Nahumi
1 Heyi ndi khaṱhulo i yaho Ninive,+ i re buguni ya bono ḽa Nahumi* wa Muelikosi, i ri:
2 Yehova ndi Mudzimu ane a lifhedza na ane a ṱoḓa hu tshi gwadamelwa ene fhedzi;+
Yehova u a lifhedza, u dzula o lugela u sumbedza mbiti dzawe.+
Yehova u lifhedza maswina awe,
Maswina awe u a vhetshela mbiti dzawe.
3 Yehova u a lenga u sinyuwa,+ u na maanḓa mahulu,+
Fhedzi Yehova a nga si litshe u pfisa vhuṱungu arali zwo tea.+
Musi a tshi tshimbila hu vhudzula muya muhulu na ḓumbu,
Na buse ḽi re milenzheni yawe ḽi ya nṱha sa makole.+
Ḽa Bashani na ḽa Karamele ḽa puta,+
Na maluvha a Libanoni a a puta.
5 Thavha dzi a dzinginyea nga nṱhani hawe,
Zwikwara zwa ṋoka.+
Ḽifhasi ḽi ḓo dzinginyea nga nṱhani ha tshifhaṱuwo tshawe,
U katela na shango na vhoṱhe vha dzulaho khaḽo.+
6 Musi o sinyuwa, ndi nnyi ane a nga ima phanḓa hawe?+
Ndi nnyi ane a nga konḓelela mbiti dzawe?+
Mbiti dzawe dzi ḓo shululwa sa mulilo,
Matombo a ḓo kwashekana nga nṱhani hawe.
7 Yehova ndi wavhuḓi,+ ndi vhushavhelo nga ḓuvha ḽa khombo.+
U ṱhogomela* vhane vha ṱoḓa u khuda ngae.+
8 U ḓo fhelisa fhethu hawe* lwa tshoṱhe nga muḓalo wa maḓi,
Maswina awe a ḓo pandamedzwa nga swiswi.
9 Ndi tshifhio tshikwekwe tshine wa nga tshi itela Yehova?
U khou fhelisa lwa tshoṱhe.
Khombo a i tsha ḓo dovha ya vha hone.+
10 Ngauri vho tsitsikana sa mipfa,
Vha nga vho kambiwaho nga halwa;
Fhedzi vha ḓo fhiswa sa maṱanga o omaho.
11 Kha iwe hu ḓo vha na ane a itela Yehova vhukwila,
A eletshedzaho zwi si na mushumo.
12 Yehova u ri:
“Naho vho vha vhe na maanḓa vhe vhanzhi,
Vha ḓo fheliswa vha si tsha vha hone.
Ndo u* pfisa vhuṱungu, fhedzi a thi tsha ḓo dovha nda u pfisa vhuṱungu.
13 Ndi ḓo vunḓa dzhogo ye a u hwesa yone,+
Nda ṱhukhula na ngeḓane ye a u vhofha ngayo.
14 Yehova o amba zwi tevhelaho nga ha iwe,*
‘Dzina ḽau a ḽi tsha ḓo vha hone lwa tshoṱhe.
Ndi ḓo fhelisa zwifanyiso zwo vhaḓiwaho na zwa tsimbi zwi re nḓuni* ya midzimu yau.
Ndi ḓo u bwela vhiḓa, ngauri u a nengisa.’
15 Vhonani milenzhe ya a re thavhani ya ane a ḓisa mafhungo maḓifha,
Ane a huwelela nga ha mulalo.+
Iwe Yuda, ita vhuṱambo hau,+ u ite zwe wa ana,
Vhathu vhavhi vha nga si tsha dovha vha u ṱhasela.
Vha ḓo fheliswa.”