Thetshelesani Zwine Muya Wa amba!
“A re na nḓevhe nga a pfe zwine muya wa vhudza zwivhidzo.”—NDZUMBULULO 3:22.
1, 2. Ndi nyeletshedzo ifhio ine ya dovhololwa malugana na milaedza ya Yesu ye a i vhudza zwivhidzo zwa sumbe zwo bulwaho kha Ndzumbululo?
VHASHUMELI vha Yehova vha fanela u thetshelesa maipfi a Yesu Kristo o hevhedzwaho nga muya e a vhudza zwivhidzo zwa sumbe zwo bulwaho kha bugu ya Bivhili ya Ndzumbululo. Vhukuma, muṅwe na muṅwe wa yeneyi milaedza u na heyi nyeletshedzo: “A re na nḓevhe nga a pfe zwiné Muya wa vhudza zwivhidzo.”—Ndzumbululo 2:7, 11, 17, 29; 3:6, 13, 22.
2 Ro no ṱhogomela milaedza ya Yesu ye a i vhudza vharuṅwa kana vhalavhelesi, vha Efeso, Simirina, na Peregamo. Ri nga vhuyelwa hani nga zwe a zwi amba nga muyamukhethwa a tshi vhudza zwiṅwe zwivhidzo zwiṋa?
Kha Muruṅwa Wa Ngei Thiathira
3. Thiathira wo vha u ngafhi, nahone wo vha u tshi ḓivhelwa u bveledza mini?
3 “Murwa wa Mudzimu” o khoḓa na u kaidza tshivhidzo tsha Thiathira. (Vhalani Ndzumbululo 2:18-29.) Thiathira (une zwino wa vha Akhisar) wo vha wo fhaṱiwa tsini na mulambwana wa Gediz (Hermus ḽa kale) Mulamboni wa ngei Asia Minor vhukovhela. Wonoyo muḓi wo vha u tshi ḓivhelwa u ḓala zwithu zwa vhutsila. Wo vha u tshi ḓivhelwa hafhu u shandukisa zwiambaro nga muvhala mutswuku wo dombelelaho. Lidia we a vha Mukriste musi Paulo o dalela ḽa Filipi ngei Gerika, o vha e “muvhambadzi wa purapura [“dza muvhala mutswuku wo dombelelaho,” NW], a bvaho muḓini wa Thiathira.”—Mishumo 16:12-15.
4. Tshivhidzo tsha Thiathira tsho khoḓelwa mini?
4 Yesu o khoḓa tshivhidzo tsha Thiathira nga ṅwambo wa mishumo yatsho yavhuḓi, lufuno, lutendo, u konḓelela, na u shuma hatsho vhuḓinḓani. Zwi re zwone ndi uri ‘mishumo yatsho ya tshifhinga tsha zwino yo vha i tshi fhira ya misini ya kale.’ Naho ri na bvumo ḽavhuḓi, a ro ngo fanela u litshelela u ḓifara zwavhuḓi siani ḽa vhuḓilisi.
5-7. (a) “Musadzi Isebele” o vha e nnyi, nahone ho vha hu tshi fanela u itwa mini malugana na ṱhuṱhuwedzo yawe? (b) Mulaedza wa Kristo we a u rumela kha tshivhidzo tsha Thiathira wo thusa vhasadzi vha ofhaho Mudzimu uri vha ite mini?
5 Tshivhidzo tsha ngei Thiathira tsho vha tshi tshi khou litshelela u gwadamela midzimu i sili, pfunzo dza mazwifhi, na u ḓifara luvhi ha u ṱangana nga dzimbeu. Vhukati havho ho vha hu na ‘musadzi Isebele’—khamusi tshigwada tsha vhasadzi vhe vha vha vha tshi ita zwithu zwine zwa fana na zwe zwa vha zwi tshi itwa nga Mufumakadzi Isebele muvhi wa tshaka dza fumi dza Muvhuso wa Isiraele. Vhaṅwe vhagudi vha amba uri ‘vhaporofita vha vhasadzi’ vha Thiathira vho lingedza u xedza Vhakriste u itela uri vha gwadamele dzangano ḽa vhadzia vhutsila, midzimukadzi na u ṱanganela kha zwimima zwine zwa katela zwiḽiwa zwine zwa ṋekedzwa midzimu i sili sa zwiṱhavhelo. Ni songo tenda vhaporofita vha vhasadzi vho tou ḓivheaho vha tshi shumisa vhaṅwe tshivhidzoni tsha Vhukriste ṋamusi!
