Bugu Ya U Thoma Ya Samuele

25 Nga u ya ha tshifhinga Samuele+ a fa; Vhaisiraele vhoṱhe vha kuvhangana uri vha mu lilele, vha mu vhulunga hayani hawe ngei Rama.+ Davida a tsela sogani ḽa Pharani.

2 Ho vha hu na muṅwe munna wa ngei Maoni+ we a vha a tshi shuma Karamele.*+ Onoyo munna o vha o pfuma vhukuma; o vha e na nngu dza 3 000 na mbudzi dza 1 000, nga tshenetsho tshifhinga o vha a tshi khou vheula nngu dzawe ngei Karamele. 3 Onoyo munna o vha a tshi pfi Nabali,+ mufumakadzi wawe a tshi pfi Abigaili.+ Onoyo mufumakadzi o vha o ṱalifha, o naka, fhedzi munna wawe o vha e wa muṱa wa Kalebe,+ e na tshiṱuhu, e na vhuḓifari vhu si havhuḓi.+ 4 Davida a zwi pfa e sogani uri Nabali u khou vheula nngu dzawe. 5 Ngauralo, Davida a rumela vhanna vha fumi vhe a vha e navho uri vha ye ha Nabali. Davida a amba na vhenevho vhanna a ri: “Gonyani Karamele ni ye ha Nabali, ni mmbudzisele mutakalo. 6 Ni ri: ‘Ngavhe u tshi lalama wa vha na mutakalo wavhuḓi* na vha muṱa wau na zwoṱhe zwine wa vha nazwo. 7 Ndo pfa uri u khou vheula nngu. Musi vhalisa vhau vhe na riṋe, a ro ngo vha ita tshithu,+ a vho ngo wana na tshithu na tshithihi tsho xela musi vhe ngei Karamele. 8 Vhudzisa vhashumeli vhau, vha ḓo u vhudza. Ngavhe u tshi sumbedza vhashumeli vhanga vhuthu, ngauri ro swika nga ḓuvha ḽavhuḓi. Ndi khou humbela uri u ṋee vhashumeli vhau na murwa wau Davida tshine wa nga kona.’”+

9 Vhashumeli vha Davida vha ya vha vhudza Nabali zwoṱhe zwe Davida a vha vhudza zwone. Musi vha tshi fhedza u amba, 10 Nabali a fhindula vhashumeli vha Davida a ri: “Davida ndi nnyi, murwa wa Isai ndi nnyi? Vhashumeli vhanzhi ṋamusi vha khou shavha vhaṋe vhavho.+ 11 Naa ndi dzhie vhurotho hanga na maḓi anga na ṋama ye nda i ṱhavhela vhavheuli vhanga ndi zwi ṋee vhanna vhane nda si ḓivhe hune vha bva hone?”

12 Vhashumeli vha Davida vha vhuya vha mu vhudza eneo mafhungo oṱhe. 13 Davida a ṱavhanya a amba na vhashumeli vhawe a ri: “Muṅwe na muṅwe kha kungele banga ḽawe!”+ Ngauralo, vhoṱhe vha kungela mabanga avho na Davida na ene a kungela ḽawe; vhanna vha ṱoḓaho u vha 400 vha gonya na Davida, ngeno vhanna vha 200 vho sala na thundu.

14 Muṅwe wa vhashumeli a amba na Abigaili, mufumakadzi wa Nabali a ri: “Davida o rumela vhaḓinḓa e sogani uri vha ḓe vha vhudzise mutakalo wa muṋe washu, fhedzi ene a vha halifhela.+ 15 Vhenevho vhanna vho ri fara zwavhuḓi vhukuma. A vho ngo vhuya vha ri ita tshithu, a ro ngo xelelwa nga tshithu na tshithihi tshifhinga tshoṱhe musi ri navho ngei maḓakani.+ 16 Vho vha vha tshi tou nga luvhondo lwa u ri tsireledza lwo ri tangaho vhusiku na masiari, tshifhinga tshoṱhe musi ri navho ri tshi khou lisa sambi. 17 Zwino humbula nga zwine wa ḓo zwi ita, ngauri khombo i khou ḓela muṋe washu na vhoṱhe vha nnḓu yawe,+ samusi a sa ḓivhalei,+ hu si na ane a nga amba nae.”

