Ndima 27

Ndi Ngani Ndi Tshi Vhona U Nga A Tho Ngo Fanela U Ita Vhukhakhi?

Naa ni a sinyuwa arali na sa wana maraga dzine na khou dzi ṱoḓa kha mulingo?

□ Ee

□ Hai

Naa ni ḓipfa ni dodo musi ni tshi sasaladzwa?

□ Ee

□ Hai

Naa zwi a ni konḓela u vha na dzikhonani kana u dzula ni nadzo nga ṅwambo wa uri dzi a kundwa u ita zwithu nga nḓila ine na i ṱoḓa?

□ Ee

□ Hai

ARALI phindulo yaṋu kha mbudziso nthihi kana u fhira dzi re afho nṱha hu ee, ni nga kha ḓi vha ni na vhuleme ha u sa ṱoḓa u ita vhukhakhi. Ni nga kha ḓi ḓivhudzisa uri, ‘Naa a si zwavhuḓi u sa ṱoḓa u ita vhukhakhi?’ Ee, ndi zwavhuḓi. Bivhili i khoḓa muthu ane a vha “makone-kha-zwawe.” (Mirero 22:29) Naho zwo ralo, muthu ane a ṱoḓa u ita tshiṅwe na tshiṅwe a sa khakhi u kaludza zwithu.

Sa tsumbo, Jason ane a vha na miṅwaha ya 19 o ri: “Nga ṅwaha we nda ṱhaphudza ngawo tshikoloni, ndo vha ndi tshi vhona u nga ndi ḓo tou vha ndi dodo arali nda sa ḓivha phindulo dza mbudziso dzoṱhe dza mulingo. Nahone ndo vha ndi tshi lidza na piano nahone ndo vha ndi tshi vhona u nga ndi fanela u i lidza u fana na mulidzi wa piano a re na vhutsila musi e khonsatini.”

Muthu ane a ṱoḓa u ita tshiṅwe na tshiṅwe a sa khakhi a nga thithisa nḓila ine a gwadamela ngayo Yehova. Edzani u humbula nga ha zwine zwa nga itea kha muswa ane tshifhinga tshoṱhe a dzhiiwa e tsumbo kha vhaṅwe vhathu. Nga ṅwambo wa uri vhathu vha dzula vho livhisa ṱhogomelo khae, a nga ḓipfa a songo vhofholowa musi a tshi ita zwithu. Ndi ngoho uri Vhakriste vhaṱuku na vhahulwane vha a vhuyelwa nga tsumbo dzavhuḓi tshivhidzoni. Naho zwo ralo, muswa ane a ḓidina uri a sa ite vhukhakhi musi a tshi ita tshiṅwe na tshiṅwe a nga kha ḓi sa takala tshumeloni ya Mudzimu. Arali zwenezwo zwa itea, onoyo muswa u fanela u thusiwa. Fhedzi a nga kha ḓi sa i humbela, a tshi ofha u shonisa vhane vha mu dzhiela nṱha. A nga kha ḓi lingea nahone a ṱoḓa u litsha tshoṱhe a ḓivhudza uri, ‘Arali ndi sa koni u ita zwithu nga nḓila yo fhelelaho ndi ngani ndi tshi fanela u ḓidina?’

U Lwisana Na Honoho Vhuleme

Vhathu vhane vha vha na mavhonele o raloho vha lwisana na mahumbulele a uri a vho ngo fanela u vhuya vha ita vhukhakhi. Naho zwo ralo, eneo mavhonele o khakhea. Bivhili i amba nga hu pfalaho uri: “Vho tshinya vhoṱhe, vhoṱhe vho ṱáhela vhurena ha Mudzimu.” (Vha-Roma 3:23) Nga zwenezwo, a zwi konadzei u ita zwithu zwoṱhe nga ho fhelelaho. Zwi re zwone ndi uri u tenda uri ni nga ita zwithu ni sa khakhi zwi fana na u humbula uri ni nga mbo ḓi sokou thamuwa na fhufha muyani. Naho ha tou itea mini, ni nga si vhuye na zwi kona!

Ni nga ita mini uri ni sa langwe nga enea mavhonele? Lingedzani zwi tevhelaho:

Dovhani ni ṱolisise zwine na zwi dzhia zwi u “bvelela.” Naa ni khou ḓinetisa u itela u lingedza u takadza muṅwe na muṅwe? Bivhili i amba uri vhuḓidini honoho vhu fana na u “pandamedza muya.” (Muhuweleli 4:4, Today’s English Version) Mbuno ndi ya uri ndi vha si gathi vhane vha kona u ita zwithu zwine zwa“takadza” muṅwe na muṅwe. Naho arali muthu a nga kona u ita nga u ralo, nga murahu ha tshifhinganyana hu vha na muṅwe ane a vha wa khwine u mu fhira. U bvelela zwi amba u ita zwa khwine zwine na nga zwi kona—hu si u ita zwithu u itela u fhira vhaṅwe.—Vha-Galata 6:4.

Ivhani na mavhonele a vhukuma. Zwine na zwi lavhelela a zwo ngo fanela u fhira vhukoni haṋu. U vha na zwilavhelelwa zwihulwane zwi nga sumbedza uri a ni ḓivhi zwine na si kone u zwi ita nahone zwi sumbedza u vha na tseḓa. Muapostola Paulo o ṋea heyi nyeletshedzo i pfalaho: “Hu songo vha na muthihi kha inwi ané a kalula u ḓi-fhima.” (Vha-Roma 12:3) Nga zwenezwo ivhani na mavhonele a vhukuma. Ḓivhani zwine na nga kona u zwi swikelela. Itani zwoṱhe zwine na nga zwi kona hu si u ṱoḓa u ḓiita o fhelelaho.

