Ndi Ngafhi Hune Na Nga Wana Hone Khuthadzo?
“Mudzimu, a re Khotsi-a Murena washu Yesu Kristo . . . Ané a ri khuthadza maṱhuphoni ashu oṱhe.”—2 VHA-KORINTA 1:3, 4.
1. Ndi zwiimo zwifhio zwine zwa nga ita uri vhathu vha ṱoḓe vhukuma khuthadzo?
VHULWADZE vhu holefhadzaho vhu nga ita uri muthu a ḓipfe u nga ri vhutshilo hawe vhu nga si tsha vha havhuḓi. Midzinginyo, maḓumbu na nḓala zwi ita uri vhathu vha hanganee. Nndwa dzi nga vhulaha miraḓo ya muṱa, dzi nga tshinyadza mahaya, kana dzi nga ita uri vhathu vha ṱutshele mahaya avho. Tshikhetho tshi nga ita uri vhathu vha vhone uri a huna fhethu hune vha nga ya hone u itela u wana thuso. Vhathu vhane vha kwamea nga dzenedzo khombo vha ṱoḓa khuthadzo vhukuma. I nga wanala ngafhi?
2. Ndi ngani khuthadzo ine ya ṋewa nga Yehova yo khethea?
2 Vhaṅwe vhathu na madzangano vha lwela u ṋea khuthadzo. Maipfi a vhulenda a a livhuhiwa. Thuso ya zwithu zwi vhonalaho i a thusa lwa tshifhinganyana. Fhedzi ndi Yehova fhedzi, Mudzimu wa ngoho, ane a nga lugisa tshinyalelo yoṱhe nahone a ṋea thuso ine ya ṱoḓea uri khombo dzo raloho dzi si tsha dovha dza bvelela na khathihi. I tshi amba malugana nae, Bivhili iri: “Nga hu rendwe Mudzimu, a re Khotsi-a Murena washu Yesu Kristo, ene Khotsi wa dzikhathutshelo, ene Mudzimu wa u khuthadzo hoṱhe. Ané a ri khuthadza maṱhuphoni ashu oṱhe, uri ri ḓo kona u khuthadza vha re maṱhuphoni oṱhe nga u khuthadza honohuḽa, he ra khuthadzwa ngaho’ nga Mudzimu riṋe vhaṋe.” (2 Vha-Korinta 1:3, 4, vhambedzani NW.) Yehova u ri khuthadza nga nḓila-ḓe?
U Wana Tshiitisi Tsha Vhuleme
3. Khuthadzo ye Mudzimu a i ṋea i sumbedza tshiitisi tsha vhuleme ha vhathu nga nḓila-ḓe?
3 Vhathu vhoṱhe vho mamela u sa fhelela nga ṅwambo wa tshivhi tsha Adamu, nahone zwenezwo zwo bveledza vhuleme vhunzhi he ha fheleledza ho ḓisa lufu. (Vha-Roma 5:12) Honohu vhuimo ho ṋaṋiswa nga uri Sathane Diabolo ndi “muvhusi wa shango ḽino.” (Yohane 12:31; 1 Yohane 5:19) Yehova o ita zwi fhiraho u sokou sumbedza u pfela vhuṱungu nga zwiimo zwi si zwavhuḓi zwine zwa dina vhathu. O rumela Murwa wawe mubebwa e eṱhe uri a ri tshidze, nahone A ri vhudze uri ri nga vhofhololwa kha dzenedzi mvelelo dza tshivhi tsha Adamu arali ra vha na lutendo kha Murwa Wawe. (Yohane 3:16; 1 Yohane 4:10) Mudzimu o dovha a dzula o amba uri Yesu Kristo, we a fhiwa maanḓa oṱhe ṱaḓulu na kha ḽifhasi, u ḓo fhelisa Sathane na ano maitele awe oṱhe mavhi a zwithu.—Mateo 28:18; 1 Yohane 3:8; Ndzumbululo 6:2; 20:10.
