Ndima ya Vhufumbiliiṋa
Yehova U Ḓiitela Dzina ḽi Kanukisaho
1, 2. (a) Ndi ngani Vhakriste vhe na dzangalelo kha “ḓuvha ḽa Yehova” ḽine ḽa khou ḓa? (b) Ndi ifhio khani khulwane ine ya kwamea nga u ḓa ha ḓuvha ḽa Yehova?
VHAKRISTE vho no fhedza miṅwaha i ṱoḓaho u vha zwigidi zwivhili vho ‘lindela u ḓa ha ḓuvha ḽa [“Yehova,” NW].’ (2 Petro 3:12; Tito 2:13) Zwi a pfala uri vha lavhelele u ḓa ha ḽeneḽo ḓuvha nga maṱo matswuku. Vhukuma, ḽi ḓo swaya u thoma ha mbofholowo yavho kha mitsiko ine ya itiswa nga u sa fhelela. (Vha-Roma 8:22) Ḽi ḓo dovha ḽa amba u guma ha mitsiko ine vha i tshenzhela kha ano ‘maḓuvha a vhufhelo a lemelaho.’—2 Timotheo 3:1.
2 Naho ḓuvha ḽa Yehova ḽi tshi ḓo ḓisa mbofholowo kha vhathu vho lugaho, ḽi ḓo dovha ḽa amba ndozwo kha “vha sa ḓivhi Mudzimu, na vha sá thetshelesi tshi ambwaho nga mafhungo-maḓifha a Murena washu Yesu.” (2 Vha-Thesalonika 1:7, 8) Haya ndi mafhungo ane a fanela u humbulwa nga ho dzikaho. Naa vhukuma Mudzimu u ḓo fhelisa vhavhi u itela u sokou vhofholola vhathu vhawe kha vhuimo vhu tsikeledzaho? Yesaya ndima ya 63 i sumbedza uri hu kwamea khani khulwane vhukuma, ine ya vha u khethwa ha dzina ḽa Mudzimu.
U Ḓa Ha Muhali A Kundaho
3, 4. (a) Ndi vhufhio vhubvo kha vhuporofita ha Yesaya ndima ya 63? (b) Yesaya u vhona nnyi a tshi khou hwenya o livha thungo ya Yerusalema, nahone vhagudi vha amba uri onoyo muthu ndi nnyi?
3 Kha Yesaya ndima ya 62, ri vhala nga ha u vhofhololwa ha Vhayuda vhuthubwani ngei Babele na u vhuyedzedzwa havho shangohaya ḽavho. Nga ho ḓoweleaho, hu takuwa mbudziso ine ya ri: Naa vha masalela o vusuluswaho a Vhayuda vha fanela u ofha uri vha ḓo dovha vha vutshelwa nga dziṅwe tshaka dza maswina? Bono ḽa Yesaya ḽi vha khuthadza vhukuma uri vha sa ofhe. Honovhu vhuporofita vhu thoma nga uri: “Naa ndi nnyi uḽa ane a bva Edomo, ó tswuka nguvho a tshi bva Bosira? O naka ó ḓi-ṱama, u hwenya a tshi pfa maanḓa?”—Yesaya 63:1a.
4 Yesaya u vhona muhali, a re na nungo na o kundaho, a tshi khou hwenya o livha Yerusalema. Zwiambaro zwawe zwo khetheaho zwi sumbedza uri ndi wa vhuimo ha nṱhesa. U bva thungo ya Bosira, muḓi une wa vha na bvumo vhukuma wa Edomo, zwi sumbedzaho uri o vha o kunda tshoṱhe wonoyo muḓi une wa vha swina. Onoyu muhali ndi nnyi? Vhaṅwe vhagudi vha amba uri ndi Yesu Kristo. Vhaṅwe vha amba uri ndi Judas Maccabaeus mulangammbi wa Muyuda. Naho zwo ralo, onoyu muhali u a ḓiṱalula musi a tshi fhindula mbudziso i re afho nṱha nga uri: “Ndi Nṋe, Mu-amba-mavhuya, Makone kha u lamulela.”—Yesaya 63:1b.
