‘Dzulani No Fhaṱuwa’—Tshifhinga Tsha Khaṱulo Tsho Swika!
Mafhungo ane a vha kha ino thero a bva kha bugwana ine ya pfi Dzulani No Fhaṱuwa! yo bviswaho mabuthanoni a tshiṱiriki e a farwa shangoni ḽoṱhe nga 2004 na nga 2005.
“Ni dzule nó fhaṱuwa ngauri a ni ḓivhi ḓuvha ḽiné Muṋe waṋu a ḓo ḓa ngaḽo.”—MATEO 24:42.
1, 2. Yesu o fanyisa nga ho teaho u ḓa hawe na mini?
NO VHA ni tshi ḓo ita mini arali no vha ni tshi zwi ḓivha uri hu na mbava ine ya khou mona-mona i tshi pwasha miḓi ya vhahura vhaṋu? No vha ni tshi ḓo dzula no fhaṱuwa u itela u tsireledza vhane na vha funa na thundu dzaṋu. Tshiṅwe tshithu tshe tsha vha tshi tshi ḓo ita uri ni fhaṱuwe ndi nga ṅwambo wa uri mbava a i rumeli vhurifhi ha u ḓivhadza uri i ḓo ḓa lini. Nṱhani ha u ita zwenezwo, i ḓa nga u ṋangavhedza nahone zwi songo lavhelelwa.
2 Kha zwiitea zwinzhi, Yesu o amba nga nḓila dzine dza shumiswa nga mbava kha tshifanyiso tshawe. (Luka 10:30; Yohane 10:10) Malugana na zwiitea zwine zwa ḓo itea tshifhingani tsha vhufhelo na zwine zwa ḓo itea musi a sa athu ḓa u haṱula, Yesu o ṋea heyi tsevho: “Ni dzule nó fhaṱuwa ngauri a ni ḓivhi ḓuvha ḽiné Muṋe waṋu a ḓo ḓa ngaḽo’. Zwiné na zwi ḓivha khezwi: Muṋe wa nnḓu arali a tshi ḓivha tshikhathi tshiné mbava ya ḓa ngatsho’, a nga dzedza vhusiku a si tende nnḓu yawe i tshi dzhenwa.” (Mateo 24:42, 43) Ngauralo, Yesu o vhambedza u ḓa hawe na mbava ine ya ḓa zwi songo lavhelelwa.
3, 4. (a) Ndi mini zwine zwa katelwa kha u thetshelesa tsevho ya Yesu nga ha u ḓa hawe? (b) Ndi mbudziso dzifhio dzine dza vhudziswa?
3 Tshenetsho tshifanyiso tsho vha tsho tea ngauri a huna muthu o no ḓivha ḓuvha ḽine Yesu a ḓo ḓa ngaḽo. Mathomoni kha honoho vhuporofita, Yesu o ri: “Ḽone ḓuvha na tshikhathi tshazwo, a huna a zwi ḓivhaho; na kha vharuṅwa vha ṱaḓulu haho’. Zwi ḓihwa nga Khotsi é eṱhe.” (Mateo 24:36) Nga zwenezwo, Yesu o ṱuṱuwedza vhathetshelesi vhawe a ri: “Dzulani-ha nó lindela.” (Mateo 24:44) Vhane vha thetshelesa tsevho ya Yesu vha ḓo dzula vho lindela na u ḓifara zwavhuḓi, hu sa londwi uri u ḓo ḓa lini u itela u ḓadzisa khaṱulo ya Yehova.
4 Dziṅwe mbudziso dza ndeme dzine dza vhudziswa ndi hedzi: Naa Yesu o vha a tshi khou sevha vhathu vha shango fhedzi, kana naa zwi a ṱoḓea uri na Vhakriste vha ngoho vha ‘dzule vho fhaṱuwa’? Ndi ngani zwo ṱavhanyiswa uri ri ‘dzule ro fhaṱuwa,’ nahone ri nga zwi ita nga nḓila-ḓe?
Ndi Vhafhio Vhane vha Khou Sevhiwa?