4. (a) Yehova o khwaṱhisa hani fhulufhelo ḽashu kha thuso ye a fhulufhedzisa u i ḓisa? (b) Yehova o ri thusa hani u kona u vhona uri yeneyo thuso u ḓo i ḓisa?
4 U itela u khwaṱhisa fhulufhelo ḽashu kha mafhulufhedziso awe, Mudzimu o ṅwala vhuṱanzi vhunzhi ha uri naho tshi tshini tshine a dzula o tshi amba tshi a bvelela. (Yoshua 23:14) Bivhilini o ṅwala mafhungo a zwithu zwe a zwi ita u itela u thusa vhashumeli vhawe kha zwiimo zwe a huna na muthu we a vha a tshi nga zwi kona. (Ekisodo 14:4-31; 2 Dzikhosi 18:13–19:37) Nahone a tshi shumisa Yesu Kristo, Yehova o sumbedza uri ndivho yawe i katela u fhodza vhathu “maṱungu oṱhe,” khathihi na u vusa vhafu. (Mateo 9:35; 11:3-6) Zwenezwi zwithu zwoṱhe zwi ḓo itea lini? Bivhili i fhindula nga u ṋea ṱhaluso ya maḓuvha a vhufhelo ha ano maitele a zwino, ane a ḓo dzhielwa vhudzulo nga maṱaḓulu maswa na ḽifhasi ḽiswa zwa Mudzimu. Ṱhaluso ya Yesu i tendelana na zwifhinga zwine ra khou tshila khazwo.—Mateo 24:3-14; 2 Timotheo 3:1-5.
Khuthadzo Kha Vhathu Vho Tsikeledzeaho
5. Musi a tshi ṋea khuthadzo kha Vhaisiraele vha kale, Yehova o ita uri vha ṱhogomele mini?
5 Musi ri tshi sedza kha nḓila ye Yehova a shumisana ngayo na Vhaisiraele vha kale, ri guda nḓila ye a vha ṋea ngayo khuthadzo zwifhingani zwa mitsiko. O vha humbudza uri u Mudzimu wa mufuda-ḓe. Hezwi zwo khwaṱhisa fhulufhelo ḽavho kha zwe a fhulufhedzisa. Yehova o ita uri vhaporofita vhawe vha shumise phambano khulwane vhukati hawe sa Mudzimu wa vhukuma na a tshilaho na midzimu i sili, i sa koni u ḓithusa khathihi na vhane vha i rabela. (Yesaya 41:10; 46:1; Yeremia 10:2-15) Musi a tshi vhudza Yesaya uri, “Fhumudzani, fhumudzani vhathu vhanga,” Yehova o ita uri muporofita wawe a shumise zwifanyiso na ṱhaluso dza mishumo Yawe ye a i sika u itela u ombedzela vhuhulwane ha Yehova samusi e ene Mudzimu muthihi wa ngoho.—Yesaya 40:1-31.
6. Yehova u ṋea vhuṱanzi vhufhio nga zwiṅwe zwifhinga u itela u sumbedza uri mbofholowo i ḓo swika lini?
6 Nga tshiṅwe tshifhinga, Yehova o ṋea khuthadzo nga u amba tshifhinga, tsha tsini kana tsha kule, tshine vhathu vhawe vha ḓo vhofhololwa ngatsho. Musi u vhofhololwa ha Vhaisiraele vho tsikeledzwaho ngei Egipita hu tsini, o vha vhudza uri: “Ndi kha ḓi vha na ṱhamu iṅwe nthihi ine nda ḓo rwa Farao na Vha-Egipita ngayo’. Ndi hone a tshi ḓo ni litsha na ṱuwa fhano.” (Ekisodo 11:1) Musi mashango mararu o itaho vhukonani a tshi govhela ḽa Yuda misini ya Khosi Yosafati, Yehova o vha vhudza uri U ḓo vha lamulela “matshelo.” (2 Koronika 20:1-4, 14-17) Kha ḽiṅwe sia, u vhofhololwa havho kha ḽa Babele ho vha ho ṅwaliwa nga Yesaya hu ṱoḓaho u vha miṅwaha ya 200 nga phanḓa, nahone zwiṅwe zwidodombedzwa zwa hone zwa ṋewa nga Yeremia hu ṱoḓaho u vha miṅwaha ya ḓana musi vha sa athu vhofhololwa. Honoho vhuporofita ho ṱuṱuwedza vhukuma vhashumeli vha Yehova musi tshifhinga tshavho tsha u vhofhololwa tsho swika!—Yesaya 44:26–45:3; Yeremia 25:11-14.
