“Dzulani No Fhaṱuwa”!
“Zwiné nda ni vhudza, ndi vhudza vhoṱhe ndi ri: Dzulani no fhaṱuwa!”—MARKO 13:37, vhambedzani NW.
1, 2. (a) Muṅwe munna o guda mini nga ha u tsireledza thundu yawe? (b) Ri guda mini kha tshifanyiso tsha Yesu tsha mbava malugana na u dzula ro fhaṱuwa?
JUAN u vhea thundu yawe ya ndeme hayani hawe. U i vhea fhasi ha mmbete—fhethu he a vha a tshi humbula uri ho tsireledzea vhukuma nḓuni yawe. Naho zwo ralo, ḽiṅwe ḓuvha nga madekwana, musi ene na musadzi wawe vho eḓela, mbava ya dzhena nḓuni. Zwi vhonala uri yeneyo mbava yo vha i tshi ḓivha hune ya fanela u sedza hone. Ya dzhia thundu yoṱhe ya ndeme ye ya vha i fhasi ha mmbete u katela na tshelede ye Juan a vha o i vhea kha ḓirowara ya tsini na mmbete. Musi Juan a tshi vuwa, a tumbula uri ho tswiwa. Ha nga ḓo vhuya a hangwa ngudo i vhavhaho ye a i wana ya uri: Muthu o eḓelaho ha koni u linda thundu yawe.
2 Zwo tou ralo na kha zwithu zwa muya. Ri nga si kone u linda fhulufhelo ḽashu na lutendo lwashu arali ro eḓela. Nga zwenezwo, Paulo o ri ṱuṱuwedza a ri: “Ndi zwone-ha ri songo eḓela sa vhaḽa vhaṅwe, aiwa! nga ri fhaṱuwe, ri dzule ró dzivhuluwa.” (1 Vha-Thesalonika 5:6) U itela u sumbedza uri ndi zwa ndeme lungafhani u dzula ro fhaṱuwa, Yesu o shumisa tshifanyiso tsha mbava. O ṱalusa zwiitea zwe zwa sumbedza u ḓa hawe e Muhaṱuli, nahone a sevha a ri: “Ni dzule nó fhaṱuwa ngauri a ni ḓivhi ḓuvha ḽiné Muṋe waṋu a ḓo ḓa ngaḽo’. Zwiné na zwi ḓivha khezwi: Muṋe wa nnḓu arali a tshi ḓivha tshikhathi tshiné mbava ya ḓa ngatsho’, a nga dzedza vhusiku a si tende nnḓu yawe i tshi dzhenwa. Na inwi dzulani-ha nó lindela, ngauri Murwa-muthu u ḓo ḓa nga tshikhathi tshiné ni si tshi ḓivhe.” (Mateo 24:42-44) Mbava a i ḓivhadzi hu tshee nga phanḓa uri i ḓo ḓa lini. I lavhelela u swika nga tshifhinga tshine hu si vhe na muthu o i lavhelelaho. Nga hu fanaho, samusi Yesu o amba, vhufhelo ha ano maitele a zwithu a ḓo swika ‘nga tshikhathi tshine ra si tshi ḓivhe.’
“Dzulani No Fhaṱuwa, Ni Ime No Khwaṱha Lutendoni”
3. Nga u shumisa tshifanyiso tsha vhashumeli vho lindelaho muṋe wavho a tshi vhuya mbinganoni, Yesu o sumbedza hani vhuhulwane ha u dzula ro fhaṱuwa?
