Ndima Ya Vhufumiraru
Gogo Ḽihulu Phanḓa Ha Khuluṋoni Ya Yehova
1. (a) Musi vhashumeli vha Mudzimu vha nga phanḓa ha Vhukriste vha sa athu fa kana vha 144 000 vha sa athu wana malamba avho, hu fanela u itea mini ngavho? (b) Hu ḓo itea mini kha vha “gogo ḽihulu” vhane vha khou tshila kha tshino tshifhinga?
VHASHUMELI vha Mudzimu vha fulufhedzeaho u bva kha Abele u ya kha Yohane Mulovhedzi, vho rangisa zwine Mudzimu zwi funa vhutshiloni havho. Naho zwo ralo, vhoṱhe vho fa, vho lindela u vuselwa vhutshiloni kha ḽifhasi shangoni ḽiswa la Mudzimu. Na vha 144 000, vhane vha ḓo vhusa na Kristo kha Muvhuso wa Mudzimu wa ṱaḓulu, vha fanela u thoma vha fa musi vha sa athu wana malamba avho. Naho zwo ralo, Ndzumbululo 7:9 i sumbedza uri kha anea maḓuvha a vhufhelo, hu ḓo vha na vha “gogo ḽihulu” vha bvaho kha tshaka dzoṱhe vhane vha sa ḓo fa, fhedzi vhane vha ḓo vha na tshilavhelelwa tsha u tshila nga hu sa fheli kha ḽifhasi. Naa ni muṅwe wavho?
U Ṱalula Vha Gogo Ḽihulu
2. Ndi mini tsho itaho uri hu pfeseswe zwavhuḓi u ṱalulwa ha vha gogo ḽihulu ḽi re kha Ndzumbululo 7:9?
2 Nga 1923, vhashumeli vha Yehova vho zwi pfesesa uri “nngu” dza kha tshifanyiso tsha Yesu tshi wanalaho kha Mateo 25:31-46 na vha “dziṅwe nngu” dze a amba ngadzo samusi zwo ṅwaliwa kha Yohane 10:16 ndi vhathu vhane vha ḓo vha na tshibuli tsha u tshila nga hu sa fheli kha ḽifhasi. Nga 1931 vho ṱaluswaho kha Hesekiele 9:1-11 sa vho swaiwaho kha phanḓa na vhone vha na fulufhelo ḽa u tshila kha ḽifhasi. Nga zwenezwo nga 1935 ho pfeseswa uri vha gogo ḽihulu vha vhumba tshigwada tsha dziṅwe nngu tshe Yesu a amba nga hatsho. Namusi, tshivhalo tsha vha gogo ḽihulu ḽine ḽa takalelwa tshi swika dzimilioni.
3. Ndi ngani maipfi ane a ri “ḽó ima ḽó livhana na khuluṋoni” a sa ambeli kha tshigwada tsha ṱaḓulu?
3 Kha Ndzumbululo 7:9, gogo ḽihulu a ḽi vhonwi ḽi ṱaḓulu. U vha haḽo “ḽó ima ḽó livhana na khuluṋoni” ya Mudzimu a zwi vhuyi zwa ṱoḓa uri ḽi vhe ṱaḓulu. Vha hune Mudzimu a kona u vha vhona. (Psalme ya 11:4) Mbuno ya uri vha gogo ḽihulu, “ḽi sa koni u vhalwa nga muthu” a si tshigwada tshine tsha ya ṱaḓulu zwi sumbedzwa nga u vhambedza tshivhalo tshaḽo tshi songo bulwaho nga ho livhaho na zwo ṅwalwaho kha Ndzumbululo 7:4-8 na kha Ndzumbululo 14:1-4. Henefho hu bulwa uri vhane vha ḓo dzhiiwa fhano kha ḽifhasi uri vha tshile ṱaḓulu ndi vha 144 000.
