Mishumo Ya Vhaapostola

7 Fhedzi tshifhe muhulu a ri: “Naa zwenezwo ndi ngoho?” 2 Stefano a ri: “Vhahashu na vhokhotsi anga, nthetsheleseni. Mudzimu wa vhugala o ḓivhonadza kha makhulukuku washu Abrahamu musi e ngei Mesopotamia, a sa athu u pfulutshela Harani,+ 3 a amba nae a ri: ‘Ṱuwa shangoni ḽa hau, u sie na mashaka au, u ye shangoni ḽine nda ḓo u sumbedza ḽone.’+ 4 A pfuluwa shangoni ḽa Vhakaladea a ya a dzula ngei Harani. Musi khotsi awe o no fa,+ Mudzimu a mu pfulusa henefho, a mu dzudza kha ḽeneḽi shango ḽine na dzula khaḽo zwino.+ 5 Naho zwo ralo, Mudzimu ho ngo mu ṋea ifa kha ḽeneḽo shango, fhedzi o fhulufhedzisa u mu ṋea ḽone uri ḽi vhe ḽawe na ḽa vhana* vhawe,+ naho o vha a sa athu u vha na vhana. 6 Zwiṅwe hafhu, Mudzimu o mu vhudza uri vhana* vhawe vha ḓo dzula shangoni ḽi si ḽavho, vha ḓo itwa dziphuli, vha tambudzwa lwa miṅwaha ya 400.+ 7 Mudzimu a ri, ‘Lwonolwo lushaka lune lwa ḓo vha ita phuli ndi ḓo lu haṱula,+ nga murahu ha zwenezwo, vha ḓo vhuya vha nnyitela mushumo mukhethwa henefha fhethu.’+

8 “A vhofha mulanga na Abrahamu wa u fumbisa,+ Abrahamu a beba Isaka,+ a mu fumbisa nga ḓuvha ḽa vhumalo,+ Isaka a beba Yakobo, Yakobo a vha khotsi a tshaka dza 12.* 9 Vhakomana vha Yosefa+ vho vha na vivho khae, vha mu rengisa, a iswa Egipita.+ Fhedzi Mudzimu o vha e nae,+ 10 a mu tsireledza kha u tambula hawe hoṱhe, a ita uri a ṱalifhe na u takalelwa nga Farao khosi ya Egipita. Farao a mu vhea uri a vhuse Egipita na nnḓu yawe yoṱhe.+ 11 Fhedzi ho vha na maṱungu mahulu musi hu tshi vha na nḓala kha ḽoṱhe ḽa Egipita na Kanana; vhomakhulukuku washu vha si kone u wana zwiḽiwa.+ 12 Yakobo a pfa uri hu na zwiḽiwa ngei Egipita, a ruma vhomakhulukuku washu.+ 13 Musi vha tshi vhuyelela lwa vhuvhili, Yosefa a ḓiḓivhadza kha vhakomana vhawe, muṱa wa ha Yosefa wa ḓivhiwa nga Farao.+ 14 Yosefa a amba uri hu vhidzwe Yakobo khotsi awe na mashaka awe oṱhe e a vha a tshi dzula henefho,+ vho vha vhe 75.+ 15 Yakobo a ya Egipita,+ a fela henengei,+ na vhomakhulukuku washu vha fela henengei.+ 16 Vha iswa Shikeme, vha vhulungwa vhiḓani ḽe Abrahamu a ḽi renga kha vharwa vha Hemoro ngei Shikeme.+

17 “Musi hu tshi vho swika tshifhinga tsha uri hu itee zwe Mudzimu a zwi fhulufhedzisa Abrahamu, vhathu vha engedzea ngei Egipita, 18 u swikela hu tshi vha na iṅwe khosi ngei Egipita, ye ya vha i sa ḓivhi Yosefa.+ 19 Yeneyo khosi ya tambudza vhokhotsi ashu, ya ita uri vha laṱe vhana vhavho uri vha fe.+ 20 Nga tshenetsho tshifhinga, ha bebiwa Mushe, o vha o naka vhukuma phanḓa ha Mudzimu. A leliwa miṅwedzi miraru hayani ha hawe.+ 21 Fhedzi musi a tshi laṱiwa,+ a dobiwa nga ṅwananyana wa Farao, a mu alusa sa murwa wawe.+ 22 Mushe a funzwa vhuṱali hoṱhe ha Vhaegipita. O vha e na maanḓa kha zwe a vha a tshi zwi amba na u zwi ita.+

