Vharuṅwa—Naa Vha Nga Kwama Vhutshilo Haṋu?

Ḽiṅwe ḓuvha nga swondaha nga masiari, Kenneth na Filomena vhane vha dzula ngei Curaçao, vho ya u dalela vhaṅwe vhavhingani vhe vha vha vha tshi guda navho Bivhili.

Kenneth o ri: “Musi ri tshi swika ro wana ho valwa nnḓu nahone goloi i siho. Fhedzi hu na tshithu tshe tsha nṱuṱuwedza uri ndi rwele mufumakadzi wa henefho muḓini luṱingo.”

Onoyo mufumakadzi o fhindula luṱingo nahone a amba uri munna wawe o ya mushumoni. Naho zwo ralo, musi a tshi pfa uri Kenneth na Filomena vha muṋangoni o vha vulela nahone a ri vha dzhene.

Nga u ṱavhanya vho zwi ṱhogomela uri o vha a tshi khou lila. Musi Kenneth a tshi thoma ngudo nga thabelo, onoyo mufumakadzi o dovha a lila. Nga zwenezwo, Kenneth na Filomena vho mu vhudzisa uri ndi ngani a tshi khou lila.

Onoyo mufumakadzi o amba uri o vha a tshi ṱoḓa u ḓivhulaha nga ḽeneḽo ḓuvha nahone o vha a tshi khou ṅwalela munna wawe vhurifhi ha u ṱoḓa u ḓivhulaha musi Kenneth a tshi mu founela. O vha vhudza uri o vha e na mutsiko, nga zwenezwo vho mu vhalela Maṅwalo a khuthadzaho. Yeneyo khuthadzo yo tshidza vhutshilo hawe.

Kenneth o ri: “Ri livhuha Yehova nge a ita uri ri thuse onoyo mufumakadzi we a vha o tsikeledzea, zwihulu-hulu o shumisa muruṅwa kana muya wawe mukhethwa u ri ṱuṱuwedza u founa!”a

Naa ndi ngoho uri Mudzimu o dzhenelela a tshi shumisa muruṅwa kana muya wawe mukhethwa kana maanḓa awe a shumaho samusi Kenneth na Filomena vha tshi tenda nga u ralo? Kana naa zwo sokou u itea uri Kenneth a foune nga tshenetsho tshifhinga?

A ri na vhuṱanzi. Fhedzi zwine ra zwi ḓivha ndi uri Mudzimu u shumisa vharuṅwa vhawe u thusa vhathu vha fulufhedzeaho. Sa tsumbo, Bivhili i amba uri Mudzimu o shumisa muruṅwa u livhisa muevangeli Filipo we a vha e Mukriste uri a thuse Muetiopia we a vha a tshi khou ṱoḓa u thusiwa nga lwa muya.—Mishumo 8:26-31.

Vhurereli ho fhamba-fhambanaho vhu ṱuṱuwedza vhathu uri vha tende kha zwithu zwa manditi, na uri hu na mimuya ine ya ita zwine Mudzimu a zwi funa na uri hu na mimuya ine ya linda vhathu. Vhathu vhanzhi a vha tendi fhedzi uri hu na vharuṅwa, vha dovha vha tenda uri vha nga kona u vha thusa. Naho zwo ralo, vhaṅwe vhanzhi a vha tendi uri hu na vharuṅwa.

Naa vharuṅwa ndi vha vhukuma? Arali zwo ralo, vha bva ngafhi? Ndi ifhio ngoho nga ha vharuṅwa? Naa vha nga kwama vhutshilo haṋu? Kha ri wane vhuṱanzi ha zwenezwo.