7. Ndi mini zwe zwa vha zwi tshi katelwa tshifhinga tshoṱhe kha fhulufhedziso ḽa u tshidzwa, nahone zwenezwi zwo kwama hani vhathu vha fhulufhedzeaho vha Isiraele?
7 Zwi swayeaho ndi uri mafhulufhedziso e a ḓisela vhathu vha Mudzimu khuthadzo tshifhinga tshoṱhe o vha e na mafhungo a ambaho nga ha Messia. (Yesaya 53:1-12) Kha mirafho yoṱhe, hezwi zwi ṋea fhulufhelo kha vhathu musi vho sedzana na milingo yo vhalaho. Kha Luka 2:25, ri vhala uri: “Vhonani, muḓini wa Yerusalema ho vha hu na muṅwe muthu ane a pfi Simeoni; muthu uyo o vha o luga, e muvhuya, ó lindela u fhumudzwa ha Isiraele [kana, khuthadzo; ine ya vha u ḓa ha Messia]; huno Muya mukhethwa wo vha u kha ene.” Simeoni o vha a tshi ḓivha nga ha fhulufhelo ḽa Messia ḽo ṅwaliwaho Maṅwaloni, nahone u lavhelela u ḓadzea haḽo zwo ṱuṱuwedza vhutshilo hawe. O vha a sa pfesesi uri zwi ḓo ḓadzea hani, nahone ha ngo tshila u swika a tshi vhona honoho u tshidzwa hu tshi ḓadzea, fhedzi o takala musi a tshi vhona we Mudzimu a vha a tshi ḓo mu shumisa u vha “mutshidzi.”—Luka 2:30.
Khuthadzo I Ṋewaho Nga Kristo
8. Thuso ye Yesu a i ṋea i nga vhambedzwa hani na zwe vhathu vhanzhi vha vha vha tshi zwi ṱoḓa?
8 Musi Yesu Kristo a tshi ḓadzisa vhuḓinḓa hawe ha kha ḽifhasi, ho ngo ṋea thuso ye tshifhinga tshoṱhe ya vha i ine vhathu vha i ṱoḓa. Vhaṅwe vho vha vho lavhelela Messia we a vha a tshi ḓo vha vhofholola vhupulini ha Vharoma. Fhedzi Yesu ho ngo vutshela wonoyo muvhuso; o vha vhudza uri “Khosi i ṋeeni-ha zwi re zwa khosi.” (Mateo 22:21) Ndivho ya Mudzimu i katela zwi fhiraho u vhofholola vhathu kha u pwanyeledzwa nga muṅwe muvhuso wa politiki. Vhathu vho vha vha tshi ṱoḓa u ita Yesu khosi, fhedzi a vha vhudza uri “u kumedza vhutshilo hawe uri a phuluse vhanzhi.” (Mateo 20:28; Yohane 6:15) Tshifhinga tshawe tsha u vha khosi tsho vha tshi sa athu swika, nahone o vha a tshi ḓo ṋewa maanḓa a u vhusa nga Yehova, hu si nga magogo a vhathu vha sa fushei.