23 “Musi e na miṅwaha ya 40, a humbula u ya u vhona Vhaisiraele, vhathu vhahawe.+ 24 Musi a tshi vhona muṅwe wavho a tshi khou tambudzwa, a mu lamulela na u mu lifhedzela nga u vhulaya Muegipita. 25 O vha a tshi humbula uri vhahawe vha ḓo pfesesa uri Mudzimu o vha a tshi khou vha tshidza nga tshanḓa tshawe, fhedzi a vho ngo zwi pfesesa. 26 Nga ḓuvha ḽi tevhelaho musi a tshi ya khavho, a wana vha tshi khou lwa nga tshavho, a lingedza u vha lamula, a ri: ‘Ni murathu na mukomana. Ni khou lwela mini?’ 27 Fhedzi we a vha a tshi khou tambudza muhura wawe, a mu sukumedzela kule, a ri: ‘Ndi nnyi we a ri u muvhusi na muhaṱuli washu? 28 Naa u khou ṱoḓa u mmbulaya samusi wo vhulaya uḽa Muegipita mulovha?’ 29 Musi Mushe a tshi pfa zwenezwo, a shavha a ya a dzula shangoni ḽa Midiani, a beba vharwa vhavhili henefho.+

30 “Ho no fhela miṅwaha ya 40, muruṅwa a ḓa khae musi e sogani, tsini na Thavha ya Sinai, e tshiṱakani tsha mipfa tshi dugaho.+ 31 Musi Mushe a tshi vhona zwenezwo a mangala. Fhedzi a tshi sendela tsini uri a kone u vhona zwavhuḓi, a pfa ipfi ḽa Yehova* ḽi tshi ri: 32 ‘Ndi Mudzimu wa vhomakhulukuku wau, Mudzimu wa Abrahamu, Isaka na Yakobo.’+ Mushe a tshuwa, a si tsha sedza tshenetsho tshiṱaka. 33 Yehova* a ri: ‘Bvula thovho* dzau, ngauri fhethu he wa ima hone ndi hukhethwa. 34 Ndo vhona vhathu vhanga vha tshi tsikeledzwa ngei Egipita, nda pfa na zwililo zwavho,+ nda tsa uri ndi vha tshidze. Zwino iḓa ndi u rume Egipita.’ 35 Onoyo Mushe we vha mu landula, vha ri: ‘Ndi nnyi we a ri u muvhusi na muhaṱuli washu?’+ ndi ene we Mudzimu a mu ruma+ uri a vhe muvhusi na muvhofhololi a tshi shumisa muruṅwa we a ḓivhonadza khae tshiṱakani tsha mipfa. 36 Onoyo munna o vha bvisa Egipita,+ o ita zwithu zwi mangadzaho na vhuṱolo ngei Egipita,+ Lwanzheni Lutswuku+ na ngei sogani lwa miṅwaha ya 40.+

37 “Ndi onoyo Mushe we a amba na Vhaisiraele a ri: ‘Mudzimu u ḓo ni vusela muporofita ane a nga nṋe vhukati ha vhahaṋu.’+ 38 Ndi onoyo Mushe we a vha e vhukati ha vhathu vha Isiraele ngei sogani, e na muruṅwa+ we a amba nae+ ngei Thavhani ya Sinai na vhomakhulukuku washu, a ṱanganedza mulaedza u bvaho kha Mudzimu uri a ri ṋee wone.+ 39 Vhomakhulukuku washu a vho ngo mu thetshelesa, vho mu shandukela,+ mbiluni dzavho vha tshi ṱoḓa u humela Egipita,+ 40 vha amba na Aroni vha ri: ‘Ri itele midzimu ine ya ḓo ri ranga phanḓa. Ngauri a ri ḓivhi zwe zwa itea kha Mushe, we a ri bvisa shangoni ḽa Egipita.’+ 41 Vha ita ṋamana misini yeneyo, vha ṋekedza zwiṱhavhelo mudzimu wa tshifanyiso, vha ita tshimima vha tshi takalela zwe vha ita.+ 42 Mudzimu a vha furalela, a vha litsha vha tshi gwadamela ṋaledzi dza ṱaḓulu,+ samusi zwo ṅwaliwa buguni ya Vhaporofita ha pfi: ‘Naa inwi vha nnḓu ya Isiraele ni tshi ṋekedza zwifuwo na zwiṱhavhelo miṅwaha ya 40 ngei sogani, no vha ni tshi khou itela nṋe? 43 No vha ni tshi hwala dennde ḽa Moloxo+ na ṋaledzi ya mudzimu waṋu Remfani. Zwenezwi ndi zwifanyiso zwe na zwi ita uri ni zwi gwadamele. Ndi ngazwo ndi tshi ḓo ni isa kule na Babele.’+

