Yeremia
31 “Nga tshenetsho tshifhinga,” u ralo Yehova, “ndi ḓo vha Mudzimu wa miṱa yoṱhe ya Isiraele, vhone vha vha vhathu vhanga.”+
2 Yehova u ri:
“Vhathu vhe vha ponyoka banga vho takalelwa sogani
Musi Isiraele a tshi khou ya vhuaweloni hawe.”
3 Yehova o ḓivhonadza kha nṋe ndi kule, a ri:
“Ndo u funa nga lufuno lu sa fheli.
Ndi ngazwo ndo u sendedza kha nṋe nga lufuno lu sa shanduki.*+
4 Ndi ḓo dovha nda u fhaṱulula, u ḓo fhaṱululea.+
Iwe ṅwananyana wa Isiraele, u ḓo dovha wa dzhia mirumba yau
Wa tshina wo takala.+
5 U ḓo dovha wa ṱavha minḓirivhe thavhani dza Samaria;+
Vhalimi vha ḓo ṱavha vha ḓiphiṋa nga mitshelo yavho.+
6 Ngauri ḓuvha ḽi ḓo ḓa ḽine vhalindi vha re thavhani dza Efuraimi vha ḓo vhidzelela vha ri:
‘Takuwani ri gonye Tsioni, ri ye ha Yehova Mudzimu washu.’”+
7 Ngauri Yehova u ri:
“Vhidzelelani Yakobo no takala.
Pembelani ngauri no kunda dzitshaka.+
Zwi ḓivhadzeni; rendani ni ri,
‘Iwe Yehova, tshidza vhathu vhau, masalela a Isiraele.’+
8 Ndi khou vha vhuisa vha tshi bva shangoni ḽa devhula.+
Ndi ḓo vha kuvhanganya vha tshi bva magumoni a ḽifhasi.+
Hu ḓo vha hu na vha sa vhoni na vho holefhalaho,+
Vhafumakadzi vho vhifhaho muvhilini na vhane vha vha tsini na u beba, vhe fhethu huthihi.
Musi vha tshi vhuya fhano vha ḓo vha vhe tshivhidzo tshihulu.+
9 Vha ḓo ḓa vha tshi khou lila.+
Ndi ḓo vha ranga phanḓa musi vha tshi humbela thuso.
Ndi ḓo vha isa milamboni,+
Nda vha tshimbidza kha nḓila i si na madindi ine khayo vha sa ḓo khukhulwa.
Ngauri ndi nṋe Khotsi a Isiraele, Efuraimi ndi tanzhe ḽanga.”+
10 Ipfani zwe Yehova a amba, inwi dzitshaka,
Ni zwi ḓivhadze vhukati ha zwiṱangadzime zwa kule-kule,+ ni ri:
“We a balanganya Isiraele u ḓo dovha a mu kuvhanganya.
U ḓo mu linda sa mulisa a tshi linda sambi ḽawe.+
12 Vha ḓo ḓa vha fhululedza nga dakalo vhe nṱha ngei Tsioni+
Vha takalela zwivhuya zwa* Yehova,
Thoro na waini ntswa+ na mapfura,
Na ngwana na zwiṋamana.+
13 “Nga tshenetsho tshifhinga musidzana* u ḓo tshina o takala,
Vhaṱhannga na vhakalaha na vhone vha ḓo tshina.+
Ndi ḓo ita uri u ṱungufhala havho hu vhe dakalo.+
Ndi ḓo vha khuthadza nda ita uri vha takale nṱhani ha u lila.+
14 Ndi ḓo fusha vhotshifhe nga zwithu zwinzhi,*
Na vhathu vhanga vha ḓo fushea nga zwivhuya zwanga,”+ u ralo Yehova.
15 “Yehova u ri:
‘Ho pfala mukosi ngei Rama,+ tshililo tshihulu na u ṱungufhala:
Rahele u khou lilela vharwa* vhawe.+
Ha ṱoḓi u fhumudzwa
Ngauri a vha tsheeho.’”+
16 Yehova u ri:
“‘U songo ṱavha mukosi, u songo lila,
Ngauri u ḓo wana malamba nga zwe wa ita,’ u ralo Yehova.
‘Vha ḓo vhuya vha tshi bva shangoni ḽa swina.’+
17 ‘Lavhelela vhumatshelo havhuḓi,’+ u ralo Yehova.
‘Vharwa vhau vha ḓo vhuya shangoni ḽavho.’”+
18 “Ndo pfa u gungula ha Efuraimi,
‘Wo nkaidza, nda tenda u kaidzwa,
Sa tshiṋamana tshi songo gudiswaho u hwala dzhogo.
Mmbuise, ndi ḓo ṱavhanya nda vhuya,
Ngauri ndi iwe Yehova Mudzimu wanga.
19 Musi ndo no rembuluwa, ndo ḓisola;+
Musi ndo no itwa uri ndi pfesese, ndo ḓi rwa tshirumbi ndo ṱungufhala.
Ndo vha ndo shona+
Nga nṱhani ha zwe nda zwi ita musi ndi tshee muswa.’”
20 “Naa Efuraimi a si murwa wa ndeme kha nṋe, ṅwana ane nda mu funa?+
Naho ndi tshi dzulela u mu kaidza, a thi mu hangwi.