5. Ndi nnyi muhali we a vhonwa nga Yesaya, nahone ndi ngani ni tshi fhindula nga u ralo?
5 A zwi timatimisi uri onoyu muhali ndi Yehova Mudzimu nga dzawe. Huṅwe fhethu u ṱaluswa sa a re na ‘maanḓa mahulu’ na a ‘ambaho mavhuya.’ (Yesaya 40:26; 45:19, 23) Zwiambaro zwi swayeaho zwa muhali zwi ri humbudza maipfi a mupsalme ane a ri: “Renda Yehova, Muya wanga! Yehova Mudzimu wanga, wo hula zwinzhi, wo ambara lupenyo na madzanga.” (Psalme ya 104:1) Naho Yehova e Mudzimu wa lufuno, Bivhili i sumbedza uri u dovha a vha muhali musi zwi tshi ṱoḓea.—Yesaya 34:2; 1 Yohane 4:16.
6. Ndi ngani Yehova a tshi bva nndwani ngei Edomo?
6 Naho zwo ralo, ndi ngani Yehova a tshi bva nndwani ngei Edomo? Vhaedomo, vhane vha vha vhaṱuṱuwedzi vha vhuswina he ha thoma nga Esau, makhulukuku wavho, ndi maswina mahulwane a vhathu vho vhofhaho mulanga na Mudzimu. (Genesi 25:24-34; Numeri 20:14-21) Vhuhulwane ha vhuswina ha Edomo kha Yuda ho vhonala zwihuluhulu tshifhingani tsha u fheliswa ha Yerusalema musi Vhaedomo vha tshi fhululedza maswole a Babele. (Psalme ya 137:7) Yehova u dzhia ḽeneḽo vengo ḽi vhuswina vhune ha itelwa ene nga ho livhaho. Ndi ngazwo o ḓiimisela u ṱomola banga ḽawe ḽa ndifhedzo u itela u lwa na ḽa Edomo!—Yesaya 34:5-15; Yeremia 49:7-22.
7. (a) Vhuporofita vhu kwamaho Edomo ho ḓadzea hani u thomani? (b) Edomo ḽi fanyisela mini?
7 Nga zwenezwo, bono ḽa Yesaya ndi ṱhuṱhuwedzo khulwane kha Vhayuda vhane vha bva Yerusalema. Ḽi vha khwaṱhisedza uri vha ḓo dzula nga mulalo hayani havho huswa. Vhukuma, misini ya muporofita Maleaxi, Mudzimu o ita uri ‘thavha [dza ḽa Edomo] dzi vhe marubi, shango ḽawe a ḽi ita ḽa phunguhwe dza sogani.’ (Maleaxi 1:3) Nga zwenezwo, naa izwi zwi amba uri vhuporofita ha Yesaya ho ḓadzea tshoṱhe misini ya Maleaxi? Hai, ngauri hu sa londwi u vha haḽo shubi, vhadzulapo vhaḽo vho vha vho ḓiimisela u fhaṱulula fhethu havho ho tshinyadzwaho, nahone Maleaxi o bvela phanḓa u vhidza Edomo “Shango ḽa vhuvhi” na “lushaka lwe lwa semwa nga Yehova.”a (Maleaxi 1:4, 5) Naho zwo ralo, nga lwa vhuporofita, Edomo a ḽi kateli vhaḓuhulu vha Esau fhedzi. Ḽi imela tshaka dzoṱhe dzine dza vha maswina a vhagwadameli vha Yehova. Tshaka dza ḽa Vhudzhagane ndi dzone dze zwihuluhulu dza vha na bvumo kha ḽeneḽi sia. Hu ḓo itea mini kha Edomo ḽa musalauno?
Vhufhonḓelo ha Veine
8, 9. (a) Muhali we a vhonwa nga Yesaya o vha a tshi khou ita mushumo ufhio? (b) Vhufhonḓelo ha veine ha pfanyisedzo ho kandekanywa lini nahone nga nḓila-ḓe?
8 Yesaya u vhudzisa muhali we a vhuya: “Naa nguvho dzau dzo tswuka nga’ni? Khe’ zwiambaro zwau zwi tshi nga zwa mufhonḓi [“wa veine,” NW]? Yehova u a fhindula: “Ndi bva u fhonḓa [“kandekanya vhufhonḓelo ha veine,” NW] ndi ndoṱhe; wa luṅwe lushaka ndo vha ndí si nae’. Ndo vha kandakanya ndó sinyuwa; ndo vha pwashakanya ndó halifha; malofha avho o nkhasha nguvho, nda tswukisa zwiambaro zwanga zwoṱhe.”—Yesaya 63:2, 3.
