Ekisoda

3 Mushe a vha mulisa wa sambi ḽa Yetero,*+ makhulu* wawe, tshifhe wa Midiani. Musi a tshi khou khadela sambi thungo ya vhukovhela ya soga, a fheleledza o swika Horebe,+ thavhani ya Mudzimu wa ngoho. 2 Muruṅwa wa Yehova a ḓa khae e tshiṱakani tsha mipfa tshi dugaho.+ Musi a tshi lavhelesa, a vhona mulilo u tshi khou duga kha tshiṱaka tsha mipfa, fhedzi tshenetsho tshiṱaka tsha mipfa tshi sa khou swa. 3 Mushe a tshi vhona zwenezwo a ri: “Ndi tea u sendela uri ndi vhone ḽeneḽi bono, ndi vhone uri ndi ngani tshenetshi tshiṱaka tshi sa khou swa.” 4 Musi Yehova a tshi vhona uri o sendela henefho uri a vhone, Mudzimu a mu vhidzelela e vhukati ha tshiṱaka tsha mipfa a ri: “Mushe! Mushe!” Ene a ri: “Ndi fhano.” 5 Mudzimu a ri: “U songo sendela tsini. Bvula thovho* dzau, ngauri fhethu he wa ima hone ndi hukhethwa.”

6 A dovha a ri: “Ndi Mudzimu wa khotsi au, Mudzimu wa Abrahamu,+ Mudzimu wa Isaka+ na Mudzimu wa Yakobo.”+ Mushe a fukedza tshifhaṱuwo tshawe, ngauri o vha a tshi khou ofha u sedza Mudzimu wa ngoho. 7 Yehova a ri: “Ndo vhona vhathu vhanga vha tshi tambula ngei Egipita, ndo pfa zwililo zwavho nga nṱhani ha vhane vha khou vha kombetshedza u shuma; ndi ḓivha zwavhuḓi vhuṱungu vhune vha khou vhu pfa.+ 8 Ndi ḓo tsa uri ndi vha tshidze zwanḓani zwa Vhaegipita,+ nda vha isa shangoni ḽavhuḓi ḽine ḽa vha ḽihulwane, shango ḽi elelaho mafhi na mutoli,+ hu dzulaho Vhakanana, Vhahethe, Vhaamori, Vhapheresi, Vhahevi na Vhayebusi.+ 9 Zwililo zwa Vhaisiraele zwo swika kha nṋe, ndo dovha nda vhona na nḓila ine Vhaegipita vha khou vha tsikeledza ngayo.+ 10 Zwino iḓa ndi u rume ha Farao uri u bvise vhathu vhanga Vhaisiraele shangoni ḽa Egipita.”+

11 Naho zwo ralo, Mushe a amba na Mudzimu wa ngoho a ri: “Nṋe ndi tou vha nnyi ane a fanela u ya ha Farao nda bvisa Vhaisiraele shangoni ḽa Egipita?” 12 Mudzimu a ri: “Ndi ḓo vha na iwe,+ tshiga tshine wa ḓo ḓivha ngatsho uri ndi nṋe ndo u rumaho ndi hetshi: Musi wo no bvisa vhathu vhanga Egipita, ni ḓo shumela* Mudzimu wa ngoho kha heyi thavha.”+

13 Fhedzi Mushe a amba na Mudzimu wa ngoho a ri: “Arali nda ya ha Vhaisiraele nda amba navho nda ri: ‘Mudzimu wa vhomakhulukuku waṋu o nthuma kha inwi,’ vha mmbudzisa uri: ‘Dzina ḽawe u pfi nnyi?’+ Ndi ḓo vha fhindula nda ri mini?” 14 Mudzimu a fhindula Mushe a ri: “Ndi Ḓo Vha Zwine Nda Nanga* U Vha Zwone.”*+ A dovha a ri: “Hezwi ndi zwine wa fanela u vhudza Vhaisiraele wa ri: ‘Ndi Ḓo Vha o nthuma ha inwi.’”+ 15 Mudzimu a dovha a amba na Mushe a ri:

“Zwine wa fanela u vhudza Vhaisiraele ndi hezwi: ‘Yehova Mudzimu wa vhomakhulukuku waṋu, Mudzimu wa Abrahamu,+ Mudzimu wa Isaka+ na Mudzimu wa Yakobo+ o nthuma kha inwi.’ Heḽi ndi ḽone dzina ḽanga u ya nga hu sa fheli,+ yeneyi ndi yone nḓila ine nda tea u humbulwa ngayo nga mirafho yoṱhe. 16 Zwino iya u kuvhanganye vhahulwane vha Isiraele u vha vhudze uri: ‘Yehova Mudzimu wa vhomakhulukuku waṋu, Mudzimu wa Abrahamu, wa Isaka na wa Yakobo o ḓa kha nṋe a ri: “Ngangoho ndo ni vhona+ nda vhona na zwine Vhaegipita vha khou ni ita zwone. 17 Nga⁠uralo, nda fhulufhedzisa uri ndi ḓo ni lamulela kha u tambudzwa+ nga Vhaegipita nda ni isa shangoni ḽa Vhakanana, ḽa Vhahethe, ḽa Vhaamori,+ ḽa Vhapheresi, ḽa Vhahevi na ḽa Vhayebusi,+ nda ni isa shangoni ḽi elelaho mafhi na mutoli.”’+

18 “Vha ḓo thetshelesa zwine wa amba,+ iwe na vhahulwane vha Isiraele ni ḓo ya kha khosi ya Egipita, ni i vhudze uri: ‘Yehova Mudzimu wa Vhahevheru+ o amba na riṋe. Nga zwenezwo, ri khou humbela uri ri fare lwendo lwa maḓuvha mararu ri ye sogani uri ri ṋekedze Yehova Mudzimu washu tshiṱhavhelo.’+ 19 Fhedzi ndi a zwi ḓivha uri khosi ya Egipita a i nga ḓo ni tendela ni tshi ṱuwa nga nnḓa ha musi yo tou kombetshedzwa nga tshanḓa tsha maanḓa.+ 20 Ndi ḓo imisa tshanḓa tshanga nda rwa Egipita nga mishumo yanga yoṱhe i mangadzaho ine nda ḓo i ita; nga murahu ndi hone i tshi ḓo ni tendela na ṱuwa.+ 21 Ndi ḓo ita uri ni takalelwe nga Vhaegipita, musi ni tshi ṱuwa, ni ḓo ṱuwa hu na zwe na fara.+ 22 Mufumakadzi muṅwe na muṅwe u fanela u humbela muhura wawe na mufumakadzi ane a dzula nḓuni yawe madzanga a siḽiva na a musuku na zwiambaro, ni ḓo zwi ambadza vharwa na vhananyana vhaṋu; Vhaegipita ni ḓo vha dzhiela thundu dzavho.”+