3 Kha maipfi o ṅwaliwaho kha Evangeli ya Luka, Yesu o vhambedza Vhakriste na vhashumeli vho lindelaho muṋe wavho a tshi vhuya mbinganoni. Vha fanela u dzula vho luga u itela uri musi a tshi vhuya a wane vho fhaṱuwa, vho lindela u mu ṱanganedza. Nga nḓila i fanaho, Yesu o ri: “A ni ḓivhi tshikhathi tshiné Murwa-muthu a ḓo ḓa ngatsho’.” (Luka 12:40) Vhaṅwe vhathu vhe vha shumela Yehova miṅwaha minzhi vha nga kha ḓi sa dzhiela nṱha zwifhinga zwine ra khou tshila khazwo. Vha nga kha ḓi humbula uri vhufhelo vhu tshee kule. Fhedzi u humbula nga yeneyo nḓila zwi nga ita uri ri sa tsha ṱhogomela zwithu zwa muya nahone ri sedzese zwithu zwi vhonalaho zwine zwa nga ri thithisa vhumuya hashu.—Luka 8:14; 21:34, 35.
4. Ndi u tenda hufhio hune ha nga ri ṱuṱuwedza uri ri dzule ro fhaṱuwa, nahone Yesu o zwi sumbedza hani zwenezwi?
4 Ri nga wana iṅwe ngudo kha tshifanyiso tsha Yesu. Naho vhashumeli vho vha vha sa ḓivhi tshikhathi tshine muṋe wavho a ḓo vhuya ngatsho, zwi vhonala uri vho vha vha tshi ḓivha vhusiku hune a ḓo vhuya ngaho. Zwo vha zwi tshi ḓo vha konḓela u dzula vho fhaṱuwa vhusiku honoho hoṱhe arali vho vha vha tshi humbula uri muṋe wavho a nga kha ḓi vhuya nga vhuṅwe vhusiku. Fhedzi vho vha vha tshi ḓivha vhusiku vhune a ḓo vhuya ngaho, nahone zwenezwo zwo vha ṋea tshiitisi tshihulwane tsha u dzula vho fhaṱuwa. Nga hu fanaho, vhuporofita ha Bivhili vhu sumbedza zwavhuḓi uri ri khou tshila tshifhingani tsha vhufhelo, fhedzi a vhu ri vhudzi ḓuvha kana tshikhathi tshine ha ḓo swika ngatsho. (Mateo 24:36) U tenda hashu uri vhufhelo vhu khou ḓa zwi ri thusa uri ri dzule ro fhaṱuwa, fhedzi arali ri tshi tenda uri ḓuvha ḽa Yehova ḽi tsini zwa vhukuma, ri ḓo vha na tshiṱuṱuwedzi tsho khwaṱhaho tsha u dzula ro fhaṱuwa.—Tsefanya 1:14.
5. Ri nga aravha hani ṱhuṱhuwedzo ya Paulo ya u “dzula ro fhaṱuwa”?
5 Musi Paulo a tshi ṅwalela Vhakorinta, o vha ṱuṱuwedza a ri: “Dzulani no fhaṱuwa, ni ime no khwaṱha lutendoni.” (1 Vha-Korinta 16:13, vhambedzani NW.) Ee, u dzula ro fhaṱuwa zwi tshimbidzana na u khwaṱha ha lutendo lwa Vhukriste. Ri nga dzula hani ro fhaṱuwa? Nga u wana nḓivho khulwane ya Ipfi ḽa Mudzimu. (2 Timotheo 3:14, 15) Nḓowelo yavhuḓi ya u ḓigudisa na u ya miṱanganoni misi yoṱhe zwi a ri thusa u khwaṱhisa lutendo lwashu nahone u dzula ri tshi humbula nga ḓuvha ḽa Yehova ndi tshipiḓa tsha ndeme tsha lutendo lwashu. Ngauralo u vusulusa tshifhinga tshoṱhe vhuṱanzi vhu bvaho Maṅwaloni ha uri ri khou tshila tsini na vhufhelo ha ano maitele a zwithu zwi ḓo ri thusa u sa hangwa mafhungo-ngoho a malugana na u ḓa ha honoho vhufhelo.a Zwi dovha zwa vha zwavhuḓi u ṱhogomela zwiitea zwa shango zwine zwa khou bvelela zwine zwa ḓadzisa vhuporofita ha Bivhili. Muṅwe wahashu wa Dzheremane o ṅwala a ri: “Tshifhinga tshoṱhe musi ndi tshi vhona mafhungo—dzinndwa, midzinginyo, dzikhakhathi, na u tshikafhadzwa ha pulanethe yashu zwi ombedzela uri vhufhelo vhu tsini.”
