Yoshua
7 Fhedzi Vhaisiraele a vho ngo fhulufhedzea kha zwe zwa vha zwi tshi fanela u fheliswa, Akani+ murwa wa Karami, murwa wa Sabadi, murwa wa Zera, wa lushaka lwa Yuda, o dzhia zwiṅwe zwa zwithu zwe zwa vha zwi tshi fanela u fheliswa.+ Nga nṱhani ha zwenezwo, Yehova a sinyutshela Vhaisiraele.+
2 Yoshua a ruma vhanna vha bva Yeriko vha ya muḓini wa Ai,+ hune ha vha tsini na Bethavena na vhubvaḓuvha ha Bethele,+ a ri: “Gonyani ni ye u ṱola shango.” Nga zwenezwo, vhenevho vhanna vha gonya vha ṱola Ai. 3 Musi vha tshi vhuya vha vhudza Yoshua uri: “A zwi ṱoḓei uri vhathu vhoṱhe vha gonye. Vhanna vha ṱoḓaho u vha zwigidi zwivhili kana zwiraru* vha nga kunda Ai. U songo netisa vhathu vhoṱhe nga u vha ruma henengei, ngauri vhathu vha Ai a si vhanzhi.”
4 Vhanna vha ṱoḓaho u vha 3 000 vha gonya henengei, fhedzi vha pandamedzwa nga vhanna vha Ai.+ 5 Vhanna vha muḓi wa Ai vha vhulaya vhanna vha 36, vha vha pandamedza u bva phanḓa ha khoro ya muḓi u swika Shebarima, vha bvela phanḓa vha tshi vha vhulaya henefho nḓilani. Ngauralo, vhathu vha ofha vha kulea nungo.
6 Yoshua a kherukanya zwiambaro zwawe a gwadama phanḓa ha Mbulungelo ya Yehova u swika nga madekwana, ene na vhahulwane vha Isiraele, vha ḓishela buse kha ṱhoho dzavho. 7 Yoshua a ri: “Yowee, Yehova Murena Muvhusahoṱhe, ndi ngani wo wedza avha vhathu Mulambo wa Yorodane u tshi itela u ri kumedzela kha Vhaamori uri vha ri fhelise? Ngavhe ro fushea nga u dzula seli* ha Yorodane! 8 Mpfarele Yehova, ndi nga ri mini zwino samusi Isiraele o shavha maswina awe? 9 Musi Vhakanana na vhadzulapo vhoṱhe vha shango vha tshi zwi pfa, vha ḓo ri tanga vha fhelisa dzina ḽashu kha ḽifhasi; u ḓo tsireledza hani dzina ḽau ḽihulwane?”+
10 Ngauralo, Yehova a amba na Yoshua a ri: “Takuwa! Wo gwadamela mini? 11 Vhaisiraele vho tshinya. Vho pfuka mulanga wanga+ we nda vha laya uri vha u vhulunge. Vho dzhia zwiṅwe zwa zwithu zwe zwa vha zwi tshi fanela u fheliswa,+ vho zwi tswa,+ vha zwi dzumba vhukati ha thundu yavho.+ 12 Vhaisiraele vha nga si kone u lwa na maswina avho. Vha ḓo shavha maswina avho, ngauri vha ḓo fheliswa. A thi tsha ḓo ima na inwi arali na sa fhelisa zwithu zwe zwa vha zwi tshi fanela u fheliswa vhukati haṋu.+ 13 Takuwa u vhudze vhathu uri vha ḓikhethe!+ Vha vhudze uri: ‘Ni ḓikhethe matshelo, ngauri hezwi ndi zwe Yehova Mudzimu wa Isiraele a zwi amba a tshi ri: “Iwe Isiraele, zwe zwa vha zwi tshi fanela u fheliswa zwi vhukati hau. A u nga ḓo kona u kunda maswina au u swika u tshi bvisa zwithu zwe zwa vha zwi tshi fanela u fheliswa vhukati hau. 14 Ni kuvhangane nga matsheloni u ya nga dzitshaka, lushaka lune Yehova a ḓo lu nanga+ lu fanela u sendela, u ya nga miṱa, muṱa une Yehova a ḓo u nanga u fanela u sendela, u ya nga miḓi, muḓi une Yehova a ḓo u nanga u fanela u sendela, na vhanna vha yeneyo miḓi vha sendele. 15 Muthu ane a ḓo waniwa e na zwithu zwe zwa vha zwo fanela u fheliswa u ḓo fhiswa,+ khathihi na zwine zwa vha zwawe, nga nṱhani ha uri o pfuka mulanga+ wa Yehova ngauri o ita zwithu zwi nyadzisaho Isiraele.”’”
