Nzumbululo I Yaho Kha Yohane
11 Nda ṋewa luṱanga lu ngaho lubaḓa,+ ha pfi: “Takuwa u kale thembele ya nnḓu khethwa ya Mudzimu na aḽeṱare, u vhale na vhane vha rabela khayo. 2 Fhedzi u songo kala muṱa u re nnḓa ha thembele ya nnḓu khethwa ngauri wo ṋewa vha dzitshaka, vha ḓo kandekanya muḓi mukhethwa+ lwa miṅwedzi ya 42.+ 3 Ndi ḓo ruma ṱhanzi dzanga mbili uri dzi porofite maḓuvha a 1 260 dzo ambara madzanganda.” 4 Miṱwari mivhili+ na zwiṱomambone zwivhili+ zwi fanyisela dzenedzi ṱhanzi, dzo imaho phanḓa ha Murena wa ḽifhasi.+
5 Arali muthu a tshi ṱoḓa u dzi huvhadza, hu bva mulilo mulomoni wadzo, wa fhisa maswina adzo. Ane a ṱoḓa u dzi huvhadza, u ḓo vhulawa nga yeneyo nḓila. 6 Dzi na maanḓa a u vala ḽiṱaḓulu+ uri mvula i si ne+ nga maḓuvha a musi dzi tshi khou porofita, dzi na maanḓa a u shandukisa maḓi uri a vhe malofha+ na u rwa ḽifhasi nga mifuda yoṱhe ya ṱhamu nga hune dza funa.
7 Musi dzo no fhedza u porofita, tshivhanda tshi bvaho mugodini tshi ḓo lwa nadzo, tsha dzi kunda tsha dzi vhulaya.+ 8 Zwitumbu zwadzo zwi ḓo vha zwi nḓilani khulu ya muḓi muhulu une wa fanyisela Sodoma na Egipita, he Murena wayo a ombelwa hone kha danda. 9 Vha tshaka na ndimi* dzo fhambanaho vha ḓo lavhelesa zwitumbu zwa dzenedzo ṱhanzi lwa maḓuvha mararu na hafu,+ vha si tende zwenezwo zwitumbu zwi tshi vhulungwa vhiḓani. 10 Vha dzulaho kha ḽifhasi vha ḓo takala na u pembela ngauri dzenedzo ṱhanzi dzo fa, vha rumelana na zwifhiwa ngauri vhenevha vhaporofita vhavhili vho tambudza vha dzulaho kha ḽifhasi.
11 Nga murahu ha maḓuvha mararu na hafu, Mudzimu a dzi vusa*+ dza takuwa dza ima, vhoṱhe vho dzi vhonaho vha tshuwa zwihulu. 12 Dza pfa ipfi ḽihulu ḽi bvaho ṱaḓulu ḽi tshi ri: “Gonyani ngeno.” Dza ya ṱaḓulu dzi kha gole, maswina adzo a tshi zwi vhona.* 13 Nga tshenetsho tshifhinga ha vha na mudzinginyo muhulu, tshipiḓa tshithihi kha zwa fumi tsha muḓi tsha wa; vhathu vha 7 000 vha vhulawa nga mudzinginyo, vho salaho vha ofha, vha renda Mudzimu wa ṱaḓulu.
14 Khombo ya vhuvhili+ yo fhira. Khombo ya vhuraru i khou ḓa nga u ṱavhanya.
15 Muruṅwa wa vhusumbe a lidza phalaphala yawe.+ Ha pfala maipfi a tshi vhidzelela e ṱaḓulu a tshi ri: “Muvhuso wa shango wo no vha Muvhuso wa Murena washu+ na Kristo,+ u ḓo vhusa lini na lini.”+
16 Vhahulwane vha 24+ vho dzulaho kha khuluṋoni dzavho phanḓa ha Mudzimu vha gwadama vha rabela Mudzimu, 17 vha ri: “Ri a u livhuwa, Yehova* Mudzimu, Ramaanḓaoṱhe, we a vha e hone na a re hone,+ ngauri wo shumisa maanḓa au mahulu, wa thoma u vhusa.+ 18 Fhedzi tshaka dza sinyuwa, wa sumbedza mbiti dzau, tshifhinga tsho vhewaho tsha swika tsha uri vhafu vha haṱulwe na tsha u lambedza+ vhalanda vhau vha vhaporofita+ na vhakhethwa na vhane vha ofha dzina ḽau, vhaṱuku na vhahulwane, na u fhelisa vha tshinyadzaho ḽifhasi.”+
19 Ha vuliwa thembele ya nnḓu khethwa ya Mudzimu ṱaḓulu, ha vhonala mbulungelo ya mulanga i thembeleni ya nnḓu khethwa.+ Ha vha na dziphenyo, mibvumo, mudzinginyo na tshifhango tshihulu, ha pfala na maipfi.