Levitiko

4 Yehova a amba na Mushe a ri: 2 “Vhudza Vhaisiraele u ri: ‘Arali muthu o ita zwivhi a songo ḓiimisela+ nga u ita zwithu naho zwi zwifhio zwe Yehova a laya uri zwi songo itwa:

3 “‘Arali tshifhe o ḓodzwaho+ a ita tshivhi,+ a ḓisela vhathu mulandu, a ḓisele Yehova mbohwana i sa lwaliho sa tshifhiwa tsha u pfumelela tshivhi a tshi itela tshivhi tshe a tshi ita.+ 4 A ḓise yeneyo mboho muṋangoni wa dennde ḽa muṱangano+ phanḓa ha Yehova a vhee tshanḓa tshawe kha ṱhoho ya mboho, a ṱhavhe yeneyo mboho phanḓa ha Yehova.+ 5 Tshifhe o ḓodzwaho+ u ḓo dzhia maṅwe a malofha a mboho a a ḓisa denndeni ḽa muṱangano; 6 tshifhe u ḓo dzhenisa munwe wawe kha malofha,+ a hasha maṅwe a malofha lwa sumbe+ phanḓa ha Yehova phanḓa ha khetheni ḽa fhethu hukhethwa. 7 Tshifhe u ḓo dovha a ḓodza maṅwe a malofha kha ṋanga dza aḽeṱare ya zwioro zwi nukhelelaho,+ zwine zwa vha phanḓa ha Yehova denndeni ḽa muṱangano; u ḓo shululela maṅwe malofha oṱhe a mboho fhasi phanḓa ha aḽeṱare ya tshifhiwa tsha u fhiswa,+ ine ya vha muṋangoni wa dennde ḽa muṱangano.

8 “‘Nga murahu ha zwenezwo, u ḓo bvisa mapfura oṱhe a mboho ya tshifhiwa tsha u pfumelela tshivhi, u katela na mapfura o putelaho mala na mapfura a re kha mala, 9 na tswio mbili dzi re na mapfura tsini na zwizwa. U ḓo bvisa mapfura a re kha tshivhindi na tswio.+ 10 Kha mboho hu bviswe zwine zwa bviswa kha tshiṱhavhelo tsha u pfumedzana.+ Tshifhe u ḓo zwi dubisa kha aḽeṱare ya tshifhiwa tsha u fhiswa.

11 “‘Fhedzi mukumba wa mboho na ṋama yayo yoṱhe khathihi na ṱhoho yayo, khwanḓa dzayo, mala ayo, muswane wayo,+ 12 zwine zwa vha mboho yoṱhe, a ita uri zwi iswe nnḓa ha madennde fhethu ho kunaho hune ha tevhulwa hone miḽora,* u ḓo i fhisa muliloni nga khuni.+ I fanela u fhiswa hune miḽora ya tevhulwa hone.

13 “‘Arali tshitshavha tshoṱhe tsha Isiraele tsha vha na mulandu nga u ita tshivhi tshi songo ḓiimisela,+ fhedzi tshi sa zwi ḓivhi uri tsho ita zwiṅwe zwithu zwe Yehova a tshi laya uri tshi si zwi ite,+ 14 tshivhi tsha ḓivhea, tshivhidzo tshi ḓise mbohwana ya tshifhiwa tsha u pfumelela tshivhi phanḓa ha dennde ḽa muṱangano. 15 Vhahulwane vha tshitshavha vha ḓo vhea zwanḓa zwavho kha ṱhoho ya yeneyo mbohwana phanḓa ha Yehova, i ḓo ṱhavhiwa phanḓa ha Yehova.

16 “‘Nga murahu ha zwenezwo, tshifhe o ḓodzwaho u ḓo ḓisa maṅwe a malofha a yeneyo mbohwana denndeni ḽa muṱangano. 17 Tshifhe u ḓo dzhenisa munwe wawe kha malofha, a hasha maṅwe a malofha lwa sumbe phanḓa ha Yehova phanḓa ha khetheni.+ 18 A ḓodze maṅwe a malofha kha ṋanga dza aḽeṱare+ phanḓa ha Yehova, hune ha vha denndeni ḽa muṱangano; a shululele malofha oṱhe fhasi phanḓa ha aḽeṱare ya tshifhiwa tsha u fhiswa, ine ya vha muṋangoni wa dennde ḽa muṱangano.+ 19 A bvise mapfura ayo oṱhe, a a dubise kha aḽeṱare.+ 20 Kha yeneyo mbohwana u fanela u ita zwi fanaho na zwe a ita kha mbohwana ya tshifhiwa tsha u pfumelela tshivhi. A zwi ite nga u ralo, tshifhe u ḓo vha itela tshipfumelelo,+ vha hangwelwa. 21 A ise yeneyo mbohwana nnḓa ha madennde a i fhise, u fana na musi a tshi fhisa mbohwana ya u thoma.+ Ndi tshifhiwa tsha u pfumelela tshivhi tsha tshivhidzo.+