9. (a) Yesu o huwelela mulaedza ufhio u khuthadzaho? (b) Yesu o sumbedza hani u tshimbilelana ha mulaedza wawe na zwiimo zwe vhathu vha vha vho sedzana nazwo? (c) Vhuḓinḓa ha Yesu ho ṋea fhulufhelo ḽifhio?
9 Yesu o vha a tshi khuthadza vhathu nga “mafhungo-maḓifha a muvhuso wa Mudzimu.” Hoyu wo vha u mulaedza we Yesu a u huwelela hoṱhe he a vha a tshi ya hone. (Luka 4:43) O sumbedza nḓila ine wonoyo mulaedza wa tshimbidzana ngayo na vhuleme ha vhathu ha ḓuvha ḽiṅwe na ḽiṅwe nga u sumbedza zwine a ḓo zwi itela vhathu musi e Khosi ya Vhumessia. O ṋea vhathu vhe vha vha vha tshi khou tambula tshiitisi tsho khwaṱhaho tsha u tshila nga u fhodza mabofu na zwimuma (Mateo 12:22; Marko 10:51, 52), u fhodza zwihole (Marko 2:3-12), u fhodza Vhaisiraele malwadze a tshusaho (Luka 5:12, 13), na u vha fhodza maṅwe malwadze a vhavhaho. (Marko 5:25-29) O khuthadza miraḓo ya muṱa ye ya vha yo ṱungufhala nga u vusa ṅwana wavho we a vha o fa. (Luka 7:11-15; 8:49-56) O sumbedza vhukoni hawe ha u langa maḓumbu a re na khombo na u fusha magogo mahulwane nga zwiḽiwa. (Marko 4:37-41; 8:2-9) Zwiṅwe hafhu, Yesu o vha funza maitele a vhutshilo e a vha a tshi nga vha thusa u sedzana nga hu bvelelaho na vhuleme havho na e a vha a tshi ḓo ita uri vhathu vha lavhelele vhuvhusi ha Messia. Nga zwenezwo, musi Yesu a tshi khou ita vhuḓinḓa hawe, ho ngo khuthadza fhedzi vhathu vhe vha thetshelesa vhe na lutendo, fhedzi o dovha a ṋea khuthadzo vhathu vha miṅwahani i ṱoḓaho u vha ya zwigidi zwivhili i ḓaho.
10. Tshiṱhavhelo tsha Yesu tsho ita uri hu vhe na khonadzeo dzifhio?
10 Nga murahu ha miṅwaha ya 60 musi Yesu o no ṋekedza vhutshilo hawe ha tshiṱhavhelo nahone o vuselwa u tshila ṱaḓulu, muapostola Yohane o hevhedzela u ṅwala a ri: “Vhana’nga, ndi tshi ni ṅwalela aya, ndi uri ni sa ḓo tshinya. Hone muthu a tshi tshinya, ri na muimeleli ha Khotsi, Yesu Kristo o lugaho, ndi Ene tshipfumelo tsha zwivhi zwashu, Hone a si tshipfumelo tsha zwashu fhedzi, ndi tsha zwa shango ḽoṱhe.” (1 Yohane 2:1, 2) Ri a wana khuthadzo khulwane vhukuma nga ṅwambo wa mbuyelo ya tshiṱhavhelo tsho fhelelaho tsha Yesu. Ri a zwi ḓivha uri ri nga hangwelwa zwivhi, u vha na luvalo lwo ṱambaho, vhushaka havhuḓi na Mudzimu, na u vha na tshilavhelelwa tsha vhutshilo vhu sa fheli.—Yohane 14:6; Vha-Roma 6:23; Vha-Heberu 9:24-28; 1 Petro 3:21.
