Dotoronomio

4 “Thetshelesani inwi Isiraele, maitele na mahaṱulele zwine nda khou ni funza zwone uri ni zwi tevhedze uri ni tshile,+ ni dzhene ni dzhie ḽeneḽo shango ḽine Yehova Mudzimu wa vhomakhulukuku waṋu a khou ni ṋea ḽone. 2 A no ngo tea u engedza zwine nda khou ni laya zwone kana u fhungudza+ uri ni vhulunge ndaela dzine Yehova Mudzimu waṋu a khou ni ṋea dzone.

3 “Maṱo aṋu o vhona zwe Yehova a zwi ita nga nṱhani ha Baali Pheoro; Yehova Mudzimu waṋu o fhelisa muthu muṅwe na muṅwe we a tevhela Baali Pheoro.+ 4 Fhedzi inwi vhane na tevhela Yehova Mudzimu waṋu, noṱhe ni khou tshila ṋamusi. 5 Ndo ni funza maitele na mahaṱulele+ samusi Yehova Mudzimu wanga o mmbudza uri ndi ite nga u ralo uri ni zwi tevhedze ni shangoni ḽine na ḓo dzula khaḽo. 6 Ni tea u zwi tevhedza nga vhuronwane,+ ngauri zwi ḓo sumbedza uri ni na vhuṱali+ na ṱhalukanyo+ phanḓa ha vhathu vhane vha ḓo pfa nga ha enea maitele oṱhe, vha ḓo ri: ‘Nangoho ulu lushaka luhulu ndi lwa vhathu vho ṱalifhaho na vha re na ṱhalukanyo.’+ 7 Ngauri ndi lushaka lufhio luhulu lune midzimu yalwo ya vha tsini nalwo u fana na Yehova Mudzimu washu e tsini na riṋe tshifhinga tshoṱhe musi ri tshi mu vhidza?+ 8 Ndi lushaka lufhio luhulu lune lwa vha na maitele o lugaho na mahaṱulele u fana na wonoyu Mulayo woṱhe une nda khou ni ṋea wone ṋamusi?+

9 “Ḓiṱhogomele uri u si hangwe zwithu zwe wa zwi vhona na uri zwi si bve mbiluni yau maḓuvha oṱhe a vhutshilo hau. U dovhe u ite uri na vhana vhau na vhaḓuhulu vhau vha zwi ḓivhe.+ 10 Nga ḓuvha ḽe wa ima phanḓa ha Yehova Mudzimu wau ngei Horebe, Yehova o amba na nṋe a ri: ‘Kuvhanganya vhathu uri vha pfe zwine nda amba,+ uri vha gude u ofha nṋe+ maḓuvha oṱhe musi vha tshi kha ḓi tshila fhano shangoni na uri vha kone u funza vharwa vhavho.’+

11 “Ngauralo, na sendela tsini na ima fhasi ha thavha, thavha yo vha i tshi khou duga mulilo we wa vha u tshi swika na makoleni; ho vha hu na swiswi, gole na buluvhutsi.+ 12 Yehova a amba na inwi e vhukati ha mulilo.+ No pfa ipfi ḽawe, fhedzi a no ngo mu vhona,+ no pfa ipfi fhedzi.+ 13 O ni ḓivhadza mulanga wawe,+ we a ni laya uri ni u tevhedze, une wa vha Milayo ya Fumi.*+ Nga murahu, o i ṅwala kha mbaba mbili dza matombo.+ 14 Nga tshenetsho tshifhinga Yehova o nndaya uri ndi ni funze maitele na mahaṱulele, zwine na ḓo zwi tevhedza shangoni ḽine na ḓo ḽi dzhia na dzula khaḽo.

