Yeremia

32 Yehova a amba na Yeremia nga ṅwaha wa vhu 10 hu tshi khou vhusa Khosi Tsedekia wa Yuda, wonoyo wo vha u ṅwaha wa vhu 18 wa musi hu tshi khou vhusa Nebukadanetsara.+ 2 Nga tshenetsho tshifhinga, mmbi dza khosi ya Babele dzo vha dzo tanga Yerusalema, muporofita Yeremia o vha o valelwa Muṱani wa Vhalindi+ vha nnḓu* ya khosi ya Yuda. 3 Ngauri Khosi Tsedekia o vha o mu valela,+ a tshi ri, “Ndi ngani u tshi porofita nga u rali? Wa ri, ‘Yehova u ri: “Ndi ḓo kumedzela uno muḓi zwanḓani zwa khosi ya Babele uri i u thube+ 4 na Khosi Tsedekia wa Yuda a nga si ponyoke kha Vhakalade⁠a, u ḓo kumedzelwa zwanḓani zwa khosi ya Babele, u ḓo amba nayo vho livhana zwifhaṱuwo.”’+ 5 ‘U ḓo dzhia Tsedekia a mu isa ngei Babele, a mu dzudza henengei u swika ndi tshi ḓivha zwine nda ḓo mu ita zwone,’ u ralo Yehova. ‘Naho wa lingedza u lwa na Vhakalade⁠a, a u nga kundi.’”+

6 Yeremia a ri: “Yehova o amba na nṋe a ri, 7 ‘Hanamiele murwa wa khotsimunene wau Shalumu, u ḓo ḓa a amba na iwe a ri: “Renga tsimu yanga i re ngei Anathothe,+ ngauri ndi iwe wa u thoma kha vhane vha vha na ndugelo ya u i rengulula.”’”+

8 Hanamiele ṅwana wa khotsimunene wanga a ḓa kha nṋe ndi Muṱani wa Vhalindi samusi Yehova o amba, a amba na nṋe a ri: “Ndi humbela uri u renge tsimu yanga i re ngei Anathothe shangoni ḽa Benyamini, ngauri ndi iwe ane a vha na ndugelo ya u i rengulula ya vha yau. Ḓirengele yone.” Musi ndi tshi pfa zwenezwo, nda zwi ḓivha uri ndi zwenezwiḽa zwe Yehova a amba.

9 Nda renga tsimu ya Hanamiele ṅwana wa khotsimunene wanga i re ngei Anathothe. Nda mu kalela tshelede,+ yeneyo tshelede yo vha i shekele* dza sumbe na shekele dza siḽiva dza fumi. 10 Nda zwi ṅwala kha ḽiṅwalwa ḽa thendelano,+ nda ḽi vhofha nda vhe⁠a luswayo,* nda vhidza dziṱhanzi,+ nda kala tshelede kha zwikalo. 11 Nda dzhia ḽeneḽo ḽiṅwalwa ḽa thendelano, ḽe ḽa vhofhiwa na u vhewa luswayo u tendelana na ndaela na ṱhoḓe⁠a dza mulayo, khathihi na ḽe ḽa vha ḽi songo swaiwa, 12 nda ṋe⁠a Baruki+ murwa wa Neria+ murwa wa Mahaseya ḽiṅwalwa ḽa thendelano, musi Hanamiele ṅwana wa khotsimunene wanga na ṱhanzi dze dza ṅwala ḽiṅwalwa ḽa thendelano na Vhayuda vhoṱhe vho dzulaho Muṱani wa Vhalindi vha tshi zwi vhona.+

13 Ndi hone ndi tshi laedza Baruki phanḓa havho, nda ri: 14 “Yehova wa mavhuthu Mudzimu wa Isiraele u ri, ‘Dzhia iḽi ḽiṅwalwa ḽa thendelano, ḽo vhofhiwaho na u vhewa luswayo na ḽi songo swaiwaho, u a dzhenise kha mudzio wa vumba uri a fhedze tshifhinga tshilapfu e hone.’ 15 Ngauri Yehova wa mavhuthu Mudzimu wa Isiraele u ri, ‘Kha heḽi shango hu ḓo dovha ha rengwa dzinnḓu na masimu khathihi na a minḓirivhe.’”+

