Ndi Nnyi Ane a Vhusa Shango Zwa Vhukuma?

Vhathu vhanzhi vho vha vha tshi ḓo fhindula mbudziso i re afho nṱha nga ipfi ḽithihi—Mudzimu. Fhedzi nga hu re khagala, a hu na hune Bivhili ya amba uri Yesu Kristo kana Khotsi awe ndi vhavhusi vha vhukuma vha ḽino shango. Zwo fhambanaho na zwenezwo, Yesu o ri: “Zwino ndi hone muvhusi wa shango ḽino a tshi ḓo kudzwa nnḓa.” Nahone a engedza: “Muvhusi wa shango ḽino u khou ḓa, huno ene ha na na tshithihi kha nṋe.”—Yohane 12:31; 14:30; 16:11.

Ngauralo muvhusi wa ḽino shango u pikisana na Yesu. A nga vha e nnyi?

Luvhonela kha Zwiimo zwa Shango

Hu sa londwi vhuḓidini ha vhathu vha re vhuimoni ha nṱha, shango ḽo shengela lu vhavhaho kha ḓivhazwakale yoṱhe. Hezwi zwi ita uri vhathu vha humbulaho vha ḓivhudzise, samusi mufu David Lawrence we a vha e muṅwaleli o vhudzisa: “‘Mulalo kha ḽifhasi’—hu ṱoḓaho u vha muṅwe na muṅwe u a u ṱoḓa. ‘U takalelwa ha vhathu’—hu ṱoḓaho u vha vhathu vhoṱhe vha shango vha a hu takalela. Zwino-ha ho tshinyala mini? Ndi ngani hu na khombo ya nndwa naho vhathu vhe na lutamo lwavhuḓi?”

Zwi vhonala zwi tshi ḓihanedza, naa a zwi ralo? Naho lutamo lwa vhathu lwa tsiko i u tshilisana nga mulalo, vha anzela u vhengana na u vhulahana—nahone lwa tshiṱuhu. Humbulani nga ha u vhulaha ha tshiṱuhu hune ha vha hone. Vhathu vho shumisa zwipfundamuya, gammba dza tshengedzo, bomo dza mulilo, bomo dza pitirolo, na dziṅwe nḓila dza tshiṱuhu u itela u shengedzana na u vhulahana lu si na khathutshelo.

Naa ni a tenda uri vhathu, vho ṱuvhaho mulalo na dakalo, vha na vhuḓifhinduleli ha vhuvhi vhuhulwane nga u ralo kha vhaṅwe? Ndi maanḓa afhio ane a sudzulusela vhathu u ita mishumo i nengisaho nga u ralo kana ane a vha vhea vhuimoni vhune vha ḓiwana vha tshi kombetshedzea u ita zwiṱuhu zwo raloho? Naa no no vhuya na ḓivhudzisa arali ho vha hu na maṅwe maanḓa mavhi, a sa vhonali ane a khou ṱuṱuwedza vhathu u ita vhuvemu ho raloho?

Hu Ṱalulwa Vhavhusi vha Shango

A zwi ṱoḓei u bvumba kha haya mafhungo, ngauri Bivhili i sumbedza zwavhuḓi uri muthu o ṱalifhaho, a sa vhonali u khou langa vhathu khathihi na dzitshaka. I ri: “Shango ḽoṱhe ḽo vhumbulutshela kha Muvhi.” Nahone Bivhili i a mu ṱalula, i tshi ri: “Diabolo, ene Sathane, muxedzi wa shango ḽoṱhe.”—1 Yohane 5:19; Ndzumbululo 12:9.

Musi Yesu a tshi ‘lingwa nga Diabolo,’ Yesu ho ngo timatima mushumo wa Sathane sa muvhusi wa ḽino shango. Bivhili i a ṱalutshedza zwe zwa itea: “Diabolo a dovha a ṱuwa nae’ a mu isa kha thavha ndapfu-ndapfu, a mu sumbedza mivhuso yoṱhe ya shango na vhugala hayo; a amba nae’ a ri: Hezwi zwoṱhe ndi ḓo U ṋea arali U tshi wa nga magona wa ndosha. Yesu ndi hone a tshi amba nae’ a ri: Ṱuwa, Sathane!”—Mateo 4:1, 8-10.