15 “Nga zwenezwo, ni ḓiṱhogomele samusi ni songo vhona tshivhumbeo nga ḓuvha ḽe Yehova a amba na inwi ngei Horebe e vhukati ha mulilo, 16 uri ni si tshinye nga u ḓivhaḓela tshifanyiso tshi re na tshivhumbeo naho tshi tshifhio, tshifanyiso tsha munna kana tsha mufumakadzi,+ 17 tshifanyiso tsha tshipuka naho tshi tshifhio kha ḽifhasi kana tshifanyiso tsha tshiṋoni naho tshi tshifhio tshine tsha fhufha ṱaḓulu,+ 18 tshifanyiso tsha tshikokovhi naho tshi tshifhio kana tshifanyiso tsha khovhe naho i ifhio ya maḓini.+ 19 Musi ni tshi lavhelesa ṱaḓulu, na vhona ḓuvha, ṅwedzi na dziṋaledzi, mavhuthu oṱhe a ṱaḓulu, ni songo kungea na zwi gwadamela na zwi shumela.+ Yehova Mudzimu waṋu o zwi kumedzela vhathu vhoṱhe fhasi ha ḽiṱaḓulu ḽoṱhe. 20 Fhedzi inwi Yehova o ni dzhia, a ni bvisa ṋanḓoni ya u ṋokisa tsimbi, o ni bvisa Egipita uri ni vhe vhathu vhawe*+ u vhuya u swika zwino.

21 “Yehova a ntsinyutshela nga mulandu waṋu,+ a ana a ri a thi nga weli Yorodane kana u ya shangoni ḽavhuḓi ḽine Yehova Mudzimu waṋu a khou ni ṋea ḽone sa ifa.+ 22 Ngauri nṋe ndi ḓo fela kha ḽeneḽi shango, a thi nga ḓo wela Yorodane,+ fhedzi inwi ni ḓo wela na dzhia shango ḽeneḽi ḽavhuḓi. 23 Ni ṱhogomele uri ni si hangwe mulanga wa Yehova Mudzimu waṋu we a u vhofha na inwi,+ ni songo ḓivhaḓela tshifanyiso, tsha tshiṅwe na tshiṅwe tshe Yehova Mudzimu waṋu a ni dzivhisa.+ 24 Ngauri Yehova Mudzimu wau ndi mulilo u tshinyadzaho,+ ndi Mudzimu ane a ṱoḓa u tshi ḓikumedza tshoṱhe khae.+

25 “Arali ni tshi ḓo vha na vhana na vhaḓuhulu no no fhedza tshifhinga tshilapfu ni tshi khou dzula kha ḽeneḽo shango, na tshinya nga u vhaḓa tshifanyiso+ tsha mufuda naho u ufhio, na ita vhuvhi phanḓa ha Yehova Mudzimu waṋu na mu sinyusa,+ 26 ḽiṱaḓulu na ḽifhasi kha zwi vhe ṱhanzi dzaṋu ṋamusi uri ni ḓo ṱavhanya na fa shangoni ḽine na khou wela Mulambo wa Yorodane uri ni ḽi dzhie. A ni nga tshili tshifhinga tshilapfu ni tshi khou dzula khaḽo, ngauri ni ḓo fheliswa tshoṱhe.+ 27 Yehova u ḓo ni balanganya na dzitshaka,+ ni ḓo sala ni si vhanzhi+ mashangoni ane Yehova a ḓo vha o ni pandelela khao. 28 Henefho ni ḓo shumela midzimu ya thanda na ya matombo yo itwaho nga zwanḓa zwa vhathu,+ i sa vhoni, i sa pfi, i sa ḽi kana u nukhedza.

29 “Arali na ṱoḓa Yehova Mudzimu waṋu ni henefho, ni ḓo mu wana zwa vhukuma,+ arali na mu ṱoḓa nga mbilu yaṋu yoṱhe na nga zwoṱhe zwine na vha zwone.+ 30 Musi ni fhasi ha mutsiko muhulwane, zwenezwi zwithu zwo no bvelela kha inwi, ni ḓo humela ha Yehova Mudzimu waṋu na thetshelesa ipfi ḽawe.+ 31 Ngauri Yehova Mudzimu waṋu ndi Mudzimu wa khathutshelo.+ Ha nga ni laṱedzi kana u ni fhelisa kana u hangwa mulanga we a u vhofha na vhomakhulukuku waṋu.+