6 Kristo ‘o vha e tsini na u posa musadzi Isebele kha vhulalo vhuthihi na vho pombwaho nae, vha ye vhuṱunguni vhuhulu, arali vha sa rembuluwa vha litsha mishumo yavho.’ Vhalavhelesi a vho ngo fanela u thetshelesa pfunzo na ṱhuṱhuwedzo mmbi, nahone a huna na Mukriste na muthihi o fanelaho u ita vhupombwe ha muya kana ha ṋama kana u ḓidzhenisa kha u gwadamela midzimu i sili u itela u vhona uri “mativha a Sathane” ndi mavhi lungafhani. Arali ra thetshelesa tsevho ya Yesu, ‘ri ḓo faresa tshine ra vha natsho,’ nahone tshivhi a tshi nga ri kundi. Nga ṅwambo wa uri vho laṱa maitele a si a vhumudzimu, na lutamo lwa u ṱangana nga dzimbeu, vhaḓodzwa vho vuswaho vho wana “maanḓa a u vhusa dzitshakha” nahone vha ḓo ṱanganela na Kristo kha u dzi fhelisa. Tshivhidzo tsha ṋamusi tshi na ṋaledzi dza pfanyisedzo nahone vho ḓodzwaho vha ḓo ṋewa “ṋaledzi i penyaho masase,” Muhwe, Yesu Kristo, musi vho no vuselwa ṱaḓulu.—Ndzumbululo 22:16.
7 Tshivhidzo tsha Thiathira tsho sevhiwa uri tshi songo tendela ṱhuṱhuwedzo mmbi ya vhasadzi vho guneaho. Mulaedza wo hevhedzwaho nga muya wa Kristo we a u vhudza tshivhidzo u thusa vhasadzi vha ofhaho Mudzimu uri vha ṱhogomele vhuimo havho he vha ṋewa nga Mudzimu ṋamusi. A vha lingedzi u vhusa vhanna nahone a vha kungi vhahashu vha tshinnani naho vhe vhafhio uri vha ite zwa vhupombwe navho muyani kana ṋamani. (1 Timotheo 2:12) Nṱhani hazwo, vhasadzi vho raloho vha vhea tsumbo kha mishumo mivhuya na kha tshumelo ya u rendisa Mudzimu. (Psalme ya 68:11; 1 Petro 3:1-6) Arali tshivhidzo tsha linda zwine tsha vha nazwo—pfunzo yo kunaho, vhuḓifari havhuḓi na u dzhiela nṱha tshumelo ya Muvhuso—Kristo u ḓo tshi fhaṱutshedza, hu si u tshi fhelisa.
Kha Muruṅwa Wa Ngei Saradesi
8. (a) Saradesi wo vha u ngafhi, nahone ndi zwifhio zwiṅwe zwidodombedzwa zwi re hone malugana na wonoyo muḓi? (b) Ndi ngani tshivhidzo tsha Saradesi tsho vha tshi tshi ṱoḓa thuso?
8 Tshivhidzo tsha ngei Saradesi tsho vha tshi tshi ṱoḓa thuso nga u ṱavhanya ngauri tsho vha tsho fa muyani. (Vhalani Ndzumbululo 3:1-6.) Saradesi wo vha u vhukule ha khilomithara dza 50 tshipembe ha Thiathira nahone wo vha u muḓi wo pfumaho. Zwa mbambadzo, u nona ha mavu kha honoho vhupo, na u bveledza hawo zwiambaro zwo lukiwaho nga muḓali na khaphethe zwo thusa uri u vhe muḓi wo pfumaho we wa vhuya wa vha na vhadzulapo vha 50 000. U ya nga muḓivhazwakale Josephus, Saradesi ho vha ho ḓala Vhayuda ḓanani ḽa u thoma ḽa miṅwaha B.C.E. Kha mashubi a wonoyo muḓi ho vha hu na tshikolo na thembele ya mudzimukadzi wa Efeso, Artemis.
