Nḓila Ine Yehova A Fhindula Ngayo Thabelo Dzashu

1-2. Ndi mini zwine ra nga ḓivhudzisa zwone nga ha thabelo dzashu?

NAA no no vhuya na ḓivhudzisa arali Yehova a tshi fhindula thabelo dzaṋu? Arali zwo ralo, a ni noṱhe. Hu na vhahashu vhanzhi vhe vha vhuya vha ḓipfa nga nḓila i fanaho, zwihuluhulu musi vha tshi khou sedzana na vhuimo vhu konḓaho. Musi ri tshi khou sedzana na thaidzo, na riṋe ri nga wana zwi tshi ri konḓela u vhona nḓila ine Yehova a khou fhindula ngayo thabelo dzashu.

² Ri ḓo haseledza uri ndi ngani ri tshi nga vha na vhungoho ha uri Yehova u a fhindula thabelo dza vhashumeli vhawe. (1 Yoh. 5:15) Ri ḓo dovha ra haseledza mbudziso dzi tevhelaho: Ndi ngani nga tshiṅwe tshifhinga ri tshi nga vhona u nga Yehova ha khou fhindula thabelo dzashu? Yehova u fhindula hani thabelo dza vhashumeli vhawe ṋamusi?

YEHOVA A NGA FHINDULA THABELO DZASHU NGA NḒILA YE RI SI I LAVHELELE

3. Ndi ngani Yehova a tshi ṱoḓa uri ri rabele khae?

³ Maṅwalo a ri khwaṱhisedza uri Yehova u a ri funa nga maanḓa na uri ri vha ndeme khae. (Hag. 2:7; 1 Yoh. 4:10) U ri ramba uri ri ambe nae nga thabelo uri a ri thuse. (1 Pet. 5:6, 7) Yehova u ṱoḓa u ri thusa uri ri vhe na vhushaka ha tsini nae na uri ri kone u kunda milingo ine ra khou sedzana nayo.

4. Ri zwi ḓivha hani uri Yehova u a fhindula thabelo dza vhashumeli vhawe? (Sedzani tshifanyiso.)

⁴ Bivhilini ri vhala nga ha nḓila ye Yehova a fhindula ngayo thabelo dza vhashumeli vhawe. Naa hu na tsumbo ine na i humbula? Hu pfi mini nga tsumbo ya Khosi Davida? Khosi Davida o sedzana na maswina manzhi a re na khombo vhutshiloni hawe hoṱhe nahone kanzhi o vha a tshi humbela Yehova nga thabelo uri a mu thuse. Kha tshiṅwe tshiitea, Davida o lilela Yehova a ri: “Iwe Yehova, ipfa thabelo yanga; thetshelesa musi ndi tshi ṱoḓa thuso. Mphindule u ya nga u fhulufhedzea hau na nga u luga hau.” (Ps. 143:1) Yehova o fhindula thabelo ya Davida. (1 Sam. 19:10, 18-20; 2 Sam. 5:17-25) Nge Davida a vha a tshi fhulufhela Yehova, o amba uri: “Yehova u tsini na vhoṱhe vhane vha mu vhidzelela.” Na riṋe ri nga vha na vhungoho ha zwenezwo.​—Ps. 145:18.

5. Naa thabelo dza vhashumeli vha Yehova vha tshifhingani tsho fhiraho dzo fhindulwa nga nḓila ye vha vha vho lavhelela ngayo? Ṋeani tsumbo. (Sedzani tshifanyiso.)

⁵ Yehova a nga fhindula thabelo dzashu nga nḓila ye ri si i lavhelele. Zwenezwo ndi zwe zwa itea kha muapostola Paulo. O humbela Mudzimu uri a mu bvise “mupfa ṋamani.” Paulo o rabela luraru nga ho livhaho, a tshi humbela Yehova uri a bvise yeneyo thaidzo. Fhedzi, naa Yehova o fhindula dzenedzo thabelo? Ee, o dzi fhindula, fhedzi hu si nga nḓila ye Paulo a vha o lavhelela ngayo. Nṱhani ha u bvisa thaidzo, Yehova o ṋea Paulo maanḓa a uri a kone u bvela phanḓa a tshi mu shumela nga u fhulufhedzea.​—2 Vhakor. 12:7-10.

