“Nangani Inwi Vhaṋe Ṋamusi Ane Na Ḓo Mu Shumela”

1. Ri tea u ita mini uri ri takale zwa vhukuma nahone ndi ngani? (Yesaya 48:17, 18)

KHOTSI ashu wa ṱaḓulu Yehova u a ri funa nahone u ṱoḓa ri tshi ḓiphiṋa nga vhutshilo zwino na nga hu sa fheli. (Muh. 3:12, 13) O ri sika ri na vhukoni ha u ita zwiṅwe zwithu zwi mangadzaho. Fhedzi ho ngo ri ṋea vhukoni ha uri ri ḓivhuse riṋe vhaṋe kana ha u khetha uri zwo lugaho na zwi songo lugaho ndi zwifhio. (Muh. 8:9; Yer. 10:23) U a zwi ḓivha uri u itela uri ri takale zwa vhukuma, ri tea u mu shumela na u tevhedza milayo yawe.​—Vhalani Yesaya 48:17, 18.

2. Saṱhane u ṱoḓa ri tshi tenda mini, fhedzi Yehova o ita mini?

² Saṱhane u ṱoḓa ri tshi tenda uri ri nga takala musi ri tshi khou ḓivhusa riṋe vhaṋe ri sa khou vhuswa nga Yehova. (Gen. 3:4, 5) Yehova o sumbedza uri zwine Saṱhane a khou zwi amba ndi mazwifhi madala-dala, nga u tendela vhathu vha tshi ḓivhusa vhone vhaṋe lwa tshifhinganyana. Nahone ri a kona u zwi vhona uri vhathu vha a balelwa u ḓivhusa vhone vhaṋe. Fhedzi Bivhili i amba nga ha vhathu vhe vha takala zwa vhukuma nga nṱhani ha uri vho vha vha tshi khou shumela Yehova. Muṅwe wa vhenevho vhathu ndi Yesu Kristo. Kha ino thero ri ḓo amba nga ha zwiitisi zwa uri ndi ngani Yesu o khetha u shumela Yehova. Nga murahu ra amba nga ha uri ndi ngani ri tshi tea u gwadamela Yehova. Ra fhedzisela nga u vusulusa zwiitisi zwa uri ndi ngani ro khetha u shumela Yehova.

NDI NGANI YESU O KHETHA U SHUMELA YEHOVA?

3. Saṱhane o fhulufhedzisa u ṋea Yesu mini nahone Yesu a ita mini?

³ Musi Yesu e kha ḽifhasi, o dzula a tshi sumbedza uri o khetha u shumela Yehova. Nga murahunyana musi Yesu o no lovhedzwa, Saṱhane o vhudza Yesu uri u ḓo mu ṋea mivhuso yoṱhe i re kha ḽifhasi arali a nga tou mu gwadamela luthihi fhedzi. Yesu o fhindula Saṱhane a ri: “Ṱuwa Saṱhane! Ngauri ho ṅwaliwa u pfi: ‘U tea u rabela Yehova Mudzimu wau, u shumele ene fhedzi.’” (Mat. 4:8-10) Ndi ngani Yesu o ita yeneyo phetho? Kha ri ṱolisise zwiṅwe zwa zwiitisi.

4-5. Ndi zwifhio zwiṅwe zwiitisi zwe zwa ita uri Yesu a khethe u shumela Yehova?

⁴ Tshiitisi tshihulwane tsha uri Yesu a shumele Yehova, ndi nga uri u funa Khotsi awe Yehova nga maanḓa. (Yoh. 14:31) Zwiṅwe hafhu, Yesu o shumela Yehova nga nṱhani ha uri ndi zwithu zwo teaho zwe a vha a tshi tea u zwi ita. (Yoh. 8:28, 29; Nzumb. 4:11) U a zwi ḓivha uri Yehova ndi Musiki wa zwithu zwoṱhe, u a fhulufhedzea na uri o ri ṋea zwithu zwoṱhe zwavhuḓi. (Ps. 33:4; 36:9; Yak. 1:17) Yehova o dzula a tshi vhudza Yesu ngoho nahone o mu ṋea zwithu zwoṱhe. (Yoh. 1:14) Fhedzi Saṱhane o fhambana vhukuma na Yehova. Saṱhane o ita uri vhathu vha vhe na tshivhi na uri vha fe. U a zwifha nahone u na tseḓa. (Yoh. 8:44) Yesu o vha a tshi ḓivha Yehova zwavhuḓi nahone o vha a tshi ḓivha na Saṱhane zwavhuḓi. O vha a sa ṱoḓi u fana na Saṱhane we a shandukela Yehova.​—Vhafil. 2:5-8.