6. Yesu o fanyisa hani nḓowelo ya u eḓela muyani musi tshifhinga tshi khou ṱanḓulukana?
6 Kha Marko ndima ya 13, ri wana maṅwe mafhungo e Yesu a ṱuṱuwedza ngao vhatevheli vhawe uri vha dzule vho fhaṱuwa. U ya nga yeneyi ndima, Yesu o vhambedza vhuimo havho na ha mulindi wa muṋango we a lindela muṋe wawe a tshi vhuya lwendoni. Mulindi wa muṋango o vha a sa ḓivhi tshikhathi tshine muṋe wawe a ḓo vhuya ngatsho. O vha o fanela u sokou dzula o fhaṱuwa. Yesu o amba zwifhinga zwiṋa zwine muṋe a nga kha ḓi vhuya ngazwo. Zwifhinga zwiṋa zwo vha zwi tshi bva nga awara ya vhuraru nga matsheloni u swika ḽi tshi kovhela. Musi ḽi tshi vho ya u kovhela, mulindi wa muṋango a nga kha ḓi thoma u kumedza. Hu vhigwa uri maswole a dzhia awara ya nga phanḓa ha u tota tombo i tshifhinga tshavhuḓi tsha u fara maswina a songo humbulela. Nga hu fanaho, kha tshino tshifhinga tsha vhufhelo, tshine vhathu vhane ra tshila navho vha vha vho eḓela muyani, ri fanela u lwa u fhira naho hu lini u itela u dzula ro fhaṱuwa. (Vha-Roma 13:11, 12) Naho zwo ralo, kha tshifanyiso tshawe, Yesu o ṱuṱuwedza lunzhi-lunzhi a ri: “Lavhelani ni karuwe . . . Nga zwenezwo ni dzule no fhaṱuwa, Huno zwiné nda ni vhudza, ndi vhudza vhoṱhe ndi ri: Dzulani no fhaṱuwa!”—Marko 13:32-37, vhambedzani NW.
7. Ndi khombo dzifhio dzine dza vha hone, nahone ri na zwenezwi muhumbuloni, ndi ṱhuṱhuwedzo ifhio ine ra i vhala misi yoṱhe Bivhilini?
7 Yesu o ṱuṱuwedza u dzula ro fhaṱuwa tshifhinga tshinzhi musi e vhuḓinḓani hawe na nga murahu ha mvuwo yawe. Hu ṱoḓaho u vha tshifhinga tshoṱhe hune Maṅwalo a ambela kha ano maitele a zwithu, ri wana tsevho ya u dzula ro fhaṱuwa.b (Luka 12:38, 40; Ndzumbululo 3:2; 16:14-16) Vhukuma, u kumedza muyani zwi na khombo khulwane. Roṱhe ri ṱoḓa tsevho dzo raloho!—1 Vha-Korinta 10:12; 1 Vha-Thesalonika 5:2, 6.
Vhaapostola Vhararu Vhe Vha Kundelwa U Dzula Vho Fhaṱuwa
8. Tsimuni ya Getsemane, vhaapostola vhararu vha Yesu vho aravha hani khumbelo yawe ya u dzula vho fhaṱuwa?
8 U dzula muthu o fhaṱuwa zwi ṱoḓa zwi fhiraho zwiṱuṱuwedzi zwavhuḓi, samusi ri tshi nga zwi vhona kha tsumbo ya Petro, Yakobo, na Yohane. Vhenevha ndi vhanna vhararu vha muya vhe vha tevhela Yesu nga u fhulufhedzea nahone vha mu funa vhukuma. Naho zwo ralo, vhusikuni ha ḽa 14 Nisan, 33 C.E., vho kundelwa u dzula vho fhaṱuwa. Musi vha tshi bva nḓuni ya nṱha he vha vha vha tshi khou pembelela Paseka, vhaapostola vhararu vho ṱuwa na Yesu tsimuni ya Getsemane. Yesu o vha vhudza a ri: “Muya wanga wo ṱungufhala tshoṱhe lwa u isa lufuni. Dzulani afha ni tshese na nṋe.” (Mateo 26:38) Yesu o rabela Khotsi awe wa ṱaḓulu luraru, nahone a vhuyelela kha khonani dzawe luraru, a wana vho eḓela.—Mateo 26:40, 43, 45.