9. Hu fanela u itwa mini arali tshumelo yashu i tshi vho “ṱoḓou fa”?
9 Kristo o vhudza muruṅwa wa tshivhidzo tsha Saradesi a ri: “Mishumo yau ndi a i ḓivha, zwauri U na dzina ḽa u pfi U a tshila, atsina wo fa.” Hu pfi mini arali ri tshi ḓivhelwa u vha vhathu vha muya fhedzi ri si na dzangalelo kha ndugelo dza Vhukriste, ri si tsha shuma nga mafulufulu, nahone ri tshi vho “ṱoḓou fa” muyani? Ngauralo, ri fanela ‘u elelwa kuṱanganedzele kwashu na uri ro pfa hani’ mulaedza wa Muvhuso, nahone ri fanela u vusulusa vhuḓidini hashu tshumeloni khethwa. Ri fanela u thoma u ṱanganela nga mbilu yoṱhe miṱanganoni ya Vhukriste. (Vha-Heberu 10:24, 25) Kristo o sevha tshivhidzo tsha Saradesi a ri: “Zwino wá sa fhaṱuwa ndi ḓo ḓa sa mbava, na tshikhathi tshiné nda ḓo U ḓela ngatsho’ U si tshi ḓivhe.” Hu pfi mini nga misini yashu? Hu si kale ri ḓo tea u ḓifhindulela.
10. Na kha vhuimo vhu fanaho na ha ngei Saradesi, ndi ngoho ifhio ine ya nga vha i hone malugana na Vhakriste vha si gathi?
10 Na kha vhuimo vhu fanaho na ha ngei Saradesi, hu nga vha na vhaṅwe vhane vha sa ‘tswukise nguvho dzavho nahone vhane vha nga tshimbila nae vho ambara tshena, ngauri vho fanelwa.’ Vha dzula vha tshi vhulunga mbonalo yavho ya Vhukriste, vha dzula vhe si na tshika, vha si na madondo a vhuḓilisi na a vhurereli ha ḽino shango. (Yakobo 1:27) Ngauralo, Yesu ha ‘nga phunyi madzina avho buguni ya vhutshilo, fhedzi u ḓo vha amba phanḓa ha Khotsi-awe na vharuṅwa vhawe vha tshi zwi pfa.’ Nga ṅwambo wa uri vha vhidzwa vho faneleaho u tshimbila na Kristo, tshigwada tshawe tsha muselwa tsha vho ḓodzwaho tshi ḓo vha tsho ambara sila ḽi penyaho ḽi si na tshika, ḽeneḽo sila ḽi ḓo fanyisela mishumo mivhuya ya vhakhethwa. (Ndzumbululo 19:8) Ndugelo dzavhuḓi dza tshumelo dzo vha lindelaho ngei ṱaḓulu dzi vha ṱuṱuwedzela u kunda ḽino shango. Hu ḓo vha na phaṱutshedzo kha vhane vha ḓo tshila kha ḽifhasi nga hu sa fheli. Na vhone madzina avho o ṅwaliwa kha bugu ya vhutshilo.
11. Ri fanela u ita mini arali ri tshi khou eḓela muyani?
11 A huna na muthihi washu ane a ṱoḓa u vha kha vhuimo ha muya vhu pfisaho vhuṱungu ha tshivhidzo tsha Saradesi. Fhedzi hupfi mini arali ra ṱhogomela uri ri khou eḓela muyani? Ri fanela u dzhia vhukando nga u ṱavhanya u itela u ḓivhuyedza. Khamusi ri khou kokodzwa nga nḓila dzi si dza vhumudzimu kana a ri tsha ṱanganela nga vhuḓalo miṱanganoni kana vhuḓinḓani hashu. Kha ri ṱoḓe thuso ya Yehova nga thabelo i bvaho mbiluni. (Vha-Filipi 4:6, 7, 13) U vhala Bivhili ḓuvha ḽiṅwe na ḽiṅwe na u guda Maṅwalo na khandiso dza “mukoma a fulufhedzeaho” zwi ḓo ri thusa uri ri fhaṱuwe muyani. (Luka 12:42-44) Nga zwenezwo, ri ḓo fana na vhaḽa vha ngei Saradesi vhe vha ṱanganedzwa nga Kristo, nahone ri ḓo vha phaṱutshedzo kha vhatendi nga riṋe.
