Ni Tenda Mini?

Vhafhisetsheli vhanzhi vha vhurereli vha tenda uri ḽifhasi na zwoṱhe zwi re khaḽo zwo sikwa nga maḓuvha a rathi a awara dza 24, miṅwahani ya zwigidi zwi si gathi yo fhiraho. Vhaṅwe vhane vha si tende uri hu na Mudzimu vha lingedza u funza vhathu uri a hu na Mudzimu, uri Bivhili ndi bugu ya dzingano, na uri vhutshilo ho sokou bvelela.

Vhathu vhanzhi vha na mavhonele o bulwaho afho nṱha. Zwa uri ni khou vhala ino bugwana zwi sumbedza uri na inwi ni nga kha ḓi vha ni tshi ḓipfa nga yeneyo nḓila. Ni nga vha ni tshi tenda Mudzimu nahone ni tshi ṱhonifha Bivhili. Fhedzi ni nga kha ḓi vha ni tshi dzhiela nṱha mavhonele a vhaḓivhi vha saintsi vhane vha si tende uri zwithu zwo tou sikwa. Arali ni mubebi, ni nga kha ḓi ḓivhudzisa nḓila ine na ḓo fhindula vhana vhaṋu ngayo musi vha tshi vhudzisa mbudziso dza malugana na uri zwithu zwo sokou bvelela na nga ha tsiko.

Ndivho Ya Ino Bugwana

Ndivho ya ino bugwana a si u goḓa vhafhisetsheli vha vhurereli kana vhathu vhe vha ḓikhethela u sa tenda Mudzimu. Nṱhani hazwo, ri fulufhela uri ino bugwana i ḓo ni ṱuṱuwedza u dovha na ṱolisisa mutheo wa zwiṅwe zwine na zwi tenda. I ḓo ṱalusa mafhungo a Bivhili a tsiko ane zwa nga itea uri no vha ni sa athu a ṱhogomela. Nahone i ḓo ombedzela uri ndi ngani zwine na zwi tenda malugana na nḓila ye vhutshilo ha thoma ngayo zwi zwa ndeme.

Naa ni ḓo fulufhela vhane vha amba uri a hu na Musiki o ṱalifhaho na uri Bivhili a i fulufhedzei? Kana naa ni ḓo ṱolisisa zwine Bivhili ya zwi amba zwa vhukuma? Ndi pfunzo dzifhio dzine na tea u dzi fulufhela: naa ndi dza Bivhilini kana ndi dza vhane vha funza pfunzo ya uri zwithu zwo sokou bvelela? (Vha-Heberu 11:1) Zwi ḓo vha zwavhuḓi lungafhani arali ra ṱolisisa mbuno dza malugana na enea mafhungo!