Ni songo ḓidzhiela nṱha nga maanḓa! Lingedzani u ita tshiṅwe tshithu tshine na sa tshi kone zwavhuḓi, khamusi u lidza tshilidzo tsha muzika. Ndi ngoho uri ni ḓo ita vhukhakhi vhunzhi. Naho zwo ralo, zwa zwino lingedzani u sa dzhia vhukhakhi haṋu u fana na u thomani. Bivhili i amba uri “u sea hu na tshifhinga tshaho.” (Muhuweleli 3:4) Nga zwenezwo ni songo ḓidzhiela nṱha nga maanḓa. U ita nga u ralo zwi ḓo ni thusa u vhona uri u ita vhukhakhi ndi nḓila ya u guda. Vhukuma a zwi nga ḓo ni lelutshela u ṱanganedza mbuno ya uri ni a ita vhukhakhi. Fhedzi lingedzani nga nungo dzoṱhe u sa langwa nga mihumbulo i si yavhuḓi.

Ni songo vhuya na hangwa uri Yehova ha lavheleli uri ri sa ite vhukhakhi; u lavhelela uri ri fulufhedzee khae. (1 Vha-Korinta 4:2) Arali ni tshi lingedza u dzula ni tshi fulufhedzea, ni ḓo ḓifuna naho ni tshi ita vhukhakhi.

LUṄWALO LWA NDEME

“Fhano shangoni”—Muhuweleli 7:20.

TSIVHUDZO

Humbulani nga ha mushumo we na u vhetshela thungo nga ṅwambo wa u ofha uri ni ḓo khakha musi ni tshi u ita. Nga zwenezwo ḓivhetsheleni ḓuvha ḽine na ḓo u ṱhaphudza ngaḽo.

NAA NI A ZWI ḒIVHA URI . . . ?

Yehova o fhelela, fhedzi musi a tshi shumisana na vhathu vha songo fhelelaho, ha ṱoḓi zwithu zwo fhelelaho. U ḓivha vhushayanungo hashu nahone u a ri humbulela.

ZWINE NDA ḒO ZWI ITA!

Musi ndi tshi ḓisasaladza zwi songo tea, ndi ḓo ․․․․․

Musi ndi tshi sasaladza vhaṅwe zwi songo tea, ndi ḓo ․․․․․

Zwine nda ṱoḓa u vhudzisa mubebi kana vhabebi vhanga nga ha enea mafhungo ndi ․․․․․

NI HUMBULA MINI?

● Ndi kha masia afhio a vhutshilo, arali e hone, ane na ḓivhetshela zwipikwa zwine na kundwa u zwi swikelela?

● Ndi ndimana dzifhio dza Bivhili dzine dza sumbedza zwavhuḓi uri Yehova Mudzimu ha lavheleli uri vhashumeli vhawe vha sa ite vhukhakhi?

● Ndi ngani vhaṅwe vhathu vha tshi nga kha ḓi ni iledza arali ni na maḓipfele a u ṱoḓa u ita tshiṅwe na tshiṅwe ni sa khakhi?

● Ni ḓo ita mini arali na ita vhukhakhi tshifhingani tshi ḓaho?

[Maipfi o ṱumbulwaho kha siaṱari 226]

“Muthu ane a ita zwithu nga hune a kona ngaho o fhambana na ane a ṱoḓa u ita tshiṅwe na tshiṅwe a sa khakhi; muṅwe u a linganyisela muṅwe ha linganyiseli.”—Megan

[Bogisi kha siaṱari 228]

Nḓila Ine Maḓipfele A U Sa Ṱoḓa U Ita Vhukhakhi A Kwama Ngayo Vhukonani

Naa a ni ṱoḓi u vhumba vhukonani nga ṅwambo wa uri vhathu a vha iti zwithu nga nḓila ine na funa ngayo? Kana naa vhathu vhavhuḓi vha iledza u ḓikonanya na inwi nga ṅwambo wa uri a vha swikeleli zwithu zwe na zwi lavhelela khavho? Bivhili i ri eletshedza uri: “U songo vha muvhuya wa ṋaṋisa, U songo ṱalifhesa wa fhirisa; U ḓo vha U tshi ḓi-tshinyela’ni?” (Muhuweleli 7:16) Iṅwe nḓila ine muthu ane a vha na maḓipfele a u sa ṱoḓa u ita vhukhakhi a ḓitshinya ngayo ndi nga u ḓifhambanya na vhathu vhane vha nga vha khonani dzavhuḓi. Muṅwe musidzana ane a pfi Amber u ri: “A hu na muthu ane a takalela u ṱwa na vhathu vhane vha mu ita uri a ḓipfe e si wa ndeme nahone ndo no vhona vhathu vhane vha ṱoḓa u ita tshiṅwe na tshiṅwe vha sa khakhi vha tshi xelelwa nga khonani dzavhuḓi nga ṅwambo wa zwithu zwiṱuku-ṱuku.”

[Tshifanyiso kha siaṱari 229]

U lingedza u ita tshiṅwe na tshiṅwe u sa khakhi zwi fana na u lingedza u fhufha muyani