Ndi Ngani Dzina Ḽa Yehova Ḽi Ḽa Ndeme Kha Yesu?

1-2. (a) Ndi mini zwe Yesu a zwi ita vhusikuni ha musi a sa athu vhulawa? (b) Ri ḓo fhindula mbudziso dzifhio kha ino thero?

NGA 14 Nisani 33 C.E., nga Ḽavhuṋa nga madekwana, Yesu o ita Tshilalelo Tsha Murena na vhaapostola vhawe vha fhulufhedzeaho. O vha a tshi zwi ḓivha uri hu si kale Yudasi u ḓo mu fheṱa, a tambudziwa na u vhulawa nga maswina awe. Musi vha tshi fhedza u ḽa, o vhudza vhaapostola vhawe zwithu zwinzhi zwi ṱuṱuwedzaho. Musi ho no swika tshifhinga tsha uri vha ṱuwe, Yesu o ita thabelo ya ndeme. Muapostola Yohane o ṅwala yeneyo thabelo kha Yohane ndima 17.

² Kha ino thero, ri ḓo vhona zwiṅwe zwa zwithu zwine ra nga zwi guda kha thabelo ya Yesu. Ndi mini zwe zwa vha zwi tshi khou mu vhilaedzisa musi a sa athu fa? Thabelo ye a i ita i sumbedza hani uri ndi mini zwe zwa vha zwi zwa ndeme khae musi e kha ḽifhasi? Kha ri haseledze phindulo dza dzenedzo mbudziso.

“NDO VHA ḒIVHADZA DZINA ḼAU”

3. Yesu o ri mini nga ha dzina ḽa Yehova nahone o vha a tshi khou amba uri mini? (Yohane 17:6, 26)

³ Kha thabelo yawe, Yesu o ri: “Ndo vha ḓivhadza dzina ḽau.” Ri a ḓivha uri zwenezwo zwo vha zwi zwa ndeme kha Yesu ngauri o zwi amba luvhili. (Vhalani Yohane 17:6, 26.) O vha a tshi khou amba uri mini? Naa o vha a tshi tea u ṱalutshedza vhafunziwa vhawe uri dzina ḽa Mudzimu ndi Yehova? Vhafunziwa vhawe vho vha vhe Vhayuda, nga zwenezwo, vho vha vha tshi ḓivha dzina ḽa Mudzimu Yehova. Ḽeneḽo dzina ḽo vha ḽi tshi bvelela lu ṱoḓaho u vha 7 000 kha Maṅwalo a Tshihevheru. Nga zwenezwo, musi Yesu a tshi amba eneo maipfi, o vha a sa khou amba nga ha u vha gudisa uri dzina ḽa Mudzimu ndi Yehova. Nṱhani hazwo, o vha a tshi khou amba uri o vha gudisa nga ha nḓila ine Yehova a vha ngayo. Yesu o thusa vhafunziwa vhawe u ḓivha Yehova khwine. O vha gudisa nga ha tshipikwa tsha Yehova nga ha ḽifhasi na vhathu, zwe Yehova a zwi ita, zwine a kha ḓi ḓo zwi ita na nḓila ine a vha ngayo. Ndi Yesu fhedzi ane a ḓivha Yehova nga vhuḓalo.

4-5. (a) Dzina ḽa muṅwe muthu ḽi nga vha hani ḽa ndeme nga ho engedzeaho kha riṋe? Ṋeani tsumbo. (b) Dzina ḽa Yehova ḽo vha ḽa ndeme nga ho engedzeaho kha vhafunziwa vha Yesu nga nḓila-ḓe?

⁴ Sa tsumbo, kha ri ri tshivhidzoni tshaṋu hu na muṅwe muhulwane wa tshivhidzo ane a pfi David ane a vha dokotela. Ndi kale ni tshi mu ḓivha. Fhedzi ḽiṅwe ḓuvha musi ni kha vhuimo ha shishi, na gidimiselwa sibadela tshine David a shuma khatsho nahone a tshidza vhutshilo haṋu. Zwenezwi zwi nga ita uri ni mu fune nga ho engedzeaho nahone musi ni tshi pfa dzina ḽawe, ni humbula nga ha zwe a ni itela zwone. Onoyo wahashu u vha a tshi kha ḓi vha David, muhulwane we na mu ḓivha u bva kale, fhedzi zwa zwino u dovha a vha dokotela we a tshidza vhutshilo haṋu.

