Mishumo Ya Vhaapostola

6 Misini yeneyo, musi vhafunziwa vha tshi khou ḓi engedzea vha tshi ya, Vhayuda vha ambaho Tshigerika vha gungulela Vhayuda vha ambaho Tshihevheru, ngauri tshilikadzi dzavho dzo vha dzi tshi khou dzimiwa mukovhe wa ḓuvha ḽiṅwe na ḽiṅwe.+ 2 Vhaapostola vha 12 vha kuvhanganya vhafunziwa vhoṱhe vha ri: “A zwo ngo tea* uri riṋe ri litshe mushumo wa u funza ipfi ḽa Mudzimu ri kovhele vhathu zwiḽiwa.+ 3 Vhahashu, nangani vhanna vha sumbe vha fhulufhedzeaho,*+ vhane vha vha na muya mukhethwa na vhuṱali,+ uri ri vha ṋee wonoyu mushumo wa ndeme;+ 4 riṋe ri ḓo bvela phanḓa na u rabela na u funza ipfi ḽa Mudzimu.” 5 Eneo mafhungo a takadza vhafunziwa vhoṱhe, vha nanga Stefano, we a vha e na lutendo lwo khwaṱhaho na muya mukhethwa, na Filipo,+ Poroxoro, Nikanoro, Timoni, Paramena na Nikolao a bvaho Antiokia, we a rembulutshela kha vhurereli ha Tshiyuda. 6 Vha vha ḓisa kha vhaapostola, vha rabela vha vha vhea zwanḓa.+

7 Ipfi ḽa Mudzimu ḽa phaḓalala,+ vhafunziwa vha bvela phanḓa vha tshi vha vhanzhi+ ngei Yerusalema; vhotshifhe vhanzhi vha vha vhatendi.+

8 Stefano we a vha a tshi takalelwa vhukuma nga Mudzimu, e na maanḓa, o vha a tshi khou ita zwithu zwihulu zwi mangadzaho na vhuṱolo vhathuni. 9 Fhedzi ha ḓa vhaṅwe vhanna vha Sinagogoni ya vho Vhofhololwaho, na vhaṅwe vhanna vha Vhakirene, Vhaalekzandria, na vha bvaho Kilikia na Asia, uri vha pikise Stefano. 10 Fhedzi a vho ngo kona u hanedza Stefano ngauri o vha a tshi amba nga vhuṱali a tshi khou thuswa nga muya mukhethwa.+ 11 Vha ṱuṱuwedza vhaṅwe vhanna tshiphirini uri vha zwifhe vha ri: “Ro pfa a tshi khou sema Mushe na Mudzimu.” 12 Vha ṱuṱuwedza na vhathu, vhahulwane na vhamaṅwalo, vha ḓa nga u ṱavhanya vha mu fara, vha mu isa Sanihedrini.* 13 Vha ḓisa ṱhanzi dza mazwifhi, dza ri: “Hoyu munna u dzula a tshi sema hafha fhethu hukhethwa na Mulayo. 14 Ro pfa a tshi amba uri Yesu wa Nazaretha u ḓo thutha hafha fhethu, a shandula milayo ye Mushe a ri ṋea yone.”

15 Musi vhathu vhoṱhe vho dzulaho Sanihedrini vha tshi mu lavhelesa, vha vhona tshifhaṱuwo tshawe tshi tshi nga tsha muruṅwa.