9 Enea maipfi o livhaho a ṱalusa bulayo. Ee, na zwiambaro zwa Mudzimu zwavhuḓi-vhuḓi zwo dondofhala, u fana na zwa mufhonḓi wa veine! Vhufhonḓelo ha veine ndi tshifanyiso tsho fanelaho tshine tsha sumbedza u khakhedzwa hune maswina a Yehova Mudzimu a ḓiwana e khaho musi a tshi dzhia vhukando ha u a fhelisa. Honovhu vhufhonḓelo ha veine ha pfanyisedzo vhu ḓo kandekanywa lini? Vhuporofita ha Yoele na ha muapostola Yohane na hone vhu amba nga ha vhufhonḓelo ha veine ha pfanyisedzo. Vhufhonḓelo ha veine ha honoho vhuporofita vhu kandekanywa musi Yehova a tshi fhelisa maswina awe nga Haramagedo. (Yoele 3:13; Ndzumbululo 14:18-20; 16:16) Vhufhonḓelo ha veine ha pfanyisedzo ha Yesaya vhu ambela kha tshifhinga tshi fanaho.
10. Ndi ngani Yehova a tshi amba uri u kandekanya vhufhonḓelo ha veine e eṱhe?
10 Naho zwo ralo, ndi ngani Yehova a tshi amba uri u kandekanya honovhu vhufhonḓelo ha veine e eṱhe, a si na muthu wa luṅwe lushaka? Naa Yesu Kristo, muimeli wa Mudzimu, a nga si range phanḓa kha u kandekanya vhufhonḓelo ha veine? (Ndzumbululo 19:11-16) Ee, zwi ḓo ralo, fhedzi Yehova u khou ambela kha vhathu, hu si zwivhumbiwa zwa muya. U khou amba uri a hu na muthu ane a nga kona u fhelisa vhatevheli vha Sathane kha ḽifhasi. (Yesaya 59:15, 16) Ndi Mudzimu Ramaanḓaoṱhe ane a nga bvela phanḓa a tshi vha kandekanya o halifha, u swika vha tshi vha buse!
11. (a) Ndi ngani Yehova a tshi ḓisa “ḓuvha ḽa u lifhedza”? (b) Ndi vhafhio vhe vha ‘vhofhololwa’ zwifhingani zwa kale, nahone ndi vhafhio ṋamusi?
11 Yehova u bvela phanḓa u ṱalutshedza zwi itaho uri a ite wonoyu mushumo nga dzawe, o ri: “Ngauri mbilu yanga yo elekanya ḓuvha ḽa u lifhedza; ha mbo ḓa ṅwaha wanga wa u vhofholola.” (Yesaya 63:4)b Ndi Yehova fhedzi a re na ndugelo ya u lifhedza vhane vha vhaisa vhathu vhawe. (Doiteronomio 32:35) Zwifhingani zwa kale vhe a vha “vhofholola” vho vha vhe Vhayuda vhe vha shengedzwa nga Vhababele. (Yesaya 35:10; 43:1; 48:20) Musalauno ndi vha masalela a vho ḓodzwaho. (Ndzumbululo 12:17) U fana na vhahavho vha kale, vho vhofhololwa kha vhuthubwa ha vhurereli. Nahone u fana na vhenevho Vhayuda, vhaḓodzwa, kathihi na khonani dzavho vha “dziṅwe nngu,” vho tovholwa na u pikiswa. (Yohane 10:16) Nga zwenezwo vhuporofita ha Yesaya vhu khwaṱhisa Vhakriste ṋamusi uri Mudzimu u ḓo vha lamulela nga tshifhinga tshee a tshi vhea.
12, 13. (a) Yehova ha na muthusi nga nḓila-ḓe? (b) Tshanḓa tsha Yehova tshi tshidza nga nḓila-ḓe, nahone vhuhali hawe vhu mu tikedza hani?
12 Yehova o bvela phanḓa: “Ndo lavhelesa, nda shaya wa u mpfarisa; nda kanuka hú si ná wa u ntikedza. Nda fariswa nga tshanḓa tshanga; nda tikedzwa nga vhuhali hanga. Nda kandakanya dzitshakha ndó sinyuwa; dza pepeleka ndó dzi halifhela; nda elisa malofha adzo fhasi.”—Yesaya 63:5, 6.