Kha Muruṅwa Wa Ngei Filadelefia
12. Ni nga ṱalusa hani vhuimo ha Filadelefia ḽa kale siani ḽa vhurereli?
12 Yesu o khoḓa tshivhidzo tsha Filadelefia. (Vhalani Ndzumbululo 3:7-13.) Muḓi wa Filadelefia (une zwino wa vha Alasehir) wo vha wo pfuma siani ḽa u bveledza veini dzinguni ḽa Asia Minor vhukovhela. Zwi re zwone ndi uri mudzimu wawo o vha e Dionysus, mudzimu wa veini. Zwi vhonala uri Vhayuda vha ngei Filadelefia vho kundelwa u ita uri Vhakriste vha Vhayuda vha humele kha maitele a Mulayo wa Mushe.
13. Kristo o shumisa hani “khoṋo ya Davida”?
13 Kristo u “na khoṋo ya Davida,” nahone nga zwenezwo o ṋewa maanḓa a madzangalelo oṱhe a Muvhuso na vhulanguli ha nnḓu ya lutendo. (Yesaya 22:22; Luka 1:32) Yesu o shumisa yeneyo khoṋo u itela u vulela zwibuli zwa Muvhuso na ndugelo kha Vhakriste vha Filadelefia ḽa kale na huṅwe-vho. U bva nga 1919 o vulela “mukoma a fulufhedzeaho” “muṋango muhulu” une wa vha i sa kha u huwelela Muvhuso une a huna na mupikisi na muthihi ane a nga u vala. (1 Vha-Korinta 16:9; Vha-Kolosa 4:2-4) Vhukuma, muṋango wa ndugelo dza Muvhuso wo valelwa vha “tshikolo tsha Sathane,” nga uri a si Vhaisiraele vha muya.
14. (a) Ndi fulufhedziso ḽifhio ḽe Yesu a ḽi ṋea tshivhidzo tsha Filadelefia? (b) Ri nga dzula hani ro ima “nga tshikhathi tsha mulingo”?
14 Yesu o fulufhedzisa Vhakriste vha Filadelefia ḽa kale a ri: “Ngauri wo londola fhungo ḽanga ḽa u ri: Konḓelela! Na nṋe-vho ndi ḓo U londola nga tshikhathi tsha mulingo, tshiné tsha ḓo ḓela ḽinnḓa ḽoṱhe, tsha u linga vho dzulaho shangoni.” U huwelela zwi ṱoḓa u konḓelela he Yesu a hu sumbedza. Ho ngo vhuya a tenda swina ḽi tshi mu khakhisa, fhedzi o bvela phanḓa a tshi ita zwine Khotsi awe a zwi funa. Ngauralo, Kristo o vuselwa vhutshiloni ha u sa fa ṱaḓulu. Arali ra dzula ro farelela kha phetho yashu ya u gwadamela Yehova nahone ra tikedza Muvhuso nga u huwelela mafhungo maḓifha, a ri nga wi tshifhingani tshino tshilingaho, “tshikhathi tsha mulingo.” Ri ḓo ‘dzula ro faresa tshine ra vha natsho’ tshi bvaho kha Kristo nga u lwela u engedza madzangalelo a Muvhuso. U ita zwenezwi zwi ḓo ita uri vhaḓodzwa vha itwe vhavhusi ṱaḓulu nahone zwa ita uri khonani dzavho dzi fulufhedzeaho dzi wane vhutshilo vhu sa fheli kha ḽifhasi.
