Mafhungo Maḓifha Ane Vha Ṱoḓa Uri Ni A Pfe

MUSI Yesu e kha ḽifhasi, vhafunziwa vhawe vho ḓa khae nahone vha mu vhudzisa vha ri: ‘Ri vhudze zwine ra ḓo ḓivha ngazwo zwauri u vhuya hau na vhufhelo ha ḽifhasi zwi tsini.’ O vha fhindula a ri hu ḓo vha na dzinndwa dzi katelaho tshakha nnzhi, nḓala, vhuṱungu, midzinginyo, u engedzea ha vhuvhi, vhurereli ha mazwifhi vhu xedzaho vhanzhi, u vhengiwa na u tovholwa ha vhatevheli vhawe vha ngoho, na u fhungudzea ha u funa zwo lugaho kha vhathu vhanzhi. Musi zwenezwi zwithu zwi tshi thoma u itea, zwo vha zwi tshi ḓo sumbedza uri u vha hone ha Kristo na Muvhuso wa ṱaḓulu zwi tsini. Hezwi zwo vha zwi tshi ḓo vha mafhungo—mafhungo maḓifha! Ngauralo Yesu o engedza haya maipfi sa tshiṅwe tshiga: “Huno mafhungo-maḓifha aya a muvhuso wa ṱaḓulu a ḓo ḓivhadzwa mashangoni oṱhe, uri a vhe thovhedzo kha dzitshakha dzoṱhe. Ndi hone hu tshi ḓo ḓa vhufhelo.”—Mateo 24:3-14.

Khavho, zwiitea zwine zwa khou bvelela zwino ndi zwivhi, fhedzi zwi amba zwithu zwavhuḓi, zwine zwa vha u vha hone ha Kristo. Vhuimo ho bulwaho afho nṱha ho thoma u vhonala nga ṅwaha we wa ḓivhadzwa hoṱhe-hoṱhe wa 1914! Wo swaya u fhela ha Zwifhinga zwa Vhannḓa na u thoma ha ḽifhinga ḽa tshanduko u bva kha u vhusa ha vhathu u ya kha Ṅwaha wa Tshigidi (Ḽikhulu) wa Vhuvhusi ha Kristo.

Ho vha hu tshi ḓo vha na ḽifhinga ḽa tshanduko ḽo sumbedzwaho nga Psalme ya 110, Ps 110 ndimana 1 na 2, na Ndzumbululo 12:7-12. Henefho hu sumbedzwa uri Kristo u ḓo dzula kha tshanḓa tsha u ḽa tsha Mudzimu ṱaḓulu u swika tshifhinga tsha u vha hawe Khosi. Ngauralo nndwa ngei ṱaḓulu yo vha i tshi ḓo ita uri Sathane a poswe kha ḽifhasi, ya ḓisa khombo kha ḽifhasi, nahone Kristo o vha a tshi ḓo vhusa vhukati ha maswina awe. U fhela tshoṱhe ha vhuvhi hu ḓo vha nga “maṱungu mahulu,” ha swika vhuimoni ha nṱha nga nndwa ya Haramagedo nahone ya tevhelwa nga Vhuvhusi ha Kristo ha Miṅwaha ya Tshigidi ya mulalo.—Mateo 24:21, 33, 34; Ndzumbululo 16:14-16.

Bivhili i ri: “Zwi ḓivhe zwauri maḓuvhani a vhufhelo hu ḓo vha na zwifhinga zwi lemelaho. Ngauri vhathu vha ḓo vha vha funaho hu tshi naka zwavho fhedzi, vhatami vha mali, vhazuwi, vhadzia u ḓi-ṱongisa, vhadzia maṱamba, vhanyadzi vha vhabebi, vhadzia-u-sá-livhuha, vha sá ili tshithu. Vhadzia u shaya lufuno, vha sá vhofhiwi navho’ fhungo ḽa vha hone, vhasumeleli, vha sá ḓi-vhofhi, vha u sokou penga naḽo’, vhavhéngi vha zwivhuya, Vhafheṱi vha vhaṅwe, vhadzia u thanyesa, vha ḓi-kukumusaho, vhané u tama u ḓi-phiṋa ha fhira u tama Mudzimu kha vhone. Vha tou vha na tshifanyiso tsha u nga vha ofha Mudzimu, ngeno maanḓa aho vho a landula. Vhenevho sendela kule havho.”—2 Timotheo 3:1-5.

