Bugu Ya U Thoma Ya Samuele
12 Mafheleloni Samuele a amba na Vhaisiraele vhoṱhe a ri: “Ndo ita zwoṱhe zwe na nkhumbela, ndo ni vhetshela khosi ya u ni vhusa.+ 2 Zwino khosi ine ya khou ni ranga phanḓa kheyi!+ Nṋe ndo no kalaha, ṱhoho yanga yo no tshena, vharwa vhanga vha hone henefha vhukati haṋu,+ ndo ni ranga phanḓa u bva ndi tshee muswa u swika ṋamusi.+ 3 Zwino nṱanzieleleni phanḓa ha Yehova na phanḓa ha muḓodzwa wawe:+ Naa ndo vhuya nda dzhiela nnyi mboho kana donngi yawe?+ Kana ndi nnyi we nda vhuya nda mu fhura kana u mu tsikeledza? Ndo vhuya nda ita tshanḓanguvhoni na nnyi u itela u tsinya ḽiṱo?+ Arali zwo ralo, ndi ḓo ni lifhela.”+ 4 Vha fhindula vha ri: “A wo ngo ri fhura kana u ri tsikeledza kana u ṱanganedza naho tshi tshini tshi bvaho kha riṋe.” 5 Ngauralo, Samuele a amba navho a ri: “Yehova nga a vhe ṱhanzi yaṋu, muḓodzwa wawe ndi ṱhanzi ṋamusi ya uri a no ngo wana tshithu tshine na nga mpomoka ngatsho.” Vha fhindula vha ri: “Mudzimu ndi ṱhanzi.”
6 Samuele a amba na vhathu a ri: “Yehova we a nanga Mushe na Aroni, a bvisa vhomakhulukuku waṋu shangoni ḽa Egipita,+ ndi ṱhanzi. 7 Imani hafha, ndi ḓo ni haṱula phanḓa ha Yehova nga ha mishumo mivhuya yoṱhe ye Yehova a itela inwi na vhomakhulukuku waṋu.
8 “Musi Yakobo a tshi tou swika Egipita,+ vhomakhulukuku waṋu vha tshi humbela thuso kha Yehova,+ Yehova o rumela Mushe+ na Aroni u itela u ranga phanḓa vhomakhulukuku waṋu musi vha tshi bva Egipita a ita uri vha dzule hafha fhethu.+ 9 Fhedzi vha hangwa Yehova Mudzimu wavho, a vha kumedzela+ zwanḓani zwa Sisera+ mulangammbi wa Hatsoro, na zwanḓani zwa Vhafilisita+ na zwanḓani zwa khosi ya Moaba,+ vha lwa navho. 10 Vha vhidzelela Yehova uri a vha thuse+ vha ri: ‘Ro khakha,+ ngauri ro ṱutshela Yehova ra shumela zwifanyiso zwa Vhobaali+ na zwa Asiterothe;+ zwino ri tshidze zwanḓani zwa maswina ashu uri ri kone u u shumela.’ 11 Yehova a rumela Yerubaali,+ Bedani, Yefeta+ na Samuele,+ a ni tshidza zwanḓani zwa maswina aṋu o ni tangaho uri ni kone u dzula no tsireledzea.+ 12 Musi Nahasi+ khosi ya Vhaamoni i tshi ḓa u lwa na inwi, no amba na nṋe na ri: ‘Aiwa, ro ḓiimisela u vhuswa nga khosi!’+ naho Yehova Mudzimu waṋu e ene Khosi yaṋu.+ 13 Zwino kheyi khosi ye na i nanga, ye na i humbela. Yehova o ni vhetshela khosi.+ 14 Arali ni tshi ofha Yehova+ na mu shumela,+ na thetshelesa zwine a amba,+ ni si shandukele ndaela dza Yehova, inwi na khosi ine ya ni vhusa na tevhela Yehova Mudzimu waṋu, zwo luga. 15 Fhedzi arali na sa thetshelesa zwine Yehova a zwi amba na shandukela ndaela dza Yehova, ndi hone Yehova a tshi ḓo pfisa vhuṱungu inwi na vhokhotsi aṋu.+ 16 Zwino imani ni vhone hezwi zwithu zwihulu zwine Yehova a khou zwi ita phanḓa haṋu. 17 Naa ṋamusi a si ḓuvha ḽa u kaṋa goroi? Ndi ḓo vhidzelela Yehova uri a ite uri hu vhe na mibvumo na mvula; ndi hone ni tshi ḓo ḓivha na u pfesesa uri no khakhela Yehova musi ni tshi humbela u vhetshelwa khosi.”+
18 Samuele a vhidzelela Yehova, Yehova a ita uri hu vhe na mibvumo na mvula nga ḽeneḽo ḓuvha, lwe vhathu vhoṱhe vha ofha nga maanḓa Yehova na Samuele. 19 Vhathu vhoṱhe vha amba na Samuele vha ri: “Rabelela vhashumeli vhau kha Yehova Mudzimu,+ samusi ri sa ṱoḓi u fa, ngauri kha zwivhi zwashu zwoṱhe ro dovha ra engedza vhuṅwe vhuvhi nga u humbela u vhetshelwa khosi.”
20 Ngauralo, Samuele a amba na vhathu a ri: “Ni songo ofha. No ita honovhu vhuvhi hoṱhe. Fhedzi ni songo litsha u tevhela Yehova,+ ni shumele Yehova nga mbilu dzaṋu dzoṱhe.+ 21 Ni songo tevhela midzimu i sa thusi tshithu,+ i sa vhuyedzi+ ine ya sa ḓo ni tshidza, ngauri ndi midzimu i sa thusi tshithu. 22 Yehova a nga si laṱe vhathu vhawe+ a tshi itela dzina ḽawe ḽihulu,+ ngauri Yehova o vhona zwo tea uri a ni ite vhathu vhawe.+ 23 A zwi pfali uri ndi khakhele Yehova nga u litsha u ni rabelela, ndi ḓo bvela phanḓa ndi tshi ni funza nḓila yavhuḓi na yo teaho. 24 Fhedzi ni ofhe Yehova,+ ni mu shumele nga u fhulufhedzea* nga mbilu dzaṋu dzoṱhe, ngauri no vhona zwithu zwihulu zwe a ni itela zwone.+ 25 Fhedzi arali na ita vhuvhi nga khole, inwi na khosi yaṋu+ ni ḓo fheliswa.”+