15. Ndi mini zwine zwa ṱoḓea kha vhane vha ḓo vha ‘phuphu dza thembele ya Mudzimu’?
15 Kristo o engedza a ri: “Ané a kunda ndi ḓo mu ita phuphu nḓuni-khethwa ya Mudzimu wanga; . . . huno ndi ḓo mu ṅwala dzina ḽa Mudzimu wanga na dzina ḽa muḓi wa Mudzimu wanga, ḽa Yerusalema huswá, huné ha ḓo tsa hu tshi bva ṱaḓulu, ha Mudzimu wanga; na ḽanga dzina ḽiswa ndi ḓo mu ṅwala.” Vhalavhelesi vho ḓodzwaho vha fanela u tikedza vhurabeli ha ngoho. Vha fanela u dzula vha tshi fanelea u vha miraḓo ya “Yerusalema huswa” nga u huwelela nga ha Muvhuso wa Mudzimu na nga u dzula vho kuna muyani. Hezwi ndi zwa ndeme arali vha tshi ṱoḓa u vha phuphu kha u khoḓisa thembele ya ṱaḓulu na musi vha tshi ṱoḓa u vha na dzina ḽa muḓi wa Mudzimu sa vhadzulapo vha ṱaḓulu na u vha na dzina ḽithihi na Kristo sa vhaselwa vhawe. Nahone vha fanela u ‘pfa zwine muya wa vhudza zwivhidzo.’
Kha Muruṅwa Wa Laodikea
16. Ndi zwifhio zwiṅwe zwithu zwine zwa ambiwa nga ha Laodikea?
16 Kristo o kaidza tshivhidzo tshi sa londi tsha Laodikea. (Vhalani Ndzumbululo 3:14-22.) Tshenetsho tshivhidzo tshi vhukule ha khilomithara dza 150 vhubvaḓuvha ha tsha Efeso nahone tshi mafhandeni a nḓila khulwane dza zwa thengiso govhani ḽo nonaho ḽa Mulambo wa Lycus, Laodikea wo vha u muḓi wo pfumaho siani ḽa zwa vhu bveledzi na kha dzi tshelede. Ḽo vha ḽi tshi ḓivhiwa sa dzingu ḽi bveledzaho nguvho dzo lukiwaho nga muḓali mutswu. Sa muḓi u ḓivhelwaho tshikolo tsha zwa ngalafho, zwi vhonala uri muḓi wa Laodikea ndi wone wo bveledzaho mushonga wa luvhanda wa maṱo une wa vhidzwa Phrygia. Asclepius, mudzimu wa mishonga, o vha e muṅwe wa midzimu mihulwane ya henengei. Laodikea u vhonala u muḓi wo ḓalesaho Vhayuda, vhane zwa vhonala zwi tshi nga vhaṅwe vhavho vho vha vho pfuma vhukuma.
17. Ndi ngani Vhalaodikea vho kaidziwa?
17 Musi a tshi amba na tshivhidzo tsha ngei Laodikea nga “muruṅwa” watsho, Yesu u amba e na maanḓa sa “ṱhanzi i fulufhedzeaho ya ngoho, musimuli wa zwivhumbwa zwa Mudzimu.” (Vha-Kolosa 1:13-16) Vhalaodikea vho kaidzwa nga ṅwambo wa u sa ‘rothola na u sa fhisa’ havho muyani. Nga ṅwambo wa uri vho vha vha tshi vho dudela, Kristo o vha a tshi vho ṱoḓou vha pfela kule. Zwi nga vha zwi songo vha konḓela u pfesesa yeneyo mbuno. Tsini ha Hierapolis ho vha hu na tshisima tsha maḓi a fhisaho, nahone kha ḽa Kolosa ho vha hu na maḓi a rotholaho. Samusi maḓi o vha a tshi tea u kokodziwa nga dziphaiphi u bva Laodikea hune ha vha tshikhala tshilapfu, zwi tou pfala uri o vha a tshi vho dudela musi a tshi swika khavho. Kha zwiṅwe zwipiḓa nḓilani, o vha a tshi fhiriselwa nga dziboroho. Tsini na Laodikea, o vha a tshi pfuka nga matomboni o semendelwaho.
18, 19. Vhakriste vha ṋamusi vha fanaho na vha ngei Laodekia vha nga thuswa hani?