Vhaṅwe vha nga amba uri zwenezwi zwithu zwo no itea kha ḓivhazwakale ya vhathu, fhedzi mbuno ndi ya uri a zwi athu u itea nga nḓila ine zwa khou itea ngayo zwino. Nga nḓila ine vhaḓivhazwakale na vhaṱalutshedzi vha amba ngayo, a hu athu vhuya ha vha na tshifhinga kha ḽifhasi u fana na tshee tsha vha hone nga 1914 u ya phanḓa. (Sedzani siaṱari 7.) Khombo dzo engedzea vhukuma u fhira tshifhingani tsho fhiraho. Zwiṅwe hafhu, malugana na dziṅwe mbonalo dza tshiga tsha Kristo tsha maḓuvha a vhufhelo, hu fanela u ṱhogomelwa mbuno dzi tevhelaho: U ḓivhadzwa ha u vha hone ha Kristo ḽifhasini ḽoṱhe na Muvhuso zwo itwa nga nḓila khulwane i sa athu vhonwa kha ḓivhazwakale. U tovholelwa u huwelela a hu athu vhuya ha fana na he ha wela Ṱhanzi dza Yehova. Maḓana manzhi avho o vhulahwa gammbani dza tshengedzo dza Vhanazi. U swika na ṋamusi Ṱhanzi dza Yehova vho thivhelwa huṅwe fhethu, nahone huṅwe vha a farwa, vha valelwa khothoni, vha shengedzwa, na u vhulahwa. Zwenezwi zwoṱhe ndi zwiga zwe Yesu a zwi ṋea.

Samusi zwo ambiwa kha Ndzumbululo 11:18, ‘dzitshaka dzo sinyutshela’ Ṱhanzi dza Yehova dzi fulufhedzeaho, nahone hezwi zwi sumbedza uri ‘mbiti dzawe’ dzi ḓo dugela dzenedzo dzitshaka. Lwonolu luṅwalo lu sumbedza uri Mudzimu u ḓo “tshinyadza vha tshinyadzaho shango.” Kha ḓivhazwakale ya vhathu a hu athu vhuya ha vha na tshifhinga tshee vhukoni ha ḽifhasi ha u tikedza vhutshilo ha vha khomboni u fana na zwino. Naho zwo ralo, zwino zwithu zwo no shanduka! Vhorasaintsi vhanzhi vho sevha uri arali vhathu vha bvela phanḓa vha tshi tshikafhadza ḽifhasi, a ḽi tsha ḓo dzulea. Fhedzi Yehova “o ḽi vhumba uri ḽi dzulwe,” nahone u ḓo fhelisa vhatshikafhadzi vha sa athu tshinya tshoṱhe ḽifhasi.—Yesaya 45:18.

PHAṰUTSHEDZO DZA ḼIFHASI NGA FHASI HA MUVHUSO

Muhumbulo wa uri vhathu vha ḓo dzula kha ḽifhasi sa vhavhusiwa vha Muvhuso wa Mudzimu u nga vhonala u songo ḓowelea kha vhatendi vhanzhi vha Bivhili vhane vha humbula uri vhoṱhe vho tshidzwaho vha ṱaḓulu. Bivhili i sumbedza uri ndi tshivhalo tshiṱuku fhedzi tsha vhane vha ḓo ya ṱaḓulu na uri vhane vha ḓo dzula nga hu sa fheli kha ḽifhasi vha ḓo vha gogo ḽihulu ḽi sa vhalei. (Psalme ya 37:11, 29; Ndzumbululo 7:9; 14:1-5) Uri Muvhuso wa Mudzimu nga fhasi ha Kristo u ḓo ḓadza ḽifhasi nahone wa ḽi vhusa zwo sumbedzwa nga vhuporofita buguni ya Bivhili ya Daniele.