⁵ Nga hu fanaho, vhafunziwa vha Yesu vho vha vha tshi ḓivha dzina ḽa Yehova. Fhedzi ḽeneḽo dzina ḽo vha ḽa ndeme nga ho engedzeaho ngauri Yesu o vha thusa u ḓivha Yehova khwine. Ndi ngani ri tshi ralo? Ndi ngauri Yesu o edzisa zwoṱhe zwe Khotsi awe a zwi amba na u zwi ita. Nga zwenezwo, musi vhafunziwa vha tshi thetshelesa nḓila ye Yesu a vha a tshi funza ngayo na u vhona nḓila ye a fara ngayo vhaṅwe, vho kona u ḓivha Yehova khwine.—Yoh. 14:9; 17:3.

“DZINA ḼAU ḼE WA NṊEA ḼONE”

6. Yesu o vha a tshi khou amba mini musi a tshi ri Yehova o mu ṋea dzina ḽawe? (Yohane 17:11, 12)

⁶ Kha thabelo yawe, Yesu o rabelela vhafunziwa vhawe a ri: “Vha tsireledze u tshi itela dzina ḽau ḽe wa nṋea ḽone.” (Vhalani Yohane 17:11, 12.) Naa zwenezwi zwi amba uri Yesu o vha a tshi ḓo vhidzwa nga dzina ḽa Yehova? Hai. Ṱhogomelani uri musi Yesu a tshi rabela o ri: “Vha tsireledze u tshi itela dzina ḽau.” Nga zwenezwo, Yesu ho ngo dzhia dzina ḽa Yehova ḽa vha ḽawe. Zwino o vha a tshi khou amba mini musi a tshi ri Mudzimu o mu ṋea dzina ḽawe? Tsha u thoma, Yesu o vha a tshi imela Yehova nahone Yehova o vha o mu ruma uri a ḓe kha ḽifhasi uri a vhe muambeli wawe. Musi Yesu a tshi ḓa kha ḽifhasi, o ḓa dzinani ḽa Khotsi awe nahone musi a tshi ita vhuṱolo, o vha a tshi vhu ita dzinani ḽa Khotsi awe. (Yoh. 5:43; 10:25) Tsha vhuvhili, dzina Yesu ḽi amba uri “Yehova Ndi Mutshidzi.” Dzina ḽa Yehova ḽo katelwa kha zwine dzina ḽa Yesu ḽa amba zwone.

7. Ndi ngani Yesu o ambela Yehova? Ṋeani tsumbo.

⁷ U itela u pfesesa uri ndi ngani Yesu o ambela Yehova, humbulani nga ha tsumbo i tevhelaho. Muvhusi a nga ruma muṅwe muthu uri a ambe na vhathu vhudzuloni hawe. Musi onoyo muthu a tshi amba na vhathu, zwi vha zwi tshi tou nga zwenezwo zwithu zwi khou bva kha muvhusi. Nga nḓila i fanaho, Yesu o vha o ṋewa maanḓa a u ambela Yehova ngauri o vha o rumiwa ngae.​—Mat. 21:9; Luka 13:35.

8. Dzina ḽa Yehova ḽo vha hani kha Yesu musi a sa athu ḓa kha ḽifhasi? (Ekisoda 23:20, 21)

⁸ Bivhili i ri Yesu ndi “Ipfi” ngauri Yehova o mu ruma uri a ye u vhudza vharuṅwa na vhathu zwe a vha a tshi ṱoḓa vha tshi zwi ḓivha na u zwi ita. (Yoh. 1:1-3) Yesu a nga vha e muruṅwa we Yehova a mu ruma u itela u ṱhogomela Vhaisiraele musi vhe Sogani. Musi Yehova a tshi vhudza Vhaisiraele uri vha thetshelese onoyo muruṅwa, o vha vhudza uri ndi ngani vha tshi tea uri vha zwi ite. O ri: “Ngauri dzina ḽanga ḽi khae.”a (Vhalani Ekisoda 23:20, 21.) Dzina ḽa Yehova ḽo vha ‘kha’ Yesu ngauri o vha e muimeleli wa Yehova nahone ndi ene muthu ane a zwi sumbedza uri Yehova u dzula a tshi ita zwo lugaho na uri ndi mukhethwa.