⁵ Tshiṅwe tshiitisi tsha uri Yesu a khethe u shumela Yehova ndi ngauri o vha a tshi zwi ḓivha uri musi a tshi shumela Yehova nga u fhulufhedzea, hu ḓo vha na zwithu zwavhuḓi zwine zwa ḓo itea. (Vhahev. 12:2) O vha a tshi zwi ḓivha uri arali a dzula a tshi fhulufhedzea, u ḓo ita uri dzina ḽa Mudzimu ḽi huliswe na uri zwi konadzee uri vhathu vha si tsha vha na tshivhi na uri vha si tsha fa.

NDI NGANI RI TSHI TEA U GWADAMELA YEHOVA?

6-7. Ndi ngani vhathu vhanzhi vha sa gwadameli Yehova ṋamusi nahone ndi ngani ro tea u gwadamela ene fhedzi?

⁶ Vhunzhi ha vhathu ṋamusi a vha shumeli Yehova ngauri a vha ḓivhi nḓila yavhuḓi ine a vha ngayo nahone a vha ḓivhi na zwithu zwavhuḓi zwine Yehova a khou vha itela zwone. Zwo vha zwo tou ralo na kha vhathu vhe Paulo a huwelela khavho ngei Athene.​—Mish. 17:19, 20, 30, 34.

⁷ Paulo o vhudza vhathu vha Athene uri Mudzimu wa ngoho o “ṋea vhathu vhoṱhe vhutshilo, muya wa u fema na zwithu zwoṱhe.” O dovha a ri: “Ri tshila, u tshimbila na u vha hone ngae.” Mudzimu ndi ene Musiki o itaho uri “kha muthu muthihi hu bve tshaka dzoṱhe,” nga zwenezwo ndi ene e eṱhe o tewaho nga u gwadamelwa.​—Mish. 17:25, 26, 28.

8. Ndi zwithu zwifhio zwine Yehova a sa ḓo vhuya a vuwa o zwi ita nahone o sumbedza hani uri u a ri funa?

⁸ Samusi Yehova e Musiki nahone e Ramaanḓaoṱhe, o vha a tshi nga kha ḓi kombetshedza vhathu uri vha mu shumele. Fhedzi ha iti nga u ralo. Nṱhani hazwo, u ṱoḓa uri muṅwe na muṅwe washu a ḓiitele phetho ya uri u ṱoḓa u mu shumela kana hai, ndi ngazwo o ri ṋea zwithu zwine zwa sumbedza uri u hone na zwine zwa sumbedza uri u a ri funa nga maanḓa nga muthihi nga muthihi washu. U ṱoḓa vhathu vhanzhi nga hune zwa nga konadzea ngaho vha tshi vha khonani dzawe lwa tshoṱhe. (1 Tim. 2:3, 4) Ndi ngazwo a tshi ri gudisa uri ri nga funza hani vhaṅwe nga ha tshipikwa tshawe na u vha vhudza nga ha zwithu zwavhuḓi zwine a ḓo zwi itela vhathu. (Mat. 10:11-13; 28:19, 20) O ita nzudzanyo ya uri hu vhe na zwivhidzo u itela uri ri kone u mu gwadamela na uri ri vhe na vhahulwane vhane vha ri thusa nga nḓila ya lufuno.​—Mish. 20:28.

9. Yehova u sumbedza hani uri u funa vhathu vhoṱhe?

⁹ Yehova u funa vhathu vhoṱhe. U itela zwithu zwavhuḓi na vhathu vhane vha si tende khae. Humbulani nga ha hezwi: Lwa miṅwaha minzhi vhathu vhanzhi vho ḓiitela phetho ya uri zwo lugaho na zwi songo lugaho ndi zwifhio, nṱhani ha u khetha u thetshelesa Yehova. Naho vha tshi ita nga u ralo, Yehova u vha ṋea zwithu zwine vha zwi ṱoḓa uri vha kone u tshila. (Mat. 5:44, 45; Mish. 14:16, 17) Nga nṱhani ha uri Yehova u a vha funa, vha a kona u vha na miṱa, khonani dzine dza vha funa, u vha na vhana, u shuma na u ḓiphiṋa nga vhutshilo. (Ps. 127:3; Muh. 2:24) Zwenezwi zwoṱhe zwi sumbedza uri Yehova u funa vhathu vhoṱhe. (Ek. 34:6) Zwa zwino kha ri ḓihumbudze zwiṅwe zwa zwiitisi zwi itaho uri ri khethe u shumela Yehova, na uri u fhaṱutshedza hani vhane vha khetha u mu shumela.

