Bugu Ya U Thoma Ya Samuele
3 Nga tshenetsho tshifhinga, mutukana Samuele o vha a tshi khou shumela+ Yehova phanḓa ha Eli, fhedzi ipfi ḽa Yehova ḽo vha ḽi sa anzeli u pfala misini yeneyo; na mabono+ o vha a si manzhi.
2 Ḽiṅwe ḓuvha Eli o vha o eḓela kamarani yawe, o vha a si tsha kona u vhona zwavhuḓi.+ 3 Luvhone+ lwa Mudzimu lwo vha lu sa athu u dzimiwa, Samuele o vha o eḓela thembeleni*+ ya Yehova, he Mbulungelo ya Mudzimu ya vha i hone. 4 Yehova a vhidza Samuele. A fhindula a ri: “Ndi fhano.” 5 A gidima a ya kha Eli, a ri: “Ndi fhano, ngauri wo mmbidza.” Fhedzi Eli a ri: “A tho ngo u vhidza. Huma u ye u eḓele.” Ngauralo, a huma a ya u eḓela. 6 Yehova a dovha a mu vhidza a ri: “Samuele!” Samuele a vuwa a ya ha Eli a ri: “Ndi fhano, wo mmbidza.” Fhedzi Eli a ri: “A tho ngo u vhidza, ṅwananga. Huma u ye u eḓele.” 7 (Samuele o vha a sa athu u ḓivha Yehova, o vha a sa athu u dzumbululelwa ipfi ḽa Yehova.)+ 8 Yehova a dovha a mu vhidza lwa vhuraru a ri: “Samuele!” A vuwa a ya ha Eli a ri: “Ndi fhano, ngauri wo mmbidza.”
Ngauralo, Eli a ṱhogomela uri o vha e Yehova we a vha a tshi khou vhidza mutukana. 9 Nga zwenezwo, Eli a amba na Samuele a ri: “Tshimbila u ye u eḓele, arali a u vhidza, u fanela uri: ‘Yehova amba, ngauri mushumeli wau o thetshelesa.’” Ngauralo, Samuele a ya u eḓela kamarani yawe.
10 Yehova a ḓa a ima henefho, a vhidzelela u fana na u thomani a ri: “Samuele, Samuele!” Samuele a ri: “Amba, mushumeli wau o thetshelesa.” 11 Yehova a amba na Samuele a ri: “Ndi ḓo ita zwiṅwe zwithu Isiraele, zwine zwa ḓo ita uri nḓevhe dza naho e nnyi dzi ṱhoṱhone musi a tshi zwi pfa.+ 12 Nga ḽeneḽo ḓuvha ndi ḓo ita zwoṱhe zwe nda zwi amba nga ha Eli na nnḓu yawe, u bva mathomoni u swika magumoni.+ 13 U mu vhudze uri ndi khou ḓisa khaṱhulo ya lini na lini kha nnḓu yawe nga nṱhani ha vhukhakhi vhune a vhu ḓivha,+ ngauri vharwa vhawe vha khou sema Mudzimu,+ fhedzi ha vha kaidzi.+ 14 Ndi ngazwo ndo anela vha muṱa wa Eli uri vhukhakhi ha vha muṱani wawe vhu nga si pfumelelwe nga zwiṱhavhelo kana nga zwifhiwa.”+
15 Samuele a eḓela u swika ḽi tshi tsha; a kona u vula mavothi a nnḓu ya Yehova. Fhedzi Samuele o vha a tshi khou ofha u vhudza Eli nga ha bono. 16 Eli a vhidza Samuele a ri: “Samuele, ṅwananga!” Samuele a fhindula a ri: “Ndi fhano.” 17 A vhudzisa a ri: “O u vhudza mini? Ndi khou humbela uri u songo ndzumbela. Ngavhe Mudzimu a tshi u ita zwikene na zwikene a dovhe a engedze arali wa ndzumbela wa si mmbudze zwoṱhe zwe a u vhudza zwone.” 18 Ngauralo, Samuele a mu vhudza zwoṱhe zwe Mudzimu a amba, a si mu dzumbele tshithu na tshithihi. Eli a ri: “Ndi Yehova. Kha ite zwo lugaho maṱoni awe.”
19 Samuele a ḓi aluwa, Yehova o vha e nae,+ a ita uri zwoṱhe zwe a zwi amba zwi itee. 20 Shangoni ḽoṱhe ḽa Isiraele, u bva Dani u swika Beresaba, vha ḓivha uri Samuele o no vha muporofita wa Yehova. 21 Yehova a bvela phanḓa a tshi ḓivhonadza ngei Shiḽo, ngauri Yehova o ḓidzumbulula kha Samuele ngei Shiḽo. Zwenezwo Yehova o zwi ita a tshi shumisa ipfi ḽawe.+