5. Ri zwi ḓivha hani uri tsevho ine ya ri “ni dzule nó fhaṱuwa” i kwama Vhakriste vha ngoho?
5 Ndi zwa vhukuma uri Murena u ḓo vhuya zwi songo lavhelelwa musi a tshi ḓela vhathu vha shango, vhane vha nyadza musi vha tshi sevhiwa nga khombo ine ya khou ḓa. (2 Petro 3:3-7) Naho zwo ralo, hupfi mini nga Vhakriste vha ngoho? Muapostola Paulo o ṅwalela vhatendi ngae a ri: “Inwi vhaṋe ni a zwi ḓivhesa zwauri ḓuvha ḽa [Yehova, NW] ḽi ḓo ḓa vhunga mbava ya vhusiku.” (1 Vha-Thesalonika 5:2) A zwi timatimisi uri “ḓuvha ḽa Yehova ḽi ḓo ḓa.” Naa zwenezwo zwi a ita uri ri dzhiele fhasi ṱhoḓea ya u dzula ro fhaṱuwa? Ṱhogomelani uri Yesu o vhudza vhafunziwa vhawe a ri: “Murwa-muthu u ḓo ḓa nga tshikhathi tshiné ni si tshi ḓivhe.” (Mateo 24:44) Musi a tshi ṱuṱuwedza vhafunziwa vhawe mathomoni uri vha bvele phanḓa vha tshi ṱoḓa Muvhuso, Yesu o vha eletshedza a ri: “Dzulani nó ḓi-lugisa, ngauri a ni ḓivhi tshikhathi tshiné Murwa-muthu a ḓo ḓa ngatsho.” (Luka 12:31, 40) Naa a zwi khagala uri Yesu o vha a tshi khou sevha vhatevheli vhawe musi a tshi ri: “Ni dzule nó fhaṱuwa”?
6. Ndi ngani ri tshi fanela u ‘dzula ro fhaṱuwa’?
6 Ndi ngani ri tshi fanela u ‘dzula ro fhaṱuwa’ na u ‘dzula ro ḓi-lugisa’? Yesu o ṱalutshedza: “Vhavhili vha ḓo vha vhe tsimuni; muṅwe a ṱanganedzwa muṅwe a laṱwa. Vhavhili vha ḓo vha vha tshi sinḓa nga mutuli muthihi; muṅwe a ṱanganedzwa muṅwe a laṱwa.” (Mateo 24:40, 41) Vhane vha ḓi-lugisa vha ḓo “ṱanganedzwa,” kana u tshidzwa, musi hu tshi fheliswa shango ḽa vhathu vha sa ofhi Mudzimu. Vhaṅwe vha ḓo “laṱwa” ngauri vho tovhola madzangalelo avho nga lwa tseḓa. Hu katelwa na vhathu vhane vha ḓivha ngoho, fhedzi vha si dzule vho fhaṱuwa.
7. U sa ḓivha uri vhufhelo vhu ḓo ḓa lini zwi ri thusa u ita mini?
7 U sa ḓivha ḓuvha ḽine ano maitele a kale a ḓo fheliswa ngaḽo zwi ri ṋea tshibuli tsha u sumbedza uri ri shumela Mudzimu nga tshiitisi tshavhuḓi. Ndi ngani hu tshi nga ambiwa nga u ralo? Ndi nga ṅwambo wa uri vhufhelo vhu nga vhonala vhu tshi nga vhu khou lenga u swika. Zwi ṱungufhadzaho ndi zwa uri vhaṅwe Vhakriste vhane vha ḓipfa nga yeneyi nḓila a vha tsha fhisetshela tshumelo ya Yehova. Naho zwo ralo, ro ḓiṋekedza kha Yehova nga u ḓifunela u itela u mu shumela. Vhane vha ḓivha Yehova vha a zwi ṱhogomela uri u fhisea hu si tshee na tshifhinga zwi nga si mu takadze. U a vhona zwi re mbiluni.—1 Samuele 16:7.
8. U funa Yehova zwi fanela u ri sudzulusela u dzula ro fhaṱuwa nga nḓila-ḓe?
8 Nga ṅwambo wa u funa zwa vhukuma Yehova, ri a takala nga u ita zwine a zwi funa. (Psalme ya 40:8; Mateo 26:39) Nahone ri ṱoḓa u shumela Yehova nga hu sa fheli. Eneo mavhonele ndi a ndeme nga ṅwambo wa uri ri nga lindela tshifhinga tshilapfunyana u fhira nga he ra vha ro lavhelela ngaho. Zwiṅwe zwa ndeme vhukuma zwine zwa ita uri ri dzule ro fhaṱuwa ndi ngauri ri lavhelela nga maṱo matswuku tshiitea tsha ndeme tshine ḓuvha ḽa Yehova ḽa ḓo tshi khunyeledza kha ndivho yawe. Lutamo lwashu lu bvaho mbiluni lwa u ṱoḓa u takadza Mudzimu lu ri sudzulusela u shumisa nyeletshedzo ya Ipfi ḽawe na u vhea Muvhuso wawe u thoma vhutshiloni hashu. (Mateo 6:33; 1 Yohane 5:3) Kha ri ṱhogomele nḓila ine u dzula ro fhaṱuwa zwa fanela u kwama ngayo phetho dzine ra dzi ita na nḓila ine ra tshila ngayo ḓuvha ḽiṅwe na ḽiṅwe.
