Giugno

Geovà el ga benedio i primi dissìpoli de Gesù intanto che i fea quel che i podea, anca cole dificoltà. Lori i ga infrontà perseghission, e dele volte, questa perseghission la vegnea fora de colpo. Varda quel che ga sucedesto con Paolo e Barnabè intanto che i era drio predicar in Listra. De scomìnsio, le persone de quela cità li ga ricevesti ben. Ma pi tardi, arquanti giudei che i ze rivadi ala cità no ghe piasea la predicassion de Paolo e Barnabè. Alora, quei giudei i ga fato tanta gente vegner contra lori, e arquante persone ghe ga dato tante sassade a Paolo che le ga pensà che l’era morto. (Ati 14:19) Ma, Paolo e Barnabè i ga seità a predicar. E cossa che ga sucedesto? Tante persone le ze deventade dissìpoli e i fradei i ze stati tanto incoraiadi par causa del esémpio de Paolo e Barnabè. (Ati 14:21, 22) Lori no i se ga mia fermà de predicar, ancora che i ze stati perseghidi. Cossita, Paolo e Barnabè i ze stati boni de giutar tanti. Alora, se noantri seitemo a far quel che Geovà el dise, sicuro che anca noantri saremo tanto benedidi. w23.04 p. 16 §§ 13, 14

El rè Davi el ga infrontà tanti nemighi nela so vita, e l’è ndà in serca del aiuto de Geovà tante volte. Compagno a Davi, anca noantri podemo esser sicuri che Geovà el scolta e el risponde ale nostre orassion. Geovà el pol darne sabedoria e forsa par perseverar. E par giutarne, lu el pol doperar i nostri fradei o fin persone che no lo adora mia. Podemo esser sicuri che Geovà el ndarà risponder ale nostre orassion, anca se no l’è mia dela maniera che spetemo. E lu sempre el ndarà darne quel che ne ocore nela ora giuta. Par quela, ghemo de seitar a pregar con fede. Podemo esser sicuri che Geovà el ndarà tender de noantri fin el novo mondo, quando lu ‘ndarà darne tuto quel che volemo’. — Sal. 145:16. w23.05 p. 8 § 4; p. 13 §§ 17, 18

L’è bon pensar nele benedission che te gavarè. Come cossita? Metemo dir che te ghè pensà de leder de pi la Bìblia o de far meio le to orassion. Alora, gàpia in mente che, se te fè cossita, la to amicìssia con Geovà la restarà ancora pi forte. (Sal. 145:18, 19) O se te vol gaver una bela qualità che gnancora te ghè, pensa come la te giutarà a esser ancora pi amigo dei altri. (Col. 3:14) Proa anca meter par scrito le benedission che te gavarè, e dopo, ricòrdate de vardar quel che te ghè scrito. Anca, stà insieme de persone che le ndarà incoraiarte a far de pi par Geovà. (Pro. 13:20) L’è vera che, dele volte, no ghemo mia voia de far quel che ghemo pensà nela nostra adorassion a Geovà. Ma questo no vol mia dir che ghemo de desistir. No ghemo de sforsarse sol quando ghemo voia, parché cossita, no saremo mai boni de rivarghe. Pitosto, ghemo de seitar a sforsarse par ndar avanti. Cossita, restaremo pròpio contenti parché saremo boni de far quel che gavemo pensà. w23.05 p. 27, 28 §§ 5-8

Ricordarse che semo noantri che ghemo la colpa de una bruta dessision ndarà giutarne a far quel che ne ocore. Alora, se ghemo fato un pecato, saremo boni de confessar, cambiar e sforsarse par mai farlo nantra volta. Se femo cossita, saremo boni de seitar a corer nela carera dela vita. Fursi te ghè fato una bruta dessision e no te pol pi cambiarla. Alora, no stà doperar del to tempo e dela to forsa par catar fora scuse o par darghe la colpa ai altri. Invesse de seitar a sentirte in colpa par causa dei to sbali, sìpia ùmile e prega a Geovà par parlarghe del to sbàlio e par domandar che el te perdone. (Sal. 25:11; 51:3, 4) E se te ghè assà qualchedun disgustà, domandaghe scusa, e se ghe vol, domanda el aiuto dei ansiani. (Tia. 5:14, 15) Proa imparar dei to sbali, e sfòrsate par mai pi farli. Se te fè cossita, te pol esser sicuro che Geovà el ndarà mostrarte misericòrdia e che el ndarà darte el aiuto che te ocore. — Sal. 103:8-13. w23.08 p. 28, 29 §§ 8, 9