6. Ndi ngani nga tshiṅwe tshifhinga ri tshi nga vhona u nga Yehova ha khou fhindula thabelo dzashu?

⁶ Na riṋe thabelo dzashu dzi nga fhindulwa nga nḓila yo fhambanaho na ye ra vha ro i lavhelela. Fhedzi ri nga vha na vhungoho ha uri Yehova u ḓivha khwine nḓila ine a nga ri thusa ngayo. Yehova “u a kona u ita zwithu zwihulwane zwi fhiraho zwoṱhe zwine ra nga zwi humbela kana u zwi elekanya.” (Vhaef. 3:20) Nga nṱhani ha zwenezwo, a nga fhindula thabelo dzashu nga tshifhinga tshe ra vha ri songo tshi lavhelela na nga nḓila ye ra vha ri songo i lavhelela.

7. Ndi ngani nga tshiṅwe tshifhinga ri tshi tea u shandula zwine ra zwi rabelela? Ṋeani tsumbo.

⁷ Ri nga tea u shandula zwine ra zwi rabelela musi ri tshi vho ḓivha Yehova khwine. Kha ri ambe nga tsumbo ya Vho Martin Poetzinger. Musi vha tshi kha ḓi bva u vhinga, Wahashu Vho Poetzinger vho mbo ḓi valelwa dzhele gammbani ya tshengedzo ya Vhanazi. U thomani, vho humbela Yehova uri a vha bvise henefho gammbani ya tshengedzo uri vha kone u ṱhogomela mufumakadzi wavho na uri vha bvele phanḓa na mushumo wa u huwelela. Naho zwo ralo, nga murahu ha vhege mbili, ho vha hu si na tshithu tshine tsha sumbedza uri Yehova u khou ṱoḓa u vha thusa uri vha bve. Vho thoma u rabela vha ri: “Yehova, ndi khou humbela uri u ntsumbedze zwine wa ṱoḓa ndi tshi zwi ita.” Nga murahu vha thoma u humbula nga ha zwine vhaṅwe vhahavho vhane vha vha gammbani vha khou lwisana nazwo. Vhunzhi havho vho vha vha tshi khou vhilaedziswa nga ha vhafumakadzi vhavho na vhana. Nga murahu, Wahashu Vho Poetzinger vha rabela vha ri: “Yehova, ndo livhuwa mushumo muswa we wa nṋea wone. Nthuse uri ndi kone u khwaṱhisa na u khuthadza vhahashu.” Vho fhedza miṅwaha ya ṱahe i tevhelaho henefho gammbani vha tshi khou thusa vhahavho.

8. Ndi zwithu zwifhio zwa ndeme zwine ra tea u zwi humbula musi ri tshi rabela?

⁸ Ri tea u dzula ri tshi humbula uri Yehova u na zwithu zwine a khou ṱoḓa u zwi ita nahone u ḓo zwi ita nga tshifhinga tshe a tshi vhea. Zwenezwo zwi katela u fhelisa tshoṱhe thaidzo dzine dza ita uri vhathu vha tambule, dzi ngaho khombo dza mupo, malwadze na lufu. Yehova u ḓo ita zwe a fhulufhedzisa a tshi shumisa Muvhuso wawe. (Dan. 2:44; Nzumb. 21:3, 4) Naho zwo ralo, musi tshenetsho tshifhinga tshi sa athu u swika, Yehova u khou tendela Saṱhane a tshi vhusa shango.b (Yoh. 12:31; Nzumb. 12:9) Arali Yehova a tandulula thaidzo dzoṱhe dzine vhathu vha khou ṱangana nadzo zwino, zwi nga vhonala u nga Saṱhane u khou ita mushumo wavhuḓi wa u vhusa shango. Musi ri tshi kha ḓi vha ro lindela uri Yehova a ite zwe a fhulufhedzisa, a zwi ambi uri ha ri thusi. Kha ri ṱhogomele zwiṅwe zwa zwithu zwine Yehova a ri thusa ngazwo.