16 Musi ndo no ṋe⁠a Baruki murwa wa Neria ḽiṅwalwa ḽa thendelano, nda rabela Yehova nda ri: 17 “Yehova Murena Muvhusahoṱhe. Wo sika ḽiṱaḓulu na ḽifhasi nga ma⁠anḓa au+ na nga tshanḓa tshau. A hu na tshine tsha u konḓela, 18 Iwe Ane a sumbedza lufuno lu sa shanduki kha vha zwigidi, fhedzi a lifhisa milandu ya vhokhotsi kha vharwa vhavho,+ iwe Mudzimu wa ngoho, muhulu na Wa ma⁠anḓa, ane dzina ḽawe a pfi Yehova wa mavhuthu. 19 U a kona u eletshedza na mishumo yau ndi ya ma⁠anḓa,+ iwe ane maṱo au a lavhelesa nḓila dzoṱhe dza vhathu,+ uri u lambedze muṅwe na muṅwe u ya nga nḓila dzawe na zwine a zwi ita.+ 20 Wo ita zwiga na vhuṱolo ngei shangoni ḽa Egipita zwine zwa kha ḓi ḓivhiwa u swika na ṋamusi, nga zwenezwo wa ḓiitela dzina ngei Isiraele na vhukati ha vhathu vhoṱhe,+ samusi zwo tou ralo na ṋamusi. 21 Wo bvisa vhathu vhau vha Isiraele ngei shangoni ḽa Egipita u tshi shumisa zwiga, vhuṱolo, tshanḓa tshau na ma⁠anḓa au na nga mishumo i ofhisaho.+

22 “Nga u ya ha tshifhinga wo vha ṋe⁠a ḽeneḽi shango ḽe wa anela vhomakhulukuku wavho uri u ḓo vha ṋe⁠a ḽone,+ shango ḽi elelaho mafhi na mutoli.+ 23 Vho ḓa vha ḽi dzhia vha dzula khaḽo, fhedzi a vho ngo thetshelesa u tshi amba kana u tevhela milayo yau. A vho ngo ita na tshithihi tshe wa vha laya, ndi ngazwo wo ita uri ene⁠a maṱungu oṱhe a vha wele.+ 24 Vhanna vho ḓa vha tanga wonoyu muḓi uri vha u thube,+ nga nṱhani ha banga,+ nḓala na dwadze,+ wonoyo muḓi u ḓo kumedzelwa zwanḓani zwa Vhakalade⁠a vhane vha khou lwa nawo; zwoṱhe zwe wa amba zwo ite⁠a, samusi u tshi khou zwi vhona. 25 Iwe Yehova Murena Muvhusahoṱhe wo mmbudza uri: ‘Bvisa tshelede u renge tsimu u vhidze dziṱhanzi,’ naho wonoyu muḓi u tshi ḓo kumedzelwa zwanḓani zwa Vhakalade⁠a.”

26 Ndi hone Yehova a tshi amba na Yeremia a ri: 27 “Ndi nṋe Yehova, Mudzimu wa vhathu vhoṱhe.* Na⁠a hu na tshine tsha nkonḓela? 28 Ndi hone Yehova a tshi ri: ‘Ndi khou kumedzela wonoyu muḓi kha Vhakalade⁠a na zwanḓani zwa Khosi Nebukadanetsara wa Babele, u ḓo u thuba.+ 29 Na Vhakalade⁠a vhane vha khou lwa na wonoyu muḓi vha ḓo ḓa vha u fhisa+ khathihi na u fhisa nnḓu dzine vhathu vha ṋekedza Ba⁠ali zwiṱhavhelo vhe nṱha ha ṱhanga dzadzo na u shululela miṅwe midzimu zwifhiwa zwa u nwiwa uri vha ntsinyuse.’+

