwaha ya 133.

19 Vharwa vha Merari vho vha vhe Mahali na Mushi.

Heyi yo vha i miṱa ya Vhalevi, u ya nga vhubvo ha miṱa yavho.+

20 Amuramu a vhinga Yoxebeta, khaladzi a khotsi awe, uri a vhe mufumakadzi+ wawe. Nga murahu a mu bebela Aroni na Mushe.+ Amuramu o tshila miṅwaha ya 137.

21 Vharwa vha Isara vho vha vhe Kora,+ Nefege na Sikiri.

22 Vharwa vha Usiele vho vha vhe Misaele, Eletsafani+ na Sitiri.

23 Aroni a vhinga Eliseba, ṅwananyana wa Aminadaba, khaladzi a Nahashoni+ uri a vhe mufumakadzi wawe. Nga murahu a mu bebela Nadaba, Abihu, Eliasara na Ithamara.+

24 Vharwa vha Kora vho vha vhe Asiri, Elikana na Abiasafu.+ Heyi yo vha i yone miṱa ya Vhakora.+

25 Eliasara,+ murwa wa Aroni, a vhinga muṅwe wa vhananyana vha Putiele uri a vhe mufumakadzi wawe. Nga murahu a mu bebela Finiasi.+

Ndi vhone vharangaphanḓa vha miṱa ya vhokhotsi a Vhalevi, u ya nga miṱa yavho.+

26 Aroni na Mushe ndi vhone vhe Yehova a amba navho a ri: “Pfulusani vhathu vha Isiraele shangoni ḽa Egipita u ya nga zwigwada zwavho.”*+ 27 Ndi vhone vhe vha amba na Farao khosi ya Egipita, uri a litshe vhathu vha Isiraele vha ṱuwe Egipita. Vhenevha vho vha vhe Mushe na Aroni.+

28 Nga ḽeneḽo ḓuvha musi Yehova a tshi amba na Mushe shangoni ḽa Egipita, 29 Yehova o vhudza Mushe a ri: “Ndi nṋe Yehova. Vhudza Farao khosi ya Egipita zwoṱhe zwine nda khou u vhudza zwone.” 30 Mushe a amba na Yehova a ri: “A thi koni u amba zwavhuḓi, Farao u ḓo nthetshelesa hani?”+