13 A hu na muthu ane a nga amba uri o shela mulenzhe kha ḓuvha ḽihulwane ḽa Yehova ḽa ndifhedzo. Nahone Yehova ha ṱoḓi thikhedzo ya vhathu u itela u ḓadzisa zwine a zwi funa.c Tshanḓa tshawe tsha maanḓa a sa linganyiswi na tshithu tshi na nungo dzo eḓanaho u itela wonoyo mushumo. (Psalme ya 44:3; 98:1; Yeremia 27:5) Zwiṅwe hafhu, u tikedzwa nga vhuhali hawe. Nga nḓila-ḓe? Nga muhumbulo wa uri vhuhali ha Mudzimu a si maḓipfele a sa langiwi, fhedzi ndi tsinyuwo yo lugaho. Samusi misi yoṱhe Mudzimu a tshi dzhia vhukando u ya nga mitheo ya maitele o lugaho, vhuhali hawe vhu a mu tikedza na u mu ṱuṱuwedza uri a ‘elelise fhasi malofha’ a maswina awe, a ita uri a farwe nga ṱhoni na u a kunda.—Psalme ya 75:8; Yesaya 25:10; 26:5.
Tshilidzi tsha Mudzimu
14. Ndi khumbudzo dzifhio dzo fanelaho dzine Yesaya a dzi ṋea zwino?
14 Zwifhingani zwo fhiraho, Vhayuda vho hangwa nga u ṱavhanya u livhuha zwithu zwe Yehova a vha itela zwone. Nga zwenezwo, zwo vha zwo fanela uri Yesaya a vha humbudze uri ndi ngani Yehova o ita zwithu zwo raloho. Yesaya o ri: “Ndi renda zwilidzi zwa Yehova; ndi khoḓa Yehova ndi tshi tevhedza zwoṱhe zwe Yehova a ri ita, na vhuthu hawe vhuhulu a tshi tonda vha lushaka lwa Isiraele nga dzikhathutshelo dzawe na nga vhunzhi ha zwilidzi zwawe. O amba a ri: Ngangoho, vhenevha ndi vhathu vhanga; ndi vhana vhanga, a vha ntshandukeli. A mbo vha Mulamuleli wavho. Hoṱhe he vha vhaisala, o pfa a tshi vhaisala-vho; [“muḓinḓa,” NW] wa tshifhaṱuwo tshawe a vha lamulela; o vha vhofholola nga u’ a vha funa, a vha pfela vhuṱungu; a ḓi dovha a vha takula, a vha hwala misi yoṱhe na lini na lini.”—Yesaya 63:7-9.
15. Yehova o sumbedza tshilidzi tshawe vhana vha Abrahamu ngei Egipita hani nahone ndi ngani?
15 Ndi tsumbo i swayeaho lungafhani ine Yehova a i vhea kha u sumbedza tshilidzi, kana lufuno lwa u fulufhedzea! (Psalme ya 36:7; 62:12) Yehova o vhumba vhushaka ho khwaṱhaho na Abrahamu. (Mixa 7:20) O fulufhedzisa musimulalushaka uri nga mbeu yawe, kana vhana vhawe, tshaka dzoṱhe dza ḽifhasi dzi ḓo ḓifhaṱutshedza. (Genesi 22:17, 18, vhambedzani NW.) Yehova o ḓadzisa ḽeneḽo fulufhedziso, a sumbedza vhuthu vhuhulwane kha nnḓu ya Isiraele. Tshi swayeaho kha mishumo yawe ya u fulufhedzea ndi u tshidza hawe vhana vha Abrahamu vhupulini ngei Egipita.—Ekisodo 14:30.
16. (a) Yehova o dzhia hani vhathu vho vhofhaho mulanga nae? (b) Mudzimu u shumisana hani na vhathu vhawe?
