Nḓila Ine Na Nga Guda Ngayo Nga Ha Mudzimu

Ni nga guda nga ha Yehova nga u vhala Bivhili. Kale-kale Mudzimu o khetha vhaṅwe vhathu uri vha ṅwale fhasi zwe a zwi amba. Maṅwalo eneo a vhidzwa Bivhili. Ṋamusi ri guda nga ha Mudzimu nga u vhala Bivhili. Ngauri Bivhili i na ipfi ḽa Yehova, kana mulaedza, i dovha ya vhidzwa Ipfi ḽa Mudzimu. Ri nga tenda zwine Bivhili ya amba ngauri Yehova ha zwifhi. “Ngauri Mudzimu ha koni u zwifha.” (Vha-Heberu 6:18) Ipfi ḽa Mudzimu ḽi na mafhungo-ngoho.—Yohane 17:17.

Bivhili ndi tshiṅwe tsha zwifhiwa zwa ndeme vhukuma tshe Mudzimu a ri ṋea tshone. I nga vhurifhi vhu bvaho ha khotsi wa lufuno he a ṅwalela vhana vhawe. I ri vhudza nga ha fulufhedziso ḽa Mudzimu ḽa u shandula ḽifhasi ḽa vha fhethu havhuḓi hune ra ḓo tshila hone—paradiso. I ri vhudza nga zwe a zwi ita tshifhingani tsho fhiraho, na zwine a khou zwi ita zwino, na zwine a ḓo zwi ita tshifhingani tshi ḓaho a tshi itela vhana vhawe vha fulufhedzeaho. I dovha ya ri thusa u piringulula vhuleme hashu na u wana dakalo.—2 Timotheo 3:16, 17.

Ṱhanzi dza Yehova ndi khonani dza Mudzimu; vha ḓo ni thusa u pfesesa zwine Bivhili ya zwi funza. Vha vhudzeni uri ni ṱoḓa u guda Bivhili. A vha badelisi. (Mateo 10:8) Zwiṅwe hafhu, ni nga ya miṱanganoni ya Vhukriste. I farelwa fhethu hune ha gwadamelwa hone hune ha vhidzwa Holo dza Muvhuso. Arali na ya miṱanganoni ya Vhukriste, nḓivho yaṋu nga Mudzimu i ḓo aluwa nga u ṱavhanya.

Ni nga guda nga ha Mudzimu nga zwithu zwe a zwi ita. Sa tsumbo, Bivhili i ri: “Mudzimu o sika ḽiṱaḓulu na ḽifhasi.” (Genesi 1:1) Musi Yehova a tshi sika “ḽiṱaḓulu,” o ita na ḓuvha. Zwenezwo zwi ni vhudza mini nga ha Mudzimu? Zwi ri vhudza uri Yehova u na maanḓa mahulwane. Ndi ene fhedzi ane a nga ita tshithu tshi re na maanḓa sa ḓuvha. Zwi dovha zwa ri vhudza uri Yehova u na vhuṱali, samusi zwi tshi ṱoḓa vhuṱali u ita ḓuvha, ḽine ḽa ri ṋea mufhiso na tshedza nahone a ḽi dzimi.

Tsiko ya Yehova i sumbedza uri u a ri funa. Humbulani nga ha mifuda yoṱhe ya mitshelo i re hone fhano kha ḽifhasi. Yehova o vha a tshi nga vha o ri ṋea mufuda muthihi fhedzi wa mutshelo—kana a songo vhuya a ri ṋea. Nṱhani hazwo, Yehova o ri ṋea mifuda minzhi ya mitshelo i re na zwivhumbeo, vhuhulwane, mivhala, na muthetshelo zwo fhamba-fhambanaho. Zwenezwi zwi sumbedza uri Yehova a si Mudzimu wa lufuno fhedzi, fhedzi ndi a re na mafunda na u humbulela na vhulenda.—Psalme ya 104:24.