9. Zwi vhonala uri ndi mini tshe tsha ita uri vhaapostola vha farwe nga khofhe?
9 Ndi ngani vhenevha vhanna vha fhulufhedzeaho vho kundelwa u ita zwe Yesu a vha humbela? Vho itiswa nga u neta. Ḽo vha ḽo no kovhela, khamusi hu vhukati ha vhusiku, nahone “maṱo avho o vha a tshi lemela” nga khofhe. (Mateo 26:43) Naho zwo ralo, Yesu o ri: “Fhaṱuwani ni rabele uri ni si dzhene milingoni; muya wone u a funa, ṋama yone i ro shaya maanḓa.”—Mateo 26:41.
10, 11. (a) Hu sa londwi maneto awe, ndi mini zwo thusaho Yesu uri a dzule o fhaṱuwa tsimuni ya Getsemane? (b) Ri nga guda mini kha zwe zwa bvelela kha vhaapostola vhararu musi Yesu a tshi vha humbela uri vha dzule vho fhaṱuwa?
10 A zwi timatimisi uri Yesu na ene o vha o neta nga honoho vhusiku vhu swayeaho. Naho zwo ralo, nṱhani ha u farwa nga khofhe, o fhedza tshenetsho tshifhinga tsha ndeme a tshee o vhofholowa a tshi khou rabela vhukuma. Maḓuvha a si gathi nga murahu ha zwenezwo, o ṱuṱuwedza vhatevheli vhawe u rabela, a tshi ri: “Fhaṱuwani-ha, ni dzule ni tshi rabela, uri ni ḓo kona u ponyoka hezwo zwoṱhe, zwiné zwa ḓo vha hone, ni kone u ima phanḓa ha Murwa-muthu.” (Luka 21:36; Vha-Efesa 6:18) Arali ra thetshelesa tsevho ya Yesu nahone ra tevhela tsumbo yawe yavhuḓi musi zwi tshi ḓa kha thabelo, u rabela hashu Yehova zwi tshi bva mbiluni zwi ḓo ri thusa u dzula ro fhaṱuwa muyani.
11 Vhukuma, Yesu o vha a tshi pfesesa—samusi vhafunziwa vhawe vho vha vha sa pfesesi nga tshenetsho tshifhinga—uri hu si kale u ḓo farwa nahone a haṱulelwa lufu. Milingo yawe i ḓo swika kha vhuimo vhu ṱungufhadzaho kha danda ḽa tshengedzo. Yesu o sevha vhaapostola vhawe nga ha zwenezwi zwithu, fhedzi a vho ngo pfesesa zwe a vha a tshi khou amba zwone. Nga zwenezwo, vho farwa nga khofhe musi ene o fhaṱuwa a tshi khou rabela. (Marko 14:27-31; Luka 22:15-18) Samusi zwo vha zwo ralo nga vhaapostola, ṋama yashu i shaya maanḓa nahone hu na zwithu zwine ri si zwi ḓivhe u swika zwino. Naho zwo ralo, arali ra sa ṱhogomela vhuhulwane ha tshifhinga tshine ra khou tshila khatsho, ri nga eḓela muyani. U ṱhogomela zwiimo zwi ḓo ita uri ri dzule ro fhaṱuwa.