“KHOTSI, HULISA DZINA ḼAU”

9. Ṱalutshedzani uri dzina ḽa Yehova ḽo vha ḽi ḽa ndeme lungafhani kha Yesu.

⁹ Samusi ro no ḓi zwi haseledza, dzina ḽa Yehova ḽo vha ḽi ḽa ndeme kha Yesu na musi a sa athu ḓa kha ḽifhasi. Musi Yesu e kha ḽifhasi o zwi sumbedza nga zwoṱhe zwe a zwi ita uri dzina ḽa Yehova ndi ḽa ndeme khae. Musi e tsini na u fhedza vhuḓinḓa hawe, Yesu o vhudza Yehova a ri: “Khotsi, hulisa dzina ḽau.” Khotsi awe o mu fhindula nga u ṱavhanya nga ipfi ḽihulu ḽi bvaho ṱaḓulu a ri: “Ndo ḽi hulisa, ndi ḓo dovha nda ḽi hulisa.”​—Yoh. 12:28.

10-11. (a) Yesu o hulisa hani dzina ḽa Yehova? (Sedzani tshifanyiso.) (b) Ndi ngani dzina ḽa Yehova ḽi tshi tea u itwa ḽikhethwa na u huliswa?

¹⁰ Yesu na ene o hulisa dzina ḽa Khotsi awe. O zwi itisa hani? Iṅwe nḓila ye a zwi ita ngayo ndi nga u vhudza vhaṅwe nḓila i mangadzaho ine Yehova a vha ngayo na nga ha zwithu zwavhuḓi zwe a zwi ita. Fhedzi o dovha a ita na zwiṅwe. Yesu o vha a tshi tea u sumbedza uri Yehova o ita zwithu zwoṱhe nga nḓila yo teaho na uri dzina ḽawe ndi ḽikhethwa. Yesu o sumbedza nḓila ine zwenezwi zwa vha zwa ndeme ngayo musi a tshi gudisa vhatevheli vhawe u rabela. O ri: “Khotsi ashu wa ṱaḓulu, dzina ḽau nga ḽi vhe ḽikhethwa.”​—Mat. 6:9.

¹¹ Ndi ngani dzina ḽa Yehova ḽi tshi tea u itwa ḽikhethwa na u huliswa? Ndi ngauri ngei tsimuni ya Edeni Saṱhane o amba mazwifhi nga ha Yehova Mudzimu. O amba uri Yehova ndi muzwifhi na uri u khou dzima Adamu na Eva zwithu zwavhuḓi. (Gen. 3:1-5) Musi Saṱhane a tshi ita zwenezwo, o vha a tshi khou lingedza u amba uri Yehova ha iti zwithu nga nḓila yo teaho. Ngauri Saṱhane o zwifha nga ha Yehova, vhathu vha nga humbula uri Yehova ndi muthu muvhi. Na tshifhingani tsha Yobo, Saṱhane o amba uri vhathu vhane vha shumela Yehova vha zwi ita nga nṱhani ha uri vha khou ṱoḓa zwiṅwe zwithu khae. O dovha a amba uri vhathu vha ḓo litsha u shumela Yehova musi zwi tshi konḓa ngauri a vha mu funi zwa vhukuma. (Yobo 1:9-11; 2:4) Ho vha hu tshi tea u thoma ha fhela tshifhinga uri zwi vhonale uri kha Yehova na Saṱhane ndi nnyi ane a zwifha.