16 Nga murahu ha Mupfuluwo, Yehova o isa Vhaisiraele Thavhani ya Sinai nahone a vha fulufhedzisa zwi tevhelaho: “Zwino arali ná thetshelesa zwine nda amba, na khwaṱhisa mulanga we nda u vhofha na inwi, ndi hone ni tshi ḓo vha thakha yanga . . . Inwi ni yo’ vha muvhuso wanga wa vho-tshifhé, lushaka lukhethwa.” (Ekisodo 19:5, 6) Naa Yehova o vha a tshi khou vha kanganyisa nga u vha fulufhedzisa zwenezwi? Hai, ngauri Yesaya u dzumbulula uri Yehova o mu vhudza a ri: “Ngangoho, vhenevha ndi vhathu vhanga, ndi vhana vhanga, a vha ntshandukeli.” Muṅwe mugudi u ri: “Ipfi ḽine ḽa ri ‘ngangoho’ a si ndaela ya vhuvhusi kana u ḓivha zwithu hu tshee nga phanḓa: ndi fulufhelo ḽo khwaṱhaho ḽa lufuno.” Ee, Yehova u vhofha mulanga wawe nga mbilu tshena, a tshi ṱoḓa nga mbilu yoṱhe uri vhathu vhawe vha bvelele. Hu sa londwi vhushayanungo havho, o sumbedza uri u a vha fulufhela. Ndi zwavhuḓi lungafhani u gwadamela Mudzimu ane a fulufhela vhagwadameli vhawe! Vhahulwane ṋamusi vha khwaṱhisa vhukuma vhe Mudzimu a vha kumedza uri vha vha ṱhogomele, nga u vha sumbedza uri vha a vha fulufhela nga hu fanaho.—2 Vha-Thesalonika 3:4; Vha-Heberu 6:9, 10.
17. (a) Yehova o sumbedza hani uri u funa Vhaisiraele? (b) Ri nga vha na fulufhelo ḽifhio ṋamusi?
17 Naho zwo ralo, mupsalme u amba zwi tevhelaho nga ha Vhaisiraele: “Vho vha vho hangwa Mudzimu we a vha tshidza, we a shuma zwithu zwihulu shangoni ḽa Egipita.” (Psalme ya 106:21) U sa thetshelesa havho na mavhonele avho a tshipimbi kanzhi zwo ita uri vha welwe nga khombo. (Doiteronomio 9:6) Naa Yehova o litsha u vha sumbedza tshilidzi? A zwo ngo ralo, Yesaya u amba uri “hoṱhe he vha vhaisala, o pfa a tshi vhaisala-vho.” Vhukuma Yehova u a pfela vhuṱungu! U fana na khotsi naho e ufhio a re na lufuno, Mudzimu o vhaisala musi a tshi vhona vhana vhawe vha tshi khou shengela, naho u shengela ha hone ho itiswa nga vhutsilu havho. Samusi zwo dzula zwo ambiwa nahone a tshi sumbedza lufuno lwawe, o rumela ‘muḓinḓa wawe,’ zwi vhonala uri Yesu a tshi kha ḓi vha muthu wa ṋama, uri a vha livhise Shangoni ḽo Fulufhedziswaho. (Ekisodo 23:20) Nga zwenezwo Yehova o hwala lwonolu lushaka nahone a lu takula, “vhunga khotsi o takula ṅwana wawe.” (Doiteronomio 1:31; Psalme ya 106:10) Ṋamusi ri nga vha na fulufhelo ḽa uri Yehova u a vhona tshengelo dzashu nahone u a ri pfela vhuṱungu musi ri mitsikoni. Nga fulufhelo ri nga ‘laṱela mbilaelo dzashu dzoṱhe kha ene, ngauri ndi ene ane a ri vhilaelela.’—1 Petro 5:7.
Mudzimu U Vha Swina
18. Ndi ngani Yehova o vha swina ḽa vhathu vhawe?
18 Naho zwo ralo, ri songo vhuya ra tamba nga tshilidzi tsha Mudzimu. Yesaya o bvela phanḓa: “Vhone vha ita nga swili, vha ṱungufhadza Muya wawe mukhethwa; a vhuya a shanduka a vha swina ḽavho, a vhó lwa navho’.” (Yesaya 63:10) Yehova o sevha uri naho e Mudzimu wa khathutshelo na vhuthu, ‘ha litshi u lifhedza.’ (Ekisodo 34:6, 7) Vhaisiraele vho vha vha tshi ḓo ṱarafiwa nge vha tevhela nḓila ya vhushandukwa. Mushe o vha humbudza a ri: “U songo hangwa zwauri Yehova Mudzimu wau wo mu levhela hangei sogani. Tshee wa pfuluwa Egipita a vhuya a U swikisa fhano wo ḓi ita Yehova nga tshikhuna.” (Doiteronomio 9:7) Vho vhaisa kana u ṱungufhadza muya wa Mudzimu nga u lwisana nawo. (Vha-Efesa 4:30) Vho ita uri Yehova a kombetshedzee u vha swina ḽavho.—Levitiko 26:17; Doiteronomio 28:63.