Pfaneleo Tharu Dza Ndeme
12. Ndi pfaneleo dzifhio tharu dze Paulo a dzi vhambedza na u dzula ro fhaṱuwa?
12 Ri nga dzula hani ro fhaṱuwa? Ro no ḓi vhona ndeme ya thabelo na ṱhoḓea ya u dzula ri tshi humbula nga ḓuvha ḽa Yehova. Zwiṅwe hafhu, Paulo o bula pfaneleo tharu dzine ra fanela u dzi ṱahulela. O ri: “Riṋe-ha, vhané ra vha vha masiari, nga ri dzivhuluwe, ri ḓi-pile khana nga lutendo na lufuno; nguwane hu vhe u fulufhela u tshidzwa.” (1 Vha-Thesalonika 5:8) Kha ri haseledze nga u pfufhifhadza mushumo wa lutendo, fhulufhelo, na lufuno u itela u ri thusa u dzula ro fhaṱuwa muyani.
13. Lutendo lu na mushumo ufhio kha u ita uri ri dzule ro fhaṱuwa?
13 Ri fanela u vha na lutendo lwo khwaṱhaho lwa uri Yehova u hone na uri “vha mu ṱoḓaho u ḓo vha ṋea malamba.” (Vha-Heberu 11:6) U ḓadzea ha vhuporofita ha u thoma ha Yesu ha ḓana ḽa u thoma ḽa miṅwaha vhu ambaho nga vhufhelo hu khwaṱhisa lutendo lwashu musi ri tshi vhona u ḓadzea haho misini yashu. Nahone lutendo lwashu lu ita uri ri dzule ro lavhelela nga mafulufulu ḓuvha ḽa Yehova, ri na vhungoho ha uri ‘[bono ḽa vhuporofita] ḽi ḓo ḓa, a ḽi nga shaei. A li nga lengi.’—Habakuku 2:3.
14. Fhulufhelo ndi ḽa ndeme lungafhani arali ri tshi ṱoḓa u dzula ro fhaṱuwa?
14 Fhulufhelo ḽashu ḽa vhukuma ḽi nga “thikho i sá dzinginyei ya mimuya yashu” ine ya ri thusa u konḓelela vhuleme naho ri tshi fanela u lindela uri hu ḓadzee maṅwe mafhulufhedziso a Mudzimu. (Vha-Heberu 6:18, 19) Margaret, wahashu wa tshisadzini o ḓodzwaho nga muya a re na miṅwaha i fhiraho 90 na o no fhedzaho miṅwaha ya 70 o lovhedzwa, uri: “Musi munna wanga a tshi vhulahwa nga vhulwadze ha khentsara nga 1963, ndo humbula uri zwi nga vha zwavhuḓi arali vhufhelo ha swika nga u ṱavhanya. Fhedzi zwino ndi a zwi vhona uri ndo vha ndi tshi khou humbula zwihuluhulu u itela madzangalelo anga. Ro vha ri sa ḓivhi uri mushumo u ḓo engedzea u swika ngafhi shangoni ḽoṱhe. Ṋamusi hu kha ḓi vha na fhethu hunzhi hune ha kha ḓi tou bva u thomiwa u shumiwa. Ngauralo ndo takalela uri Yehova ho ngo fhela mbilu.” Muapostola Paulo o ri khwaṱhisedza a ri: “U konḓelela hu ḓisa u fulufhedzea, u fulufhedzea ha ṋea fulufhelo. Huno fulufhelo a ḽi ṱhavhisi dziṱhoni.”—Vha-Roma 5:3-5.
15. Lufuno lu ri ṱuṱuwedza hani naho zwi tshi vhonala u nga ro no lindela tshifhinga tshilapfu?
15 Lufuno lwa Vhukriste ndi pfaneleo ya ndeme ngauri ndi lwone lune lwa ri ṱuṱuwedza kha zwoṱhe zwine ra zwi ita. Ri shumela Yehova nga ṅwambo wa uri ri a mu funa, ri sa londi mbekanyatshifhinga yawe. U funa vhahashu zwi ri ṱuṱuwedzela u huwelela mafhungo maḓifha a Muvhuso, hu sa londwi uri Mudzimu u ṱoḓa ri tshi ita zwenezwo tshifhinga tshingafhani na uri ri vhuyelela lungana kha vhathu vhathihi. Samusi Paulo o ṅwala, “tshi sá fheli ndi lutendo, na fulufhelo, na lufuno, zwithu hezwi zwiraru; hone zwihulwane khazwo’ ndi lufuno.” (1 Vha-Korinta 13:13) Lufuno lu ri thusa u konḓelela na u dzula ro fhaṱuwa. “[Lufuno lu] fulufhela zwoṱhe, lwa konḓelela zwoṱhe. Lufuno na lini na lini a lu lovhi.”—1 Vha-Korinta 13:7, 8.