“NDI KUMEDZELA VHUTSHILO HANGA”

12. Yesu o vha o ḓiimisela u ita mini nga nṱhani ha uri u funa dzina ḽa Yehova?

¹² Ngauri Yesu u a funa Yehova, o vha a tshi ṱoḓa u ita zwoṱhe zwine a nga kona uri a ite uri dzina ḽa Yehova ḽi vhe ḽikhethwa na u ḽi hulisa. O ri: “Ndi kumedzela vhutshilo hanga.” O vha o ḓiimisela na u fa u itela u sumbedza uri Yehova ndi mukhethwa na uri u dzula a tshi ita zwo lugaho.b (Yoh. 10:17, 18) Adamu na Eva a vho ngo thetshelesa Yehova, vho ima na Saṱhane. Fhedzi Yesu o vha o ḓiimisela u ḓa kha ḽifhasi u itela u sumbedza uri u a funa Yehova. O zwi sumbedza nga u thetshelesa Yehova kha zwoṱhe. (Vhahev. 4:15; 5:7-10) Yesu o dzula a tshi fhulufhedzea u vhuya u swika a tshi vhulawa nga nḓila i vhavhaho kha danda. (Vhahev. 12:2) Nge a ita zwenezwo, o sumbedza uri u a funa Yehova na dzina ḽawe.

13. Ndi ngani Yesu o vhe e ene muthu wa khwine we a vha a tshi nga sumbedza uri Saṱhane ndi muzwifhi? (Sedzani tshifanyiso.)

¹³ Zwoṱhe zwe Yesu a zwi ita zwo sumbedza uri Saṱhane ndi ene muzwifhi, hu si Yehova. (Yoh. 8:44) A hu na muthu ane a ḓivha Yehova khwine u fhira Yesu. Arali zwiṅwe zwithu zwe Saṱhane a zwi amba nga ha Yehova zwo vha zwi ngoho, Yesu o vha a tshi ḓo vha a tshi zwi ḓivha. Fhedzi Yesu o vha o ḓiimisela u imelela dzina ḽa Yehova. Naho zwo vha zwi tshi vhonala u nga Yehova o mu laṱa, Yesu o vha o ḓiimisela u fa na u dzula a tshi fhulufhedzea kha Khotsi awe a re na lufuno nṱhani ha u sa mu thetshelesa.​—Mat. 27:46.c

‘NDO FHEDZA MUSHUMO WE WA NṊEA WONE URI NDI U ITE’

14. Yehova o lambedza hani u fhulufhedzea ha Yesu?

¹⁴ Kha thabelo ye Yesu a i ita vhusikuni ha musi a sa athu vhulawa o ri: ‘Ndo fhedza mushumo we wa nṋea wone uri ndi u ite.’ Yesu o vha a tshi fhulufhela uri Yehova u ḓo mu lambedza arali a dzula a tshi fhulufhedzea. (Yoh. 17:4, 5) Yesu o vhuyelwa nge a ita zwenezwo ngauri Yehova ho ngo mu litsha vhiḓani. (Mish. 2:23, 24) O mu vusa a mu ṋea vhuimo ha nṱha ṱaḓulu. (Vhafil. 2:8, 9) Nga u ya ha tshifhinga, Yesu o thoma u vhusa sa Khosi ya Muvhuso wa Mudzimu. Ndi mini zwe wonoyo muvhuso wa vha u tshi ḓo zwi ita? Ri wana phindulo kha zwe Yesu a zwi amba musi a tshi gudisa vhafunziwa vhawe u rabela, o ri: “Muvhuso wau u ḓe. Zwine [Yehova a] zwi funa nga zwi itwe fhano kha ḽifhasi vhunga zwi tshi itwa ngei ṱaḓulu.”​—Mat. 6:10.

15. Ndi zwifhio zwiṅwe zwine Yesu a ḓo zwi ita?

¹⁵ Hu si kale Yesu u ḓo lwa na maswina a Mudzimu a fhelisa vhavhi nga Haramagedo. (Nzumb. 16:14, 16; 19:11-16) Nga murahu ha zwenezwo, u ḓo posa Saṱhane “mugodini” hune a sa ḓo kona u ita tshithu na tshithihi. (Nzumb. 20:1-3) Nga murahu Yesu u ḓo vhusa lwa Miṅwaha ya Tshigidi, a ita uri ḽifhasini hu dovhe hu vhe na mulalo na u thusa vhathu uri vha si tsha dovha vha vha na tshivhi. U ḓo vusa vho faho. U ḓo ita uri ḽifhasi ḽoṱhe ḽi vhe pharadiso. Zwithu zwi ḓo vha nga nḓila ye Yehova a vha a tshi ṱoḓa zwi tshi vha ngayo.​—Nzumb. 21:1-4.