Geoiada el ga giutà el rè Geoàs a deventar un bravo rè. Par quela, quando l’era gióveno Geoàs el volea obedir a Geovà. Ma dopo che Geoiada l’è morto, Geoàs el ga scominsià a scoltar prìnsipi che i ndea contra Geovà. (2 Cró. 24:4, 17, 18) Ancora che Geovà el fusse tanto disgustà, lu el ga seità a mandar profeti par dirghe che i cambiesse. Ma Geoàs e i so servi no i ga volesto scoltarli. Un de questi profeti l’è stà el sasserdote Zacaria, che l’era fiol de Geoiada e primo cusin de Geoàs. Geoàs el ga mandà coparlo. (2 Cró. 22:11; 24:19-22) Geovà el ga dito che ‘quei che i ghe fà de poco i sarà umiliadi’. (1 Sam. 2:30) Alora, come Geoàs no’l ga seità a gaver tanto rispeto par Dio, tante robe rugne le ga scominsià a suceder con lu. Par esémpio, anca se el so esèrsito el fusse grando, el pìcolo esèrsito dela Sìria lo ga vinsesto e Geoàs el se ga fato tanto mal. (2 Cró. 24:24, 25) Dopo, i so servi lo ga copà. w23.06 p. 17, 18 §§ 16, 17

El apòstolo Paolo el gavea predicà e insegnà le bone notìssie in Èfeso. (Ati 19:1, 8-10; 20:20, 21) Par quela, lu el amea tanto i so cari fradei efesi e el volea giutarli a seitar fedeli a Geovà. Dopo che i ga imparà la verità, i efesi i i ze stati lìberi de creder nele busie dele religion false e nela magia. Le persone in Èfeso le pratichea tanta imoralità e no le sentia mia vergogna par quel che le fea. Nele festività religiose e nei teatri se parlea tanto sora imoralità sessual. (Efe. 5:3) Par quela, tanti efesi ‘no i savea pi quel che l’era sbalià’. (Efe. 4:17-19) Alora, i fradei efesi no i se nicordea dei so sbali parché no i savea quel che l’è giusto e sbalià. Par quela, Paolo el ga dito che ‘la mente de lori la era scura e lontan dela vita che Dio el dà’. Ma arquante persone in Èfeso no le ga seità nela scuridon. w24.03 p. 20 §§ 2, 4; p. 21 §§ 5, 6

Gideon ghe ocorea de forsa par esser un giuis. Par esémpio, quando i òmini de Midian i ga scampà via dela guera in meso la note, Gideon e i so òmini i ze ndati drio. Vanti de rivar nel Rio Giordon, lori i ga passà par Gezreel. (Giui. 7:22) Ma ancora che Gideon e i so 300 òmini i era cansi, lori no i se ga fermà lì. Invesse, i ze ndati de quel’altra banda del Rio Giordon par catar e vinser el esèrsito de Midian. (Giui. 8:4-12) Gideon l’era sicuro che Geovà el ndaria giutarlo, e el ga bio la forsa che ghe ocorea. (Giui. 6:14, 34) Par esémpio, una volta, Gideon e i so òmini i era a pié e i gavea de vinser due rè de Midian che i era drio scampar via de cameli. (Giui. 8:12, 21) Ma, lori i ze stati boni de catar quei rè e vinserli parché Geovà li ga giutadi. Ancoi, i ansiani i pol esser sicuri che Geovà el ndarà darghe la forsa che i ga de bisogno parché “lu no’l resta mai canso, gnanca straco”. — Isa. 40:28, 29. w23.06 p. 6 §§14, 16

