Nḓila Ine Mudzimu A Khuthadza Ngayo

Muapostola Paulo o ṱalusa Yehovaa sa “Mudzimu wa u khuthadza hoṱhe, ane a ri khuthadza kha vhuṱungu hashu hoṱhe.” (2 Vhakorinta 1:3, 4) Nga zwenezwo, Bivhili i ri khwaṱhisedza uri a hu na muthu ane Mudzimu a nga kundelwa u mu thusa nahone a hu na thaidzo ine Khotsi ashu wa ṱaḓulu a nga kundelwa u ri khuthadza khayo.

Ndi ngoho uri ri fanela u ita zwiṅwe zwithu arali ri tshi ṱoḓa u khuthadzwa nga Mudzimu. Dokotela a nga ri thusa hani arali ri songo ya khae? Muporofita Amosi o vhudzisa uri: “Naa vhavhili vha nga tshimbidzana hani vhá songó ranga vha ṱangana?” (Amosi 3:3) Nga zwenezwo, Bivhili i ri ṱuṱuwedza uri: “Sendelani tsini ha Mudzimu, na ene u ḓo sendela tsini haṋu.”—Yakobo 4:8.

Ri nga vha hani na vhungoho ha uri Mudzimu u ḓo sendela tsini na riṋe? Tsha u thoma, u ri vhudza lunzhi-lunzhi uri u ṱoḓa u ri thusa. (Sedzani bogisi.) Tsha vhuvhili, ri na vhuṱanzi ho khwaṱhaho ha vhathu vhe vha khuthadzwa nga Mudzimu tshifhingani tsho fhiraho na musalauno.

U fana na vhanzhi ṋamusi vhane vha ṱoḓa thuso kha Mudzimu, na Khosi Davida o sedzana na thaidzo nnzhi. O vhuya a humbela Yehova a ri: “Ipfa ipfi ḽa u dzindela hanga, ndi tshi U lilela.” Naa Mudzimu o mu fhindula? Ee, o mu fhindula. Davida o dovha a ri: “[Ndo] tshidzwa. Mbilu yanga i takalela zwenezwo.”—Psalme ya 28:2, 7.

MUSHUMO WA YESU WA U KHUTHADZA VHOṰHE VHA LILAHO

Mudzimu o amba uri Yesu u na mushumo wa ndeme wa u khuthadza. Kha miṅwe ya mishumo ye Mudzimu a mu ṋea yone, Yesu o vha a tshi fanela uri a “phuphe dzimbilu dzo pwashakanywaho” na u ‘fhumudza vhoṱhe vha lilaho.’ (Yesaya 61:1, 2) Samusi zwo dzula zwo ambiwa, Yesu o vha a tshi fanela u khuthadza vho ‘netaho na vho lemelwaho.’—Mateo 11:28-30.

Yesu o khuthadza vhathu nga u vha ṋea nyeletshedzo ya vhuṱali, nga nḓila ya vhuthu ye a vha a tshi vha fara ngayo nahone nga zwiṅwe zwifhinga a tshi fhodza vha lwalaho. Ḽiṅwe ḓuvha muthu we a vha o farwa nga mapele o ri: “Arali u tshi funa, u nga mphodza.” Yesu o mu pfela vhuṱungu nahone a ri: “Ndi a funa. Fhola.” (Marko 1:40, 41) Onoyo munna a fhola.

Ṋamusi Murwa wa Mudzimu ha ho kha ḽifhasi u itela u ri khuthadza. Fhedzi Khotsi awe Yehova, “Mudzimu wa u khuthadza,” u bvela phanḓa a tshi khuthadza vho ṱungufhalaho. (2 Vhakorinta 1:3) Ṱhogomelani nḓila nṋa dzine Mudzimu a dzi shumisa u itela u khuthadza vhathu.

• Bivhili. “Zwithu zwoṱhe zwo ṅwalwaho kale zwo ṅwalelwa u ri funza, uri nga u konḓelela hashu na nga u khuthadzwa nga Maṅwalo ri vhe na fulufhelo.”—Vharoma 15:4.

• Muya Mukhethwa Wa Mudzimu. Musi Yesu a tshi kha ḓi tou bva u fa, ho vha na mulalo tshivhidzoni tshoṱhe tsha Vhukriste. Ndi ngani? Ngauri tshivhidzo ‘tsho tshimbila nga u ofha Yehova nga nṱhani ha uri tsho khwaṱhiswa nga muya mukhethwa.’ (Mishumo 9:31) Muya mukhethwa wa Mudzimu u na maanḓa. Mudzimu a nga u shumisa u itela u khuthadza muṅwe na muṅwe kha vhuimo vhuṅwe na vhuṅwe.

• Thabelo. Bivhili i ri: “Ni songo vhilaela nga tshithu na tshithihi.” Nahone i dovha ya ri: “Zwoṱhe zwine na zwi ṱoḓa ni humbele Mudzimu nga thabelo khathihi na u livhuha; nahone mulalo wa Mudzimu une wa fhira u ṱalukanya hoṱhe u ḓo tsireledza mbilu dzaṋu na maanḓa.”—Vhafilipi 4:6, 7.

• Vhatendi Nga Inwi vha nga vha khonani dza vhukuma dzine na nga ḓitika ngadzo musi no sedzana na zwiimo zwi konḓaho. Muapostola Paulo o ṱalusa khonani dzawe sa ‘vho mu khuthadzaho vhukuma’ zwifhingani zwi ‘tsikeledzaho na maṱunguni.’—Vhakolosa 4:11; 1 Vhathesalonika 3:7.

Fhedzi ni nga vha ni tshi khou ḓivhudzisa uri zwenezwi zwi shuma hani vhutshiloni. Kha ri ṱhogomele nga vhuronwane thaidzo dze vhathu vho bulwaho mathomoni vha sedzana nadzo. U fana navho, ni nga kona u vhona uri Mudzimu u kha ḓi bvela phanḓa a tshi ita zwe a fulufhedzisa musi a tshi ri: “Ndi ḓo ni fhumudza vhunga muthu a tshi fhumudzwa nga mme-awe.”—Yesaya 66:13.