“Faresa Tshiné Wa Vha Natsho’ ”
16. Nṱhani ha u fhelelwa nga maanḓa, ndi mavhonele afhio ane ra fanela u a ṱahulela?
16 Ri khou tshila tshifhingani tsha ndeme tshine zwiitea zwa shango zwa ri humbudza tshifhinga tshoṱhe uri ri khou tshila maḓuvhani a vhufhelo. (2 Timotheo 3:1-5) Tshino a si tshifhinga tsha u fhelelwa nga maanḓa, fhedzi ndi tsha u “faresa tshiné wa vha natsho’.” (Ndzumbululo 3:11) Nga u ‘fhaṱuwa nga u dzula ri tshi rabela’ na nga u ṱahulela lutendo, fulufhelo, na lufuno, ri ḓo ḓiimisela u sedzana na tshifhinga tsha u lingiwa. (1 Petro 4:7) Ri na mushumo munzhi wa Mudzimu. U dzula ro farakanea nga mushumo wa Mudzimu zwi ḓo ita uri ri dzule ro fhaṱuwa vhukuma.—2 Petro 3:11.
17. (a) Ndi ngani ri songo tea u kulwa nungo nga zwithu zwine zwa si ḓadzee tshifhinga tshoṱhe? (Sedzani bogisi ḽi re kha siaṱari 21.) (b) Ri nga edzisa hani Yehova, nahone vhane vha ita nga u ralo vha ḓo wana phaṱhutshedzo dzifhio?
17 Yeremia o ṅwala a ri: “Nṋe mbilu yanga i ri: Wanga mukovhe ndi Yehova! Ndi itwa ngazwo’ ndí tshee ndó fulufhela. Yehova u tonda vhane vha mu ṱuvha, na dzimbilu dzine dza mu ṱoḓa. Zwo naka muthu a tshi konḓelela, a lindela u lamulelwa nga Yehova.” (Zwililo 3:24-26) Vhaṅwe vhashu a si kale ro lindela. Vhaṅwe vho no lindela miṅwaha minzhi u itela u vhona u tshidza ha Yehova. Honohu u lindela ndi hu pfufhi lungafhani musi ri tshi hu vhambedza na vhutshilo vhu si fheli vhu re phanḓa! (2 Vha-Korinta 4:16-18) Nahone musi ro lindela tshifhinga tsho teaho tsha Yehova, ri nga ṱahulela pfaneleo dza ndeme dza Vhukriste nahone ri thuse vhaṅwe u dzhiela nṱha u sa fhela mbilu ha Yehova na u ṱanganedza mafhungo-ngoho. U nga ri roṱhe ri nga dzula ro fhaṱuwa. Kha ri edzise Yehova nahone ri sa fhele mbilu, ri tshi livhuha fhulufhelo ḽe a ri ṋea ḽone. Nahone musi ri tshi dzula ro fhaṱuwa nga u fhulufhedzea, u nga ri ri nga dzula ri tshi tenda ro khwaṱha kha fhulufhelo ḽa vhutshilo vhu sa fheli. Nga zwenezwo, haya mafhulufhedziso a vhuporofita a ḓo shuma kha riṋe: ‘[Yehova] u ḓo u hulisa; shango ḽi ḓo vha ḽau; vhavhi vha ḓo lovha U tshi zwi vhona.’—Psalme ya 37:34.