22 “‘Musi murangaphanḓa+ o ita tshivhi a songo ḓiimisela nga u ita tshiṅwe tsha zwoṱhe zwe Yehova Mudzimu wawe a ri tshi songo itwa, a vha na mulandu, 23 kana a ṱhogomela uri o ita tshivhi nga u pfuka iṅwe ndaela, a ḓise tshibokoṱo sa tshifhiwa tshawe. 24 A vhee tshanḓa tshawe kha ṱhoho ya tshibokoṱo, a tshi ṱhavhe hune tshifhiwa tsha u fhiswa tsha anzela u ṱhavhiwa hone phanḓa ha Yehova.+ Ndi tshifhiwa tsha u pfumelela tshivhi. 25 Tshifhe a dzhie maṅwe a malofha a tshifhiwa tsha u pfumelela tshivhi nga munwe wawe, a a ḓodze kha ṋanga+ dza aḽeṱare ya tshifhiwa tsha u fhiswa, a shululele maṅwe malofha oṱhe fhasi phanḓa ha aḽeṱare ya tshifhiwa tsha u fhiswa.+ 26 A fhise mapfura atsho oṱhe kha aḽeṱare u fana na zwe a ita kha mapfura a tshiṱhavhelo tsha u pfumedzana;+ tshifhe u ḓo mu pfumelela tshivhi tshawe, u ḓo hangwelwa.

27 “‘Arali muṅwe wa ḽeneḽo shango a ita zwivhi a songo ḓiimisela, a vha na mulandu nga u ita tshiṅwe tsha zwithu zwe Yehova a laya uri zwi songo itwa,+ 28 kana a ṱhogomela uri o ita tshivhi nga u pfuka iṅwe ndaela, a ḓise tshifhiwa tsha mbudzi ya tsadzi i sa lwaliho, u itela tshivhi tshe a tshi ita. 29 A vhee tshanḓa tshawe kha ṱhoho ya tshifhiwa tsha u pfumelela tshivhi, a tshi ṱhavhe fhethu hune ha ṱhavhiwa hone tshifhiwa tsha u fhiswa.+ 30 Tshifhe u ḓo dzhia maṅwe a malofha ayo nga munwe wawe a a ḓodza kha ṋanga dza aḽeṱare ya tshifhiwa tsha u fhiswa, u ḓo shululela malofha ayo oṱhe fhasi phanḓa ha aḽeṱare.+ 31 A bvise mapfura+ atsho oṱhe, u fana na musi a tshi bviswa kha tshiṱhavhelo tsha u pfumedzana;+ tshifhe u ḓo tshi dubisa kha aḽeṱare uri tshi nukhelele kha Yehova; tshifhe u ḓo pfumelela tshivhi tshawe, u ḓo hangwelwa.

32 “‘Fhedzi arali a ḓisa tshifhiwa tsha u pfumelela tshivhi tsha ngwana, a ḓise ngwana ya tsadzi i sa lwaliho. 33 A vhee tshanḓa tshawe kha ṱhoho ya tshifhiwa tsha u pfumelela tshivhi a tshi ṱhavhe sa tshifhiwa tsha u pfumelela tshivhi fhethu hune ha ṱhavhiwa+ tshifhiwa tsha u fhiswa. 34 Tshifhe u ḓo dzhia maṅwe a malofha a tshifhiwa tsha u pfumelela tshivhi nga munwe wawe a a ḓodza kha ṋanga dza aḽeṱare ya tshifhiwa tsha u fhiswa,+ a shululele malofha atsho oṱhe fhasi phanḓa ha aḽeṱare. 35 A bvise mapfura atsho oṱhe nga nḓila i fanaho na ine ha bviswa mapfura kha thutha ya tshiṱhavhelo tsha u pfumedzana, tshifhe u ḓo tshi dubisa kha aḽeṱare nṱha ha zwifhiwa zwine zwa fhiselwa Yehova;+ tshifhe u ḓo mu itela tshipfumelelo tsha zwivhi zwe a ita, u ḓo hangwelwa.+