44 “Vhomakhulukuku washu vho vha vhe na dennde ḽikhethwa* ngei sogani. Mudzimu o vhudza Mushe uri a ḽi ite u ya nga zwe a mu sumbedza zwone.+ 45 Vhomakhulukuku washu vho ḽi ṱanganedza, vha ḽi ḓisa vhe na Yoshua shangoni ḽe ḽa vha ḽo dzula tshaka+ dze Mudzimu a dzi pandela, a tshi itela vhomakhulukuku washu.+ Ḽa dzula henefho u swika misini ya Davida. 46 Onoyo o vha a tshi takalelwa nga Mudzimu, a humbela ndugelo ya u fhaṱela Mudzimu wa Yakobo nnḓu.+ 47 Fhedzi ndi Salomo we a mu fhaṱela nnḓu.+ 48 Wa-Ṱaḓulu-ṱaḓulu ha dzuli nḓuni dzo fhaṱwaho nga zwanḓa zwa vhathu,+ samusi muporofita o amba a ri: 49 ‘Yehova* u ri: Ḽiṱaḓulu ndi khuluṋoni yanga,+ ḽifhasi ndi fhethu hune nda kanda hone.+ Ni nga mphaṱela nnḓu ya mufuda-ḓe? Kana hune nda nga awela hone ndi ngafhi? 50 Hezwi zwithu zwoṱhe zwo itwa nga nṋe.’+

51 “Inwi vha re na tshikhuna, vha nḓevhe dzo valeaho na vha sa funi u shandula nḓila ine na humbula ngayo, ni dzula ni tshi lwa na muya mukhethwa u fana na vhomakhulukuku waṋu.+ 52 Ndi ufhio muporofita we vhomakhulukuku waṋu vha si mu tovhole?+ Vho vhulaya vhe vha ḓivhadza hu tshee nga phanḓa nga ha u ḓa ha muthu o lugaho,+ we inwi na mu fheṱa na u mu vhulaya,+ 53 inwi vhe na ṱanganedza Mulayo we wa ḓiswa nga vharuṅwa,+ fhedzi ni si u tevhedze.”

54 Musi vha tshi pfa zwenezwo, vha mu sinyutshela vha shenganya maṋo nga mbiti. 55 Stefano a lavhelesa ṱaḓulu o ḓala muya mukhethwa, a vhona vhugala ha Mudzimu na Yesu o ima thungo ya tshanḓa tsha u ḽa tsha Mudzimu,+ 56 a ri: “Ndi khou vhona ḽiṱaḓulu ḽo vulea, Murwa muthu+ o ima thungo ya tshanḓa tsha u ḽa tsha Mudzimu.”+ 57 Musi a tshi ralo, vha ṱavha mukosi vho vala nḓevhe nga zwanḓa zwavho, vhoṱhe vha mu gidimela. 58 Musi vho no mu sukumedzela nnḓa ha muḓi, vha mu kanḓa nga matombo.+ Vha re dziṱhanzi+ vha vhea zwiambaro zwavho tsini na muṱhannga ane a pfi Saulo.+ 59 Musi vha tshi khou kanḓa Stefano nga matombo, a humbela a ri: “Murena Yesu, vhutshilo hanga ndi vhu kumedzela zwanḓani zwau.” 60 A gwadama a vhidzelela, a ri: “Yehova,* u songo vha lifhedza tshenetshi tshivhi.”+ Musi o no amba zwenezwo, a fa.