19, 20. Ndi zwithu zwifhio zwine Vhayuda vha zwi humbula, nahone ndi ngani?
19 Musi vha tshi khou tambula, vhaṅwe Vhayuda vho thoma u humbula nga zwa kale. Yesaya o ri: “Vhathu vhawe vha mbo elelwa aḽa maḓuvha a kale a Mushe, vha ri: U ngafhi Uḽa we a vha bvisa lwanzheni vhé na mulisa wa sambi ḽawe? U ngafhi Uḽa we a vhea Muya wawe mukhethwa mbiluni ya onoyo mulisa? We a ruma tshanḓa tshawe tsha u kanukisa tsha tshimbila na Mushe tshí nga thungo ya tsha u ḽa tshawe? Uḽa we a fhandakanya lwanzhe phanḓa havho, a lundisa dzina ḽawe ḽa vha ḽa lini na lini? We a vha wedza mativha, a vha tshimbidza sogani sa mbiḓi dzi sá khukhulwi. Muya wa Yehova wo vha orosa vhunga sambi ḽi tshi tsela muedzini.”—Yesaya 63:11-14a.d
20 Ee, musi Vhayuda vha tshi khou shengela nga nṱhani ha u sa thetshelesa, vho thoma u humbula maḓuvha e Yehova a vha e Muvhofhololi wavho nṱhani ha swina ḽavho. Vho elelwa nḓila ye ‘vhalisa’ vhavho, Mushe na Aroni, vha vha ranga ngayo phanḓa vha wela nga Lwanzheni Lutswuku vho tsireledzea. (Psalme ya 77:20; Yesaya 51:10) Vho elelwa tshifhinga tshee nṱhani ha u vhaisa muya wa Mudzimu, vha rangwa ngawo phanḓa nga vhulivhisi ho ṋewaho nga Mushe na vhaṅwe vhahulwane vho vhewaho nga muya. (Numeri 11:16, 17) Vha dovha vha humbula uri vho vhona “tshanḓa” tsha Yehova tsha nungo tshi tshi vha thusa nga Mushe! Nga u ya ha tshifhinga, Yehova a vha bvisa sogani ḽihulwane na ḽi ofhisaho nahone a vha livhisa shangoni ḽi elaho mukhaha na ṋotshi—fhethu ha vhuawelo. (Doiteronomio 1:19; Yoshua 5:6; 22:4) Naho zwo ralo, zwino Vhaisiraele vha a shengela nga ṅwambo wa uri vho pfuvhisa vhushaka havho havhuḓi na Mudzimu!
‘Dzina ḽawe ḽi Kanukisaho’
21. (a) Ndi ndugelo ifhio khulwane ye Vhaisiraele vha vha vha tshi ḓo vha nayo malugana na dzina ḽa Mudzimu? (b) Tsho vha tshi tshifhio tshiitisi tshihulwane tsha Mudzimu tsha u vhofholola vhaḓuhulu vha Abrahamu Egipita?
21 Naho zwo ralo, zwithu zwi vhonalaho zwe Vhaisiraele vha xelelwa ngazwo zwo vha zwi si tshithu musi zwi tshi vhambedzwa na ndugelo ye vha tamba ngayo, ine ya vha u ṱanganela kha u ṋea vhugala dzina ḽa Mudzimu. Mushe o fulufhedzisa Vhaisiraele a ri: “Yehova U ḓo ni khwaṱhisa na vha vhathu vhawe vhakhethwa vhunga ó ni anela, arali ni tshi tevhedza milayo ya Yehova Mudzimu waṋu na fara nḓila dzawe. Ndi hone tshakha dzoṱhe dza shango dzi tshi ḓo vhona zwauri dzina ḽa Yehova ḽi buliwa kha inwi, vha ni ofha.” (Doiteronomio 28:9, 10) Musi Yehova a tshi lwela vhaḓuhulu vha Abrahamu, a tshi vha vhofholola vhupulini ngei Egipita, o vha a sa khou itela fhedzi uri vha kone u tshila vho ḓigeḓa. O vha a tshi khou zwi ita nga ṅwambo wa tshiṅwe tshithu tsha ndeme vhukuma—dzina ḽawe. Ee, o vha a tshi khou ita vhungoho ha uri dzina ḽawe “ḽi khoḓiwe mashangoni oṱhe.” (Ekisodo 9:15, 16) Nahone musi Mudzimu a tshi khathutshela Vhaisiraele nga murahu ha vhushandukwa ngei sogani, o vha a sa khou zwi itela u sokou sumbedza nḓila ine a ḓipfa ngayo. Yehova nga dzawe o ri: “Nda itela dzina ḽanga, uri ndi si ḽi nyadzise kha vha-nnḓa.”—Hesekiele 20:8-10.
