Evangeli Ya Marko

15 Nga u ṱavhanya nga maḓautsha, vhahulwane vha vhotshifhe na vhahulwane na vhamaṅwalo na vha Sanihedrini,* vha langana, vha vhofha Yesu vha mu isa kha Pilato.+ 2 Pilato a mu vhudzisa a ri: “Naa u Khosi ya Vhayuda?”+ Yesu a ri: “Ndi iwe ane a khou zwi amba.”+ 3 Fhedzi vhahulwane vha vhotshifhe vho vha vha tshi khou mu pomoka zwithu zwinzhi. 4 Pilato a dovha a mu vhudzisa a ri: “Naa a u fhinduli?+ Ipfa uri ndi milandu mingana ine vha khou u pomoka yone.”+ 5 Yesu a si fhindule, zwa ita uri Pilato a mangale.+

6 Nga vhuṱambo vhuṅwe na vhuṅwe, Pilato o vha a tshi bvisa muthu muthihi dzhele, we vhathu vha vha vha tshi ṱoḓa uri a bvisiwe.+ 7 Nga tshenetsho tshifhinga, ho vha hu na vhaṅwe vhanna vho farwaho nge vha lwa na muvhuso na u vhulaya vhathu, muṅwe wavho o vha e Baraba. 8 Ngauralo, vhathu vha ḓa vha humbela Pilato uri a vha itele zwe a vha a tshi vha itela. 9 A vhudzisa a ri: “Ni ṱoḓa ndi tshi vhofholola Khosi ya Vhayuda?”+ 10 Pilato o vha a tshi zwi ḓivha uri vhahulwane vha vhotshifhe vho kumedzela Yesu vha tshi khou itiswa nga vivho.+ 11 Fhedzi vhahulwane vha vhotshifhe vha ṱuṱuwedza vhathu uri vha ambe uri hu vhofhololwe Baraba.+ 12 Pilato a dovha a ri: “Ndi ite mini nga uyu ane na mu vhidza Khosi ya Vhayuda?”+ 13 Vha dovha vha ṱavha mukosi vha ri: “Kha ombelwe kha danda!”*+ 14 Fhedzi Pilato a ri: “Ndi ngani? O tshinya mini?” Vha tou ṋaṋa u ṱavha mukosi vha ri: “Kha ombelwe kha danda!”*+ 15 Musi Pilato a tshi ṱoḓa u takadza vhathu, a vhofholola Baraba, nga murahu a laedza uri Yesu a rwiwe,+ a mu kumedzela kha maswole uri a mu ombele kha danda.+

16 Maswole a isa Yesu muṱani wa nnḓu ya muvhusi, a vhidza tshigwada tshoṱhe tsha maswole tsha kuvhangana.+ 17 Maswole a mu ambadza tshiambaro tsha phephulu, a luka khare ya mipfa a mu ambadza kha ṱhoho; 18 a mu lumelisa a ri: “Ri a vusa, iwe Khosi ya Vhayuda!”+ 19 O vha a tshi khou mu rwa nga luṱanga kha ṱhoho na u mu pfela mare, a gwadama a mu losha. 20 Musi o no fhedza u mu goḓa, a mu bvula tshiḽa tshiambaro tsha phephulu, a mu ambadza zwiambaro zwawe. A ṱuwa nae uri a ye a mu ombele kha danda.+ 21 A kombetshedza muṅwe munna we a vha a tshi khou fhira, ane a pfi Simoni wa Kirene, khotsi a Alekzanda na Rufo, we a vha a tshi khou bva tsimuni, uri a hwale danda* ḽine Yesu a ḓo ombelwa khaḽo.+

