Levitiko

5 “‘Arali muthu o vhona muṅwe a tshi ita tshivhi kana a ḓivha nga hazwo, u vha ṱhanzi. Arali onoyo muthu o vhudzwa uri a ḓe a ṱanziele+ nga ha onoyo muitazwivhi, fhedzi a si ḓe a ṱanziela, o ita tshivhi, u ḓo ḓifhindulela kha honoho vhukhakhi hawe.

2 “‘Kana arali muthu a kwama naho tshi tshini tshi songo kunaho, hu sa londwi uri ndi mutumbu wa phukha, tshifuwo tshi songo kunaho, zwivhumbiwa zwi tshatshamaho,+ ho ngo kuna u na mulandu naho a songo zwi ṱhogomela. 3 Kana muṅwe a kwama tshika ya muthu a songo zwi ṱhogomela,+ naho tshi tshini tshi songo kunaho tshine tsha nga mu tshikafhadza, a ḓivha nga hazwo, nga zwenezwo u na mulandu.

4 “‘Kana arali muthu a ana uri u ḓo ita zwiṅwe zwithu a songo thoma a humbula, hu sa londwi uri ndi u ita zwivhuya kana zwivhi, naho zwi zwifhio, musi a tshi zwi ṱhogomela uri o ana a songo thoma a humbula u vha e na mulandu.*+

5 “‘Arali a vha na mulandu kha zwenezwi zwithu, u tea u bula+ nḓila ye a ita ngayo tshenetsho tshivhi. 6 A dovhe a ḓise tshifhiwa tsha u pfumelela mulandu kha Yehova u itela tshivhi tshe a tshi ita,+ a ḓise ngwana ya tsadzi kana mbudzi ya tsadzi, u itela tshifhiwa tsha u pfumelela tshivhi. Tshifhe u ḓo mu pfumelela tshivhi tshawe.

7 “‘Arali a si na tshelede yo linganaho u renga nngu, a ḓisele Yehova maivha-muronzhe mavhili kana mafhondo mavhili a maivha+ sa tshifhiwa tsha u pfumelela mulandu wawe wa tshivhi, ḽiṅwe ḽi ḓo vha ḽa tshifhiwa tsha u pfumelela tshivhi, ḽiṅwe ḽa vha ḽa tshifhiwa tsha u fhiswa.+ 8 A a ḓise ha tshifhe, ane a ḓo thoma nga u ṋekedza ḽa tshifhiwa tsha u pfumelela tshivhi, a ḽi tshee mukulo fhedzi a si u tumule. 9 A hashe maṅwe a malofha a tshifhiwa tsha u pfumelela tshivhi nga thungo ha aḽeṱare, fhedzi malofha o salaho a ḓo shululelwa fhasi phanḓa ha aḽeṱare.+ Ndi tshifhiwa tsha u pfumelela tshivhi. 10 Ḽiṅwe a ḽi ite sa tshifhiwa tsha u fhiswa a tshi tevhedza maitele o ḓoweleaho;+ tshifhe u ḓo mu itela tshipfumelelo tsha tshivhi tshe a tshi ita, u ḓo hangwelwa.+

11 “‘Arali a nga si kone u renga maivha-muronzhe mavhili kana mafhondo mavhili a maivha, a ḓise tshipiḓa tshithihi kha zwa fumi tsha tshikalo tsha efa*+ tsha fuḽauru tsekene u itela tshifhiwa tsha u pfumelela tshivhi tshawe. Ho ngo fanela u shela mapfura khayo kana zwioro zwitshena, nga⁠uri ndi tshifhiwa tsha u pfumelela tshivhi. 12 A i ḓise ha tshifhe, tshifhe u ḓo ṱusa yo ḓadzaho tshanḓa tshawe sa tshifhiwa tsha tshihumbudzi, a i dubise kha aḽeṱare nṱha ha zwifhiwa zwi fhiselwaho Yehova. Ndi tshifhiwa tsha u pfumelela tshivhi. 13 Tshifhe u fanela u mu itela tshipfumelelo tsha tshivhi tshe a tshi ita, naho tshi tshifhio tsha zwenezwi zwivhi, u ḓo hangwelwa.+ Tshifhiwa tsho salaho tshi ḓo vha tsha tshifhe,+ u fana na tshifhiwa tsha thoro.’”+

14 Yehova a bvela phanḓa a tshi amba na Mushe a ri: 15 “Arali muthu a sa fhulufhedzea a ita tshivhi nga u shumisa luvhi zwithu zwikhethwa zwa Yehova a songo ḓiimisela,+ a ḓisele Yehova thutha i sa lwaliho sa tshifhiwa tsha u pfumelela mulandu;+ mutengo wayo wa shekele* dza siḽiva u elwa u ya nga nḓila ine ha elwa ngayo tshileme tsha shekele fhethu hukhethwa.+ 16 U ḓo lifha a tshi itela tshivhi tshe a tshi ita nga u shumisa luvhi zwithu zwikhethwa, a dovha a engedza tshithihi tsha zwiṱanu tsha mutengo wayo.+ A tshi ṋee tshifhe uri a mu pfumelele+ nga thutha ya tshifhiwa tsha u pfumelela mulandu, u ḓo hangwelwa.+

17 “Arali muthu a ita tshivhi nga u ita naho tshi tshini tshe Yehova a laya uri tshi songo itwa, naho o vha a sa zwi ḓivhi, u na mulandu, u ḓo ḓifhindulela honoho vhukhakhi hawe.+ 18 A ḓisele tshifhe thutha i sa lwaliho ine ya ṱoḓou lingana na mutengo wa tshifhiwa tsha u pfumelela mulandu.+ Tshifhe u ḓo mu pfumelela a tshi itela vhukhakhi hawe he a vhu ita a songo ḓiimisela a sa zwi ḓivhi, u ḓo hangwelwa. 19 Ndi tshifhiwa tsha u pfumelela mulandu. O khakhela Yehova.”