16 Nga ḓuvha ḽi tevhelaho Yoshua a vuwa nga matsheloni-tsheloni a kuvhanganya Vhaisiraele u ya nga tshaka dzavho, lushaka lwa Yuda lwa nangiwa. 17 Nga murahu a sendedza miṱa ya Yuda, a nanga muṱa wa Zera,+ a ita uri muṱa wa Zera u sendele, kha vhanna vha wonoyo muṱa ha nangiwa Sabadi. 18 Mafheleloni ene na muṱa wawe vha sendela, kha vhanna vha wonoyo muṱa ha nangiwa Akani murwa wa Karami, murwa wa Sabadi, murwa wa Zera, wa lushaka lwa Yuda.+ 19 Ngauralo, Yoshua a amba na Akani a ri: “Murwa wanga, ndi khou humbela uri u hulise Yehova Mudzimu wa Isiraele, u ḓibule khae. Ndi khou humbela uri u mmbudze zwe wa ita. U songo ndzumbela.”
20 Akani a fhindula Yoshua a ri: “Ndi ngoho uri ndi nṋe ndo khakhelaho Yehova Mudzimu wa Isiraele, ndo ita hezwi. 21 Kha zwithu zwe ra zwi thuba ndo vhona nguvho yavhuḓi i bvaho Shinari,+ na shekele* dza 200 dza siḽiva na musuku wa tshileme tsha shekele dza 50, nda zwi tama, nda zwi dzhia. Zwo bwelwa fhasi denndeni ḽanga, tshelede i nga fhasi.”
22 Yoshua a ṱavhanya a ruma vhaḓinḓa, vha gidimela denndeni, vha wana nguvho yo dzumbiwa henefho denndeni ḽawe, tshelede i nga fhasi hayo. 23 Vha zwi dzhia denndeni vha zwi ḓisa kha Yoshua na Vhaisiraele vhoṱhe, vha zwi vhea phanḓa ha Yehova. 24 Yoshua na Vhaisiraele vhoṱhe vhe a vha e navho vha dzhia Akani+ murwa wa Zera, siḽiva, nguvho yavhuḓi na musuku+ khathihi na vharwa vhawe, vhananyana vhawe, mboho dzawe, donngi dzawe, nngu na mbudzi, dennde ḽawe na zwoṱhe zwe zwa vha zwi zwawe, vha zwi isa Govhani ḽa Axoro.+ 25 Yoshua a ri: “Ndi ngani wo ri ḓisela khombo?+ Yehova u ḓo u ḓisela khombo ṋamusi.” Nga zwenezwo, Vhaisiraele vhoṱhe vha mu kanḓa nga matombo,+ nga murahu vha vha fhisa.+ Vha vha kanḓa vhoṱhe nga matombo. 26 Vha ita tshiṱhopho tshihulu nga matombo nṱha hawe, na zwino tshi kha ḓi vha hone. Nga nṱhani ha zwenezwo, mbiti dza Yehova dza dzika.+ Ndi ngazwo henefho fhethu hu tshi pfi Govhani ḽa Axoro u swika na ṋamusi.