Quando ghemo dificoltà, ghemo de fidarse del tuto el cuor in Geovà Varda quel che ga sucedesto con un servo de Dio del passà de nome Barache. Geovà el ga dito che lu el gavaria de ndar contra el poderoso esèrsito de Sìsera. (Giui. 5:8) Ma, in quela època i israeliti no i era mia pronti par la guera parché no i gavea scudi gnanca lanse. Alora, la profetisa Dèbora la ga dito che Barache el gavea de lotar contra Sìsera e le so 900 carete de guera nte un posto piano. Ancora che fusse pi fàcile par el esèrsito de Sìsera lotar in quel posto, Barache el ga obedio. Alora, intanto che i israeliti i vegnea do del Monte Tabor, Geovà el ga fato vegner una forte spiovada. Cossita, le carete de guera de Sìsera no le era mia bone de ndar avanti parché ghen’era tanto baro in tera, e Barache e so esèrsito li ga vinsesti. (Giui. 4:1-7, 10, 13-16) Dela medèsima maniera, Geovà el ndarà giutarne se se fidemo in lu e nele orientassion che lu el ne dà par meso dela so organisassion. w23.07 p. 18, 19 §§ 17, 18

Se volemo viver par sempre, ghemo de dimostrar passiensa. Arquanti servi fedeli del passà i ga portà passiensa fin che Geovà el fesse quel che el gavea prometesto. (Ebr. 6:11, 12) La Bìblia la fà una comparassion intrà noantri e un colono. (Tia. 5:7, 8) Un colono el laora tanto par piantar, darghe àqua e tender dela piantassion. Ancora cossita, lu no’l sa quando che la sarà pronta par tor su. Par quela, lu el porta passiensa fin che rive la ora de tor su quel che el ga semenà. Anca noantri ghemo de ndar drio el esémpio de Gesù e spetar, ‘parché no savemo che giorno el vegnarà’. (Mat. 24:42) Alora, l’è tanto importante portar passiensa e esser sicuri che Geovà el ndarà far quel che el ga prometesto nela ora giusta. Parché? Parché se no ghemo passiensa, restaremo stufi e scominsiaremo a tirarse distante de Geovà o ndaremo drio le robe de questo mondo che pensemo che ne darà alegria. Ma, se ghemo passiensa, saremo boni de perseverar fin el fin. — Mic. 7:7. w23.08 p. 22 § 7

Nela professia de Daniel 2:41-43, Daniel el ga dito che i pié i volea dir un regno che el gavaria ‘una parte forte e nantra parte fiaca’. Dopo de vardar le professie del libro de Daniel e de Apocalisse, capimo che i pié i ze la Potensa Anglo-Americana, o sia, i Stati Unidi e la Gran Bretagna. Questi due governi i laora insieme e i ze i pi poderosi dei nostri giorni. Ma parché che una parte de questo regno la saria fiaca? Parché le persone, o sia, el baro, no le assaria che questi governi i fesse tuto quel che i vol. Dopo de capir quel che Daniel el ga dito sora la stàtua, podemo imparar anca altre robe importante. Prima, vedemo che la Potensa Anglo-Americana la mostra che la ga tanto poder de diverse maniere. Par esémpio, i Stati Unidi e la Gran Bretagna i era intrà i paesi che i ga vinsesto la Prima e la Seconda Guera Mondial. Ma questi governi i mostra che i ze drio deventar fiachi, parché le persone no le ze mai intese una colaltra e le seita a vegner contra lori. Seconda, la Potensa Anglo-Americana la sarà la ùltima a governar vanti che el Regno de Dio el finissa fora tuti i governi dei òmini. w23.08 p. 10, 11 §§ 12, 13

Tante volte, Davi l’è restà preocupà par causa dele dificoltà che l’era drio infrontar. (Sal. 18:4, 5) Ma, lu el ga bio forsa parché el ga visto che Geovà lo tendea con amor. L’era come se Geovà lo fesse ‘butarse do nte un bel prà e lo fesse riposar in posti ndove ghen’è tanta àqua’. Cossita, Davi el ga bio forsa par seitar a servir a Geovà contento. (Sal. 18:28-32) Geovà el giuta anca noantri ancoi compagno el ga giutà Davi. Quando semo drio tribolar, ‘no semo mia finidi fora par via del amor leal de Geovà’. (Lam. 3:22; Col. 1:11) Davi l’era sempre in perìcolo e el ga bio tanti nemighi poderosi. Ma, par meso del so amor, Geovà lo ga giutà a esser sicuro che lu l’era drio tenderlo e protegerlo. Davi l’era bon de veder che Geovà l’era drio giutarlo. Par quela, lu el ga cantà: ‘Par causa de Geovà, adesso, no go pi paura.’ (Sal. 34:4) Ancora che dele volte Davi el gavesse tanta paura, lu l’è stà bon de dàrghene fora parché el savea che Geovà lo amea. w24.01 p. 30 §§ 15-17