Humbulani nga ha hezwi. Sathane o linga Yesu nga u mu ṋea “mivhuso yoṱhe ya shango.” Nga zwenezwo, naa u ṋea ha Sathane ho vha hu tshi ḓo vha mulingo wa vhukuma arali Sathane o vha e si muvhusi wa iyi mivhuso zwa vhukuma? Hai, wo vha u sa nga ralo. Nahone ṱhogomelani, Yesu ho ngo hanedza uri heyi mivhuso yoṱhe ya shango yo vha i ya Sathane, zwe a vha a tshi nga vha o zwi ita arali Sathane o vha e si na maanḓa khayo. Ngauralo-ha, vhukuma Sathane Diabolo ndi muvhusi a sa vhonali wa ḽino shango! Zwi re zwone ndi uri Bivhili i mu vhidza uri ndi “mudzimu wa tshino tshifhinga.” (2 Vha-Korinta 4:4) Nga zwenezwo, onoyo muthu muvhi nga u rali zwo ḓa hani uri a vhe vhuimoni uvhu ha maanḓa?

We a vha Sathane o vha e muruṅwa we a sikwa nga Mudzimu, fhedzi o tama vhuimo ha Mudzimu. O itela khaedu vhuvhusi ha Mudzimu ho teaho. U itela hezwi o shumisa ṋowa sa muambeleli wawe u fhura Eva, musadzi wa u thoma, nahone nga zwenezwo o kona u mu fhura khathihi na munna wawe, Adamu, u ita lufuno lwawe nṱhani ha lwa Mudzimu. (Genesi 3:1-6; 2 Vha-Korinta 11:3) O ita na u sumbedza uri o vha a tshi nga kona u bvisa kha Mudzimu vhoṱhe vhane vha kha ḓi ḓo vha vhana vha Adamu na Eva. Ngauralo Mudzimu a ṋea tshifhinga Sathane uri a lingedze u vhona vhuṱanzi ha zwine a khou zwi amba, fhedzi Sathane ho ngo bvelela.—Yobo 1:6-12; 2:1-10.

Zwi khagala uri Sathane ha eṱhe kha u vhusa shango. O kona u ṱuṱuwedza vhaṅwe vharuṅwa uri vha ṱanganele nae kha u shandukela Mudzimu. Havha vho vha madimoni, vhashumisani nae vha muya. Bivhili i amba nga havho musi i tshi khadeledza Vhakriste: “Ni ḓo kona u kunda maano oṱhe a Diabolo, a tshi ni dodela. Ngauri nndwa yashu a si ya u lwa na ṋama na malofha, ndi ya u lwa na . . . vho-ṋemashango vha swiswi ḽino, ndi ya u lwa na mimuya ya vhuvhi i re ṱaḓulu.”—Vha-Efesa 6:11, 12.

Lwisani Mimuya Mivhi

Havha vhavhusi vha shango vhavhi, vha sa vhonali vho ḓiimisela u xedza vhathu vhoṱhe, vha tshi vha litshisa u gwadamela Mudzimu. Iṅwe nḓila ine mimuya mivhi ya ita hezwi ngayo ndi nga u tikedza muhumbulo wa u tshila nga murahu ha lufu, naho Ipfi ḽa Mudzimu ḽi tshi sumbedza zwavhuḓi uri vhafu a vha pfi tshithu. (Genesi 2:17; 3:19; Hesekiele 18:4; Psalme ya 146:3, 4; Muhuweleli 9:5, 10) Nga zwenezwo, muya muvhi, u tshi edzisa ipfi ḽa o faho, u nga amba na mashaka ane a khou tshila kana khonani dza onoyo o faho, u tshi shumisa mungome kana “ipfi” ḽi bvaho fhethu hu sa vhonali. Ḽeneḽo “ipfi” ḽi nga ndi ḽa o faho, hu uri zwa vhukuma ndi dimoni!