NḒILA DZINE MUDZIMU A FHINDULA NGADZO THABELO ṊAMUSI

9. Yehova a nga ri thusa hani musi ri tshi ṱoḓa u dzhia phetho? Fanyisani.

⁹ U ri ṋea vhuṱali. Yehova u fhulufhedzisa uri u ḓo ri ṋea vhuṱali uri ri kone u dzhia phetho dzavhuḓi. Ri ṱoḓa vhuṱali ha Mudzimu musi ri tshi tea u dzhia phetho dzine dza kwama vhutshilo hashu hoṱhe, dzi ngaho u vhinga kana u vhingwa. (Yak. 1:5) Ṱhogomelani tshenzhelo ya muṅwe wahashu ane a pfi Maria.c O vha a tshi khou shumela Yehova o takala sa muvulanḓila wa tshifhinga tsho tshoṱhe musi a tshi ṱangana na muṅwe wahashu wa tshinnani. O ri: “Musi vhukonani hashu vhu tshi khou ṋaṋa u khwaṱha, na nḓila ine ra takalelana ngayo yo mbo ḓi engedzea. Ndo vha ndi tshi tea u ita phetho. Ndo rabela lunzhi nga hazwo. Ndo vha ndi tshi ṱoḓa u livhiswa nga Yehova, fhedzi ndo vha ndi tshi zwi ḓivha uri Yehova o vha a sa ḓo nnyitela yeneyo phetho.” O kona u vhona uri Yehova u khou fhindula thabelo dzawe dza u ṱoḓa vhuṱali. Nga nḓila-ḓe? Musi a tshi ita ṱhoḓisiso kha khandiso dzashu, o kona u wana thero dze dza mu thusa u wana phindulo dza mbudziso dzawe. O dovha a thetshelesa nyeletshedzo ya vhuṱali ye a i ṋewa nga mme awe. Yeneyo nyeletshedzo yo thusa Maria uri a ḓiṱolisise. O fhedza o dzhia phetho ya vhuṱali.

10. U ya nga Vhafilipi 4:13, ndi mini zwine Yehova a ḓo ita u itela u thusa vhashumeli vhawe? Ṋeani tsumbo. (Sedzani tshifanyiso.)

¹⁰ U ri ṋea maanḓa a u konḓelela. Samusi Yehova o thusa muapostola Paulo, na riṋe u ḓo ri ṋea maanḓa a u konḓelela milingo ine ra sedzana nayo. (Vhalani Vhafilipi 4:13.) Ṱhogomelani nḓila ye Yehova a thusa ngayo muṅwe wahashu ane a pfi Benjamin we a vha a tshi khou sedzana na vhuimo vhu konḓaho. Tshifhinga tshinzhi tsha vhuswa hawe, ene na muṱa wahawe vho vha vha tshi dzula gammbani ya vhushavhelo fhano Afurika. Benjamin u ri: “Ndo rabela lunzhi kha Yehova ndi tshi khou mu humbela uri a nṋee maanḓa a u bvela phanḓa ndi tshi ita zwine zwa mu takadza. Yehova o fhindula thabelo dzanga nga u ita uri ndi dzike, a nṋea tshivhindi tsha u bvela phanḓa ndi tshi huwelela, na khandiso dze dza nthusa uri ndi vhe na lutendo lwo khwaṱhaho.” O dovha a ri: “U vhala nga ha tshenzhelo dza vhahashu na u guda nga ha nḓila ye Yehova a vha thusa ngayo u konḓelela, zwo nkhwaṱhisa zwa ita uri ndi ḓiimisele u bvela phanḓa ndi tshi fhulufhedzea.”

11-12. Yehova a nga shumisa hani vhahashu u itela u fhindula thabelo dzashu? (Sedzani tshifanyiso.)