Naa Vhutshilo Haṋu ho Livha Ngafhi?
9. Ndi ngani zwo ṱavhanyiswa uri vhathu vha shango vha ṱhogomele zwine zwifhinga zwine ra khou tshila khazwo zwa amba zwone?
9 Vhathu vhanzhi ṋamusi vha a ṱhogomela uri vhuleme vhuhulwane na zwiitea zwi ofhisaho zwo no tou vha zwithu zwo ḓoweleaho, nahone vha nga kha ḓi sa takadzwa nga nḓila ine vhutshilo havho ha vha ngayo. Naho zwo ralo, naa vha a ḓivha uri zwiimo zwa shango zwi amba mini kha riṋe? Naa vha a zwi ṱhogomela uri ri khou tshila ‘vhufheloni ha ḽifhasi’? (Mateo 24:3) Naa vha a zwi ṱhogomela uri u ḓala ha tseḓa, vhuvemu, na u sa ofha Mudzimu zwi sumbedza uri enea ndi ‘maḓuvha a vhufhelo’? (2 Timotheo 3:1-5) Zwo ṱavhanyiswa uri vha ṱhogomele zwine zwenezwi zwithu zwoṱhe zwa amba zwone na u ṱolisisa nḓila ine vhutshilo havho ha khou livha hone.
10. Ri fanela u ita mini u itela u vha na vhungoho ha uri ri dzula ro fhaṱuwa?
10 Hupfi mini nga riṋe? Ḓuvha ḽiṅwe na ḽiṅwe ri ita phetho dzine dza kwama mishumo yashu, mutakalo washu, miṱa yashu, na vhurabeli hashu. Ri a ḓivha zwine Bivhili ya zwi amba, nahone ri a lingedza u zwi shumisa. Nga zwenezwo, ri fanela u ḓivhudzisa uri: ‘Naa ndi khou tendela mbilaelo dza vhutshilo dzi tshi nthithisa kha zwipikwa zwanga zwa muya? Naa ndi khou tendela pfunzo ya maṱali ya shango na mahumbulele aḽo zwi tshi langa zwine nda zwi khetha?’ (Luka 21:34-36; Vha-Kolosa 2:8) Hu ṱoḓea uri ri bvele phanḓa ri tshi sumbedza uri ri fulufhela Yehova nga mbilu yashu yoṱhe na u sa ḓitika nga ṱhalukanyo yashu. (Mirero 3:5) Nga yeneyo nḓila, ri ḓo wana “vhutshilo vhu re vhutshilo nangoho,” vhutshilo vhu sa fheli shangoni ḽiswa ḽa Mudzimu.—1 Timotheo 6:12, 19.
11-13. Ri nga guda mini kha tsumbo dza zwe zwa bvelela (a) misini ya Noaxe? (b) misini ya Loto?
11 Bivhili i na tsumbo nnzhi dzi sevhaho dzine dza ḓo ri thusa u dzula ro fhaṱuwa. Ṱhogomelani zwe zwa bvelela misini ya Noaxe. Mudzimu o ita vhungoho ha uri hu ḓivhadzwe tsevho hu tshee nga phanḓa. Fhedzi ndi Noaxe na muṱa wawe fhedzi vhe vha thetshelesa yeneyo tsevho. (2 Petro 2:5) Malugana na zwenezwi, Yesu o ri: “Hone, Murwa-muthu a tshi vhuya, zwi ḓo nga misi iḽa ya Noaxe. Zwe vha ita misi iḽa maḓi mahulu á sathu u ḓa, ndi zwiné vha ḓo ita u swika hu tshi vhuya Murwa-muthu. Vho vha vha tshi ḽa, vha tshi nwa, vha tshi dzea, vha tshi dzewa, Noaxe a vhuya a dzhena gungwani; vha si sedze tshithu ha vhuya ha ḓa maḓi mahulu a vha fhedza. Zwi ḓo ralo musi Murwa-muthu a tshi vhuya.” (Mateo 24:37-39) Ri nga guda mini kha zwenezwo? Arali ri tshi khou tendela mbilaelo dza u ṱoḓa zwithu zwa shango, naho hu mishumo ya vhutshilo yo ḓoweleaho zwi tshi dzhiela vhudzulo mishumo ya zwithu zwa muya zwine Mudzimu a ri ṱuṱuwedzela u zwi vhea u thoma, kha ri humbule nga ha matshilele ashu.—Vha-Roma 14:17.