30 “‘Ngauri vhathu vha Isiraele na vha Yuda vho ita zwi sa ntakadzi, u bva vhuṱukuni havho;+ vhathu vha Isiraele vha bvela phanḓa vha tshi ntsinyusa nga mishumo ya zwanḓa zwavho,’ u ralo Yehova. 31 ‘Ngauri u bva nga ḓuvha ḽe vha fhaṱa hoyu muḓi u swika na ṋamusi, wo vha u tshi ita uri ndi sinyuwe,+ lwe zwa ita uri u fheliswe phanḓa hanga,+ 32 nga nṱhani ha vhuvhi hoṱhe he vhathu vha Isiraele na vha Yuda vha vhu ita u itela u ntsinyusa, vhone, mahosi avho,+ vhakololo vhavho,+ vhotshifhe vhavho, vhaporofita vhavho,+ vhanna vha Yuda na vhadzulapo vha Yerusalema. 33 Vho bvela phanḓa vha tshi mpfuralela, vha si ntsedze;+ naho ndo lingedza u vha funza lunzhi-lunzhi, fhedzi a hu na na muthihi wavho we a nthetshelesa ndi tshi mu kaidza.+ 34 Vho vhe⁠a midzimu yavho ya zwifanyiso i nengisaho nḓuni ine ya vhidzwa nga dzina ḽanga, uri vha tshikafhadze yeneyo nnḓu.+ 35 Zwiṅwe hafhu, vho fhaṱa fhethu ha vhurabeli ha Ba⁠ali ngei Govhani ḽa Murwa wa Hinomi,*+ uri vha pose vharwa vhavho na vhananyana vhavho muliloni vha tshi itela Molexo+ tshiṱhavhelo, zwithu zwe ndi si vha laye,+ zwi sa athu u vhuya zwa ḓa muhumbuloni wanga* uri ndi ite zwithu zwo raloho zwi nengisaho, zwe zwa ita uri Yuda a ite tshivhi.’

36 “Zwe Yehova Mudzimu wa Isiraele a zwi amba nga ha muḓi une iwe wa khou amba uri u ḓo kumedzelwa zwanḓani zwa khosi ya Babele nga banga, nḓala na dwadze, ndi hezwi, 37 ‘Ndi ḓo vha kuvhanganya vha tshi bva kha mashango oṱhe e nda vha balanganyela khao ndo sinyuwa ndo halifha,+ ndi ḓo vha vhuisa henefha fhethu na u ita uri vha dzule vho tsireledze⁠a.+ 38 Vha ḓo vha vhathu vhanga, nṋe nda vha Mudzimu wavho.+ 39 Ndi ḓo ita uri vha vhe vhathihi,+ vha ite zwi fanaho uri vha dzule vha tshi nnyofha, uri zwi vhuyedze vhone na vhana vhavho.+ 40 Ndi ḓo vhofha navho mulanga wa lini na lini,+ wa uri a thi nga litshi u vha itela zwivhuya;+ ndi ḓo ita uri vha nnyofhe mbiluni dzavho, uri vha si ntshandukele.+ 41 Ndi ḓo takalela u vha itela zwivhuya,+ ndi ḓo ita uri vha dzule kha ḽeneḽi shango,+ nga mbilu yanga yoṱhe na nga nungo dzanga dzoṱhe.’”

42 “Yehova u ri, ‘Samusi ndo ita uri vhenevha vhathu vha welwe nga maṱungu mahulu, ndi ḓo dovha hafhu nda ita uri vha wane zwivhuya* zwoṱhe zwine nda khou vha fhulufhedzisa zwone.+ 43 Hu ḓo dovha ha rengwa masimu kha ḽeneḽi shango,+ naho ni tshi ri: “Ndi soga ḽi si na vhathu na zwivhanda, ḽo kumedzelwa zwanḓani zwa Vhakalade⁠a.”’

44 “‘Masimu a ḓo rengwa nga tshelede, maṅwalwa a thendelano a ḓo ṅwaliwa na ḽo vhofhiwaho na u vhewa luswayo, ṱhanzi dzi ḓo vhidzwa ngei Benyamini+ na tsini, u mona na Yerusalema na miḓini ya Yuda+ na miḓini i re dzinguni ḽa dzithavha na miḓini i re midavhini+ na miḓi i re tshipembe, ngauri ndi ḓo vhuisa mathubwa avho,’+ u ralo Yehova.”