Kha Vharoma
2 Arali u tshi haṱula vhaṅwe, a hu na tshine wa nga ḓiimelela ngatsho, hu sa londwi uri u nnyi;+ ngauri u tshi haṱula muṅwe na iwe u khou ḓihaṱula, ngauri na iwe ane wa haṱula u ita zwenezwo zwithu.+ 2 Ri a zwi ḓivha uri Mudzimu u haṱula zwo tea vhane vha ita zwenezwo zwithu, na uri khaṱhulo yawe i tshimbidzana na ngoho.
3 Naa u vhona u nga u ḓo ponyoka khaṱhulo ya Mudzimu arali u tshi haṱula vhane vha ita zwithu zwine na iwe wa zwi ita? 4 Naa u khou nyadza vhuthu hawe vhuhulu,+ u konḓelela hawe+ na u sa fhela hawe mbilu?+ Naa a u ḓivhi uri Mudzimu, nga vhuthu hawe u lingedza uri u rembuluwe?+ 5 Fhedzi nga nṱhani ha u rindila na u sa rembuluwa, u khou ḓiengedzela mbiti dzine wa ḓo dzi vhona nga ḓuvha ḽa u dzumbululwa ha khaṱhulo yo lugaho ya Mudzimu.+ 6 Mudzimu u ḓo ṋea muṅwe na muṅwe u ya nga mishumo yawe:+ 7 vhutshilo vhu sa fheli kha vhane vha ṱoḓa vhugala, u huliswa na u sa sina+ nga u konḓelela kha mishumo mivhuya; 8 fhedzi u ḓo sinyutshela+ vhane vha ṱaṱa khani, vha sa thetshelesi ngoho, vha thetshelesaho zwi songo lugaho. 9 Vhathu vhoṱhe vhane vha ita vhuvhi vha ḓo tsikeledzea na u pfa vhuṱungu, hu ḓo thoma Vhayuda ha tevhela Vhagerika; 10 fhedzi vhane vha ita zwivhuya vha ḓo wana vhugala, u huliswa na mulalo, hu ḓo thoma Vhayuda+ ha tevhela Vhagerika.+ 11 Ngauri Mudzimu ha ṱaluli.+
12 Vhoṱhe vho itaho tshivhi vha sa ḓivhi mulayo,+ vha ḓo lovha naho vha sa ḓivhi mulayo; fhedzi vhoṱhe vhe vha ita tshivhi vha tshi ḓivha mulayo, vha ḓo haṱulwa nga mulayo.+ 13 Ngauri vhane vha pfa mulayo a si vhone vho lugaho phanḓa ha Mudzimu, fhedzi vhane vha tevhedza mulayo ndi vhone vhane vha ḓo vhidzwa vho lugaho.+ 14 Musi vha dzitshaka vha tshi tevhedza mulayo naho vha sa ḓivhi mulayo,+ zwenezwi zwi sumbedza uri vha na mulayo mbiluni dzavho. 15 Ndi vhone vhane vha sumbedza uri mulayo wo ṅwaliwa mbiluni dzavho, na luvalo lwavho lu vha vhudza arali zwine vha khou zwi ita zwo luga kana zwo khakhea, vha kona u ḓivha arali vha na mulandu kana vha si na. 16 Zwenezwi zwi ḓo itea nga ḓuvha ḽine Mudzimu a ḓo shumisa Kristo Yesu u itela u haṱula zwiphiri zwa vhathu,+ u ya nga mafhungo maḓifha ane nda a huwelela.
17 Arali u Muyuda+ u tshi ḓitika nga mulayo, u tshi ḓihudza nga u vha na vhushaka na Mudzimu, 18 u tshi ḓivha zwine a zwi funa na u ṱhogomela zwithu zwa ndeme vhunga wo funzwa Mulayo;+ 19 u tshi amba u sa timatimi uri ndi tshimbidza vha sa vhoni, ndi tshedza tsha vha re swiswini, 20 ndi khakhulula vho tsilufhalaho, ndi funza vhana, ndi ḓivha zwithu zwa mutheo na ngoho i re Mulayoni, 21 iwe ane wa funza muṅwe, khezwi u sa ḓifunzi?+ Iwe ane wa vhudza muṅwe wa ri, “U songo tswa,”+ naa u a tswa? 22 Iwe ane wa ri, “U songo vha phombwe,”+ naa u phombwe? Iwe ane wa nengwa zwifanyiso, naa u a tswa zwi re thembeleni? 23 Iwe ane wa ḓihudza ngauri u a ḓivha Mulayo, ndi ngani u tshi nyadzisa Mudzimu nga u pfuka Mulayo? 24 Ngauri ho ṅwaliwa ha pfi “dzina ḽa Mudzimu ḽi khou semiwa vhukati ha vha dzitshaka nga nṱhani haṋu.”+
25 U fumba+ hu a vhuyedza arali u tshi tevhedza mulayo;+ fhedzi arali u tshi pfuka mulayo, naho wo fumba zwi fana na musi u songo fumba. 26 Arali muthu a songo fumbaho+ a tshi tevhedza Mulayo, Mudzimu u ḓo mu dzhia o fumba.+ 27 A songo fumbaho u ḓo u haṱula nga u tevhedza Mulayo, ngauri iwe u mupfuki wa mulayo naho u tshi ḓivha mulayo, wo fumba. 28 Ngauri Muyuda a si ane a vhonala nga nnḓa,+ na u fumba a si hune ha itwa kha muvhili.+ 29 Fhedzi ndi ane a vha Muyuda nga ngomu,+ u fumba hawe ndi ha mbiluni,+ a ho ngo ṅwaliwa mulayoni.+ Ha rendwi nga vhathu, fhedzi u rendwa nga Mudzimu.+