U Khuthadzwa Nga Muyamukhethwa
11. Ndi ifhio iṅwe ndugiselelo ya khuthadzo ye Yesu a i fhulufhedzisa musi a sa athu fa?
11 Musi e na vhaapostola vhusikuni ha u fhedza musi a sa athu fa lufu lwa tshiṱhavhelo, Yesu o amba nga ha iṅwe ndugiselelo ye Khotsi awe wa ṱaḓulu a i ita u itela u vha khuthadza. Yesu o ri: “Ndi ḓo humbela Khotsi uri a ni fhe muṅwe muthusi [mukhuthadzi, nga Lugerika, pa·raʹkle·tos], wa u dzula na inwi lini na lini. Ndi Muya wa mafhungo-ngoho.” Yesu o vha khwaṱhisedza a ri: “Muthusi, Muya mukhethwa, . . . u ḓo ni humbudza zwoṱhe zwe nda ni vhudza.” (Yohane 14:16, 17, 26, vhambedzani NW.) Muyamukhethwa wo vha khuthadza hani?
12. Mushumo wa muyamukhethwa we wa humbudza vhafunziwa vha Yesu wo thusa hani u khuthadza vhathu vhanzhi?
12 Vhaapostola vho wana pfunzo khulwane kha Yesu. Vha nga si vhuye vha hangwa zwe a ita, fhedzi naa vhukuma vha ḓo humbula zwe a zwi amba? Naa vha ḓo hanga pfunzo dza ndeme nga ṅwambo wa ngelelo dzavho dzi songo fhelelaho? Yesu o vha khwaṱhisedza uri muyamukhethwa ‘u ḓo vha humbudza zwoṱhe zwe a vha vhudza.’ Nga zwenezwo, nga murahu ha miṅwaha i ṱoḓaho u vha ya malo musi Yesu o no fa, Mateo o kona u ṅwala Evangeli ya u thoma, ye khayo a ṅwala Pfunzo ya Yesu ya Thavhani i takadzaho, vhunzhi ha zwifanyiso zwawe zwa malugana na Muvhuso, na zwidodombedzwa zwawe zwa zwiga zwa u vha hone hawe. Nga murahu ha miṅwaha ya 50, muapostola Yohane o kona u ṅwala mafhungo a ngaho e a ṋea zwidodombedzwa zwinzhi zwa nga ha maḓuvha a u fhedza a vhutshilo ha Yesu musi a tshe kha ḽifhasi. Eneo mafhungo o hevhedzwaho o ṱuṱuwedza lungafhani u vhuya u swika na misini yashu!
13. Muyamukhethwa wo funza hani Vhakriste vha u thoma?
13 Zwi fhiraho u vha thusa u humbula maipfi a Yesu, muyamukhethwa wo funza vhafunziwa na u vha livhisa uri vha pfesese nga vhuḓalo ndivho ya Mudzimu. Musi Yesu a kha ḓi vha na vhafunziwa vhawe, o vha vhudza zwithu zwe nga tshenetsho tshifhinga vha vha vha sa zwi pfesesi zwavhuḓi. Naho zwo ralo, vha tshi sudzuluswa nga muyamukhethwa, Yohane, Petro, Yakobo, Yuda, na Paulo vho ṅwala nga ha dziṅwe ṱhaluso dza u ḓadzea ha ndivho ya Mudzimu. Nga zwenezwo, muyamukhethwa wo vha funza na u vha ṋea khwaṱhisedzo ya ndeme ya vhulivhisi ya Mudzimu.
14. Muyamukhethwa wo thusa vhathu vha Yehova nga nḓila-ḓe?
14 Zwifhiwa zwa vhuṱolo zwa muyamukhethwa zwo dovha zwa ita uri zwi vhe khagala uri Mudzimu o ṱutshela Vhaisiraele vha ṋama nahone a ṱanganedza tshivhidzo tsha Vhakriste. (Vha-Heberu 2:4) Zwiaṋwiwa zwa wonoyo muya zwo dovha zwa vha zwa ndeme vhutshiloni ha vhenevho vhathu u itela u ṱalula vhe vha vha vhe vhafunziwa vha Yesu vha vhukuma. (Yohane 13:35; Vha-Galata 5:22-24) Nahone muya wo dovha wa khwaṱhisa miraḓo ya tshenetsho tshivhidzo uri vha vhe ṱhanzi dzi re na tshivhindi na dzi sa ofhi.—Mishumo 4:31.