Impara dele brute dessision de Geoàs. Dopo che el prinsipal sasserdote Geoiada l’è morto, Geoàs el ga scoltà i prìnsipi de Giudà che no i amea a Geovà. (2 Cró. 24:17, 18) Invesse de star distante de quele brute amicìssie, lu el ga scoliesto ndarghe drio. Alora, quando so primo cusin, Zacaria, ghe ga dato un consìlio, Geoàs el ga mandà coparlo. (2 Cró. 24:20, 21; Mat. 23:35) Geoàs l’era stà bravo de gióveno, ma dopo, l’è deventà un rè stùpido. Lu l’è restà contra Geovà, el ga copà una persona e, par fin, i so servi i lo ga copà. (2 Cró. 24:22-25) Sicuro che la so vita la podea esser stata tanto difarente se el seitesse a scoltar a Geovà e a quei che lo amea. w23.09 p. 9 § 6

Gesù el savea che el apòstolo Piero el saria bon de seitar leal e el ghe ga dito con bontà: “No stà gaver paura.” La vita de Piero la ga cambià dopo che el ga visto che Gesù el se fidea in lu. Alora, un tempo dopo, lu e so fradel, Andrè, i ga assà el so laoro de pesca par ndar drio a Gesù. Par causa de questa dessision, lori due i ga ricevesto tante benedission. (Mar. 1:16-18) Piero el ga bio tante benedission dopo che l’è deventà dissìpolo de Gesù. Lu el ga visto Gesù curar i maladi, parar via demoni e fin ressussitar i morti. (Mat. 8:14-17; Mar. 5:37, 41, 42) E Piero mai pi el se ga desmentegà de veder la glòria de Gesù come Rè del Regno de Dio. (Mar. 9:1-8; 2 Pie. 1:16-18) Lu el ga visto tante robe de gnanca creder parché l’era insieme a Gesù. Sicuro che Piero l’era contento cole benedission che el ga ricevesto dopo che el se ga fermà de pensar che no l’era bon de far gnente! w23.09 p. 21 §§ 4, 5

Nela so prima carta, el apòstolo Piero el ga parlà che ne ocore gaver “grando amor un par el altro”. Se ghemo questo amor, saremo boni perdonar “tanti pecati” e no sol un per de sbali che i fà contra noantri. (1 Pie. 4:8) Quando Piero el ga dato questo consìlio, fursi el se ga ricordà de quel che el ga imparà de Gesù sora el perdon. Lu el pensea che l’era drio mostrar bontà quando el ga domandà a Gesù se el gavea de perdonar un fradel “fin sete volte”. Ma Gesù el ghe ga dito che el gavea de perdonar “fin 77 volte”, o sia, lu el gavea de perdonar sempre. (Mat. 18:21) Pol esser che te pensi che l’è fadiga meter in pràtica questo consìlio. Ma no stà restar desanimà, parché anca altri servi de Dio i ga belche fato fadiga perdonar a qualchedun. Alora, sfòrsate de perdonar el to fradel e far la pace. w23.09 p. 29 § 12

Giona l’era rento la pansa de un pesse lu lu sol. Lu el savea che Geovà el ndaria scoltarlo e giutarlo se el fusse ùmile e el se ciamesse gramo. Par quela, dopo ricever el aiuto de Geovà, Giona l’era pronto par far quel che Dio el volea. (Giona 2:10–3:4) Fursi te sì drio infrontar una bruta situassion e no te sì mia bon de dir a Geovà come te te senti. O pol esser che te sì massa straco e no te ghè gnanca forsa par studiar. Alora, cossa che te pol far? Ricòrdate che Geovà el sa quel che te sì drio infrontar. Anca se te fè una orassion con poche parole, te pol esser sicuro che lu el te darà pròpio quel che te ocore. (Efe. 3:20) Se te ghè mal o te sì massa desanimà par studiar, proa scoltar la letura dela Bìblia o de altre publicassion. Te pol anca meter sonar un càntico o vardar un vìdeo nel jw.org. Geovà el vol giutarte e el te darà la forsa che te ocore se te preghi e te vè in serca dela so orientassion par meso dela Bìblia e dele publicassion. w23.10 p. 13 § 6; p. 14 § 9

