Mbudziso Dzi Bvaho Ha Vhavhali

Ndi ngudo ifhio ine ya funzwa kha Mirero 24:27?

Musi a tshi ṋea muṱhannga nyeletshedzo, muṅwali wa Mirero o ri: “Vuledza mishumo yau ya nnḓa, U lime tsimu U fhedze, U kone u fhaṱa na nnḓu.” Ndi mbuno ifhio ine ya khou ambiwa kha murero wonoyu wo hevhedzwaho? Ndi ya uri muṱhannga u fanela u ḓilugisela zwavhuḓi musi a sa athu vhinga na u thoma muṱa wawe, a tshi ṱhogomela vhuḓifhinduleli vhune ha tshimbidzana na u ḓikumedza honoho.

Tshifhingani tsho fhiraho, ndimana yeneyi nga zwiṅwe zwifhinga yo vha i tshi ṱalutshedzelwa sa ine ya amba uri munna ane a dovha a vha khotsi, ho ngo fanela u ṱhogomela mushumo wawe wa u ḓitshidza fhedzi, fhedzi u fanela u dovha a shuma u itela u khwaṱhisa, kana u ṱuṱuwedza muṱa wawe, sa tsumbo, nga u gudisa zwithu zwa muya. Naho muhumbulo wonowo u tshi khou amba ngoho zwa vhukuma nahone u wa Maṅwalo, a zwi vhonali i mbuno khulwane ya ndimana yeneyi. Ndi ngani? Ṱhogomelani zwiitisi zwivhili.

Tsha u thoma, ndimana yeneyi a i khou amba nga ha u fhaṱa nga muhumbulo wa u ṱuṱuwedza, kana u khwaṱhisa muṱa une wa vha hone zwino. Nṱhani hazwo, muhumbulo ndi wa u fhaṱa nnḓu zwa vhukuma. Ipfi ḽo ṱalutshedzelwaho nga uri “u fhaṱa” ḽi nga kha ḓi dovha ḽa vha ḽa pfanyisedzo, nga muhumbulo wa u fhaṱa, kana u thoma muṱa—zwine zwa amba u vhinga nahone wa vha na vhana.

Tsha vhuvhili, ndimana yeneyi i ombedzela u ita zwithu nga nḓila yo teaho, zwa tou nga u amba uri, “Ni thoma nga u ita hezwi; nga murahu na ita he zwiḽa.” Nga zwenezwo, naa mirero i nga vha i tshi khou amba uri vhuḓifhinduleli vhu si ha zwithu zwa muya vhu ḓa u thoma kha ha zwithu zwa lwa muya? Na khathihi!

Zwifhingani zwa Bivhili, arali muṱhannga a tshi ṱoḓa ‘u fhaṱa nnḓu yawe,’ kana u thoma muṱa nga u vhinga, o vha a tshi fanela u ḓivhudzisa, ‘Naa ndo ḓilugisela u ṱhogomela na u tikedza musadzi wanga na vhana vhane ra nga kha ḓi vha navho nga murahu?’ Musi a sa athu thoma muṱa, o vha e na mushumo une a fanela u u ita, u ṱhogomela masimu awe kana zwiliṅwa. Nga zwenezwo, Today’s English Version i ṱalutshedzela zwavhuḓi ndimana yeneyi musi i tshi ri: “Ni songo fhaṱa nnḓu yaṋu na u thoma muṱa u swika musi masimu aṋu o no lugela u kaṋiwa, nahone ni na vhungoho ha uri ni nga kona u ḓitshidza.” Naa maitele a fanaho a a shuma na ṋamusi?

Ee. Muṱhannga ane a ṱoḓa u vhinga u fanela u ḓilugisela zwavhuḓi vhuḓifhinduleli honoho. Arali mutakalo wawe u tshi mu tendela, u fanela u shuma. Vhukuma, u shuma nga maanḓa ha munna u itela u ṱhogomela muṱa wawe a zwo ngo fanela u fhelela fhedzi kha zwithu zwi vhonalaho. Ipfi ḽa Mudzimu ḽi sumbedza uri munna ane a si ṱhogomele ṱhoḓea dza ṋama, maḓipfele, na dza muya dza muṱa wawe ndi muvhi u fhira a sa tendiho! (1 Tim. 5:8) Nga zwenezwo, musi a tshi khou lugisela mbingano na vhutshilo ha muṱa, muṱhannga u fanela u ḓivhudzisa mbudziso dzi fanaho na hedzi: ‘Naa ndo ḓilugisela zwavhuḓi u ṱhogomela muṱa wanga nga zwithu zwi vhonalaho? Naa ndo no lugela u ranga phanḓa muṱa kha mafhungo a vhurabeli ha muṱa? Naa ndi ḓo ḓadzisa vhuḓifhinduleli ha u fara pfunzo ya Bivhili tshifhinga tshoṱhe na musadzi wanga na vhana vhanga?’ Ipfi ḽa Mudzimu ḽi a ombedzela zwa vhukuma vhuḓifhinduleli honoho ha ndeme.—Doit. 6:6-8; Vha-Ef. 6:4.

Ngauralo, muṱhannga ane a ṱoḓa musadzi u fanela u humbula nga vhuronwane nga ha maitele a re kha Mirero 24:27. Nga hu fanaho, zwi ḓo vha zwavhuḓi arali khomba ya ḓivhudzisa arali yo no lugela vhuḓifhinduleli ha u vha musadzi na u vha mme. Vhavhingani vhaswa vha nga kha ḓi ḓivhudzisa mbudziso dzi fanaho musi vha tshi khou humbula nga ha khonadzeo ya u alusa vhana. (Luka 14:28) U tshila nga vhulivhisi honoho ho hevhedzwaho zwi nga thusa vhathu vha Mudzimu u iledza vhuṱungu vhuhulwane na uri vha ḓiphine nga vhutshilo ha muṱa vhu fushaho.

[Maipfi o ṱumbulwaho kha siaṱari 12]

Ndi mbudziso dzifhio malugana na mbingano dzine muṱhannga a fanela u ḓivhudzisa dzone?