4. (a) Ndi afhio ‘maṱungu mahulu’ ane vha gogo ḽihulu vha ponyoka khao? (b) Samusi zwo bulwa kha Ndzumbululo 7:11, 12, ndi vhafhio vho vhonaho gogo ḽihulu nahone vha ṱanganela naḽo kha vhurabeli?
4 Ndzumbululo 7:14 i amba zwi tevhelaho nga ha vha gogo ḽihulu: “Havhano, ndi vho bvaho maṱunguni mahulu.” Vho ponyoka maṱungu mahulu u fhira oṱhe e a vhuya a vha hone kha ḓivhazwakale ya vhathu. (Mateo 24:21) Musi vha tshi livhuha Mudzimu na Kristo nga u tshidzwa havho, zwivhumbiwa zwoṱhe zwi re ṱaḓulu zwi ḓo amba mazha zwa ri: “Amen! zwirendo na lupenyo na vhuṱali na ndivhuho na u huliswa na maanḓa na nungo nga zwi vhe zwa Mudzimu washu na lini na lini!”—Ndzumbululo 7:11, 12.
U Sumbedza U Fanelea U Ponyoka
5. Ri nga ḓivha hani zwine zwa ṱoḓea u itela u vha tshipiḓa tsha vha gogo ḽihulu?
5 U tshidzwa ha vha gogo ḽihulu kha maṱungu mahulu zwi tshimbidzana na zwilinganyo zwo lugaho zwa Yehova. Pfaneleo dzine dza ṱalula vhane vha ḓo vhofhololwa dzo haseledzwa zwavhuḓi Bivhilini. Nga zwenezwo, zwi a konadzea uri vhane vha funa u luga vha dzhie vhukando zwino uri vha fanelee u ponyoka. Vhenevha vhathu vha fanela u ita mini?
6. Ndi ngani vha gogo ḽihulu vha tshi nga vhambedzwa na nngu?
6 Nngu dzo vuḓa nahone dzi a ḓiṱukufhadza. Nga zwenezwo musi Yesu a tshi amba uri u na dziṅwe nngu dzi si dza tshigwada tsha ṱaḓulu, o vha a tshi khou amba nga vhathu vhane vha ṱoḓa u tshila tshoṱhe kha ḽifhasi na vhane vha ḓo thetshelesa pfunzo dzawe. O ri: “Nngu dzanga dzi pfa ipfi ḽanga; nṋe ndi a dzi ḓivha, huno dzi a ntevhela.” (Yohane 10:16, 27) Vhenevha ndi vhathu vhane vhukuma vha thetshelesa na u ita zwine Yesu a zwi amba, vha vha vhafunziwa vhawe.
7. Ndi pfaneleo dzifhio dzine vhatevheli vha Yesu vha fanela u dzi ṱahulela?
7 Ndi dzifhio dziṅwe pfaneleo dzine dza fanela u ṱahulelwa nga muṅwe na muṅwe wa vhenevha vha vhatevheli vha Yesu? Ipfi ḽa Mudzimu ḽi a fhindula: ‘Bvulani muthu mulala, wa kutshimbilele kwa kale, ambarani muthu muswa, we a ri a tshi vhumbiwa ha vha u tevhedza Mudzimu, a vhumbwa ó luga, e mukhethwa, zwi tshi bva kha mafhungo-ngoho.’ (Vha-Efesa 4:22-24) Vha ṱahulela pfaneleo dzine dza khwinisa vhuthihi ha vhashumeli vha Mudzimu—“dakalo, mulalo, u sa fhela mbilu, vhulenda, vhuthu, lutendo, U vuḓa, u konḓelela.”—Vha-Galata 5:22, 23.
