NGUDO 40
Ri Nga Vha Hani Vho Kunaho Phanḓa Ha Mudzimu?
Edzani u humbula mme a re na lufuno a tshi khou lugiselela mutukana wawe u ya tshikoloni. U ita vhungoho ha uri mutukana wawe o ṱamba, zwiambaro zwawe zwo kuna na u dzudzanyea. Zwenezwi zwi ita uri a dzule e na mutakalo wavhuḓi nahone zwi sumbedza vhaṅwe uri vhabebi vhawe vha a mu ṱhogomela. Samusi vhabebi vha tshi ṱoḓa uri vhana vhavho vha kune, na Khotsi ashu Yehova u ṱoḓa uri ri vhe na mivhili yo kunaho, ri kune kha nḓila ine ra humbula ngayo, nḓila ine ra amba ngayo na nḓila ine ra ita zwithu ngayo. Musi ro kuna ri a vhuyelwa, ra dovha ra hulisa Yehova.
1. Ri nga vha hani vho kunaho?
Yehova u ri vhudza uri: “Ni tea u vha vhakhethwa.” (1 Petro 1:16) Uri ri vhe vhakhethwa, ri tea u ḓifara nga nḓila yavhuḓi na u vha na mivhili yo kunaho. Ri nga dzula ro kuna nga u ṱamba tshifhinga tshoṱhe na nga u ita uri zwiambaro zwashu, mahaya ashu na goloi dzashu zwi dzule zwo kuna na u dzudzanyea. Ri nga dovha ra shela mulenzhe kha u kunakisa Holoni dzashu dza Ṱhanzi dza Yehova. Musi ri tshi dzula ro kuna, ri ita uri Yehova a huliswe.—2 Vhakorinta 6:3, 4.
2. Ri tea u iledza mini uri ri vhe vho kunaho?
Bivhili i a ri ṱuṱuwedza uri “ri ṱambe tshika dzoṱhe dza ṋama na dza muya.” (2 Vhakorinta 7:1) Zwenezwi zwi amba uri ri fanela u iledza tshiṅwe na tshiṅwe tshine tsha nga tshinyadza mivhili yashu na mihumbulo yashu. Zwine ra zwi humbula zwi fanela u takadza Yehova. Nga zwenezwo, ri ita zwoṱhe zwi re maanḓani ashu uri ri iledze u humbula nga ha zwithu zwi songo kunaho. (Phisalema 104:34) Ri dovha ra iledza u semana.—Vhalani Vhakolosa 3:8.
Ndi mini zwiṅwe zwine zwa nga tshikafhadza mivhili yashu kana vhuḓifari hashu? Hu na zwiṅwe zwithu zwine zwa nga tshikafhadza mivhili yashu. Nga zwenezwo, ri iledza u daha fola, u shumisa zwidzidzivhadzi na u shumisa luvhi mishonga. Musi ri tshi iledza zwenezwi, ri a vha na mutakalo wavhuḓi nahone ri sumbedza uri ri dzhiela nṱha tshifhiwa tsha vhutshilo. Ri dovha ra lwela u dzula ro kuna nga u iledza u ita zwithu zwine zwa tshikafhadza, zwi ngaho u swoṱa zwiraḓo zwa mbeu (masturbation)a na u ṱalela pornography. (Phisalema 119:37; Vhaefesa 5:5) Zwi nga konḓa u kunda dzenedzi nḓowelo, fhedzi Yehova a nga ri thusa u dzi kunda.—Vhalani Yesaya 41:13.
GUDANI ZWO ENGEDZEAHO
Gudani uri ri nga hulisa hani Yehova musi ri tshi dzula ro kuna na uri ri nga kunda hani nḓowelo mmbi.
3. U kuna zwi hulisa Yehova
Musi ri tshi vhala milayo ye Yehova a i ṋea Vhaisiraele, ri a vhona uri ndi zwa ndeme lungafhani khae uri vhathu vhawe vha vhe vho kunaho. Vhalani Ekisoda 19:10 na 30:17-19, ni kone u fhindula mbudziso dzi tevhelaho:
Idzi vese dzi sumbedza uri Yehova u dzhia hani u kuna?
Ni nga ita mini tshifhinga tshoṱhe uri ni dzule no kuna?
U kuna zwi ṱoḓa tshifhinga na u ḓiimisela. Fhedzi ri nga zwi kona hu sa londwi uri ri dzula ngafhi, uri ro pfuma kana ri vhashai. Ṱalelani VIDIO, ni kone u fhindula mbudziso i tevhelaho.
Ndi ngani vhathu vhane ra vha ḓivhadza mafhungo maḓifha vha tshi ḓo ṱhonifha Yehova nga ho engedzeaho musi vha tshi vhona zwithu zwashu zwo kuna?
4. Kundani nḓowelo mmbi
Yehova a nga ri thusa u kunda nḓowelo iṅwe na iṅwe mmbi
Arali ni tshi daha fola kana ni tshi shumisa zwidzidzivhadzi, ni nga vha ni tshi zwi ḓivha uri zwi konḓa hani u zwi litsha. Ni nga thuswa nga mini? Humbulani uri yeneyo nḓowelo i ni kwama hani. Vhalani Mateo 22:37-39, ni kone u haseledza nḓila ine u daha fola kana u shumisa luvhi zwidzidzivhadzi zwa kwama ngayo . . .
vhushaka ha muthu na Yehova.
muṱa wa hawe na vhane a vha tsini navho.
