Vhurifhi Ha Vhuvhili Vhu Yaho Kha Vhakorinta

13 Holwu ndi lwa vhuraru ndi tshi ḓa kha inwi. “Mafhungo oṱhe a tea u khwaṱhiswa nga ṱhanzi mbili kana tharu.”+ 2 Naho ndi siho henefho, ndi pfa u nga ndo no vha henefho. Ndi ngazwo ndi tshi amba na inwi noṱhe na vhe vha ita tshivhi vhukati haṋu uri musi ndi tshi ḓa, ndi nga si khathutshele vhane vha khou ita zwithu zwo khakheaho. 3 Nga u ita zwenezwi ndi ḓo ni sumbedza uri Kristo u amba a tshi shumisa nṋe. Kristo ha shayi nungo musi a tshi shumisana na inwi, fhedzi u sumbedza uri u na maanḓa. 4 O ombelwa kha danda nga nṱhani ha u shaya nungo, fhedzi u a tshila nga nṱhani ha maanḓa a Mudzimu.+ Na riṋe ri a shaya nungo samusi nae o shaya nungo, fhedzi ri ḓo tshila khathihi nae+ ngauri ri na maanḓa a Mudzimu.+

5 Ni dzule ni tshi ḓiṱolisisa uri ni vhone arali lutendo lwaṋu lu tshee lwo khwaṱha, ni dzule ni tshi sumbedza zwine na vha zwone.+ Kani a ni zwi ḓivhi uri Yesu Kristo u na vhuthihi na inwi? Nga nnḓa ha musi ni sa takalelwi. 6 Ndi ṱoḓa ni tshi ḓivha uri ri takalelwa nga Mudzimu.

7 Ri rabela Mudzimu uri ni sa ite zwo khakheaho, hu si uri riṋe ri vhonale ri tshi takalelwa. Ri ṱoḓa ni tshi ita zwo lugaho, naho riṋe ri sa takalelwi. 8 Ngauri a hu na tshine ra nga ita tshi lwisanaho na ngoho, fhedzi ri tikedza ngoho. 9 Ri a takala musi ni na maanḓa naho riṋe ri tshi shaya nungo. Zwine ra zwi rabelela ndi uri ni ite tshanduko dzo teaho. 10 Ndi ngazwo ndi tshi ni ṅwalela zwenezwi ndi sa athu u ḓa, uri musi ndi tshi swika, ndi si ni pfise vhuṱungu, ngauri Murena o nṋea maanḓa+ a u ni khwaṱhisa lutendoni, hu si a u ni wisa.

11 Vhahashu, dzulani no takala, ni tshi ita tshanduko dzo teaho, ni tshi khuthadzwa,+ ni tshi tendelana kha zwine na zwi humbula,+ ni tshi tshila nga mulalo;+ ndi hone Mudzimu wa lufuno na mulalo+ a tshi ḓo vha na inwi. 12 Ni lumelisane nga khisi.* 13 Vhakhethwa vhoṱhe vha a ni lumelisa.

14 Ngavhe Murena Yesu Kristo a tshi ni sumbedza vhuthu vhuhulu, Mudzimu a tshi ni funa na u ni ṋea muya mukhethwa une wa vhuyedza tshivhidzo.