12 Dovhani ni humbule nga ha misi ya Loto. Muḓi wa Sodoma, he ha vha hu tshi dzula Loto na muṱa wawe, ho vha hu na zwithu zwinzhi zwi vhonalaho, fhedzi matshilele a hone o vha a songo kuna. Yehova o rumela vharuṅwa vhawe uri vha fhelise wonoyo muḓi. Vharuṅwa vho kombetshedza Loto na muṱa wawe uri vha shavhe Sodoma na uri vha sa lavhelese murahu. Vho thetshelesa ṱhuṱhuwedzo ya vharuṅwa, nahone vha shavha kha wonoyo muḓi. Naho zwo ralo, zwi khagala uri musadzi wa Loto o vha a tshi kha ḓi humbula nga muḓi wawe wa Sodoma. O mbo ḓi sedza murahu nga khole, nahone a fa. (Genesi 19:15-26) Yesu o ri sevha nga ha vhumatshelo hashu a ri: “Elelwani musadzi wa Loto.” Naa ri khou tshila u tendelana na yeneyo tsevho?—Luka 17:32.
13 Vhe vha thetshelesa tsevho dza Mudzimu vho tshidzwa. Zwenezwo zwo itea kha Noaxe na muṱa wawe na kha Loto na vhananyana vhawe. (2 Petro 2:9) Musi ri tshi elekanya nga tsevho ya dzenedzi tsumbo, ri a ṱuṱuwedzwa nga mulaedza wa u tshidzwa u re henefho kha vhane vha funa zwo lugaho. Zwenezwi zwi ita uri ri vhe na fulufhelo ḽo khwaṱhaho kha u ḓadzea ha fulufhedziso ḽa Mudzimu ḽa “maṱaḓulu maswa na ḽifhasi ḽiswa” hune “u luga ha fhaṱa khazwo.”—2 Petro 3:13.
‘Tshikhathi Tsha Tsengo Tsho Swika’
14, 15. (a) “Tshikhathi” tsha tsengo tshi katela mini? (b) Zwi amba mini u ‘ofha Mudzimu na u mu ṋea vhugala’?
14 Ndi mini zwine ra fanela u zwi lavhelela musi ri tshi khou bvela phanḓa ro fhaṱuwa? Bugu ya Ndzumbululo i sumbedza nḓila ine ndivho ya Mudzimu ya ḓo ḓadzea ngayo nga zwiṱuku nga zwiṱuku. Ndi zwa ndeme uri ri tshile u tendelana nayo arali ri tshi ṱoḓa u dzula ro ḓi-lugisa. Honoho vhuporofita vhu ṱalusa zwavhuḓi zwithu zwine zwa ḓo itea nga “ḓuvha ḽa Murena,” ḽe ḽa thoma musi Kristo a tshi vhewa kha khuluṋoni ngei ṱaḓulu nga 1914. (Ndzumbululo 1:10) Ndzumbululo i ita uri ri livhise ṱhogomelo kha muruṅwa we a ṋewa mushumo wa u ḓivhadza “mafhungo-maḓifha a ndalamo ya lini na lini.” O huwelela nga ipfi ḽihulu a ri: “Ofhani Mudzimu ni rende ene, ngauri tshikhathi tsha tsengo yawe tsho swika.” (Ndzumbululo 14:6, 7) Tshenetsho “tshikhathi” tsha tsengo ndi tshifhinga tshipfufhi, nahone tshi katela u ḓivhadzwa ha khaṱulo na u itwa ha khaṱulo dzo ṱaluswaho kha honoho vhuporofita. Zwino ri khou tshila kha tshenetsho tshifhinga.