¹¹ U shumisa vhahashu. Vhusiku ha musi Yesu a sa athu u ṋekedza vhutshilo hawe sa tshiṱhavhelo, o rabela zwi tshi bva mbiluni. O humbela Yehova uri a si tendele vhathu vha tshi mu pomoka uri o sema Yehova na u mu vhulaya nga nṱhani ha zwenezwo. Nṱhani ha u ita zwenezwo, Yehova o mu thusa nga u rumela muruṅwa uri a mu khwaṱhise. (Luka 22:42, 43) Na riṋe Yehova a nga ri thusa a tshi shumisa vhahashu vhane vha ri ṱuṱuwedza nga u ri founela kana nga u tou ri dalela. Roṱhe ri nga ṱoḓa nḓila dza u thusa vhahashu nga u amba navho “fhungo ḽavhuḓi.”​—Mir. 12:25.

¹² Ṱhogomelani tshenzhelo ya muṅwe wahashu vhane vha pfi Vho Miriam. Musi ho no fhela vhege dzi si gathi munna wavho o lovha, Vho Miriam vho vha vhe hayani vha tshi khou ḓipfa vhe vhoṱhe nahone vho tsikeledzea. Vho vha vha tshi khou lila lu pfisaho vhuṱungu, vha tshi ṱoḓa muthu ane vha nga amba nae. Vho ri: “Ndo pfa ndi si na na maanḓa a u founela muṅwe muthu. Nga zwenezwo, nda rabela kha Yehova. Musi ndi tshi khou lila na u rabela, founu yanga yo mbo ḓi lila. Ho vha hu muṅwe muhulwane ane a vha khonani ya muṱa.” Vho Miriam vho khuthadzwa nga onoyo muhulwane na mufumakadzi wawe nahone zwo vha ṋea vhuṱanzi ha uri Yehova ndi ene o itaho uri onoyo muhulwane a vha founele.

13. Ṋeani tsumbo ya nḓila ine Yehova a nga shumisa ngayo vhathu vhane vha si vhe vhagwadameli vhawe u itela u fhindula thabelo dzashu.

¹³ A nga shumisa vhathu vhane vha si vhe vhagwadameli vhawe. (Mir. 21:1) Nga tshiṅwe tshifhinga Yehova o shumisa vhathu vhane vha si vhe vhagwadameli vhawe u itela u thusa vhathu vhawe. Sa tsumbo, o ita uri Khosi Arithasasitha a tendele Nehemia a tshi humela Yerusalema u thusa u fhaṱulula wonoyo muḓi. (Neh. 2:3-6) Na ṋamusi, Yehova a nga shumisa vhathu vhane vha si vhe vhagwadameli vhawe u ri thusa musi ri tshi ṱoḓa thuso.

14. Tshenzhelo ya Vho Soo Hing yo ni khwaṱhisa hani? (Sedzani tshifanyiso.)

¹⁴ Muṅwe wahashu wa tshifumakadzini ane a pfi Soo Hing o vhona nḓila ye Yehova a mu thusa ngayo a tshi shumisa dokotela. Ṅwana wawe wa mutukana u na thaidzo dzo fhambanaho dza vhulwadze ha muhumbulo. Ṅwana wawe o ṱangana na khombo i shushaho nahone ene na mukalaha wawe vha tea u litsha mishumo yavho uri vha mu ṱhogomele. Nga nṱhani ha zwenezwo, vho vha na thaidzo nnzhi dza masheleni. Vho Soo Hing vho amba uri vho pfa vha si tsha kona u konḓelela wonoyo mutsiko. Nga zwenezwo, vho rabela vha humbela Yehova uri a vha thuse. Dokotela o wana nḓila ine a nga vha thusa ngayo na muṱa wavho. Nga nṱhani ha zwenezwo, vho kona u wana thuso i bvaho kha muvhuso u katela na vhudzulo he vha vha vha tshi nga kona u vhu badela. Nga murahu, Vho Soo Hing vho ri: “Ro vhona nḓila ye Yehova a ri thusa ngayo. Nga ngoho Yehova ndi ‘Mupfi wa thabelo.’”​—Ps. 65:2.

RI ṰOḒA LUTENDO URI RI KONE U WANA NA U ṰANGANEDZA PHINDULO I BVAHO KHA YEHOVA

15. Ndi mini zwe zwa thusa muṅwe wahashu wa tshifumakadzini u ṱhogomela nḓila ine Yehova a khou fhindula ngayo thabelo dzawe?