El tabernàcolo e el témpio, che dopo l’è stà fato su in Gerusalen, i se someiea tanto. In tuti i due, ghen’era el Santo e el Santìssimo, e intrà questi due, ghen’era una coltrina par spartirli. (Ebr. 9:2-5; Éso. 26:31-33) Rento el Santo, ghen’era un candelabro de oro, un altar par brusar insenso e una tola coi pan de presentassion. Sol i sasserdoti i podea ndar rento el Santo par far i so laori santi. (Nùm. 3:3, 7, 10) Nel Santìssimo, ghen’era la arca del acordo, e quando el prinsipal sasserdote el ndea rento quela parte del tabernàcolo, l’era come se el fusse davanti el pròpio Geovà. El somo sasserdote el podea ndar là sol una volta al ano, nel Giorno de Domandar Perdon dei Pecati. (Éso. 25:21, 22; Lev. 16:2, 17) Alora, lu el portea rento el Santìssimo el sangue dele bèstie par domandar perdon dei so pecati e de quei dele persone. Pi tardi, Geovà el ga giutà le persone a saver cossa pròpio volea dir queste due parte del tabernàcolo. — Ebr. 9:6-7. w23.10 p. 27 § 12

La Bìblia la dise una volta drio man che ‘ghemo de amar un al altro’. (Gio. 15:12; Rom. 13:8; 1 Tes. 4:9; 1 Pie. 1:22; 1 Gio. 4:11) Ma el amor l’è un sentimento che ghemo rento el nostro cuor e che nissuni pol vederlo. Alora, come che podemo mostrar ai altri che li amemo? Par meso de quel che parlemo e de quel che femo. Varda arquante robe che la Bìblia la dise che ghemo de far par mostrar che amemo ai altri: “Parlé la verità” e “seité in pace un coi altri”. (Zac. 8:16; Mar. 9:50) “Sìpie premosi de darghe onor un al altro.” (Rom. 12:10) “Gavé de acetarve un al altro” e ‘a perdonarve del tuto’. (Rom. 15:7; Col. 3:13) “Seité portar le carghe un dei altri”. (Gàl. 6:2) “Seité a darve coraio” e ‘consolo’ e ‘preghé un par el altro’. — 1 Tes. 4:18; 5:11; Tia. 5:16. w23.11 p. 9 §§ 7, 8

L’è importante gaver una forte fede parché ghemo tanti dessision de far tuti i giorni. Par esémpio, ghemo de dessider chi che i ze nostri amighi, come che ndaremo divertirse, se ndaremo in serca de gaver stùdio, che tipo de laoro ndaremo scòlier, con chi che ndaremo maridarse e se gavaremo fioi. Alora, ghemo de domandarse: ‘Quel che mi fao mostra che son sicuro che questo mondo suito el sarà finio e che el novo mondo el vegnarà? O sonti drio far compagno ale persone che no le crede che le pol viver par sempre?’ (Mat. 6:19, 20; Luc. 12:16-21) Se femo forte la nostra fede che el novo mondo l’è darente, sempre faremo le meio dessision.Ne ocore una forte fede par dàrghene fora cole nostre dificoltà, come la perseghission, una bruta malatia o qualcossa che ne assa desanimadi. De scomìnsio, fursi pensemo che saremo boni de perseverar. Ma se seitemo a infrontar quela dificoltà par tanto tempo, ghemo bisogno de una forte fede par esser boni de perseverar e de seitar a servir a Geovà con alegria. — 1 Pie. 1:6, 7. w23.04 p. 27 §§ 4, 5