8. Vha gogo ḽihulu vha ḓo sedzana na mini musi vha tshi tikedza vha masalela?
8 Vha gogo ḽihulu vha tikedza vha tshigwada tshiṱuku vhane vha vha na fulufhelo ḽa u tshila ṱaḓulu, vhane vha ranga phanḓa kha mushumo wa u huwelela. (Mateo 24:14; 25:40) Vha dziṅwe nngu vha tikedza tshenetsho tshigwada, naho vha tshi zwi ḓivha uri vha ḓo pikiswa nga ṅwambo wa uri musi enea maḓuvha a vhufhelo a tshi thoma, Kristo Yesu na vharuṅwa vhawe vho pandela Sathane na madimoni awe ṱaḓulu. Hezwi zwo amba “Yawee! ḽifhasi . . . ngauri Diabolo o tsela henengeo ha vho inwi e na mbiti khulu, a tshi zwi ḓivha zwauri o salelwa nga tshifhinga tshiṱuku.” (Ndzumbululo 12:7-12) Nga zwenezwo, Sathane u ita uri vhashumeli vha Mudzimu vha pikiswe vhukuma samusi ano maitele e tsini na u fhela.
9. Vhashumeli vha Mudzimu vha bvelela lungafhani kha u huwelela mafhungo maḓifha, nahone ndi ngani?
9 Hu sa londwi u tovholwa ha tshiṱuhu, mushumo wa u huwelela u khou bvela phanḓa. Musi Nndwa ya Shango ya U Thoma i tshi fhela, ho vha huna vhahuweleli vha Muvhuso vha zwigidi zwi si gathi, zwino huna vha dzimilioni, ngauri Yehova o fulufhedzisa a ri: “Mafumo oṱhe a fúlelwaho u lwa na iwe ha nga koni tshithu.” (Yesaya 54:17) Na muraḓo wa gota ḽa Vhayuda o zwi ṱhogomela uri mushumo wa Mudzimu u nga si thivhelwe. O vhudza Vhafarisei kha ḓana ḽa u thoma ḽa miṅwaha mafhungo a tevhelaho malugana na vhafunziwa: “Avha vhathu vha litsheni vha ṱuwe. Arali mafhungo avho na mishumo yavho zwi tshi bva kha vhathu, zwi ḓo lovha. Hone arali zwi tshi bva kha Mudzimu, a ni nga koni u zwi dzivhisa. Vha litsheni, uri ni sa vho ḓo nga vha lwaho na Mudzimu.”—Mishumo 5:38, 39.
10. (a) ‘Luswayo’ lu re kha vha gogo ḽihulu lu amba mini? (b) Vhashumeli vha Mudzimu vha thetshelesa hani ‘ipfi ḽi bvaho ṱaḓulu’?
10 Vha gogo ḽihulu vha ṱaluswa sa vho swaiwaho u itela u tshidzwa. (Hesekiele 9:4-6) ‘Luswayo’ ndi vhuṱanzi ha uri vho ḓiṋekedza kha Yehova, vha lovhedzwa vha vha vhafunziwa vha Yesu, nahone vha lwela u ṱahulela vhumuthu vhu ngaho ha Kristo. Vha thetshelesa ‘ipfi ḽi bvaho ṱaḓulu’ ḽine ḽa amba zwi tevhelaho malugana na vhurereli ha mazwifhi ha Sathane ha shango ḽoṱhe: “Ibvani khaḽo’ vhathu vhanga! Ni songo vha na vhuhura naḽo’ kha zwivhi zwaḽo, na vhó ḓo baḓakanyiwa naḽo’ kha dziṱhamu dzaḽo.”—Ndzumbululo 18:1-5.
11. Vha gogo ḽihulu vha sumbedza nga nḓila ifhio ya ndeme uri ndi vhashumeli vha Yehova?
11 Hafhu, Yesu o vhudza vhatevheli vhawe a ri: “Ndi zwiné vhathu vhoṱhe vha ḓo ḓivha ngazwo’ zwauri ni vhafunziwa vhanga arali u funana hu hone kha inwi.” (Yohane 13:35) U fhambana na zwenezwo, miraḓo ya vhurereli ha ḽino shango i a vhulahana nndwani, kanzhi nga ṅwambo wa uri a si vha lushaka luthihi! Ipfi ḽa Mudzimu ḽi ri: “Ndi zwone zwiné muthu a ṱalukanya ngazwo’ vhana vha Mudzimu na vhana vha Sathane. Muthu ané a si ite zwo lugaho ha bvi Mudzimuni, u ḓi nga a sá funi vha hawe. . . . Hu pfi ri funane. Ri songo nga Kaini we a vha a tshi bva kha muvhi, a vhulaha murathu wawe.”—1 Yohane 3:10-12.
