Ni Fanela U Guda Nga Ha Mudzimu

Uri ni vhe khonani ya Mudzimu, ni fanela u guda nga hae. Naa khonani dzaṋu dzi ḓivha dzina ḽaṋu na u ni vhidza ngalo? Vha a ḽi ḓivha nahone vha ni vhidza ngaḽo. Mudzimu u ṱoḓa ni tshi ḓivha na u shumisa dzina ḽawe. Dzina ḽa Mudzimu ndi Yehova. (Psalme ya 83:18; Mateo 6:9) Ni fanela u guda zwine a zwi funa na zwine a si zwi fune. Ni fanela u ḓivha uri khonani dzawe ndi dzifhio na uri maswina awe ndi afhio. Zwi dzhia tshifhinga u itela u ḓivha muṅwe muthu. Bivhili i ri ndi vhuṱali u vhetshela thungo tshifhinga tsha u guda nga ha Yehova.—Vha-Efesa 5:15, 16.

Khonani dza Mudzimu dzi ita zwine zwa mu takadza. Humbulani nga ha khonani dzaṋu. Arali na dzifara nga nḓila i si yavhuḓi na ita zwithu zwine dza zwi vhenga, naa dzi ḓo bvela phanḓa u vha khonani dzaṋu? Na kathihi! Nga nḓila i fanaho, arali ni tshi ṱoḓa u vha khonani ya Mudzimu, ni fanela u ita zwine zwa mu takadza.—Yohane 4:24.

A si vhurereli hoṱhe vhune ha ita uri ni vhe khonani ya Mudzimu. Yesu, ane a vha khonani ya tsini-tsini ya Mudzimu, o amba nga ha nḓila mbili. Iṅwe nḓila yo aṱama nahone i tshimbilwa nga vhathu vhanzhi. Yeneyo nḓila i ya tshinyaloni. Iṅwe nḓila ndi tsekene nahone i tshimbilwa nga vhathu vha si gathi. Yeneyo nḓila i isa vhutshiloni vhu sa fheli. Hezwi zwi amba uri arali ni tshi ṱoḓa u vha na vhukonani na Mudzimu, ni fanela u guda nḓila yo lugaho ya u mu gwadamela.—Mateo 7:13, 14.