Vhurifhi Ha U Thoma Vhu Yaho Kha Vhakorinta
9 Naa a tho ngo vhofholowa? Kani a thi muapostola? Naa a tho ngo vhona Yesu Murena washu?+ Naa a ni zwine na vha zwone nga nṱhani ha mushumo wanga Murenani? 2 Naho ndi si muapostola kha vhaṅwe, ndi muapostola waṋu. Ni vhuṱanzi vhu sumbedzaho uri ndi muapostola wa Murena.
3 Kha vhane vha nkhaṱhula ndi ri: 4 Naa a ro ngo tea u wana zwa u ḽa na zwa u nwa kha vhaṅwe? 5 Naa a ro ngo tea u tshimbila na mufumakadzi a re mutendi,+ u fana na vhaṅwe vhaapostola na vharathu+ vha Murena na Kefa?*+ 6 Kani ndi nṋe na Baranaba+ vhane vha tea u shuma uri ri ḓitshidze? 7 Naa hu na swole ḽine ḽa nga ḓibadelela zwithu zwoṱhe musi ḽi vhuswoleni? Ndi nnyi ane a nga ṱavha minḓirivhe a si ḽe mitshelo yayo?+ Kana ndi nnyi ane a nga lisa sambi a si nwe mafhi aḽo?
8 Zwine nda zwi amba a zwi ambiwi nga vhathu fhedzi. Na Mulayo u a zwi amba. 9 Ngauri kha Mulayo wa Mushe ho ṅwaliwa u pfi: “U songo thivha kholomo mulomo musi i tshi khou fhula thoro.”+ Naa Mudzimu u khou vhilaela nga ha kholomo? 10 Kani o amba zwenezwi a tshi itela riṋe? Zwo ṅwaleliwa riṋe, ngauri ane a lima na ane a fhula u fanela u zwi ita e na fhulufhelo ḽa uri u ḓo ḽa zwenezwo.
11 Arali ro ni funza zwithu zwi bvaho kha Mudzimu,* naa zwi ḓo vha zwo khakhea uri ni ri ṋee zwine ra zwi shaya?+ 12 Arali vhaṅwe vha tshi wana zwenezwo kha inwi, naa na riṋe a ro ngo tea uri ri wane zwenezwo? Naho zwo ralo, a ro ngo humbela tshithu,+ fhedzi ri khou konḓelela zwithu zwoṱhe, uri ri si thivhele mafhungo maḓifha a ambaho nga Kristo.+ 13 Naa a ni zwi ḓivhi uri vhane vha shuma thembeleni vha ḽa zwithu zwi re thembeleni, na vhane vha shuma aḽeṱareni vha wana mukovhe wa zwo ṋekedzwaho aḽeṱareni?+ 14 Murena a tshi ralo o vha a tshi khou vhudza vhane vha ḓivhadza mafhungo maḓifha uri vha tshile* ngao.+
15 Fhedzi a hu na zwe nda ni humbela.+ A tho ngo ṅwala zwenezwi zwithu uri ndi iteliwe zwone, ngauri ndi khwine u fa nṱhani ha u dzhielwa zwiitisi zwanga zwa u ḓihudza!+ 16 Arali ndi tshi khou ḓivhadza mafhungo maḓifha, a tho ngo fanela u zuwa, ngauri ndo ṋewa vhuḓifhinduleli. Khombo kha nṋe arali ndi sa ḓivhadzi mafhungo maḓifha!+ 17 Arali ndi tshi takalela u ita zwenezwo, ndi ḓo wana malamba; naho ndi tshi tou ḓikombetshedza, ndi fanela u zwi ita ngauri ndo ṋewa vhuḓifhinduleli.+ 18 Malamba anga ndi afhio? Malamba anga ndi u ḓivhadza mafhungo maḓifha ndi sa badelisi. Zwenezwi zwi ḓo nthusa uri ndi si humbele tshithu u itela u ḓivhadza mafhungo maḓifha.
19 Naho ndi si mulanda wa muthu, ndo ḓiita mulanda kha vhoṱhe, uri ndi kunge vhathu vhanzhi. 20 Kha Vhayuda, ndo ḓiita Muyuda, uri ndi kunge Vhayuda;+ kha vha re fhasi ha mulayo, ndo ḓiita ane a vha fhasi ha mulayo, naho ndi siho fhasi ha mulayo, uri ndi kone u kunga vha re fhasi ha mulayo.+ 21 Kha vha si na mulayo, ndo ḓiita a si na mulayo, naho ndi tshi tevhedza mulayo wa Mudzimu na wa Kristo,+ uri ndi kunge vha si na mulayo. 22 Kha vha si na nungo, ndo ḓiita a si na nungo, uri ndi kunge vha si na nungo.+ Ndo vha zwithu zwoṱhe kha vhathu vhoṱhe, uri ndi tshidze vhaṅwe nga hune zwa nga konadzea ngaho. 23 Fhedzi ndi ita zwoṱhe ndi tshi itela mafhungo maḓifha, uri ndi kone u a huwelela kha vhaṅwe.+
24 Vhagidimi vha gidima vhe vhanzhi kha mbambe, fhedzi pfufho i waniwa nga muthihi. Gidimani nga nḓila ine ya ita uri ni wane pfufho.+ 25 Zwiṅwe hafhu, vhoṱhe vhane vha dzhenela mbambe vha a ḓifara kha zwithu zwoṱhe. Vha ita zwenezwi uri vha wane khare i ṱahalaho,+ fhedzi riṋe ri wana i sa ṱahali.+ 26 A thi gidimi sa ane a si ḓivhe hune a ya;+ a thi rwi sa ane a rwa muya; 27 fhedzi ndi langa* muvhili wanga+ na u u livhisa sa phuli, uri musi ndo no huwelela kha vhaṅwe, Mudzimu a si nndaṱe.*