Thuso Musi Ri Nga Fhasi Ha Mutsiko Muhulwane
15. (a) Ndi mitsiko ifhio ye Vhakriste vha sedzana nayo tshifhingani tsho fhelaho na tsha zwino? (b) Ndi ngani vhane vha ṋea nyeletshedzo nga zwiṅwe zwifhinga na vhone vha tshi i ṱoḓa?
15 Vhathu vhoṱhe vhe vha ḓikumedza kha Yehova na vhane vha fhulufhedzea khae vha a tovholwa nga iṅwe nḓila. (2 Timotheo 3:12) Naho zwo ralo, Vhakriste vhanzhi vho ṱangana na mutsiko muhulwane vhukuma. Musalauno, vhaṅwe vho farwa luvhi nga zwigwada zwi vutshelaho na u valelwa gammbani dza tshengedzo, dzidzhele, na gammbani dza mishumo i konḓaho nga fhasi ha vhathu vha re na tshiṱuhu. Mivhuso ndi yone ye ya vha tovhola vhukuma, kana u tendela vhathu vha sa tevheli mulayo vha tshi ita vhutshinyi vha sa vha dzhieli vhukando. Zwiṅwe hafhu, Vhakriste vho ṱangana na vhuleme vhuhulwane ha mutakalo kana mutsiko muhulwane wa muṱani. Vhakriste vho vhibvaho na vhone vha nga ṱangana na mutsiko nga u thusa vhatendi ngavho vhanzhi u sedzana na zwiimo zwi konḓaho. Nga fhasi ha zwenezwo zwiimo, muthu ane a ṋea ṱhuṱhuwedzo a nga dovha a vha ene ane a i ṱoḓa.
16. Musi Davida e nga fhasi ha mutsiko muhulu, o wana hani thuso?
16 Musi Khosi Saulo a tshi khou pandamedza Davida u itela u mu vhulaha, Davida o ya kha Mudzimu samusi e ene Muthusi wawe a ri: “Mudzimu, ipfa thabelo yanga; . . . ndi khuda murunzini wa phapha dzau, muvhango u vhuye ú fhire.” (Psalme ya 54:2, 4; 57:1) Naa Davida o wana thuso? Ee, o i wana. Nga tshenetsho tshifhinga, Yehova o shumisa muporofita Gada na tshifhe Abiatara u itela u ṋea Davida vhulivhisi, nahone a shumisa Yonathani murwa wa Saulo u khwaṱhisa onoyu muṱhannga. (1 Samuele 22:1, 5; 23:9-13, 16-18) Yehova o dovha a tendela Vhafilista uri vha vutshele ḽeneḽo shango, nahone zwenezwo zwa ita uri Saulo a litshe u mu pandamedza.—1 Samuele 23:27, 28.
17. Musi e nga fhasi ha mutsiko muhulwane, Yesu o ya ngafhi u itela u wana thuso?
17 Yesu Kristo na ene o vha e nga fhasi ha mutsiko muhulu musi e tsini na u fa. O vha a tshi ḓivha vhukuma nḓila ine vhuḓifari hawe ha nga kwama ngayo dzina ḽa Khotsi awe wa ṱaḓulu na zwine zwa ḓo amba zwone nga ha vhumatshelo ha vhathu vhoṱhe. O rabela zwi tshi bva mbiluni, nahone a “pfa vhuṱungu vhukuma.” (NW) Mudzimu o ita vhungoho ha uri Yesu a wane thikedzo ine a i ṱoḓa tshifhingani tshi konḓaho.—Luka 22:41-44.