Ngauralo arali na vhuya na pfa “ipfi” ḽo raloho, ni songo fhurwa. Hanani zwoṱhe zwine ḽa amba, nahone ni dovholole maipfi a Yesu: “Ṱuwa, Sathane!” (Mateo 4:10; Yakobo 4:7) Ni songo tendela u ṱoḓa u ḓivha nga ha mimuya mivhi hu tshi ni ita uri ni ṱanganele na mimuya mivhi. U ṱanganela ho raloho hu vhidzwa uri ndi vhungome, nahone Mudzimu u sevha vhagwadameli vhawe uri vha si ṱanganele kha zwivhumbeo zwaho zwoṱhe. Bivhili i sasaladza “ane a bvumba . . . kana a vhudzisa mudzia-u-bvumba, na ane a ya zwifhoni, a songo vhonala.”—Doiteronomio 18:10-12; Vha-Galata 5:19-21; Ndzumbululo 21:8.

Samusi vhungome vhu tshi ita uri muthu a vhe nga fhasi ha ṱhuṱhuwedzo ya madimoni, hanani mishumo yaho yoṱhe hu sa londwi uri i a seisa, kana i takadza lungafhani. Heyi mishumo i katela na u sedza kha bolo ya khirisitala, u shumiswa ha bodo ya Ouija, u bvumba, u sedza mitalo ya tshanḓa (palmistry), na u bvumba nga ṋaledzi. Madimoni o ita na u bveledza phosho dziṅwe-vho na zwiṅwe zwithu zwi vhonalaho nḓuni dza vhane a vha dalela.

Zwiṅwe hafhu, mimuya mivhi i kona u sendamela kha vhuvhi ha vhathu nga u tikedza dzibugu, dzibaisikopo, na mbekanyamushumo dza thelevishini dzine dza sumbedza u ḓifara ha vhuaḓa na hu si ha tsiko ha u ṱangana nga dzimbeu. Madimoni a a zwi ḓivha uri mihumbulo yo khakheaho arali ya sa pandelwa muhumbuloni i a khwaṱha nahone ya ita uri vhathu vha ite vhuaḓa—u fana na madimoni nga one aṋe.—Genesi 6:1, 2; 1 Vha-Thesalonika 4:3-8; Yuda 6.

I ngoho, vhanzhi vha nga hanedza mbuno ya uri ḽino shango ḽi khou vhuswa nga mimuya mivhi. Fhedzi u sa tenda havho a hu mangadzi, samusi Bivhili i tshi ri: “Na ene Sathane a tshi ḓi-kanganyedza a ḓi-ita muruṅwa wa tshedza.” (2 Vha-Korinta 11:14) Vhufhura hawe ha vhuṱali vhukuma ho vha musi a tshi swingisa vhanzhi malugana na mbuno ya uri ene khathihi na madimoni awe vha hone. Fhedzi ni songo fhurwa! Diabolo na madimoni awe ndi vha vhukuma, nahone ni fanela u vha lwisa zwifhinga zwoṱhe.—1 Petro 5:8, 9.

Zwi takadzaho ndi uri tshifhinga tshi tsini tsha uri Sathane na vhatevheli vhawe vha si tsha vha hone! Bivhili i a khwaṱhisa: “Shango [u katela na vhavhusi vha madimoni] ḽi a lovha na nyemulo dzaḽo, huno ane a ita zwiné Khotsi a zwi funa u ḓi dzula e hone na lini na lini.” (1 Yohane 2:17) Hu ḓo vha na mbofholowo ngafhani musi ho bviswa ṱhuṱhuwedzo mmbi! Nga zwenezwo, nga ri vhe vhukati ha vhane vha ita lufuno lwa Mudzimu nahone ri ḓiphine nga vhutshilo vhu sa fheli shangoni ḽiswa ḽo lugaho ḽa Mudzimu.—Psalme ya 37:9-11, 29; 2 Petro 3:13; Ndzumbululo 21:3, 4.

Nga nnḓa ha musi zwo sumbedzwa nga iṅwe nḓila, miredzo yoṱhe ya Bivhili i bva Bivhilini ya Luvenḓa.

[Picture on page 4]

Naa Sathane o vha a tshi ḓo ṋea Yesu mivhuso yoṱhe ya ḽino shango arali yo vha i si yawe?