Henefho Muvhuso wa Kristo u imelwa nga tombo ḽo phiguluswaho ḽi tshi bva kha vhuvhusahoṱhe ha Yehova vhu ngaho thavha. Ḽi rwa na u pwasha tshifanyiso tshine tsha imela tshaka dza maanḓa dza ḽifhasi, nahone “iḽo tombo ḽone ḽe ḽa pwashakanya itsho tshifanyiso ḽa mbo vha thavha khulu ye ya ḓadza shango ḽoṱhe.” Vhuporofita vhu a bvela phanḓa: “Hone, misi ya eneo mahosi, ndi hone Mudzimu wa ṱaḓulu a tshi ḓo vusa muvhuso une wa sa ḓo tshinyala lini na lini, une vhuhosi hawo ha sa ḓo wetshela kha luṅwe lushaka. Wonoyo u ḓo pwashakanya mivhuso yoṱhe wa i lozwa; wone wa ima lini na lini.”—Daniele 2:34, 35, 44.

Ndi wonoyu Muvhuso na Maṅwalo a tikedzaho fulufhelo ḽa vhutshilo vhu sa fheli ḽifhasini ḽo kunakiswaho na ḽo nakaho une Ṱhanzi dza Yehova vha takalela u ni vhudza ngawo. Vha dzimilioni vhane vha khou tshila zwino, na vha dzimilioni nnzhi vhane zwino vha vha mavhiḓani vha ḓo vha na tshibuli tsha u dzula khaḽo nga hu sa fheli. Ngauralo, nga fhasi ha Vhuvhusi ha Kristo Yesu ha Miṅwaha ya Tshigidi, ndivho ya Yehova ya u thoma ya u sika ḽifhasi na u vhea vhavhingani vha u thoma i ḓo ḓadzea. Ḽeneḽi ḽifhasi ḽa Paradiso a ḽi nga ḓo vha na vhumvumvu. Samusi Adamu o vha o ṋewa mushumo tsimuni ya Edeni, na vhathu nga hu fanaho vha ḓo vha na mishumo i re na khaedu ya u ṱhogomela ḽifhasi na miri na vhutshilo ha zwipuka khaḽo. Vha “ḓo ḓiphina nga mishumo ya zwanḓa zwavho.”—Yesaya 65:22, Revised Standard Version, Genesi 2:15.

Hu na maṅwalo manzhi ane a sumbedza zwiimo zwine zwa ḓo vha hone musi thabelo ye Yesu a i funza i tshi fhindulwa: “Muvhuso wau u ḓe; zwiné wa funa nga zwi itwe fhano fhasi vhunga zwi tshi itwa ngei ṱaḓulu.” (Mateo 6:10) Naho zwo ralo, kha ri phethe nga luṅwalo lune lwa ri: “Nda pfa ipfi ḽihulu ḽi tshi bva kha khuluṋoni ḽi tshi ri: Asiyo, thumba ya Mudzimu vhukati ha vhathu! Ene u ḓo fhaṱa mushasha vhukati havho, vhone vha vha vhathu vhawe, huno ene nga eṱhé, Mudzimu, u ḓo vha kha vhone, Mudzimu wavho. U ḓo fhuluṱa maṱodzi oṱhe maṱoni avho, lufu a lu tsha ḓo vha hone, na vhuṱungu na zwililo na tshengelo a zwi tsha ḓo vha hone, ngauri zwa kale zwo fhela. O dzulaho kha khuluṋoni a ri: Asizwo, zwoṱhe ndi zwi ita zwiswa. A dovha a ri: Ṅwala, ngauri haya maipfi ndi a fulufhedzeaho, ndi ngoho.”—Ndzumbululo 21:3-5.

[Maipfi o ṱumbulwaho kha siaṱari 15]

“Zwifhinga zwi lemelaho,”

FHEDZI “ndi hone hu tshi ḓo ḓa vhufhelo”

[Tshifanyiso kha siaṱari 18]

Netherlands

[Tshifanyiso kha siaṱari 18]

Nigeria