Geovà el vol che femo el nostro meio dopo che ghe domandemo qualcossa. Par esémpio, pol esser che un fradel el domande a Geovà che lo giute a esser lìbero del laoro par ndar al congresso. Come che Geovà el podaria risponder a questa orassion? Fursi lu el ghe daria coraio par parlar col so paron. Alora, ghe tocaria al fradel domandar al so paron che lo assesse ndar nel congresso. Fursi, lu el gavaria de domandar diverse volte o fin acetar ciapar manco soldi nel fin del mese. Geovà el vol che seitemo a pregar par parlarghe dei nostri pensieri. Gesù el ga dito che arquante robe che ghe domandemo a Geovà no le ndarà suceder nela ora che volemo. (Luc. 11:9) Ancora cossita, no stà mia desister. Pitosto, seita a pregar a Geovà. (Luc. 18:1-7) Quando seitemo a domandar el aiuto de Geovà, mostremo che quel che domandemo l’è importante e che se fidemo che lu el pol giutarne. w23.11 p. 22 §§ 10, 11

Geovà el ga prometesto a Abraon che tute le nassion le saria benedide par meso del so fiol. (Gén. 15:5; 22:18) Come Abraon el gavea una forte fede, lu el credea che questa promessa la ndaria pròpio suceder. Alora, anca se Abraon e Sara i gavesse quasi 100 ani e no i gavesse fioi, lori i seitea a gaver una forte speransa. (Gén. 21:1-7) La Bìblia la dise: “Par via dela speransa, Abraon el ga bio fede che el ndaria deventar pare de tante nassion, de acordo con quel che l’è stà dito.” (Rom. 4:18) Tuti noantri savemo che la promessa de Dio la ga pròpio sucedesto parché Abraon l’è deventà pare de Isache. Parché che Abraon el gavea una fede forte cossita? Lu el gavea una forte amicìssia con Geovà e l’era sicuro che “Dio el saria bon de far tuto quel che el ghe gavea prometesto”. (Rom. 4:21) Par quela, Abraon el ga assà Geovà tanto contento e l’è deventà una persona giusta par lu. — Tia. 2:23. w23.12 p. 8 §§ 1, 2

Un gióveno che el vol esser una persona de fidarse el proa tender de tute le so responsabilità. Varda el bel esémpio de Gesù. Geovà el ghe ga dato laori pròpio fadiga de far. Ma come Gesù el amea tanto a Geovà e ale persone, lu el ga dato la so vita come sacrifìssio e sempre el ga fato quel che el podea par giutar a tuti. (Gio. 13:1) Alora, fà compagno a Gesù e proa far ben i laori che te ghè. Invesse de sol far quel che te toca, sfòrsate de far sempre el to meio. (Rom. 12:11) Ricòrdate che te sì drio laorar “par Geovà e nò par òmini”. (Col. 3:23) Ma, se no te sè mia come far un laoro, sìpia ùmile e domanda aiuto ai altri fradei. E gàpia in mente che no te sì mia perfeto e che te ndarè sbaliar. — Pro. 11:2. w23.12 p. 26 § 8

Una persona la resta tanto contenta de batesarse e deventar parte dela fameia de Geovà. Cossita, ela la scomìnsia a gaver una amicìssia tanto pi forte con lu. Sicuro che ela la se sente compagno al rè Davi, che el ga dito: “Felice l’è quel che ti te scòli e che te porti darente de ti, par esser de star nei to cortivi.” (Sal. 65:4) Geovà el scòlie tanto ben quei che i ndarà far parte dela so fameia. Lu sol el scòlie persone che le volarà gaver una forte amicìssia con lu. (Tia. 4:8) Alora, quando te fè la to dedicassion a Geovà e te te batesi, te pol esser sicuro che te ‘riceverè benedission fin che no te gàpia pi bisogno de gnente’. (Mal. 3:10; Ger. 17:8) Dopo del batésimo, te scominsi a doperar la to vita par servir a Geovà. Alora, te gavarè de sforsarte par seitar fedele, anca quando te vien voia de far qualcossa de sbalià o quando te infronti dificoltà. (Ecl. 5:4, 5) Come te deventi un dissìpolo de Gesù, te gavarè anca de sforsarte par far compagno a lu. — Mat. 28:19, 20; 1 Pie. 2:21. w24.03 p. 8 §§ 1-3