18 Abigaili+ a tshi pfa zwenezwo a ṱavhanya a dzhia ḽofo dza 200 dza vhurotho, mvuvhelo khulwane mbili dza waini, na nngu ṱhanu dzo ṱhavhiwaho, thoro dza mielo miṱanu ya tshikalo tsha siha* dzo kadzingwaho, khekhe dza nḓirivhe dza 100 na khekhe dza mahuyu dza 200, zwenezwo zwithu zwoṱhe a zwi hwesa donngi.+ 19 A amba na vhashumeli vhawe a ri: “Rangani phanḓa; ndi ḓo ni tevhela.” Fhedzi ho ngo vhudza tshithu Nabali munna wawe.

20 Musi o ṋamela donngi a tshi khou tsa nga thavha a sa vhonwi, a ṱangana na Davida na vhanna vhe a vha e navho vha tshi khou tsela khae. 21 Davida o vha a tshi ri: “Ndo sokou linda zwithu zwoṱhe zwa onoyo munna ngei sogani. Ho ngo wana na tshithu na tshithihi tsho xela,+ fhedzi ene u livhuwa zwivhuya nga zwivhi.+ 22 Ngavhe Mudzimu a tshi lifhedza maswina a Davida nga nḓila ine a funa ngayo, a engedze kha zwenezwo arali nda litsha vhanna vhoṱhe vha Nabali vha tshi ponyoka vha vhona ḽa matshelo.”

23 Musi Abigaili a tshi vhona Davida, a ṱavhanya a tsa kha donngi, a gwadama phanḓa ha Davida a losha. 24 Abigaili a gwadama milenzheni ya Davida a ri: “Muṋe wanga, nga hu vhonwe nṋe mulandu; tendela mushumeli wau wa mufumakadzi a tshi amba, u thetshelese zwine mushumeli wau wa mufumakadzi a ḓo u vhudza zwone. 25 Muṋe wanga a songo dzhiela nṱha hoyu Nabali a sa ḓivhalei,+ ngauri u ita zwine dzina ḽawe ḽa amba zwone. U pfi Nabali,* u tou vha tsilu. Fhedzi nṋe mushumeli wau wa mufumakadzi, a tho ngo vhona vhashumeli vhau vhe wa vha ruma. 26 Muṋe wanga ndi ana nga Yehova a tshilaho, nda dovha nda ana nga vhutshilo hau, ndi Yehova we a u thivhela+ uri u si vhe na mulandu wa malofha+ na uri u si ḓilifhedzele. Ngavhe maswina au na vhane vha ṱoḓa u huvhadza muṋe wanga vha tshi fana na Nabali. 27 Dzhia hetshi tshifhiwa*+ tshe mushumeli wau wa mufumakadzi a tshi ḓisela muṋe wawe, u tshi ṋee havha vhashumeli vhau.+ 28 Ndi khou humbela uri u hangwele mushumeli wau wa mufumakadzi vhutshinyi hawe, ngauri Yehova u ḓo ita uri vhaḓuhulu vhau vha vhuse sa dzikhosi lwa tshifhinga tshilapfu,+ ngauri muṋe wanga u khou lwa nndwa dza Yehova,+ a hu nga ḓo wanwa vhuvhi kha iwe vhutshilo hau hoṱhe.+ 29 Arali muthu a tshi u pandamedza uri a u vhulaye, Yehova Mudzimu wau u ḓo u tsireledza u fana na muthu ane a tsireledza zwithu zwa ndeme zwi re mukhwamani, fhedzi vhutshilo ha maswina au u ḓo vhu posa kule u fana na muthu a tshi posa matombo nga gatho. 30 Musi Yehova o no itela muṋe wanga zwithu zwoṱhe zwavhuḓi zwe a zwi fhulufhedzisa, o no u vhea uri u vhe murangaphanḓa kha ḽa Isiraele,+ 31 u nga si ḓisole ngauri u ḓo vha u songo shulula malofha hu si na tshiitisi, u ḓo vha u songo ḓilifhedzela.+ Musi Yehova a tshi u fhaṱutshedza, u songo hangwa mushumeli wau wa mufumakadzi.”