¹⁵ Kanzhi thabelo dzashu a dzi fhindulwi nga nḓila i no tou mangadza. Fhedzi phindulo dzine ra dzi wana dzi vha dzi zwine ra khou zwi ṱoḓa uri ri bvele phanḓa ri tshi fhulufhedzea kha Khotsi ashu wa ṱaḓulu. Nga zwenezwo, dzulani ni tshi ṱhogomela nḓila ine Yehova a ni fhindula ngayo. Muṅwe wahashu wa tshifumakadzini ane a pfi Yoko o vha a tshi pfa u nga Yehova ha fhinduli thabelo dzawe. Fhedzi o thoma u ṅwala fhasi zwoṱhe zwe a zwi humbela kha Yehova. Musi ho no fhela tshifhinga, o sedza zwe a zwi ṅwala kha bugu yawe ya notsi nahone a ṱhogomela uri Yehova o no fhindula vhunzhi ha thabelo dzawe, u katela na thabelo dze ene muṋe a vha o no dzi hangwa. Ri tea u ita ri tshi ḓiṋea tshifhinga tsha u humbula nga ha nḓila ine Yehova a khou fhindula ngayo thabelo dzashu.​—Ps. 66:19, 20.

16. Ri nga sumbedza hani uri ri na lutendo musi zwi tshi ḓa kha thabelo dzashu? (Vhahevheru 11:6)

¹⁶ Ri sumbedza u vha na lutendo nga u rabela na nga u ṱanganedza nḓila ine Yehova a fhindula ngayo thabelo dzashu. (Vhalani Vhahevheru 11:6.) Ṱhogomelani tsumbo ya Vho Mike na mufumakadzi wavho Vho Chrissy. Vho vha vhe na tshipikwa tsha u ya u shuma Bethele. Vho Mike vha ri: “Ro ita khumbelo lunzhi nahone ra rabela lunzhi nga ha tshenetshi tshipikwa. Fhedzi ri si vhidzwe.” Vho Mike na Vho Chrissy vho dzula vhe na fhulufhelo ḽa uri Yehova u ḓivha uri a nga vha shumisa hani nga nḓila ya khwine. Vho bvela phanḓa na u ita zwoṱhe zwine vha nga kona, vha tshi khou shuma sa vhavulanḓila vha tshifhinga tshoṱhe fhethu hu re na ṱhoḓea na u tikedza kha mushumo wa u fhaṱa zwifhaṱo zwa ndangulo ya Yehova. Ṋamusi vha khou ita mushumo wa u dalela zwivhidzo. Vho Mike vha ri: “Yehova ho ngo fhindula thabelo dzashu nga nḓila ye ra vha ro lavhelela, fhedzi o dzi fhindula nahone o zwi ita nga nḓila ya khwinesa u fhira na nḓila ye ra vha ro lavhelela ngayo.”

17-18. U ya nga Phisalema 86:6, 7, ndi mini zwine ra nga vha na vhungoho nazwo?

¹⁷ Vhalani Phisalema 86:6, 7. Muphisalema Davida o vha e na vhungoho ha uri Yehova o pfa na u fhindula thabelo dzawe. Na inwi ni nga vha na fhulufhelo ḽi fanaho. Tsumbo dze ra amba nga hadzo kha heyi thero, dzi ri khwaṱhisedza uri Yehova u a ri ṋea vhuṱali na maanḓa ane ra a ṱoḓa uri ri kone u konḓelela. U dovha a shumisa vhahashu kana vhathu vhane vha si vhe vhagwadameli vhawe u ri thusa nga dziṅwe nḓila.

¹⁸ Naho Yehova a sa fhinduli thabelo dzashu nga nḓila ye ra i lavhelela, ri na vhungoho ha uri u ḓo dzi fhindula. U ḓo ri ṋea zwine ra zwi ṱoḓa nga tshifhinga tsho teaho. Bvelani phanḓa ni tshi rabela ni na lutendo na vhungoho ha uri Yehova u ḓo ni ṱhogomela zwa zwino na uri tshifhingani tshi ḓaho u ḓo “fusha lutamo lwa tshiṅwe na tshiṅwe tshi tshilaho.”​—Ps. 145:16.