18 Vhathu vha fanaho na Vhalaodikea ṋamusi ndi vha sa fhisi kana vha sa rotholi. U fana na maḓi a dudelaho, vha a pfelwa nnḓa! Yesu ha ṱoḓi vha tshi vha vhaambeli vhawe, sa “vhaḓinḓa tshiimoni tsha Kristo” vho ḓodzwaho. (2 Vha-Korinta 5:20) Vha ḓo xelelwa nga ndugelo ya u vha vhahuweleli vha Muvhuso, arali vha sa rembuluwa. Vhalaodikea vho vha vha tshi ṱoḓesa lupfumo lwa ḽifhasi nahone ‘vha sa zwi ḓivhi zwauri vho dzhielwa, vho ṱungufhadzwa, ndi vhashai, mabofu, na uri vha fhedzi.’ U itela u fhelisa vhushai ha muya, u pofula, na u vha fhedzi, muṅwe na muṅwe ane a fana navho u fanela u ‘renga musuku wo bviswaho manyelo’ wa lutendo lwo lingwaho, “nguvho tshena” ya u luga, na ‘mushonga wa u ḓodza maṱo’ une wa khwinisa luvhonela lwa muya. Vhalavhelesi vha Vhakriste vha a takalela u vha thusa uri vha ḓivhe ṱhoḓea dzavho dza muya u itela uri vha vhe “vhapfumi u tendani.” (Yakobo 2:5; Mateo 5:3) Zwiṅwe hafhu, vhalavhelesi vha fanela u vha thusa uri vha shumise ‘mushonga wa u ḓodza maṱo’ wa muya—u ṱanganedza na u tshila u tendelana na pfunzo, nyeletshedzo, tsumbo, na mavhonele zwa Yesu. Hezwi ndi mushonga une wa lwisana na “nyemulo dza ṋama na nyemulo dza maṱo na u tshila nga u ḓi-kukumusa.”—1 Yohane 2:15-17.
19 Yesu u kaidza na u laya vhoṱhe vhane a vha funa. Vhalavhelesi vha re nga fhasi hawe vha fanela u lwela u ita zwi fanaho nga vhulenda. (Mishumo 20:28, 29) Vhalaodekia vho vha vha tshi tea u ‘vusa nungo na uri vha rembuluwe,’ vha ite tshanduko kha mahumbulele avho na vhutshiloni havho. Naa hu na vhaṅwe vhashu vhe vha ḓi ḓowedza kutshilele kune kwa ita uri vha litshelele tshumelo khethwa ya Mudzimu u itela mishumo i si ya ndeme vhutshiloni? Ngauralo, kha ri ‘renge mushonga wa u ḓodza maṱo kha Yesu’ u itela uri ri kone u vhona ndeme ya u fhisetshela u ṱoḓa Muvhuso u thoma.—Mateo 6:33.
20, 21. Ndi vhafhio vhane vha khou aravha nga nḓila yo teaho kha u “omba-omba” ha Yesu ṋamusi, nahone vha na zwilavhelelwa zwifhio?
20 Kristo u ri: “Asizwo, ndo ima muṋangoni, ndi khou omba-omba; ané a pfa ipfi ḽanga, a mvulela vothi, ndi ḓo dzhena khae’ nda ḽa tshilalelo nae’, a tshí ḽa na nṋe.” Yesu o vha a tshi anzela u amba nga ha zwithu zwa muya u nga u khou ḽa zwiḽiwa. (Luka 5:29-39; 7:36-50; 14:1-24) Zwino u khou omba-omba muṋangoni wa tshivhidzo tshi fanaho na tsha Laodekia. Naa miraḓo yatsho i ḓo aravha musi a tshi omba-omba, ya vusulusa lufuno lwayo khae, u mu ṱanganedza mihumbuloni yavho, na u mu tendela a tshi vha funza? Arali zwo ralo, Kristo u ḓo ita tshimima navho nga zwiḽiwa zwa muya zwi vhuyedzaho.