32 Davida a amba na Abigaili a ri: “Nga hu rendwe Yehova Mudzimu wa Isiraele, we a ruma iwe ṋamusi uri u ḓe u ṱangane na nṋe ṋamusi! 33 Nga hu rendwe vhuṱali hau! Ngavhe u tshi fhaṱutshedzwa nge wa nthivhela ṋamusi uri ndi si vhe na mulandu wa malofha+ na uri ndi si ḓilifhedzele. 34 Nga⁠uralo, ndi ana nga Yehova Mudzimu wa Isiraele a tshilaho we a nthivhela uri ndi si u huvhadze.+ Arali u songo ḓa u ṱangana na nṋe nga u ṱavhanya,+ ndi musi hu sa ḓo ponyoka na munna na muthihi wa Nabali a vhona ḽa matshelo.”+ 35 Davida a ṱanganedza zwe Abigaili a mu ḓisela zwone, a ri: “Humela nḓuni yau nga mulalo. Ndo zwi pfa zwe wa amba, ndi ḓo ita zwe wa humbela.”

36 Nga murahu Abigaili a vhuyelela ha Nabali, a mu wana e nḓuni yawe hu na munyanya une wa fana na une wa itwa nga khosi, Nabali* o vha o takala, o kambiwa. Abigaili ho ngo mu vhudza tshithu ḽa vhuya ḽa tsha. 37 Nga matsheloni musi Nabali o no kambuluwa, mufumakadzi wawe a mu vhudza eneo mafhungo. Mbilu ya Nabali ya ima, a oma sa tombo. 38 Musi ho no fhela maḓuvha a ṱoḓaho u vha fumi, Yehova a ita uri Nabali a fe.

39 Musi Davida a tshi pfa uri Nabali o fa, a ri: “Nga hu rendwe Yehova, we a nndamulela+ kha Nabali+ we a ntsema, a thivhela mushumeli wawe uri a si ite vhuvhi,+ Yehova o humisela vhuvhi ha Nabali kha ṱhoho yawe!” Nga zwenezwo, Davida a ruma vhashumeli vhawe uri vha ye vha ambise Abigaili uri a vhe mufumakadzi wawe. 40 Vhashumeli vha Davida vha ya ha Abigaili ngei Karamele vha amba nae vha ri: “Davida o ri ruma ha iwe uri ri ḓe ri u dzhie uri u vhe mufumakadzi wawe.” 41 Nga khathihi fhedzi a ima, a losha o kwatamisa tshifhaṱuwo a ri: “Phuli yau i ḓo vha mushumeli wa u ṱanzwa milenzhe+ ya vhashumeli vha muṋe wanga.” 42 Abigaili+ a takuwa nga u ṱavhanya a ṋamela donngi yawe e na vhashumeli vhawe vhaṱanu vha vhafumakadzi vha tshi khou tshimbila murahu hawe; a ṱuwa na vhaḓinḓa vha Davida a vha mufumakadzi wawe.

43 Davida o vha o no vhinga Ahinoamu+ a bvaho Yeseriele,+ vhuvhili havho vha vha vhafumakadzi vhawe.+

44 Fhedzi Saulo o vha o dzhia Mihali+ ṅwana wawe, ane a vha mufumakadzi wa Davida, a mu ṋea Palati+ murwa wa Laisi, we a vha a tshi bva Galime.