Lukani maano u itela u kunda nḓowelo mmbi.b Ṱalelani VIDIO.
Vhalani Vhafilipi 4:13, ni kone u fhindula mbudziso i tevhelaho:
U rabela, u vhala Bivhili na u vha hone tshivhidzoni tshifhinga tshoṱhe zwi nga ṋea hani muthu maanḓa a u kunda nḓowelo mmbi?
5. Ilwani na mihumbulo i songo kunaho na vhuḓifari vhu si havhuḓi
Vhalani Vhakolosa 3:5, ni kone u fhindula mbudziso dzi tevhelaho:
Ri zwi ḓivha hani uri pornography, sextingc na u swoṱa zwiraḓo zwa mbeu ndi zwithu zwi songo kunaho phanḓa ha Yehova?
Naa ni vhona u nga zwi a pfala uri Yehova u lavhelela uri ri ḓifare nga nḓila yo kunaho? Ndi ngani ni tshi ralo?
Vhonani uri ni nga lwa hani na mihumbulo i songo kunaho. Ṱalelani VIDIO.
Yesu o shumisa tshifanyiso u itela u sumbedza uri ri tea u dzhia vhukando nga u ṱavhanya u itela uri ri dzule ri tshi ḓifara nga nḓila yo kunaho. Vhalani Mateo 5:29, 30, ni kone u fhindula mbudziso i tevhelaho:
Yesu o vha a sa khou amba uri ri tea u ḓihuvhadza, fhedzi o vha a tshi khou sumbedza uri ri tea u dzhia vhukando. Ndi vhukando vhufhio vhune muthu a tea u vhu dzhia nga u ṱavhanya u itela uri a iledze u humbula zwithu zwi songo kunaho?d
Arali ni tshi khou lwa nga nungo dzoṱhe u itela u kunda nḓowelo ya u humbula nga ha zwithu zwi songo kunaho, Yehova u a dzhiela nṱha zwine na khou zwi ita. Vhalani Phisalema 103:13, 14, ni kone u fhindula mbudziso i tevhelaho:
Iyi vese i ni ṱuṱuwedza hani uri ni bvele phanḓa ni tshi lwisana na nḓowelo mmbi?
Ni songo neta!
Zwo leluwa u humbula uri, ‘Samusi ndi tshi khou kundelwa, ndi khwine ndi zwi litshe.’ Fhedzi humbulani hezwi: Arali mugidimi a piringedzea a wa, a zwi ambi uri o kundwa nga mbambe kana uri u tea u dovholola u bva mathomoni. Nga hu fanaho, arali na ḓiwana no piringedzea na dovha na ita iṅwe ya dzenedzo nḓowelo mmbi, a zwi ambi uri no kundwa. A zwi ambi uri a no ngo ita mvelaphanḓa. U nembelela ha shamba a si u wa haḽo. Ni songo neta! Yehova a nga ni thusa u kunda nḓowelo mmbi.
VHAṄWE VHATHU VHA AMBA URI: “Zwo no tou vha malofhani. A thi tsha kona u zwi litsha.”
Ndi vese ifhio ine na nga i shumisa u itela u sumbedza muthu uri Yehova a nga mu thusa uri a litshe nḓowelo mmbi?
NO GUDA MINI?
Yehova u a takala musi mivhili yashu, mihumbulo yashu na nḓila ine ra ḓifara ngayo zwi tshi dzula zwo kuna.
Ni Kha Ḓi Zwi Humbula?
Ndi ngani zwi zwa ndeme vhukuma uri ri dzule ro kuna?
Ni nga ita mini uri ni dzule no kuna?
Ni nga ita hani uri ni dzule ni tshi humbula zwithu zwo kunaho na u ḓifara nga nḓila yo kunaho?
WANANI ZWO ENGEDZEAHO
Ndi zwifhio zwithu zwo leluwaho zwine na nga zwi ita uri ni dzule no kuna naho ni tshi shaya?
Gudani nga ha zwine na nga zwi ita u itela u litsha u daha.
Gudani nga ha masiandoitwa a u ṱalela pornography.
“Zwifanyiso Zwa Vhudzekani—Naa Zwi Na Khombo Kana A Zwi Na?” (Tshiingamo, 1 September 2013)
Vhalani nga ha muṅwe munna we a kunda dzema ḽa u ṱalela pornography.
a U swoṱa zwiraḓo zwa mbeu (masturbation) ndi u ḓifara-fara zwiraḓo zwa mbeu u itela u karusa maḓipfele a zwa vhudzekani.
b Khandiso i re na tshiṱoho tshine tsha ri “Ni Nga Litsha Hani U Daha?” i re kha tshipiḓa tshine tsha ri Wanani Zwo Engedzeaho tshi re kha ino ngudo, i ṱalutshedza zwithu zwine muthu a nga zwi ita u itela u kunda nḓowelo mmbi.
c Sexting ndi u rumelana milaedza, zwifanyiso kana vidio dzi songo kunaho nga zwishumiswa zwa elekitironiki.
d U itela u vhona zwithu zwine zwa nga thusa muthu a re na nḓowelo ya u swoṱa zwiraḓo zwa mbeu, sedzani thero i re na tshiṱoho tshine tsha ri, “Ndi Nga Kunda Hani Nḓowelo Ya U Ḓiswoṱa Tshiraḓo Tsha Mbeu?” kha bugu Mbudziso Dzine Vhaswa Vha Dzi Vhudzisa—Phindulo Dzi Shumaho, Volumu 1, ndima ya 25.