12. Tshifhingani tsha maṱungu mahulu, Yehova u ḓo ita mini “miri” ya vhurereli ine ya aṋwa mitshelo mivhi?
12 Yesu o ri: “Muri wavhuḓi ndi wone u aṋwaho mitshelo yo nakaho; muri u sa ḓivhalei wa aṋwa mitshelo mivhi. Muri wavhuḓi a u koni u bvisa mitshelo mivhi; zwi ḓi nga muri u sá ḓivhalei ú sa koni u bvisa mitshelo yo nakaho. Miri yoṱhe i sá aṋwi mitshelo yavhuḓi i a remiwa ya kudzwa muliloni. Ndi zwone-ha, ni ḓo vha ḓivha nga mitshelo yavho.” (Mateo 7:17-20) Mitshelo ine ya aṋwiwa nga vhurereli ha ḽino shango i vhu ṱalula sa “miri” mivhi, ine Yehova a ḓo i fhelisa hu si kale nga maṱungu mahulu.—Ndzumbululo 17:16.
13. Vha gogo ḽihulu vha sumbedza hani uri vha ‘ima phanḓa ha khuluṋoni’ ya Yehova nga vhuthihi?
13 Ndzumbululo 7:9-15 i amba nga zwithu zwine zwa ḓo ita uri vha gogo ḽihulu vha tshidzwe. Vha sumbedzwa vhe na vhuthihi ‘vho ima vho livhana na khuluṋoni’ ya Yehova, vha tshi sumbedza uri vha tikedza vhuvhusahoṱhe hawe. Vho “ṱanzwa, vho tshenisa nguvho dzavho nga malofha a Ngwana,” zwine zwa sumbedza uri vha tenda kha tshiṱhavhelo tsha Yesu tshine tsha pfumelela zwivhi. (Yohane 1:29) Vho ḓiṋekedza kha Mudzimu nahone vha zwi sumbedza nga u mbwandamedzwa maḓini. Nga zwenezwo, vho kuna phanḓa ha Mudzimu, zwine zwa sumbedzwa nga nguvho tshena, nahone vha mu “shumela masiari na vhusiku.” Naa dzi hone nḓila dzine na nga ita ngadzo uri vhutshilo haṋu vhu tendelane tshoṱhe na zwe zwa ṱaluswa afha?
Zwivhuya Zwa Zwino
14. Ndi zwifhio zwiṅwe zwivhuya zwo khetheaho zwine zwa waniwa nga vhashumeli vha Yehova naho hu zwino?
14 Khamusi na zwino no no zwi vhona zwivhuya zwo khetheaho zwine zwa waniwa nga vhathu vhane vha shumela Yehova. Sa tsumbo, musi ni tshi guda nga ha ndivho dzo lugaho dza Yehova, no pfesesa uri huna fulufhelo ḽavhuḓi ḽa vhumatshelo. Zwino ni na ndivho ya vhukuma vhutshiloni—ine ya vha u shumela Mudzimu wa ngoho ni na tshilavhelelwa tshi takadzaho tsha vhutshilo vhu sa fheli kha ḽifhasi ḽa paradiso. Ee, Khosi Yesu Kristo ‘u ḓo lisa [vha gogo ḽihulu] nḓilani ya u ya zwisimani zwa maḓi a vhutshilo.’—Ndzumbululo 7:17.
15. Ṱhanzi dza Yehova vho vhuyelwa hani nga u tevhela maitele a Bivhili malugana na mafhungo a zwa politiki na a zwa matshilele?