22. (a) Tshifhingani tshi ḓaho, ndi ngani Mudzimu a tshi ḓo dovha a lwela vhathu vhawe? (b) U funa hashu dzina ḽa Mudzimu zwi kwama nyito dzashu nga nḓila dzifhio?
22 Yesaya u phetha honovhu vhuporofita nga maipfi a re na maanḓa vhukuma! O ri: “Muya wa Yehova wo vha orosa vhunga sambi ḽi tshi tsela muedzini. Ndi zwone zwe a ḓi-itela dzina ḽi kanukisaho ngazwo’.” (Yesaya 63:14b) Zwino zwi khagala uri ndi ngani Yehova a tshi lwela nga maanḓa madzangalelo a vhathu vhawe. Ndi u ḓiitela dzina ḽi kanukisaho. Nga zwenezwo vhuporofita ha Yesaya ndi khumbudzo ya maanḓa ya uri u vhidzwa nga dzina ḽa Yehova ndi ndugelo i ofhisaho na vhuḓifhinduleli vhuhulwane. Vhakriste vha ngoho ṋamusi vha funa dzina ḽa Yehova u fhira vhutshilo havho. (Yesaya 56:6; Vha-Heberu 6:10) Vha iledza tshiṅwe na tshiṅwe tshine khamusi tsha nga ḓisa samba kha ḽeneḽo dzina ḽikhethwa. Vha aravha lufuno lwa Mudzimu lwa u fulufhedzea nga u dzula vha tshi fulufhedzea khae. Nahone nga ṅwambo wa uri vha funa dzina ḽa Yehova ḽi kanukisaho, vha ṱulutshela tshifhinga tshine a ḓo kandekanya maswina awe kha vhufhonḓelo ha veine ha vhuhali hawe—hu si nga ṅwambo wa uri zwi ḓo vha vhuyedza fhedzi, fhedzi na nga ṅwambo wa uri zwi ḓo ita uri vha ṋee vhugala dzina ḽa Mudzimu ḽine vha ḽi funa.—Mateo 6:9.
[Ṱhaluso dzi re magumoni a siaṱari]
a Vhoherode vha ḓana ḽa u thoma ḽa miṅwaha C.E. vho vha vhe Vhaedomo.
b Mubulo une wa ri “ṅwaha wanga wa u vhofholola” u nga ambela kha ḽifhinga ḽi fanaho na ḽine ḽa vhidzwa “ḓuvha ḽa u lifhedza.” Ṱhogomelani nḓila ine maipfi a fanaho a shumiswa ngayo kha mafhungo a tshimbidzanaho kha Yesaya 34:8.
c Yehova u mangadzwa nga uri a hu na muthu ane a ṱoḓa u thusa. Vhukuma ndi mbuno i mangadzaho uri nga murahu ha miṅwaha i ṱoḓaho u vha 2 000 Yesu o no fa, vhathu vha maanḓa vha kha ḓi lwisana na zwi funwaho nga Mudzimu.—Psalme ya 2:2-12; Yesaya 59:16.
d Maipfi ane a tevhela a sumbedza maḓipfele a vhathu vha Mudzimu nahone hu si a Yehova nga dzawe. Nga zwenezwo Soncino Books of the Bible i shumisa maipfi ane a ri: “Nga zwenezwo vhathu Vhawe vha humbula maḓuvha a kale.”
[Tshifanyiso kha siaṱari 359]
Yehova u lavhelela zwithu zwa nṱha kha vhathu vhawe