Nzumbululo I Yaho Kha Yohane
12 Ha vhonala bono ḽihulu ngei ṱaḓulu. Kha ḽeneḽo bono ho vha hu na mufumakadzi+ o ambaraho ḓuvha, ṅwedzi u nga fhasi ha milenzhe yawe, hu na khare ya ṋaledzi dza 12 ṱhohoni yawe, 2 o vhifha muvhilini. A ṱavha mukosi musi a tshi pfa vhuṱungu ha u beba.
3 Ha dovha ha vhonala ḽiṅwe bono ngei ṱaḓulu. Ho vha hu na ḽigweṋa ḽihulu ḽo tswukaho sa mulilo,+ ḽi na ṱhoho dza sumbe na ṋanga dza fumi, ḽi na khare dza sumbe ṱhohoni yaḽo; 4 mutshila waḽo wa kokodza tshipiḓa tshithihi kha zwiraru tsha ṋaledzi,+ wa dzi wisela kha ḽifhasi.+ Ḽigweṋa ḽa ima phanḓa ha onoyo mufumakadzi+ we a vha e tsini na u beba, uri ḽi mile ṅwana wawe musi a tshi beba.
5 Onoyo mufumakadzi a beba ṅwana wa mutukana,+ ane a ḓo lisa tshaka dzoṱhe nga lubaḓa lwa tsimbi.+ Onoyo ṅwana a iswa nga u ṱavhanya kha Mudzimu we a vha o dzula kha khuluṋoni yawe. 6 Mufumakadzi a shavhela sogani, fhethu he a vha o lugiselelwa hone nga Mudzimu, o vha a tshi ḓo ṋewa zwiḽiwa maḓuvha a 1 260.+
7 Ha vuwa nndwa ngei ṱaḓulu: Mikaele*+ na vharuṅwa vhawe vha lwa na ḽigweṋa, ḽigweṋa na vharuṅwa vhaḽo vha lwa navho, 8 fhedzi vha kundwa,* vha si tsha wana fhethu ha u dzula ngei ṱaḓulu. 9 Ḽigweṋa+ ḽihulu ḽa poswa kha ḽifhasi, ḽiṋowa ḽa kale na kale,+ ḽine ḽa pfi Diabolo+ na Saṱhane,+ ḽine ḽa khou xedza ḽifhasi ḽoṱhe;+ na vharuṅwa vhaḽo vha poswa kha ḽifhasi naḽo.+ 10 Nda pfa ipfi ḽi tshi vhidzelela ḽi ṱaḓulu ḽi tshi ri:
“Tshifhinga tsha uri Mudzimu a tshidze+ vhathu tsho swika, o sumbedza maanḓa awe, Muvhuso wawe u khou vhusa,+ na Kristo o thoma u vhusa, ngauri ane a pomoka vhahashu vhusiku na masiari phanḓa ha Mudzimu washu,+ o poswa fhasi! 11 Vho mu kunda+ nga malofha a Ngwana+ na nga mulaedza we vha u ḓivhadza,+ vho ḓiimisela na u fa.+ 12 Ndi ngazwo ni tshi tea u takala inwi ḽiṱaḓulu na vho dzulaho khaḽo! Khombo kha ḽifhasi na lwanzhe,+ ngauri Diabolo o tsela henengeo kha inwi e na mbiti khulu, a tshi ḓivha uri o salelwa nga tshifhinga tshiṱuku.”+
13 Musi ḽigweṋa ḽi tshi vhona uri ḽo poswa kha ḽifhasi,+ ḽa tovhola mufumakadzi+ we a beba ṅwana wa mutukana. 14 Fhedzi onoyo mufumakadzi a ṋewa phapha mbili dza goni ḽihulu,+ uri a fhufhele fhethu hawe sogani, hune a ḓo ṋewa zwiḽiwa lwa tshifhinga na zwifhinga na hafu ya tshifhinga*+ e kule na ḽiṋowa.+
15 Ḽiṋowa ḽa ṱanza maḓi a ngaho mulambo uri a tevhele onoyo mufumakadzi, uri wonoyo mulambo u mu kumbe. 16 Fhedzi ḽifhasi ḽa thusa onoyo mufumakadzi, ḽa vula mulomo waḽo ḽa nwa eneo maḓi a ngaho mulambo o ṱanziwaho nga ḽigweṋa. 17 Ḽigweṋa ḽa sinyutshela mufumakadzi, ḽa ya ḽa lwa na vhana* vhawe+ vho salaho vhane vha tevhedza milayo ya Mudzimu, vha re na mushumo wa u huwelela nga ha Yesu.+