Yesaya
58 “Vhidzelela u tou ṱavha mukosi; u songo litsha!
Takusa ipfi ḽau ḽi nge luṋanga.
U ḓivhadze vhathu vhanga nga ha vhushandukwa havho,+
Na vha nnḓu ya Yakobo u vha ḓivhadze zwivhi zwavho.
2 Vha nṱoḓa ḓuvha ḽiṅwe na ḽiṅwe,
Vha takalela u ḓivha nḓila dzanga,
Vha nga ndi lushaka lune lwa ita zwivhuya
Lu songo laṱaho khaṱhulo yo teaho ya Mudzimu walwo.+
Vha nkhumbela uri ndi haṱule nga nḓila yo lugaho,
Vha takalela u sendela tsini na Mudzimu,+ vha ri:
3 ‘Ndi ngani u sa zwi vhoni musi ri tshi ḓidzima zwiḽiwa?+
Ndi ngani u sa zwi ṱhogomeli musi ri tshi ḓitambudza?’+
Ndi ngauri nga ḓuvha ḽine na ḓidzima zwiḽiwa, ni ita zwine zwa ni takadza,
Na tsikeledza vhashumi vhaṋu.+
4 U ḓidzima haṋu zwiḽiwa zwi ita uri ni semane na u lwa,
Na rwana nga mavili lwa tshiṱuhu.
Ni nga si ḓidzime zwiḽiwa sa zwine na zwi ita ṋamusi, na ita uri ndi pfe ipfi ḽaṋu ndi ṱaḓulu.
5 Naa ndi hone u ḓidzima zwiḽiwa hune nṋe nda hu takalela,
Sa ḓuvha ḽine muthu a ḓitambudza ngaḽo,
A tshi kwatamisa ṱhoho sa muṱaṱe,
A tshi ita uri vhulalo hawe vhu vhe dzanganda na miḽora?
Naa zwenezwi ndi zwine wa zwi vhidza u ḓidzima zwiḽiwa na ḓuvha ḽi takadzaho Yehova?
6 Hai, u ḓidzima zwiḽiwa hune nda hu takalela ndi hohu:
U vhofholola ngeḓane dza vhuvhi,
U ṱhukhula thambo dza dzhogo,+
U vhofholola vho tsikeledzwaho,+
Na u vunḓa dzhogo iṅwe na iṅwe nga vhukati;
7 Ndi u kovhekana vhurotho na a re na nḓala,+
U ḓisa mushai na a si na haya nḓuni yau,
U ambadza a re fhedzi musi u tshi mu vhona,+
Na u sa shandukela wahau.
8 Tshedza tshau tshi ḓo penya sa maḓautsha,+
Na u fhodzwa hau hu ḓo ḓa nga u ṱavhanya.
Zwivhuya zwau zwi ḓo u ranga phanḓa,
Vhugala ha Yehova vhu ḓo u sala murahu.+
9 Ndi hone u tshi ḓo vhidzelela, Yehova a fhindula;
U ḓo lila u tshi ṱoḓa thuso, ene a ri, ‘Ndi fhano!’
Arali wa bvisa dzhogo i re vhukati hau
Wa litsha u sumbana nga minwe na u sasaladzana,+
10 Arali wa ṋea a re na nḓala zwine iwe wa tama+
Wa fusha vhane vha tambula,
Ndi hone tshedza tshau tshi tshi ḓo penya na swiswini,
Swiswi ḽau ḽi ḓo nga masiari.+
11 Yehova u ḓo dzula a tshi u livhisa
A u fusha na shangoni ḽo omaho;+
U ḓo khwaṱhisa marambo au,
Wa fana na tsimu yo sheledzwaho zwavhuḓi,+
Wa nga tshisima tshine maḓi atsho a si xe.
12 Vha ḓo fhaṱulula mashubi a kale vha tshi itela iwe,+
U ḓo vusulusa mitheo ya mirafho ya tshifhingani tsho fhiraho.+
U ḓo vhidzwa mufhaṱululi wa mbondo dzo kwashekanaho,+
Mulugisi wa nḓila dza hune ha dzulwa hone.
13 Arali wa litsha zwine zwa u takadza nga ḓuvha ḽanga ḽikhethwa ḽa Savhatha+
Wa amba uri Savhatha i a takadza vhukuma, ndi ḓuvha ḽikhethwa ḽa Yehova, ndi ḓuvha ḽine ḽa tea u huliswa,+
Wa ḽi hulisa nṱhani ha u ḓitakadza na u amba zwi si na mushumo,
14 Ndi hone u tshi ḓo takalela Yehova nga maanḓa,
Ndi ḓo ita uri u gonye thavha dza ḽifhasi.+