NDI NGANI RI TSHI KHETHA U SHUMELA YEHOVA?

10. (a) Ndi tshifhio tshiitisi tshihulwane tshine tsha ita uri ri khethe u shumela Yehova? (Mateo 22:37) (b) U ḓivha uri Yehova u a ni pfesesa na uri u a ni hangwela, zwi ita uri ni ḓipfe hani? (Phisalema 103:13, 14)

¹⁰ U fana na Yesu, tshiitisi tshashu tsha u shumela Yehova ndi tsha uri ri a mu funa nga maanḓa. (Vhalani Mateo 22:37.) U guda nḓila ine Yehova a vha ngayo zwi ita uri ri mu fune. Sa tsumbo, humbulani nga ha nḓila ine Yehova a si ri fhelele ngayo mbilu. Musi Vhaisiraele vha sa thetshelesi Yehova, o amba navho a ri: “Ndi khou humbela uri ni litshe nḓila dzaṋu mmbi.” (Yer. 18:11) Yehova u a ḓivha uri ri na tshivhi, u a humbula uri ri buse. (Vhalani Phisalema 103:13, 14.) Musi ni tshi elekanya nga ha zwifhinga zwoṱhe zwe Mudzimu a ni hangwela, naa a zwi iti uri ni ṱoḓe u mu shumela lwa tshoṱhe?

11. Ndi zwifhio zwiṅwe zwiitisi zwine zwa ita uri ri khethe u shumela Yehova?

¹¹ Tshiṅwe tshiitisi tshine tsha ita uri ri khethe u shumela Yehova ndi ngauri ndi zwone zwithu zwo teaho zwine ra fanela u zwi ita. (Mat. 4:10) Zwiṅwe hafhu, ri a zwi ḓivha uri musi ri tshi shumela Yehova nga u fhulufhedzea, hu ḓo vha na mvelelo dzavhuḓi. U shumela hashu Yehova nga u fhulufhedzea zwi ḓo ita uri dzina ḽa Yehova ḽi huliswe. Zwi ḓo dovha zwa sumbedza uri Saṱhane u a zwifha na u ita uri Yehova a takale. Arali ra khetha u shumela Yehova zwino, zwi ḓo ita uri ri vhe na tshilavhelelwa tsha u mu shumela lwa tshoṱhe.​—Yoh. 17:3.

12-13. Ri guda mini kha tshenzhelo ya Jane na Pam?

¹² Ni nga kona u funa Yehova nga mbilu yaṋu yoṱhe naho ni kha ḓi vha muṱuku nahone lwonolwo lufuno lu nga engedzea lu tshi ya musi ni tshi khou aluwa. Zwenezwo zwo itea kha Pam na Jane vhane vha vha murathu na mukomana.a Musi vha tshi thoma u guda Bivhili, Jane o vha e na miṅwaha ya 11 ngeno Pam e na miṅwaha ya 10. Naho vhabebi vhavho vho vha vha sa takaleli u guda, vho tenda musi Jane na Pam vha tshi guda na Ṱhanzi dza Yehova, tenda vha tshi ḓo vha vha tshi ya kerekeni na muṱa wa havho nga mafhelo a vhege. Jane u ri: “Zwe Ṱhanzi vha ngudisa zwone vha tshi shumisa Bivhili, zwo nthusa uri ndi sa ḓidzhenise kha zwe thangana dzanga dza vha dzi tshi khou zwi ita zwi ngaho u shumisa zwidzidzivhadzi na u ḓifara luvhi.”

¹³ Musi Jane na Pam vha tshi swika kha miṅwaha ya vhuswa, vho mbo ḓi vha vhahuweleli. Nga u ya ha tshifhinga, vha thoma u vula nḓila. Na musi vhabebi vhavho vho no vha vhalala, vho bvela phanḓa vha tshi vula nḓila ngeno vha tshi khou vha ṱhogomela. Musi Jane a tshi humbula nga ha zwithu zwoṱhe zwe Yehova a mu itela zwone, u ri: “Ndo guda uri Yehova u a ṱhogomela khonani dzawe dzi fhulufhedzeaho na uri u a ḓivha vha re vhawe samusi zwo ambiwa kha 2 Timotheo 2:19.” A zwi timatimisi uri Yehova u a ṱhogomela vhane vha mu funa na vhane vha mu shumela.