[Ṱhaluso dzi re magumoni a siaṱari]
a Zwi nga ni thusa u vusulusa mitaladzi ya rathi ya vhuṱanzi vhu sumbedzaho uri ri khou tshila “maḓuvhani a vhufhelo” yo ṅwaliwaho kha masiaṱari 12-13 a Tshiingamo tsha ḽa 15 January, 2000.—2 Timotheo 3:1.
b Musi a tshi amba nga ḽiiti ḽa Lugerika ḽo ṱalutshedzwaho nga uri “dzulani no fhaṱuwa,” muṅwali wa ṱhalusamaipfi ane a pfi W. E. Vine o ṱalutshedza uri zwi amba ‘u pandela khofhe,’ nahone “a zwi ambi u sokou fhaṱuwa fhedzi, fhedzi zwi dovha zwa amba u fhaṱutshela vhane vha khou ṱoḓa u ita tshiṅwe tshithu.”
Ni Nga Fhindula Hani?
• Ri nga khwaṱhisa hani lutendo lwashu lwa uri vhufhelo ha ano maitele a zwithu vhu tsini?
• Ri nga guda mini kha tsumbo dza Petro, Yakobo, na Yohane?
• Ndi pfaneleo dzifhio tharu dzine dza nga ri thusa u dzula ro fhaṱuwa muyani?
• Ndi ngani tshino tshi tshifhinga tsha u “faresa tshiné wa vha natsho’ ”?
[Bogisi/Tshifanyiso kha siaṱari 21]
“Wa Mashudu Ndi Uyo Ane A Lindela.”—Daniele 12:12
Edzani u humbula arali mulindi a ḓivha uri mbava i khou dzudzanya u tswa fhethu he a hu linda. Musi ḽi tshi kovhela, mulindi u thetshelesa nga vhuronwane phosho naho ifhio ine ya nga sumbedza u vha hone ha yeneyo mbava. Tshifhinga tshoṱhe u dzula o thetshelesa na u sedza nga maanḓa. Zwi a leluwa u pfesesa nḓila ine a nga fhurwa ngayo nga phosho i si yone—phosho ya muya une wa khou vhudzula mirini kana phosho ya tshimange tshi tshi khou wela kha tshiṅwe tshithu.—Luka 12:39, 40.
Tshiṅwe tshithu tshi fanaho tshi nga bvelela kha vho “ṱulutshelwaho u dzumbululwa ha Murena washu Yesu Kristo.” (1 Vha-Korinta 1:7) Vhaapostola vho vha vha tshi humbula uri Yesu u ḓo “imisa muvhuso wa Isiraele” nga u ṱavhanya nga murahu ha mvuwo yawe. (Mishumo 1:6) Nga murahu ha miṅwaha, Vhakriste vha Thesalonika vho humbudzwa uri u vha hone ha Yesu hu tshee kule vhukuma. (2 Vha-Thesalonika 2:3, 8) Naho zwo ralo, zwilavhelelwa zwi si zwone nga ha ḓuvha ḽa Yehova a zwo ngo ita uri vhenevho vhatevheli vha Yesu vha kale vha ṱutshele nḓila i isaho vhutshiloni vhu sa fheli.—Mateo 7:13.
Misini yashu, u kulea nungo nga ḓuvha ḽine ḽa khou vhonala ḽi tshi khou lenga ḽa vhufhelo ha ano maitele a zwithu a zwo ngo fanela u ita uri ri si dzule ro fhaṱuwa. Mulindi o fhaṱuwaho a nga kha ḓi fhurwa nga phosho i si yone, fhedzi u fanela u dzula o fhaṱuwa! Ndi mushumo wawe. Zwo tou ralo na kha Vhakriste.
[Tshifanyiso kha siaṱari 18]
Naa ni a tenda uri ḓuvha ḽa Yehova ḽi tsini?
[Zwifanyiso kha siaṱari 19]
Miṱangano, thabelo, na nḓowelo dzavhuḓi dza u ḓigudisa zwi nga ri thusa u dzula ro fhaṱuwa
[Tshifanyiso kha siaṱari 22]
U fana na Margaret, u nga ri ri nga dzula ro fhaṱuwa ri sa fheli mbilu nahone ro khwaṱha