Ndi ngazwo maḓipfele anga a tshi dzikuwa musi ndi tshi humbula nga hae.+
Ndi ḓo mu pfela vhuṱungu,” u ralo Yehova.+
21 “Ḓiitele tswayo nḓilani,
U ḓivhetshele zwiga.+
U ṱhogomele nḓila khulwane ine wa fanela u tshimbila khayo.+
Vhuya, Iwe ṅwananyana wa Isiraele, vhuya kha yeneyi miḓi yau.
22 U ḓo litsha lini u timatima, Iwe ṅwananyana a sa fhulufhedzei?
Yehova o ita zwithu zwiswa kha ḽifhasi:
Mufumakadzi u ḓo ṱoḓa munna.”
23 Yehova wa mavhuthu, Mudzimu wa Isiraele, u ri: “Musi ndi tshi vhuisa mathubwa avho shangoni ḽa Yuda na miḓini yaḽo vha ḓo dovha vha amba hezwi: ‘Ngavhe Yehova a tshi u fhaṱutshedza, Iwe haya ha zwivhuya,+ Iwe thavha khethwa.’+ 24 Kha ḽa Yuda na miḓini yaḽo yoṱhe hu ḓo dzula vhalimi, vhalisa vha sambi na vhaṅwe vhathu vhoṱhe.+ 25 Ngauri ndi ḓo khwaṱhisa o netaho na u fusha a shayaho.”+
26 Nda karuwa, naho khofhe dzo vha dzi tshi kha ḓi ḓifha.
27 “Maḓuvha a khou ḓa,” u ralo Yehova, “ane ngao nda ḓo andisa vha nnḓu ya Isiraele na vha nnḓu ya Yuda. Ndi ḓo dovha nda andisa na zwifuwo.”+
28 “Samusi ndo vha lavhelesa uri ndi vha tupule, ndi vha wise, ndi vha thuthe, ndi vha fhelise na u vha vhaisa,+ ndi ḓo vha lavhelesa uri ndi vha fhaṱe na u vha ṱavha,”+ u ralo Yehova. 29 “Misini yeneyo a vha tsha ḓo ri, ‘Vhokhotsi vho ḽa nḓirivhe dza magaga, fhedzi u haṱa ha pfiwa nga vhana.’*+ 30 Fhedzi muṅwe na muṅwe u ḓo fela mulandu wawe. Hu ḓo haṱa mulomo* wa ane a ḽa nḓirivhe dza magaga.”
31 Yehova u ri: “Hu khou ḓa maḓuvha ane nda ḓo vhofha mulanga muswa na vha nnḓu ya Isiraele na vha nnḓu ya Yuda.+ 32 A u nga fani na mulanga we nda u vhofha na vhomakhulukuku wavho musi ndi tshi vha fara nga tshanḓa uri ndi vha bvise shangoni ḽa Egipita,+ ‘a vho ngo fhulufhedzea kha mulanga wanga,+ naho ndo vha ndi muṋe* wavho wa vhukuma,’ u ralo Yehova.”
33 “Wonoyu ndi mulanga une nda ḓo u vhofha na vha nnḓu ya Isiraele nga murahu ha eneo maḓuvha,” u ralo Yehova. “Ndi ḓo vhea mulayo wanga khavho,+ nda u ṅwala mbiluni dzavho.+ Ndi ḓo vha Mudzimu wavho, vhone vha vha vhathu vhanga.”+
34 “A vha tsha ḓo funza vhahura vhavho na vhahavho, vha ri, ‘Ḓivhani Yehova!’+ Ngauri vhoṱhe vha ḓo nḓivha, u bva kha muṱuku u swika kha muhulwane,”+ u ralo Yehova. “Ngauri ndi ḓo vha hangwela vhukhakhi havho, a thi tsha ḓo humbula zwivhi zwavho.”+
35 Zwe Yehova a amba,
Ene o sikaho ḓuvha uri ḽi vhonetshele nga masiari,
O layaho ṅwedzi na ṋaledzi uri zwi vhonetshele vhusiku,
Ane a dzikusa lwanzhe, a ita uri magabelo alwo a halifhe,
Ane dzina ḽawe a pfi Yehova wa mavhuthu,+ u ri:
36 “‘Arali yeneyi milayo ya kundelwa,’ u ralo Yehova,
‘Ndi hone vhana vha Isiraele vha si tsha ḓo vha lushaka phanḓa hanga misi yoṱhe.’”+
37 Yehova u ri: “‘Arali zwi tshi konadzea u kala ḽiṱaḓulu na u tandula mitheo ya ḽifhasi, ndi hone na nṋe ndi tshi ḓo laṱa vhana vhoṱhe vha Isiraele nga nṱhani ha zwoṱhe zwe vha ita,’ u ralo Yehova.”+
38 “Maḓuvha a khou ḓa,” u ralo Yehova, “ane ngao ha ḓo fhaṱelwa Yehova muḓi+ u bva Mutsheṱoni wa ngei Hananele+ u swika Khoroni ya Khonani.+ 39 Luṱale lwa u kala+ lu ḓo bva lwo livha tshikwarani tsha Garebe lu tshi yela Goatha. 40 Na magovhani oṱhe a re na zwitumbu na miḽora na masimuni oṱhe a re Govhani ḽa Kidironi,+ u yela thungo ya Khoro ya Bere+ i re thungo ya vhubvaḓuvha, hu ḓo vha fhethu hukhethwa kha Yehova.+ A hu tsha ḓo dovha ha tupulwa kana u thuthwa.”