Dotoronomio

15 “Musi ṅwaha muṅwe na muṅwe wa vhusumbe u tshi fhela u phumule zwikolodo.+ 2 Nḓila ine wa fanela u phumula ngayo zwikolodo ndi heyi: Muṅwe na muṅwe we a hadzimisa muhura wawe u ḓo phumula tshenetsho tshikolodo. A songo vhila muhura wawe kana wahawe, ngauri u ḓo phumulelwa tshikolodo u itela u hulisa Yehova.+ 3 U nga vhila mutsinda,+ fhedzi tshiṅwe na tshiṅwe tshe wa hadzimisa wahau u nga tshi phumula. 4 Naho zwo ralo, a hu na muthu ane a fanela u vha mushai, ngauri Yehova u ḓo u fhaṱutshedza+ shangoni ḽine Yehova Mudzimu wau a khou u ṋea ḽone uri u dzule khaḽo sa ifa, 5 tenda wa thetshelesa zwavhuḓi Yehova Mudzimu wau, wa tevhedza ndaela dzenedzi dzoṱhe dzine nda khou u ṋea dzone ṋamusi.+ 6 Ngauri Yehova Mudzimu wau u ḓo u fhaṱutshedza sa zwe a fhulufhedzisa, iwe u ḓo hadzimisa tshaka nnzhi, fhedzi iwe u nga si ḓo hadzima;+ iwe u ḓo vhusa tshaka nnzhi, fhedzi iwe a dzi nga u vhusi.+

7 “Arali muṅwe wa vhahau a vha mushai henefho kha miṅwe ya miḓi yau shangoni ḽe Yehova Mudzimu wau a u ṋea ḽone, u mu khathutshele, u songo dzima wahau wa mushai.+ 8 U mu sumbedze mafunda,+ u mu hadzime tshine a tshi ṱoḓa kana u tshi shaya. 9 U ṱhogomele uri u si ambe zwithu zwivhi mbiluni yau wa ri: ‘Ṅwaha wa vhusumbe, ṅwaha wa u phumula zwikolodo wo swika,’+ wa litsha u sumbedza wahau a re mushai vhuthu, u si mu ṋee tshithu. Arali a vhudza Yehova zwe wa mu ita, u ḓo vha wo ita tshivhi.+ 10 U mu ṋee nga mafunda,+ u songo mu ṋea u tshi khou gungula, nga⁠uri Yehova Mudzimu wau u ḓo fhaṱutshedza mishumo yau yoṱhe na zwoṱhe zwine wa ita.+ 11 Ngauri hu ḓo dzula hu na vhashai shangoni ḽau.+ Ndi ngazwo ndi tshi khou u laya nda ri: ‘U vhe na mafunda kha vhane vha khou tambula na kha wahau a re mushai shangoni ḽau.’+

12 “Arali muṅwe wa vhahau, munna kana mufumakadzi wa Muhevheru, we wa rengiselwa ene a u shumela miṅwaha ya rathi, nga ṅwaha wa vhusumbe u mu vhofholole.+ 13 Arali wa mu vhofholola, a songo ṱuwa a si na tshithu. 14 U mu ṋee nga mafunda zwi bvaho kha zwifuwo zwau, na zwi bvaho fhethu hau hune wa fhefhera hone,* hune wa suka hone nḓirivhe na hune wa ita hone mapfura. U mu ṋee samusi Yehova Mudzimu wau o u fhaṱutshedza. 15 U humbule uri wo vha u phuli shangoni ḽa Egipita, Yehova Mudzimu wau a u rengulula. Ndi ngazwo ndi tshi khou u laya uri u ite zwenezwi ṋamusi.

16 “Fhedzi arali a amba na iwe a ri: ‘A thi funi u ṱuwa nda u sia!’ ngauri u funa iwe na muṱa wau, samusi o vha o takala musi e na iwe,+ 17 u dzhie ṋeleṱe u phule nḓevhe yawe wo i baḓekanya na vothi, u ḓo vha phuli yau lwa tshoṱhe. U ite zwi fanaho na kha phuli yau ya mufumakadzi. 18 U songo zwi dzhia zwi tshi konḓa musi u tshi mu vhofholola a u sia nga⁠uri zwe a u shumela zwone nga miṅwaha ya rathi zwi fhira kavhili zwa mushumi o tholwaho, Yehova Mudzimu wau o u fhaṱutshedza kha zwoṱhe zwe zwa itwa.

19 “U kumedze Yehova Mudzimu wau tanzhe ḽiṅwe na ḽiṅwe ḽa tshiduna ḽa kholomo yau na ḽa tshiduna ḽa nngu yau.+ A wo ngo tea u shumisa tanzhe ḽa kholomo kana u vheula tanzhe ḽa nngu. 20 Iwe na muṱa wau ni ḽe ḽeneḽo tanzhe phanḓa ha Yehova Mudzimu wau ṅwaha muṅwe na muṅwe fhethu hune Yehova a ḓo hu nanga.+ 21 Fhedzi arali ḽo holefhala, ḽi tshi ṱudza, ḽi sa vhoni kana u holefhala nga iṅwe nḓila, a wo ngo tea u ḽi ṋekedza Yehova Mudzimu wau.+ 22 U ḽi ḽe muḓini* wau, ḽi ḽiwe nga muthu a re na tshika na o kunaho, u fana na musi ni tshi ḽa phala kana ntsa.+ 23 Fhedzi u songo ḽa malofha aḽo;+ u a shululele fhasi u fana na musi u tshi shulula maḓi.+