Kha Vharoma
1 Paulo, mulanda wa Kristo Yesu we a vhidzwa uri a vhe muapostola, o nangwa uri a ḓivhadze mafhungo maḓifha a Mudzimu.+ 2 Mudzimu o fhulufhedzisa eneo mafhungo maḓifha hu tshee nga phanḓa Maṅwaloni makhethwa a tshi shumisa vhaporofita vhawe. 3 Ndi mafhungo maḓifha nga ha Murwa wawe we a bebwa* e muḓuhulu wa Davida.+ 4 O ḓivhadzwa uri ndi ene Murwa wa Mudzimu+ nga maanḓa a muya mukhethwa musi a tshi vuswa vhafuni.+ Onoyo Murwa ndi Yesu Kristo Murena washu. 5 O ri sumbedza vhuthu vhuhulu, a ita uri ri vhe vhaapostola+ uri vhathu vha tshaka dzoṱhe+ vha mu tende na u mu thetshelesa, vha rende dzina ḽawe. 6 Ni vhaṅwe vha tshaka dze dza vhidzwa uri dzi tevhele Yesu Kristo. 7 Ndi ṅwalela vhoṱhe vha re ngei Roma vha funwaho nga Mudzimu, vho vhidzwaho uri vha vhe vhakhethwa:
Ngavhe Mudzimu Khotsi ashu na Murena washu Yesu Kristo, vha tshi ni sumbedza vhuthu vhuhulu na u ita uri ni vhe na mulalo.
8 Tsha u thoma, ndi livhuwa Mudzimu wanga nga Yesu Kristo ngauri ni na lutendo, lune lwa khou ambiwa shangoni ḽoṱhe. 9 Ndi khou shumela Mudzimu nga mbilu yoṱhe, ndi tshi ḓivhadza mafhungo maḓifha nga ha Murwa wawe. Mudzimu u a zwi ḓivha uri ndi dzula ndi tshi ni amba kha thabelo dzanga.+ 10 Ndi tshi humbela uri ndi kone u ḓa kha inwi, arali Mudzimu a tshi zwi funa. 11 Ngauri ndi khou ṱoḓa u ni vhona, uri ndi ni thuse u khwaṱhisa vhushaka haṋu na Mudzimu, uri ni vhe na lutendo lwo khwaṱhaho; 12 uri ri ṱuṱuwedzane,+ nga lutendo lwaṋu na lwanga.
13 Vhahashu, ḓivhani uri ndo lingedza u ḓa kha inwi, uri hu vhe na mvelelo dzavhuḓi ndi tshi funza henefho, sa zwe nda zwi ita kha dziṅwe tshaka. Fhedzi ndo vha ndi tshi thivhelwa. 14 Ndi na mulandu wa u ya kha Vhagerika na kha vhane vha si vhe Vhagerika, kha vho ṱalifhaho na vha songo ṱalifhaho; 15 ndi ṱoḓa u ḓivhadza mafhungo maḓifha na kha inwi ngeo Roma.+ 16 A thi shoni u amba mafhungo maḓifha;+ ngauri Mudzimu u shumisa eneo mafhungo maḓifha u sumbedza maanḓa awe a u tshidza vhoṱhe vhane vha tenda,+ o thoma u ḓivhadzwa kha Vhayuda,+ nga murahu a ḓivhadzwa kha Vhagerika.+ 17 Ngauri vhane vha tenda vha vhona uri Mudzimu u dzumbulula u luga hawe nga mafhungo maḓifha, zwenezwi zwa khwaṱhisa lutendo lwavho,+ samusi ho ṅwaliwa ha pfi: “Muvhuya u ḓo tshila ngauri u na lutendo.”+
18 Mudzimu u khou dzumbulula mbiti+ dzawe e ṱaḓulu, dzine dza ḓo ḓela vhathu vha sa thetshelesi na vha songo lugaho vhane vha thivhela vhaṅwe uri vha si ḓivhe ngoho.+ 19 Ngauri o vha dzumbululela zwithu zwinzhi uri vha mu ḓivhe.+ 20 Naho Mudzimu ri sa mu vhoni, ri a kona u vhona zwine a vha zwone kha zwe a zwi sika,+ ri vhona maanḓa awe a sa fheli+ na uri ndi Mudzimu.+ Ndi ngazwo vha si na tshiitisi tsha u sa tenda Mudzimu. 21 Naho vha tshi ḓivha Mudzimu, a vho ngo mu hulisa kana u mu livhuwa. Mihumbulo yavho a i na tshithu, a hu na zwine vha zwi ṱalukanya.+ 22 Naho vha tshi ḓiita vho ṱalifhaho, vha vha matsilu. 23 Nṱhani ha u hulisa Mudzimu a sa fi, vha hulisa midzimu ya zwifanyiso yo itwaho nga muthu, yeneyo midzimu i fana na zwiṋoni, zwikokovhi na zwipuka zwi re na milenzhe miṋa.+
24 Ndi ngazwo Mudzimu o vha litsha vha tshi takadza mbilu dzavho uri vha tshinye mivhili yavho. 25 Vho nanga u tenda mazwifhi nṱhani ha u tenda ngoho nga ha Mudzimu, vho gwadamela na u rabela zwe Mudzimu a zwi sika, nṱhani ha u gwadamela Musiki wa zwithu zwoṱhe, o fanelwaho nga u rendwa lini na lini. Amen. 26 Ndi ngazwo Mudzimu o vha litsha vha tshi vha na nyemulo dza u ita zwa vhudzekani dzi shonisaho,+ ngauri vhafumakadzi vho shandula nḓila yavho ya lwa tsiko, vha vho ita zwine zwa lwisana na tsiko;+ 27 na vhanna vho litsha u funana na vhafumakadzi, vha vho emulana nga tshavho, vha ita zwi nengisaho,+ ndi ngazwo vho pfiswa vhuṱungu nga nṱhani ha vhuṱudzi havho.+
28 Samusi vho vha vha songo ḓiimisela u ḓivha Mudzimu nga nḓila yo teaho, Mudzimu o vha litsha vha vha na mihumbulo mivhi, uri vha ite zwithu zwi songo teaho.+ 29 Vho ita vhutshinyi hoṱhe,+ vhuvhi, tseḓa,+ vivho ḽihulu,+ u vhulaya,+ khani, vhufhura,+ vengo,+ zwitshele,* 30 u sasaladza,+ u vhenga Mudzimu, vhuhali, u ḓihudza, u zuwa, u vhamba maano a zwithu zwivhi, u sa thetshelesa vhabebi,+ 31 vhutsilu,+ u sa fhulufhedzea, u sa vha na lufuno na u sa khathutshela. 32 Naho vha tshi ḓivha nga vhuḓalo khaṱhulo ya Mudzimu yo lugaho, ya uri vhoṱhe vhane vha ita zwenezwo zwithu vho tewa nga u fa,+ vha bvela phanḓa vha tshi zwi ita na u takalela vhane vha zwi ita.