32 “Vhudzisani nga ha maḓuvha o fhiraho musi ni sa athu u vha hone, u bva nga tshifhinga tsha musi Mudzimu a tshi vhumba muthu kha ḽifhasi; ṱoḓani u bva mathomoni a ḽifhasi u ya magumoni a ḽifhasi. Naa ho no vhuya ha itea zwithu zwingafha kana ho no vhuya ha pfala zwi ngaho zwenezwi?+ 33 Naa hu na vhathu vho no vhuyaho vha pfa ipfi ḽa Mudzimu ḽi tshi amba ḽi tshi bva muliloni nga nḓila ye inwi na ḽi pfa ngayo, vha ḓi bvela phanḓa vha tshi khou tshila?+ 34 Kana naa Mudzimu o vhuya a lingedza u ḓinangela lushaka vhukati ha luṅwe lushaka, nga u lu haṱula,* nga zwiga, nga vhuṱolo,+ nga nndwa,+ nga tshanḓa tsha maanḓa,+ nga mishumo i ofhisaho,+ samusi Yehova Mudzimu waṋu o zwi ita ngei Egipita ni tshi zwi vhona? 35 No sumbedzwa zwenezwi zwithu uri ni ḓivhe uri Yehova ndi Mudzimu wa ngoho;+ a hu na muṅwe nga nnḓa ha ene.+ 36 O ita uri ni pfe ipfi ḽawe e ṱaḓulu uri a ni khakhulule, a ita uri ni vhone mulilo wawe muhulu kha ḽifhasi, na pfa ma⁠ipfi awe a tshi bva kha wonoyo mulilo.+

37 “Ngauri o vha a tshi funa vhomakhulukuku waṋu, a nanga vhana* vhavho,+ no pfuluswa ngei Egipita e na inwi nga maanḓa awe mahulu. 38 O pandela dzitshaka phanḓa haṋu dze dza vha dzi khulwane dzi na maanḓa u ni fhira, a ni ṋea mashango avho uri a vhe ifa ḽaṋu, samusi zwo ralo na ṋamusi.+ 39 Nga zwenezwo, ḓivhani ṋamusi, ni zwi vhulunge mbiluni uri Yehova ndi ene Mudzimu wa ngoho kha ḽiṱaḓulu na kha ḽifhasi.+ A hu na muṅwe.+ 40 Ni tea u tevhedza maitele awe na ndaela dzawe dzine nda khou ni ṋea dzone ṋamusi uri inwi na vhana vhaṋu zwi ni tshimbilele zwavhuḓi uri ni tshile kha ḽeneḽo shango ḽine Yehova Mudzimu waṋu a khou ni ṋea ḽone.”+

41 Nga tshenetsho tshifhinga, Mushe a nanga miḓi miraru ya vhubvaḓuvha ha Yorodane.+ 42 Arali muvhulayi a vhulaya muṅwe muthu a songo ḓiimisela, o vha a sa mu vhengi,+ a shavhele kha muṅwe wa yeneyo miḓi uri a tshile.+ 43 Yeneyo miḓi ndi Betsera+ u re sogani mudavhini wa Vharubeni, Ramothe+ ngei Giḽiada wa Vhagada na Golani+ ngei Bashani wa Vhamanase.+

44 Hoyu ndi Mulayo+ we Mushe a u ṋea vhathu vha Isiraele. 45 Hedzi ndi khumbudzo, maitele na mahaṱulele zwe Mushe a zwi ṋea Vhaisiraele musi vha tshi bva Egipita,+ 46 vhe dzinguni ḽa Mulambo wa Yorodane govhani ḽo livhanaho na Bethe-peoro,+ shangoni ḽa Sihoni khosi ya Vhaamori, we a vha a tshi dzula ngei Hesiboni,+ we Mushe na Vhaisiraele vha mu kunda musi vha tshi bva Egipita.+ 47 Vho dzhia shango ḽawe na ḽa Ogo+ khosi ya Bashani, mahosi mavhili a Vhaamori e a vha a tshi dzula dzinguni ḽi re vhubvaḓuvha ha Yorodane, 48 u bva Aroere,+ hune ha vha Govhani ḽa Arinoni* u swika Thavhani ya Sioni, hune ha vha Herimoni,+ 49 na ḽoṱhe ḽa Araba ḽi re dzinguni ḽa vhubvaḓuvha ha Yorodane, u swika Lwanzheni lwa Araba* fhasi ha magovha a Pisiga.+