Ekisoda

7 Nga zwenezwo, Yehova a amba na Mushe a ri: “Ndo u ita uri u nge Mudzimu* kha Farao, Aroni mukomana wau u ḓo vha muporofita wau.+ 2 U dovholole zwoṱhe zwine nda ḓo u laya; Aroni mukomana wau u ḓo amba na Farao, Farao u ḓo tendela Vhaisiraele vha tshi ṱuwa shangoni ḽawe. 3 Nṋe ndi ḓo tendela mbilu ya Farao i tshi rindila,+ ndi ḓo engedza zwiga zwanga na vhuṱolo hanga shangoni ḽa Egipita.+ 4 Fhedzi Farao ha nga ḓo ni thetshelesa; ndi ḓo lwa na Egipita nga tshanḓa tshanga nda bvisa magogo* a vhathu vhanga, Vhaisiraele, shangoni ḽa Egipita nga khaṱhulo khulwane.+ 5 Vhaegipita vha ḓo ḓivha uri ndi nṋe Yehova+ musi ndi tshi shumisa maanḓa anga u itela u lwa na Vhaegipita, nda bvisa Vhaisiraele vhukati havho.” 6 Mushe na Aroni vha ita zwe Yehova a vha laya. Vha ita nga u ralo. 7 Mushe o vha e na miṅwaha ya 80, Aroni o vha e na miṅwaha ya 83 musi vha tshi amba na Farao.+

8 Yehova a amba na Mushe na Aroni a ri: 9 “Arali Farao a amba na inwi a ri: ‘Itani vhuṱolo,’ ngauralo u vhudze Aroni uri: ‘Dzhia thonga yau u i pose fhasi phanḓa ha Farao.’ I ḓo shanduka ya vha ṋowa khulu.”+ 10 Ngauralo, Mushe na Aroni vha ya ha Farao vha ita zwe Yehova a vha laya. Aroni a posa thonga yawe fhasi phanḓa ha Farao na vhashumeli vhawe, ya shanduka ya vha ṋowa khulu. 11 Naho zwo ralo, Farao na ene a vhidza vhanna vha vhuṱali na vhaloi; na vhotshifhe vha itaho manditi vha Egipita+ na vhone vha ita vhuṱolo vhu fanaho na honoho nga manditi avho.+ 12 Vhoṱhe vha posa thonga dzavho, dza vha maṋowa; fhedzi thonga ya Aroni ya mila thonga dzavho. 13 Naho zwo ralo, mbilu ya Farao ya rindila,+ a si vha thetshelese, samusi Yehova o vha o amba.

14 Ngauralo, Yehova a amba na Mushe a ri: “Farao o rindidza+ mbilu. Ho ngo tenda vhathu vha tshi ṱuwa. 15 Iya ha Farao nga matsheloni. U ḓo bva a ya Mulamboni wa Nili. Iwe u ime u mu lindele philiphilini ya Mulambo wa Nili; u ṱuwe na thonga ye ya shanduka ya vha ṋowa.+ 16 Iwe u ambe u ri: ‘Yehova Mudzimu wa Vhahevheru o nthuma kha iwe,+ u ri: “Litsha vhathu vhanga vha ṱuwe uri vha ye u ntshumela sogani,” fhedzi a wo ngo thetshelesa u swika zwino. 17 Yehova o amba a ri: “Ni ḓo ḓivha zwa uri ndi nṋe Yehova.+ Ndi khou rwa maḓi a re Mulamboni wa Nili nga thonga i re tshanḓani tshanga, a ḓo shanduka a vha malofha. 18 Khovhe dzi re Mulamboni wa Nili dzi ḓo fa, Mulambo wa Nili u ḓo nukha, Vhaegipita a vha nga koni u nwa maḓi a wonoyo Mulambo.”’”

19 Yehova a amba na Mushe a ri: “U vhudze Aroni u ri: ‘Dzhia thonga yau u imise tshanḓa tshau nṱha ha maḓi a Egipita,+ nṱha ha milambo yavho, migero* yavho, mativha+ avho na madamu avho oṱhe uri a shanduke a vhe malofha.’ Hu ḓo vha na malofha shangoni ḽoṱhe ḽa Egipita na kha midzio ya thanda na ya matombo.” 20 Nga u ṱavhanya Mushe na Aroni vha ita zwe Yehova a vha laya. A imisa thonga a rwa maḓi e a vha e Mulamboni wa Nili, Farao na vhashumeli vhawe vha tshi zwi vhona, maḓi oṱhe e a vha e mulamboni a shanduka a vha malofha.+ 21 Khovhe dze dza vha dzi mulamboni dza fa,+ mulambo wa nukha; Vhaegipita vha si tsha kona u wana maḓi a u nwa Mulamboni wa Nili;+ ha vha na malofha shangoni ḽoṱhe ḽa Egipita.

22 Naho zwo ralo, vhotshifhe vha itaho manditi vha Egipita vha ita zwi fanaho nga manditi avho;+ Farao a bvela phanḓa a tshi rindidza mbilu yawe, a si vha thetshelese samusi Yehova o amba.+ 23 Farao a humela nḓuni yawe, na zwenezwo a si vhuye a zwi dzhiela nṱha. 24 Vhaegipita vhoṱhe vha bwa u mona na Mulambo wa Nili vha tshi khou ṱoḓa maḓi ngauri vho vha vha sa koni u nwa maḓi a Nili. 25 Ha fhela maḓuvha a sumbe u bva tshee Yehova a shandukisa maḓi a Mulambo wa Nili uri a vhe malofha.