16. Vhutshilo vhu ḓo vha vhu hani nga murahu ha Miṅwaha ya Tshigidi?

¹⁶ Vhutshilo vhu ḓo vha vhu hani nga murahu ha Miṅwaha ya Tshigidi? Vhathu vhoṱhe vha ḓo vha vhe si tsheena tshivhi. Ri ḓo vha ri si tsha ṱoḓa tshirengululi. Zwi ḓo vha zwi si tsha ṱoḓea uri vha 144 000 vha vhe vhotshifhe na uri Yesu a vhe Tshifhe Muhulu u itela u ri thusa uri ri vhe na vhushaka havhuḓi na Yehova. Nahone ‘lufu lwo vhangwaho nga Adamu lune lwa vha swina ḽa u fhedza’ lu ḓo vha lwo fheliswa. Mavhiḓani hu ḓo vha hu si tsheena tshithu. Vho faho vha ḓo vha vho vuswa.​—1 Vhakor. 15:25, 26.

17-18. (a) Hu ḓo itea mini nga murahu ha Miṅwaha ya Tshigidi? (b) Yesu u ḓo ita mini musi tshifhinga tshawe tsha u vhusa tshi tshi fhela? (1 Vhakorinta 15:24, 28) (Sedzani tshifanyiso.)

¹⁷ Ndi zwifhio zwiṅwe zwine zwa ḓo itea nga murahu ha Miṅwaha ya Tshigidi? Hu ḓo itea zwiṅwe zwithu zwo khetheaho. A hu tsha ḓo dovha ha vha na muthu ane a timatima uri Yehova ndi mukhethwa na uri u haṱula nga nḓila yo teaho. Ndi ngani ri tshi ralo? Ngei tsimuni ya Edeni, Saṱhane o amba uri Yehova u a zwifha na uri ha vhusi nga nḓila ya lufuno. U bva nga tshenetsho tshifhinga, vhathu vhane vha shumela Yehova vho zwi sumbedza lunzhi-lunzhi uri nḓila ine a ita ngayo zwithu ndi yone ya khwinesa. Nga murahu ha Miṅwaha ya Tshigidi, Yehova u ḓo vha o phumula matope e a ḓodziwa dzina ḽawe. U ḓo vha o zwi sumbedza uri nangoho u Khotsi ashu wa ṱaḓulu a re na lufuno.

¹⁸ Nga murahu ha Miṅwaha ya Tshigidi, muṅwe na muṅwe u ḓo vha a tshi khou zwi ḓivha uri zwe Saṱhane a zwi amba nga ha Yehova zwo vha zwi mazwifhi. Yesu u ḓo ita mini musi tshifhinga tshawe tsha u vhusa tshi tshi fhela? Naa u ḓo shandukela Yehova sa zwe Saṱhane a zwi ita? Hai. (Vhalani 1 Vhakorinta 15:24, 28.) Yesu u ḓo humisela Muvhuso kha Khotsi awe. U ḓo ḓivhea fhasi ha vhuvhusi ha Yehova. U fhambana na Saṱhane, Yesu o ḓiimisela u humisela maanḓa oṱhe kha Yehova ngauri u a funa Yehova.

19. Ro guda mini nga ha Yesu kha ino thero?

¹⁹ Ndi ngazwo Yehova o vha o ḓiimisela u ṋea Yesu dzina ḽawe. Yesu o sumbedza uri ndi ene muambeleli wa Yehova wa khwinesa. Dzina ḽa Yehova ndi ḽa ndeme lungafhani kha Yesu? Ndi ḽa ndeme u fhira tshithu tshiṅwe na tshiṅwe. O vha o ḓiimisela u fela dzina ḽa Yehova nahone o ḓiimisela u humisela zwithu zwoṱhe kha Yehova musi o no fhedza u vhusa lwa Miṅwaha ya Tshigidi. Ri nga edzisa hani tsumbo ya Yesu? Ri ḓo fhindula yeneyo mbudziso kha thero i tevhelaho.