22 Eneo maswole a mu isa fhethu hune ha pfi Golgotha, zwine zwa amba uri “Dethele.”+ 23 A mu ṋea waini yo ṱanganyiswaho na mira,*+ fhedzi a hana u nwa. 24 A mu ombela kha danda, a kovhekana zwiambaro zwawe nga u ita madeṅwa uri a ḓivhe uri ndi nnyi ane a dzhia tshifhio.+ 25 Ho vha hu nga awara ya vhuraru* musi a tshi mu ombela kha danda. 26 Nga nṱha ha ṱhoho yawe ho vha ho ombelwa luṅwalo lu re na mulandu une a khou pomokwa wone une wa ri: “Khosi ya Vhayuda.”+ 27 O mu ombela vhukati ha mavemu mavhili, ḽiṅwe ḽi nga thungo ya tshanḓa tsha u ḽa ḽiṅwe kha tsha monde.+ 28* —— 29 Vha fhiraho vha mu sema, vha dzungudza ṱhoho+ vha ri: “Koṱo! Iwe we wa ri u ḓo thutha thembele wa i fhaṱa nga maḓuvha mararu,+ 30 ḓitshidze nga u tsa kha danda.”* 31 Vhamaṅwalo na vhahulwane vha vhotshifhe na vhone vha mu goḓa vha ri: “O tshidza vhaṅwe, fhedzi ha koni u ḓitshidza!+ 32 Kristo Khosi ya Vhaisiraele, nga a tse kha danda,* uri ri zwi vhone ri tende.”+ Na vho ombelwaho tsini nae vho vha vha tshi khou mu sema.+

33 Nga awara ya vhurathi,* ha vha na swiswi ḽihulu kha ḽeneḽo shango, u swika nga awara ya vhuṱahe.*+ 34 Nga awara ya vhuṱahe, Yesu a vhidzelela nga ipfi ḽihulu a ri: “Eli, Eli, lama sabaxtani?” zwine zwa amba uri, “Mudzimu wanga, Mudzimu wanga, ndi ngani wo nṱutshela?”+ 35 Vhaṅwe vho imaho henefho, vha tshi pfa zwenezwo vha ri: “Ipfani, u khou vhidzelela Elia.” 36 Fhedzi muṅwe munna a gidima a dzhia tshipontshi a tshi mbwandamedza kha waini i dungaho, a tshi ṱoma kha luṱanga a tshi ṋea Yesu uri a nwe,+ a ri: “Mu litsheni! Kha ri vhone arali Elia a tshi ḓo ḓa a mu tsitsa.” 37 Yesu a ṱavha mukosi, a fa.+ 38 Khetheni ḽe ḽa vha ḽi nḓuni khethwa+ ḽa kheruwa nga vhukati, u bva nṱha u ya fhasi.+ 39 Musi muhulwane wa maswole we a vha o ima tsini nae a tshi vhona zwe zwa itea musi a tshi fa, a ri: “Ngangoho o vha e Murwa wa Mudzimu.”+

40 Ho vha hu na vhaṅwe vhafumakadzi vho lavhelesaho vhe kulenyana, vhaṅwe vhavho hu Maria Magdalena, Maria mme a Yakobo* na Yose; na Salome o vha e henefho,+ 41 vhenevho vho tshimbila na Yesu na u mu ṱhogomela+ musi e Galilea, na vhaṅwe vhafumakadzi vhanzhi vhe vha ya nae Yerusalema vho vha vhe henefho.

42 Samusi ḽo vha ḽi ḓuvha ḽa u Lugiselela, musi ḽi tshi vho kovhela, hu tshi tou pfi Savhatha ndi ya matshelo, 43 ha ḓa muṅwe munna ane a pfi Yosefa wa Arimathia, muraḓo wa Khothe Khulwane ya Vhayuda a ḓivheaho, we a vha o lindela Muvhuso wa Mudzimu. A vha na tshivhindi a ya kha Pilato, a humbela tshitumbu tsha Yesu.+ 44 Fhedzi Pilato o vha a tshi khou ḓivhudzisa arali Yesu o no fa, a vhidza muhulwane wa maswole a mu vhudzisa. 45 Musi a tshi pfa uri o fa, a tendela Yosefa a tshi dzhia tshitumbu. 46 Musi o no renga labi ḽavhuḓi ḽa ḽinene na u tsitsa tshitumbu, a tshi putela nga ḽeneḽo labi, a tshi vhulunga vhiḓani+ ḽe ḽa vha ḽo koriwa kha tombo, a vala muṋango wa vhiḓa nga tombo.+ 47 Fhedzi Maria Magdalena na Maria mme a Yose vha dzula vho lavhelesa he a vha o vhewa hone.+