Dotoronomio

5 Mushe a vhidza Vhaisiraele vhoṱhe a amba navho a ri: “Inwi Isiraele, thetshelesani maitele na mahaṱulele zwine nda khou ni vhudza zwone ṋamusi, ni tea u zwi guda na u zwi tevhedza nga vhuronwane. 2 Yehova Mudzimu washu o vhofha mulanga na riṋe ngei Horebe.+ 3 Yehova ho ngo vhofha wonoyu mulanga na vhomakhulukuku washu, fhedzi o u vhofha na riṋe, riṋe roṱhe vhane vha khou tshila ṋamusi. 4 Yehova o amba na inwi no livhana zwifhaṱuwo ngei thavhani e vhukati ha mulilo.+ 5 Nga tshenetsho tshifhinga ndo vha ndo ima vhukati ha Yehova na inwi+ uri ndi ni vhudze zwe Yehova a vha a tshi khou amba zwone ngauri inwi no vha ni tshi khou ofha mulilo, a no ngo gonya thavhani.+ A ri:

6 “‘Ndi nṋe Yehova Mudzimu wau, we a u bvisa shangoni ḽa Egipita, nḓuni ya vhupuli.+ 7 U songo gwadamela miṅwe midzimu nga nnḓa ha nṋe.*+

8 “‘U songo ḓivhaḓela tshifanyiso+ kana u ita tshifanyiso tsha zwa ṱaḓulu kana zwi re kha ḽifhasi kana zwi re maḓini. 9 U songo zwi gwadamela kana wa ungeledzwa uri u zwi shumele,+ ngauri nṋe Yehova Mudzimu wau ndi Mudzimu ane a ṱoḓa u tshi ḓikumedza tshoṱhe khae,+ ane a pfisa vhana vhuṱungu nga nṱhani ha vhukhakhi ha vhokhotsi avho, u swika kha murafho wa vhuraru na wa vhuṋa kha vhane vha mmbenga,+ 10 fhedzi ane a sumbedza lufuno lu sa shanduki u swika kha mirafho ya zwigidi ya vhane vha mpfuna na vhane vha tevhedza milayo yanga.

11 “‘U songo shumisa luvhi+ dzina ḽa Yehova Mudzimu wau, ngauri Yehova a nga si litshe u pfisa vhuṱungu ane a shumisa luvhi dzina ḽawe.+

12 “‘U tevhedze ḓuvha ḽa Savhatha, u ḽi ite ḽikhethwa, sa zwe Yehova Mudzimu wau a u laya.+ 13 Mishumo yau yoṱhe u i ite nga maḓuvha a rathi,+ 14 fhedzi nga ḓuvha ḽa vhusumbe ndi savhatha ya Yehova Mudzimu wau.+ U songo shuma tshithu,+ iwe na murwa wau, ṅwananyana wau, phuli yau ya munna, phuli yau ya mufumakadzi, na zwifuwo zwau na mutsinda ane a dzula nḓuni yau+ uri phuli yau ya munna na ya mufumakadzi vha awele u fana na iwe.+ 15 U humbule uri wo vha u phuli shangoni ḽa Egipita, Yehova Mudzimu wau a u bvisa henefho nga tshanḓa tsha maanḓa.+ Ndi ngazwo Yehova Mudzimu wau o u laya uri u vhulunge Savhatha.

16 “‘Hulisa khotsi au na mme au,+ samusi Yehova Mudzimu wau o u laya, uri u tshile tshifhinga tshilapfu, u bvelele* u shangoni ḽine Yehova Mudzimu wau a khou ṋea ḽone.+

17 “‘U songo vhulaya.+

18 “‘U songo vha phombwe.+

19 “‘U songo tswa.+

20 “‘U songo ambela muṅwe muthu vhuṱanzi ha u zwifha.+

21 “‘U songo emula mufumakadzi wa muṅwe muthu.+ U songo emula nnḓu ya muṅwe muthu, tsimu yawe, phuli yawe ya munna, phuli yawe ya mufumakadzi, mboho yawe, donngi yawe kana tshithu tsha muṅwe muthu.’+

22 “Yeneyi milayo Yehova o i vhudza tshivhidzo tshoṱhe ngei thavhani e vhukati ha mulilo, e kha gole, e kha buluvhutsi,+ nga ipfi ḽihulu, a si tsha amba zwiṅwe; nga murahu a ṅwala kha mbaba mbili dza matombo a nṋea dzone.+

23 “Fhedzi musi ni tshi tou pfa ipfi ḽi tshi bva swiswini, musi thavha i tshi khou duga mulilo,+ vharangaphanḓa vhoṱhe vha tshaka dzaṋu na vhahulwane vhaṋu vho ḓa kha nṋe. 24 Na ri: ‘Yehova Mudzimu washu o ri sumbedza vhugala hawe na vhuhulu hawe, ro pfa ipfi ḽawe ḽi tshi bva vhukati ha mulilo.+ Ṋamusi ro zwi vhona uri Mudzimu a nga amba na vhathu vha tshila.+ 25 Zwino ndi ngani ri tshi fanela u fa? Ngauri hoyu mulilo muhulu u ḓo ri vhulaya. Arali ra bvela phanḓa ri tshi thetshelesa ipfi ḽa Yehova Mudzimu washu ri ḓo fa. 26 Ndi nnyi kha vhathu vhoṱhe we a vhuya a pfa ipfi ḽa Mudzimu a tshilaho a tshi khou amba e vhukati ha mulilo samusi ro zwi pfa, fhedzi a tshila? 27 Iwe u tea u sendela wa pfa zwoṱhe zwine Yehova Mudzimu washu a zwi amba, ndi iwe ane wa ḓo ri vhudza zwine Yehova Mudzimu washu a u vhudza, ri ḓo thetshelesa ra zwi ita.’+

28 “Yehova a pfa zwe na mmbudza zwone, Yehova a amba na nṋe a ri: ‘Ndo pfa zwoṱhe zwe vhenevha vhathu vha u vhudza zwone. Zwoṱhe zwe vha amba ndi zwone.+ 29 Ngavhe vha tshi dzula vhe na mbilu dzi ofhaho nṋe,+ vha tevhedza ndaela dzanga dzoṱhe;+ tshifhinga tshoṱhe zwi ḓo vha tshimbilela zwavhuḓi na vhana vhavho!+ 30 Tshimbila u vha vhudze u ri: “Vhuyelelani madenndeni aṋu.” 31 Fhedzi iwe u sale henefha na nṋe, ndi u vhudze ndaela dzoṱhe, maitele na mahaṱulele zwine wa fanela u vha funza, vha zwi tevhedze shangoni ḽine nda khou vha ṋea ḽone uri ḽi vhe ḽavho.’ 32 Zwino inwi ni fanela uri ni ṱhogomele ni ite zwe Yehova Mudzimu waṋu a ni laya.+ Ni songo pambutshela kha tsha u ḽa kana kha tsha monde.+ 33 Ni tshimbile nḓilani ye Yehova Mudzimu waṋu a ni laya uri ni tshimbile khayo+ uri ni tshile ni bvelele, ni lalame shangoni ḽine na ḓo ḽi dzhia ḽa vha ḽaṋu.+