Fursi valtri, sposo e sposa, no ve piase passar tempo insieme. Alora, cossa che podé far? Pensé nte un fogo che el scomìnsia a brusar pin pian. Par quela, prima te toca meter i tochi pi pìcoli de legna e sol dopo meter i tochi pi grossi. Proa far compagno nel to matrimònio. Scominsié a passar un poco de tempo insieme tuti i giorni, fé robe che ve piase tuti due. (Tia. 3:18) Se ve sforsé de far queste pìcole robe, el vostro amor el restarà forte nantra volta. L’è tanto importante che el omo e la dona i mostre rispeto un al altro. L’è compagno a quel che sucede col fogo. Se no ghen’è ossigénio, el fogo suito el se smorsa. Dela medèsima maniera, se no ghen’è rispeto nel matrimònio, el amor el pol finirse. Invesse, quando el omo e la dona i mostra rispeto un al altro, el amor intrà de lori el resta pi grando. w23.05 p. 22 § 9; p. 23, 24 §§ 14, 15

La Bìblia la parla de arquanti servi de Geovà che i ga bio paura par causa dei so nemighi e dele dificoltà. (Sal. 18:4; 55:1, 5) Anca noantri fursi sentimo paura se ghemo una bruta malatia o se infrontemo perseghission nela scola, nel laoro, dela fameia o del governo. Pol esser che no semo boni de far gnente e se sentimo compagno un bambin. Alora, come che Geovà el ne giuta a infrontar questi bruti colpi? Lu el ne dà consolo e el ne giuta a restar pi calmi. Ghemo de seitar a pregar a Geovà e a leder la Bìblia. (Sal. 77:1, 12-14) Cossita, quando te sì preocupà, la prima roba che te ndarè far sarà domandar el aiuto de Geovà. Alora, conteghe tuto quel che te assa spaurà, e scolta quel che el te dise par meso dela Bìblia. — Sal. 119:28. w24.01 p. 24, 25 §§ 14-16

Se te ghè in mente de far una roba ancora meio nela to adorassion a Geovà, l’è tanto importante che te gàpie voia parché, cossita, te ndarè sforsarte. E sarà pi fàcile far meio la to adorassion a Geovà se te ghè voia. Alora, cossa che podemo far par gaver pi voia? Prega par gaver voia. Geovà el pol doperar el so spìrito par darte la voia de far quel che te ghè in mente. E questo l’è importante parché, dele volte, proemo far qualcossa meio nela adorassion a Geovà sol parché savemo che sarà bon, e nò parché volemo. Pensaghe sora quel che Geovà el ga fato par ti. (Sal. 143:5) L’è stà pròpio quel che el apòstolo Paolo el ga fato. Lu el savea che no’l meritea mia la bontà che Dio sempre ghe mostrea. Alora, el ga pensà sora questa bontà. Cossita, Paolo el ga bio ancora pi voia de laorar tanto par Geovà. (1 Cor. 15:9, 10; 1 Tim. 1:12-14) Se te seiti a pensarghe sora come Geovà el te ga giutà, te gavarè pi voia de far meio la to adorassion a lu. — Sal. 116:12. w23.05 p. 27 §§ 3-5

El nostro caro Dio el resta contento quando lodemo el so nome. (Sal. 119:108) Ma lu no l’è mia come le persone che ghe toca scoltar i lodi dei altri par sentirse ben o saver che le ze drio far un bon laoro. Quando lodemo a Geovà anca mostremo che quel che Sàtana el ga dito sora noantri l’è una busia. Come cossita? Lu el ga dito che nissun seitaria leal a Geovà e che ndarìssino abandonarlo se qualchedun el ne desse qualcossa meio. (Giò 1:9-11; 2:4) Nel passà, Giò el ga belche mostrà che Sàtana l’è un busier. E cossa che ti te ndarè far? Anca ti te pol mostrar che Sàtana l’è un busier se te seiti fedele e te obedissi a Geovà. (Pro. 27:11) Varda sol che bela roba che te pol far! w24.02 p. 8, 9 §§ 3-5