15 Samusi tshifhinga tsha khaṱulo tsho swika, ri a ṱuṱuwedzwa: “Ofhani Mudzimu ni rende ene.” Zwenezwi zwi amba mini? U ofha Mudzimu nga nḓila yo teaho zwi fanela u ri ita uri ri iledze vhuvhi. (Mirero 8:13) Arali ri tshi hulisa Mudzimu, ri ḓo mu thetshelesa nga ṱhonifho khulwane. Ri nga si farakanee nga zwiṅwe zwithu nahone ra litsha u vhala Ipfi ḽawe, Bivhili, misi yoṱhe. Ri nga si dzhiele fhasi nyeletshedzo yawe ya u ya miṱanganoni ya Vhukriste. (Vha-Heberu 10:24, 25) Ri ḓo dzhiela nṱha ndugelo ya u ḓivhadza mafhungo maḓifha a Muvhuso wa Vhumessia nahone ri ḓo ita nga u ralo nga u fhisea. Ri ḓo fulufhela Yehova misi yoṱhe nahone nga mbilu yashu yoṱhe. (Psalme ya 62:8) Nga ṅwambo wa u ṱhogomela uri Yehova ndi Muvhusahoṱhe, ri a mu ṱhonifha nga u ḓiṱukufhadza khae nga u ḓifunela vhutshiloni hashu. Naa ni a ofha zwa vhukuma Mudzimu na u mu ṋea vhugala nga dzenedzo nḓila?
16. Ndi ngani ri tshi nga amba uri u haṱulwa ha Babele Ḽihulu ho ambiwaho kha Ndzumbululo 14:8 ho no ḓadzea?
16 Ndzumbululo ndima ya 14 i bvela phanḓa i tshi ṱalusa zwiṅwe zwithu zwine zwa ḓo itea tshifhingani tsha tsengo. Yo thoma nga u amba nga Babele Ḽihulu, ḽine ḽa vha vhurereli ha mazwifhi ha shango ḽoṱhe: “Muṅwe muruṅwa wa vhuvhili a tevhela a tshi ri: Ḽo wa, ḽo wa, Babele ḽihulu.” (Ndzumbululo 14:8) Ee, u ya nga mavhonele a Mudzimu, Babele Ḽihulu ḽo no ḓi wa. Nga 1919, vhashumeli vha Yehova vho ḓodzwaho vho vhofhololwa vhupulini ha pfunzo dza mazwifhi dza Babele na mishumo yaḽo, ye ya langa vhathu na dzitshaka u bva kale. (Ndzumbululo 17:1, 15) U bva nga tshenetsho tshifhinga, vho bvela phanḓa vha tshi ḓikumedza u itela u tikedza vhurabeli ho kunaho. Mushumo wa u huwelelwa ha mafhungo maḓifha a Muvhuso wa Mudzimu wo bvela phanḓa u bva nga tshenetsho tshifhinga.—Mateo 24:14.
17. Ri fanela u ita mini u itela u bva kha Babele Ḽihulu?
17 Fhedzi u haṱulwa ha Babele Ḽihulu nga Mudzimu a hu fheleli henefho. Ḽi ḓo fheliswa lwa tshoṱhe hu si kale. (Ndzumbululo 18:21) Bivhili i ṱuṱuwedza vhathu nga tshiitisi tshavhuḓi musi i tshi ri: “Ibvani khaḽo’ [Babele Ḽihulu] . . . Ni songo vha na vhuhura naḽo’ kha zwivhi zwaḽo.” (Ndzumbululo 18:4, 5) Ri bva hani kha Babele Ḽihulu? Hezwi zwi katela zwi fhiraho u sokou litsha u ṱanganela na vhurereli ha mazwifhi. Hu na ṱhuṱhuwedzo ya Babele kha vhuṱambo na mikhuvha minzhi yo ḓoweleaho, kha mavhonele a shango a u tendela tshiṅwe na tshiṅwe siani ḽa zwa vhudzekani, kha u ṱuṱuwedza matshilele na u ḓimvumvusa hune ha katela vhungome, na zwiṅwe zwinzhi. U itela u dzula ro fhaṱuwa ndi zwa ndeme uri zwiito zwashu na zwine ra zwi tama zwi sumbedze uri ro ḓifhambanya tshoṱhe na Babele Ḽihulu.