21 Ṋamusi “vha dziṅwe nngu” vha khou tendela Yesu a tshi dzhena khavho nga lwa pfanyisedzo, nahone yeneyo nyito i ḓo ita uri vha wane vhutshilo vhu sa fheli. (Yohane 10:16; Mateo 25:34-40, 46) Kha muṅwe na muṅwe wa vhaḓodzwa ane a ḓo kunda, Kristo u ḓo mu ṋea ndugelo ya u ‘dzula nae khuluṋonini yawe, vhunga na ene o ri u kunda a dzula na Khotsi awe khuluṋonini Yawe.’ Ee, kha vhakundi vha vhaḓodzwa, Yesu u vha fulufhedzisa malamba avhuḓi a u dzula nae khuluṋonini kha tshanḓa tsha u ḽa tsha Khotsi awe ngei ṱaḓulu. Nahone vha dziṅwe nngu vhane vha ḓo kunda vha dzula vho lavhelesa phanḓa kha u dzula fhethu havhuḓi nga fhasi ha vhuvhusi ha Muvhuso.
Ngudo Kha Riṋe Roṱhe
22, 23. (a) Vhakriste vhoṱhe vha nga vhuyelwa hani nga maipfi e Yesu a vhudza zwivhidzo zwa sumbe? (b) Ri fanela u ḓiimisela u ita mini?
22 A zwi timatimisi uri Vhakriste vhoṱhe vha nga vhuyelwa vhukuma nga maipfi e Yesu a vhudza zwivhidzo zwa sumbe zwa ngei Asia Minor. Sa tsumbo, vha tshi ṱhogomela uri Kristo o khoḓa musi zwo tea, vhahulwane vha Vhakriste vha a sudzulusea u khoḓa muṅwe na muṅwe na zwivhidzo zwine zwa khou bvela phanḓa zwavhuḓi muyani. Hune ha vha na vhushayanungo, vhahulwane vha thusa vhatendi ngavho u shumisa dzilafho ḽa Maṅwalo. Roṱhe ri nga bvela phanḓa u vhuyelwa nga nyeletshedzo dzo fhamba-fhambanaho dze Kristo a dzi ṋea zwivhidzo zwa sumbe, arali ra rabela zwi tshi bva mbiluni nahone nga u ṱavhanya.a
23 Haya maḓuvha a vhufhelo a si tshifhinga tsha u sa londa, u tovhola zwithu zwi vhonalaho, kana tshiṅwe na tshiṅwe tshine tsha nga ita uri ri fhungudze tshumelo yashu kha Mudzimu. Ngauralo u nga ri zwivhidzo zwoṱhe zwi nga dzula zwi tshi penya sa zwiṱomambone zwe Yesu a zwi vhuyedzedza vhudzuloni hazwo. Sa Vhakriste vha fulufhedzeaho, u nga ri misi yoṱhe ri nga ḓiimisela u thetshelesa Kristo musi a tshi amba nahone ra thetshelesa zwine muya wa zwi amba. Nga zwenezwo, ri ḓo tshenzhela dakalo sa vha vhonetsheli vha vhugala ha Yehova.
[Ṱhaluso dzi re magumoni a siaṱari]
a Ndzumbululo 2:1–3:22 yo dovha ya haseledzwa kha ndima ya 7 u swika kha ya 13 ya bugu ya Revelation—Its Grand Climax At Hand!, yo gandiswaho nga Ṱhanzi dza Yehova.
Ni Ḓo Fhindula Hani?
• ‘Musadzi Isebele” o vha e nnyi, nahone ndi ngani vhasadzi vha ofhaho Mudzimu vha sa mu edzisi?
• Ndi vhuimo vhufhio he ha vha vhu hone tshivhidzoni tsha Saradesi, nahone ndi mini zwine ra nga zwi ita u itela u iledza u fana na vhanzhi vhe vha vha vha tshi dzula henengei?
• Ndi mafulufhedziso afhio e Yesu a a ṋea tshivhidzo tsha Filadelefia, nahone a shuma hani ṋamusi?
• Ndi ngani Vhalaodekia vho kaidziwa, fhedzi ndi zwilavhelelwa zwifhio zwe zwa fulufhedziswa Vhakriste vha fhiseaho?
[Tshifanyiso kha siaṱari 16]
Nḓila mmbi dza ‘musadzi Isebele’ dzi fanela u iledzwa
[Zwifanyiso kha siaṱari 18]
Yesu o vulela vhatevheli vhawe “muṋango muhulu” u itela ndugelo dza Muvhuso
[Tshifanyiso kha siaṱari 20]
Naa ni a ṱanganedza Yesu nahone na mu thetshelesa?