14. Ri nga imelela hani Yehova? (Sedzani zwifanyiso.)

¹⁴ Ri khou ṱoḓa vhathu vha tshi zwi ḓivha uri zwithu zwi si zwavhuḓi zwe vha zwi pfa nga ha Mudzimu ndi mazwifhi madala-dala. Sa tsumbo, kha ri ri ni na khonani i re na vhuthu na mafunda na ine ya hangwela, fhedzi ḽiṅwe ḓuvha na pfa muṅwe muthu a tshi khou amba mazwifhi nga ha yeneyo khonani yaṋu, a tshi ri ndi muthu ane a vha na tshiṱuhu na ane a zwifha. Ni nga ita mini nga eneo mafhungo? Zwi tou pfala uri ni ḓo imelela khonani yaṋu. Nga nḓila i fanaho, musi Saṱhane na vhashumeli vhawe vha tshi lingedza u tshinya dzina ḽa Yehova nga u amba mazwifhi madala-dala nga hae, riṋe ri imelela Yehova nga u vhudza vhathu ngoho nga hae. (Ps. 34:1; Yes. 43:10) Musi ri tshi imelela Yehova nga zwine ra zwi amba na u zwi ita, ri vha ri tshi khou sumbedza uri ri khou ṱoḓa u mu shumela nga mbilu yashu yoṱhe.

15. Ndi mvelelo dzifhio dzavhuḓi dze Paulo a dzi wana nge a ita tshanduko vhutshiloni hawe uri a shumele Yehova? (Vhafilipi 3:7, 8)

¹⁵ Ro ḓiimisela u ita tshanduko vhutshiloni hashu uri ri kone u takadza Yehova na u ita zwo engedzeaho tshumeloni yawe. Sa tsumbo, muapostola Paulo o khetha u ṱutshela vhuimo havhuḓi he a vha e naho kha vhurereli ha Tshiyuda uri a kone u vha mutevheli wa Kristo na u shumela Yehova. (Vhagal. 1:14) Zwenezwo zwo ita uri a vhe na tshenzhelo nnzhi tshumeloni ya Yehova na uri a wane tshibuli tsha u vhusa na Yesu ngei ṱaḓulu. Ho ngo ḓisola nge a ita phetho ya u shumela Yehova, na riṋe musi ri tshi khetha u shumela Yehova a ri nga vhuyi ra ḓisola.​—Vhalani Vhafilipi 3:7, 8.

16. Ri guda mini kha tshenzhelo ya Julia? (Sedzani zwifanyiso.)

¹⁶ Arali u shumela Yehova zwa vha tshone tshithu tsha ndeme vhutshiloni hashu, ri ḓo wana malamba zwino na tshifhingani tshi ḓaho. Ṱhogomelani zwe zwa itea kha muṅwe wahashu ane a pfi Julia. Musi a sa athu guda ngoho, Julia o vha tshi imba kha khwairi kerekeni. O zwi ita u bva a tshi kha ḓi vha muṱuku. Muṅwe muimbi makone o mbo ḓi zwi ṱhogomela uri Julia u tou vha ṋambi nahone a mu gudisa u imba. Zwenezwo zwo ita uri Julia a vhe na bvumo vhukuma nahone o vha a tshi ya a tshi imba fhethu hu ḓivheaho. Musi e tshikoloni tsha muzika tshi re na bvumo vhukuma, muṅwe ane a dzhena nae tshikolo o mbo ḓi thoma u amba nae nga ha Mudzimu, a mu vhudza uri dzina ḽa Mudzimu ndi Yehova. Hu sa athu fhela na tshifhinga, Julia o mbo ḓi thoma u guda Bivhili luvhili nga vhege. Nga u ya ha tshifhinga o mbo ḓi dzhia phetho ya uri u ḓo shumela Yehova nṱhani ha u livhisa ṱhogomelo kha mafhungo a muzika. Zwo vha zwi songo leluwa u ita yeneyo phetho. Julia u ri: “Vhunzhi ha vhathu vho mmbudza uri ndi khou tambisa tshifhiwa tshe Mudzimu a nṋea tshone. Fhedzi nṋe ndo vha ndi tshi khou ṱoḓa u shumela Yehova.” Zwino Julia u ḓipfa hani nga phetho ye a i ita miṅwaha ya 30 yo fhiraho? U ri: “Ndo takala nge nda khetha u shumela Yehova nahone ndi a zwi ḓivha uri tshifhingani tshi ḓaho u ḓo fusha lutamo lwanga.”​—Ps. 145:16.