18. U ya nga zwo ṱaluswaho kha Ndzumbululo 14:9, 10, Vhakriste vho fhaṱuwaho vha a ṱhogomela u itela u iledza mini?
18 Kha Ndzumbululo 14:9, 10, ri dovha ra guda zwiṅwe zwithu nga ha “tshikhathi tsha tsengo.” Muṅwe muruṅwa o ri: “Arali muthu a tshi rabela ḽiḽa ḽivhanda na tshifanyiso tshaḽo, a ṱanganedza lufayo lwaḽo kha phanḓa yawe námusi hu kha tshanḓa tshawe, Na ene u ḓo nwa veine ya mbiti dza Mudzimu.” Ndi ngani? Ndi nga ṅwambo wa uri “ḽivhanda na tshifanyiso tshaḽo” ndi zwiga zwa vhuvhusi ha vhathu vhu sa hulisi vhuvhusahoṱhe ha Yehova. Vhakriste vho fhaṱuwaho vha a ṱhogomela u itela uri vha sa ṱuṱuwedzwe ngaḽo kana u ṱanganedza luswayo lwaḽo kha mavhonele na nyito dzavho u fana na vhane vha si dzhiele nṱha vhuvhusahoṱhe ha Mudzimu wa ngoho, Yehova. Vhakriste vha a zwi ḓivha uri Muvhuso wa Mudzimu wo no tikwa ngei ṱaḓulu, na uri u ḓo fhelisa mivhuso yoṱhe ya vhathu, nahone wa ima lini na lini.—Daniele 2:44.
Kha Ri vhe na Muya wa u Ṱavhanyisa Zwithu!
19, 20. (a) Musi ri tshi khou tshila maḓuvhani a vhufhelo, ndi zwifhio zwine ra vha na vhungoho nazwo uri Sathane u ḓo lingedza u zwi ita? (b) Ri fanela u ḓiimisela u ita mini?
19 Musi ri tshi khou tshila maḓuvhani a vhufhelo, mitsiko na milingo zwi ḓo engedzea. Arali ri tshi khou tshila kha ano maitele a kale na u tsikeledzwa nga u sa fhelela hashu riṋe vhaṋe, ri a kwamea nga zwithu zwi ngaho vhulwadze, vhulala, u felwa nga vhane ra vha funa, u pfa vhuṱungu, u kulea nungo musi hu sa sumbedzwi dzangalelo kha vhuḓidini hashu ha u huwelela Ipfi ḽa Mudzimu, na zwiṅwe zwinzhi. Ri songo vhuya ra hangwa uri Sathane u ḓo shumisa mitsiko ine ra ṱangana nayo u itela u ri kula nungo uri ri litshe u huwelela mafhungo maḓifha kana u litsha u tshila nga zwilinganyo zwa Mudzimu. (Vha-Efesa 6:11-13) Hetshi ndi tshifhinga tsha u ṱavhanyisa zwithu malugana na zwifhinga zwine ra khou tshila khazwo!
20 Yesu o vha a tshi zwi ḓivha uri hu ḓo vha na mitsiko minzhi ine ya nga ri kula nungo, ndi ngazwo o ri eletshedza a ri: “Ni dzule nó fhaṱuwa ngauri a ni ḓivhi ḓuvha ḽiné Muṋe waṋu a ḓo ḓa ngaḽo.” (Mateo 24:42) Nga zwenezwo kha ri dzule ro fhaṱuwa kha zwino zwifhinga zwine ra khou tshila khazwo. Kha ri ḓi-linde kha zwikwekwe zwa Sathane zwine zwa nga ita uri ri sa fhisee kana ri litshe. Kha ri ḓiimisele u huwelela nga u fhisea vhukuma mafhungo maḓifha a Muvhuso wa Mudzimu. I ngoho, kha ri bvele phanḓa ri na muya wa u ṱavhanyisa zwithu musi ri tshi thetshelesa tsevho ya Yesu ine ya ri: “Ni dzule nó fhaṱuwa.” Arali ra ita nga u ralo, ri ḓo hulisa Yehova na u vha vhaṅwe vhane vha ḓo wana phaṱhutshedzo dzi sa fheli.
Ni Ḓo Fhindula Hani?
• Ri zwi ḓivha hani uri tsevho ya Yesu ya u ‘dzula ro fhaṱuwa’ i shuma kha Vhakriste vha ngoho?
• Ndi tsumbo dzifhio dza tsevho dzi re Bivhilini dzine dza nga ri thusa u ‘dzula ro fhaṱuwa’?
• Tshifhinga tsha khaṱulo ndi mini, nahone ri ṱuṱuwedzelwa u ita mini musi tshi sa athu fhela?
[Tshifanyiso kha siaṱari 26]
Babele Ḽihulu ḽi tsini na u lozwiwa