18. Ndi khuthadzo ifhio ye Mudzimu a i ṋea Vhakriste vha u thoma vhe vha tovholwa lu vhavhaho?
18 Vhakriste vho tovholwa lu vhavhaho vhukuma musi ho no thomiwa tshivhidzo tsha ḓana ḽa u thoma ḽa miṅwaha lwe vhoṱhe vha humbela uri vhaapostola vha pandelwe Yerusalema. Vhanna na vhasadzi vho kokodzelwa nnḓa ha mahaya avho. Mudzimu o vha khuthadza hani? Nga u vha khwaṱhisedza nga Ipfi ḽawe uri vha na “lupfumo lu fhirisaho, luné lwa ḓi dzula lú hone,” ifa ḽine ḽa dzula ḽi hone ṱaḓulu vhe na Kristo. (Vha-Heberu 10:34; Vha-Efesa 1:18-20) Musi vha tshi bvela phanḓa vha tshi huwelela, vho kona u vhona vhuṱanzi ha uri muya wa Mudzimu u khavho, nahone zwe vha ṱangana nazwo zwo vha ṋea tshiṅwe tshiitisi tsha uri vha takale.—Mateo 5:11, 12; Mishumo 8:1-40.
19. Naho Paulo o tovholwa vhukuma, o ḓi pfa hani nga ha khuthadzo ye Mudzimu a mu ṋea yone?
19 Nga u ya ha tshifhinga, Saulo (Paulo), we a vha e mutovholi wa tshiṱuhu, o vha muṅwe wa vhe vha tovholwa nga uri o vha Mukriste. Tshiṱangadzimeni tsha Kipiro, ho vha hu na mungome we a lingedza u thivhela vhuḓinḓa ha Paulo nga u shumisa vhufhura. Ngei Galata, Paulo vho mu kanḓa nga matombo nahone vha mu litsha vha tshi humbula uri o fa. (Mishumo 13:8-10; 14:19) Ngei Makedonia vho mu rwa nga dziṱhamu. (Mishumo 16:22, 23) Nga murahu ha u vutshelwa nga tshigwada ngei Efesa, o ṅwala a ri: “Ro lemelwa zwinzhisa luné lwa fhira maanḓa ashu, ra hanganea na uri ri ḓo vhuya ra tshila. Mafhungo o vha ó no ḓi fhela ngomu hashu zwauri tshashu ndi u fa.” (2 Vha-Korinta 1:8, 9) Fhedzi kha honoho vhurifhi vhu fanaho, Paulo o ṅwala maipfi a khuthadzaho o ṅwaliwaho kha phara ya vhuvhili ya ino thero.—2 Vha-Korinta 1:3, 4.
20. Ri ḓo haseledza mini theroni i tevhelaho?
20 Ni nga ṱanganela hani kha u ṋea yeneyo khuthadzo? Hu na vhathu vhanzhi misini yashu vhane vha i ṱoḓa musi vha tshi khou pfa vhuṱungu, khamusi vhu bveledzwaho nga khombo dzine dza kwama vhathu vhanzhi kana nga maṱungu ane a kwama vhone fhedzi. Theroni yashu i tevhelaho, ri ḓo haseledza nḓila ine ra nga ṋea ngayo khuthadzo kha masia oṱhe.
Ni Kha Ḓi Zwi Humbula?
• Ndi ngani khuthadzo i bvaho ha Mudzimu i ya ndeme vhukuma?
• Kristo o ṋea khuthadzo ifhio?
• Muyamukhethwa wo sumbedza hani u vha mukhuthadzi?
• Ṋeani tsumbo dza khuthadzo ye ya ṋewa nga Mudzimu musi vhashumeli vhawe vha nga fhasi ha mutsiko muhulwane.
[Zwifanyiso kha siaṱari 15]
Bivhili i sumbedza uri Yehova u khuthadza vhathu vhawe nga u vha tshidza
[Zwifanyiso kha siaṱari 16]
Yesu o khuthadza nga u funza, u fhodza na nga u vusa vhafu
[Tshifanyiso kha siaṱari 18]
Yesu o wana thuso i bvaho ṱaḓulu