15 Zwivhuya zwi mangadzaho zwine vha gogo ḽihulu vha ḓiphina ngazwo ndi lufuno, vhuthihi, na pfano zwine zwa vha hone vhukati ha vhashumeli vha Yehova ḽifhasini ḽoṱhe. Samusi roṱhe ri tshi ḽa zwiḽiwa zwi fanaho zwa muya, roṱhe ri thetshelesa milayo i fanaho na maitele zwi wanalaho kha Ipfi ḽa Mudzimu. Ndi ngazwo ri songo fhandekanywa nga pfunzo dza politiki kana dza vhutshavha. Hafhu, matshilele ashu ndi a vhuimo ha nṱha ane Mudzimu a a ṱoḓa kha vhathu vhawe. (1 Vha-Korinta 6:9-11) Nga zwenezwo, nṱhani ha u vha na khakhathi, u sa pfana, na vhuaḓa ho phaḓalalaho shangoni, vhathu vha Yehova vha ḓiphina nga zwine zwa nga vhidzwa paradiso ya muya. Ṱhogomelani nḓila ye zwenezwi zwa ṱaluswa ngayo kha Yesaya 65:13, 14.
16. Hu sa londwi vhuleme ho ḓoweleaho vhutshiloni, vha gogo ḽihulu vha na fulufhelo ḽifhio?
16 A zwi ambi uri vhashumeli vha Yehova vho fhelela. Vha sedzana na vhuleme ho ḓoweleaho vhutshiloni kha ḽino shango, vhu ngaho maṱhupho kana u vutshelwa vha si na mulandu musi mashango a tshi lwa. Hafhu vha a farwa nga malwadze, vha a shengela nahone vha a fa. Fhedzi vha na lutendo uri shangoni ḽiswa, Mudzimu “u ḓo fhuluṱa maṱodzi oṱhe maṱoni avho, lufu a lu tsha ḓo vha hone, na vhuṱungu na zwililo na tshengelo a zwi tsha ḓo vha hone.”—Ndzumbululo 21:4.
17. Hu sa londwi zwine zwa nga itea kha riṋe zwino, ndi vhumatshelo vhufhio vhu mangadzaho ho vhetshelwaho vhane vha gwadamela Mudzimu wa ngoho?
17 Naho na fa zwino nga ṅwambo wa vhulala, vhulwadze, khombo ya badani, kana u tovholwa, Yehova u ḓo ni vusa na tshila Paradisoni. (Mishumo 24:15) Nga zwenezwo ni ḓo bvela phanḓa ni tshi ḓiphina tshifhingani tsha Vhuvhusi ha Miṅwaha ya Tshigidi ha Kristo. Ni ḓo funa Mudzimu nga ho engedzeaho musi ni tshi vhona ndivho dzawe dzi tshi ḓadzea nga nḓila i swayeaho. Nahone nḓila ine Yehova a ḓo ni fhaṱutshedza ngayo siani ḽa ṋama i ḓo ni ita uri ni mu fune nga ho engedzeaho. (Yesaya 25:6-9) Ndi vhumatshelo havhuḓi lungafhani vhune ha ḓo waniwa nga vhathu vha Mudzimu!
Mvusuluso
• Ndi tshiitea tshifhio tshi swayeaho tshine Bivhili ya tshi ṱanganya na vha gogo ḽihulu?
• Arali ri tshi ṱoḓa u vha vhaṅwe vha vha gogo ḽihulu ḽine ḽa takalelwa nga Mudzimu, ri fanela u ita mini zwino?
• Phaṱutshedzo dzine vha gogo ḽihulu vha ḓiphina ngadzo zwino na dzine vha kha ḓi ḓo ḓiphina ngadzo shangoni ḽiswa ḽa Mudzimu ndi dza ndeme lungafhani kha inwi?
[Tshifanyiso kha siaṱari 123]
Vha gogo ḽihulu ḽa dzimilioni vha gwadamela Mudzimu wa ngoho nga vhuthihi