BVELANI PHANḒA NI TSHI SHUMELA YEHOVA

17. U ḓivha uri ri khou tshila mafheleloni a maḓuvha a vhufhelo zwi tea u kwama hani vho khethaho u shumela Yehova na vha sa athu khethaho u ita nga u ralo?

¹⁷ Ri khou tshila mafheleloni a maḓuvha a vhufhelo. Muapostola Paulo o amba uri “ho sala ‘tshifhinga tshiṱuku’” nahone ane a khou ḓa u ḓo swika, “ha nga lengi.” (Vhahev. 10:37) Enea mafhungo a ri kwama hani? A sumbedza uri ho sala tshifhinga tshiṱuku uri vhathu vha khethe u shumela Yehova. (1 Vhakor. 7:29) Fhedzi arali ro no khetha u shumela Yehova, kha ri bvele phanḓa ri tshi konḓelela ngauri ri a zwi ḓivha uri “tshifhinga tsho salaho ndi tshiṱuku.”

18. Yehova na Yesu vha ṱoḓa ri tshi ita mini?

¹⁸ Yesu ho ngo ṱuṱuwedza vhafunziwa vhawe uri vha mu tevhele fhedzi, nṱhani hazwo o vha ṱuṱuwedza na uri vha dzule vha tshi mu tevhela. (Mat. 16:24) Nga zwenezwo, arali ri na tshifhinga tshilapfu ri tshi khou shumela Yehova, u ṱoḓa ri tshi ḓiimisela u bvela phanḓa ri tshi mu shumela. Ndi ngoho uri a zwo ngo leluwa u ita nga u ralo, fhedzi arali ra zwi ita ri ḓo takala zwino na u ḓiphiṋa na nga phaṱhutshedzo dza u shumela Yehova.​—Ps. 35:27.

19. Ri guda mini kha tshenzhelo ya Gene?

¹⁹ Vhaṅwe vha vhona u nga u shumela Yehova zwi ita uri ri sa ḓiphiṋe nga vhutshilo. Arali ni muswa naa ni vhona u nga a ni ḓiphiṋi nga vhutshilo nga nṱhani ha uri ni khou shumela Yehova? Muṅwe wahashu wa tshinnani ane a kha ḓi vha muswa ane a pfi Gene u ri: “Ndo vha ndi tshi vhona u nga u vha Ṱhanzi ya Yehova zwi ita uri ri sa ḓiphiṋe nga vhutshilo. Ndo vha ndi tshi vhona u nga vhaṅwe vhana vhane vha vha thangana dzanga vha khou ḓiphiṋa nga zwithu zwi ngaho u ya phathini, u ita zwa u ḓivhana, na u tamba video game dzi re na nndwa, ngeno nṋe ndi tshi vha ndi tshi khou ya miṱanganoni na tsimuni.” U humbula nga yeneyi nḓila zwo kwama hani Gene? O ri: “Ndo thoma u kanda nga huvhili, ndi tshi ita zwithu zwine thangana dzanga dza khou zwi ita ngeno ndi tshi ḓiita u nga ndi khou shumela Yehova. Ndo pfa u nga ndi khou ḓiphiṋa nga vhutshilo, fhedzi zwenezwo zwo vha lwa tshifhinganyana nahone a zwo ngo ita uri ndi takale. Ndo mbo ḓi thoma u humbula nga mbuyelo dzine nda dzi wana musi ndi tshi tevhedza vhulivhisi vhu re Bivhilini. Nda phetha nga ḽa uri ndi ḓo thoma u shumela Yehova nga mbilu yanga yoṱhe. U bva tshe nda ita zwenezwo ndo kona u vhona Yehova a tshi fhindula thabelo dzanga.”

20. Ri tea u ḓiimisela u ita mini?

²⁰ Muphisalema o imbela Yehova a ri: “Hu takala ane wa mu nanga, wa mu sendedza tsini uri a dzule miṱani yau.” (Ps. 65:4) Nga zwenezwo, u nga ri ri nga ḓiimisela u bvela phanḓa ri tshi shumela Yehova. U fana na Yoshua ri ri: “Nṋe na vha muṱa wanga, ri ḓo shumela Yehova.”​—Yosh. 24:15.