Un tempo dopo che Moisè e Giosuè i ze morti, Geovà el ga doperà giuisi par giutar el so pòpolo. Nela època dei rè, lu el ga doperà profeti. I rè che i era fedeli i ndea drio ai consili dei profeti de Dio. Par esémpio, dopo che Davi el ga fato un bruto pecato, lu el ga acetà el forte consìlio del profeta Natan. (2 Sam. 12:7, 13; 1 Cró. 17:3, 4) El rè Geosafà el se ga fidà in quel che el profeta Giaaziel el ghe ga dito e el ga incoraià i giudei a acetar le orientassion dei profeti de Dio. (2 Cró. 20:14, 15) E quando el rè Ezechia l’era drio infrontar bruti colpi, lu l’è ndato drio el aiuto del profeta Isaia. (Isa. 37:1-6) Sempre che i rè i ndea drio ale orientassion de Geovà, lori i era benedidi e i gavea protession. (2 Cró. 20:29, 30; 32:22) Lori i podea esser sicuri che Geovà el doperea i profeti par giutarli. w24.02 p. 21 § 8

Sàtana el vol che restemo insieme a persone che le ne intriga de adorar a Geovà. Alora, ghemo de star ancora pi atenti parché podemo star insieme a persone che no le adora a Geovà, anca se i ze de star distante de noantri. Savemo che la imoralità del mondo l’è una roba pròpio bruta e ghemo de sforsarse de no viver de questa maniera. (Efe. 4:19, 20) Alora, l’è importante domandarse: ‘Sarà che son drio sforsarme par no restar insieme a coleghi dela scola, del laoro o altri che no i adora a Geovà se no ocore mia? Go coraio par far quel che Geovà el dise che l’è giusto, anca se le persone le dise che no aceto quei che i ze difarenti?’ De acordo con 2 Timòteo 2:20-22, ghemo de scòlier ben i nostri amighi, anca se lori i ze fradei e sorele. Pol esser che arquanti de lori, fursi, no i ndarà giutarne a seitar fedeli a Geovà. w24.03 p. 22, 23 §§ 11, 12

Gheto belche pensà come che Geovà l’è? Anca se no podemo mia vederlo, la Bìblia la dise che lu l’è come ‘un fogo che el brusa’, come ‘el sol e come un scudo’. (Sal. 84:11; Ebr. 12:29) Un scritor dela Bìblia el ga visto Geovà nte una vision, e el ga dito che Dio el se someia a un ‘sasso de safira’, a un ‘metal che slusea’ e a un bel ‘arco-ìris’. (Eze. 1:26-28) Come no podemo mia veder a Geovà, pol esser che sìpia fadiga creder che lu el ne ama. Arquanti fursi i ga infrontà bruti colpi nela vita. Ma Geovà el capisse ben quel che sentimo, e el vol giutarne. Par quela, lu el ne fà cognosserlo par meso dela Bìblia. La Bìblia la dise che Dio l’è amor. (1 Gio. 4:8) Questa la ze la qualità pi bela che lu el ga parché tuto quel che el fà l’è con amor. E lu el mostra so amor a tuti, fin a quei che no i lo serve mia. — Mat. 5:44, 45. w24.01 p. 26 §§ 1-3

Geovà el ga scoliesto Moisè par liberar i israeliti del Egito e el doperea una colona de nùvola de giorno e una colona de fogo de note. (Éso. 13:21) Moisè el ndea drio quela colona. E una volta, la colona li ga menadi nel Mar Rosso. El pòpolo l’è restà spaurà quando el esèrsito dei egipsi l’era drio vegnerghe contra e no ghen’era come scampar via. Ma l’era stà Geovà che li gavea menadi fin quel posto parché el volea mostrarghe el so grando poder. (Éso. 14:2, 26-28) Moisè el ga seità a fidarse nele orientassion de Geovà par giutar i israeliti nei 40 ani che i ze restadi in meso el deserto. (Éso. 33:7, 9, 10) Cossita, tuti i podea esser sicuri che Geovà l’era drio doperar Moisè par tenderli. Geovà el parlea con Moisè par meso de quela colona, e dopo, Moisè el ghe insegnea al pòpolo. w24.02 p. 21 §§ 4, 5