Agosto

Varda due robe importante che imparemo de questo salmo: Anca le persone che le fà quel che l’è giusto le ndarà tribolar e Geovà el ne salva dele nostre dificoltà. Come che lu el ne salva? Lu el ne giuta a pensar dela maniera giusta. Geovà el promete che, se noantri lo servimo, gavaremo tanta alegria. Magari, questo no vol mia dir che no gavaremo problemi. (Isa. 66:14) Par quela, Geovà el ne dise de pensar come sarà bela la nostra vita nel futuro, quando viveremo felici e par sempre. (2 Cor. 4:16-18) Ma, par intanto, lu el ne giuta a dàrghene fora cole nostre dificoltà e a seitar a servirlo tuti i giorni. (Lam. 3:22-24) Cossa che podemo imparar sora el esémpio de servi fedeli del passà e anca dei nostri giorni? Ancora che infrontemo bruti colpi, Geovà sempre el ndarà giutarne se se fidemo in lu. w23.04 p. 14, 15 §§ 3, 4

Noantri podemo imparar tanto de Giusepe e Maria. Lori i ze stati obedienti ale autorità anca quando no l’è mia stà fàcile. (Luc. 2:1-6) Par esémpio, Maria la era gràvida de nove mesi quando el governante de Roma el ga fato una lege che tuti i gavea de ndar registrarse ndove i era nassesti. Alora, Giusepe e Maria ghe ga tocà far un viaio de 150 chilòmetri fin Belen. Questo viaio saria pròpio fadiga par Maria parché i gavea de ndar su e do par i monti. Sicuro che lori i ze restadi preocupadi parché quel tatin el saria el Messia e el podaria nasser in meso el viaio! Alora, gali pensà che i gavea una bela scusa par desobedir quela lege? Ancora che Giusepe e Maria i gavesse tante robe par preocuparse, lori i ze stati obedienti ala lege. Par quela, Geovà l’è restà contento e li ga giutadi. Lori i ga fato un bel viaio e el bambin l’è nassesto ben. E anca quel che l’era stà scrito nte una professia dela Bìblia ga sucedesto par causa dela so obediensa. — Mic. 5:2. w23.10 p. 8 § 9; p. 9 §§ 11, 12

Fursi te resti massa preocupà e te ghè paura de far un comentàrio nele riunion. Te pol pol pareciarte ben e far pìcoli comentari. (Pro. 21:5; Pro. 15:23; 17:27) Quando te sì ben parecià, te sarè bon de capir ben el stùdio e sarà pi fàcile far un comentàrio. E ricòrdate che l’è pi fàcile che i fradei i capissa un comentàrio pìcolo invesse de un comentàrio massa longo. Ma e se dopo de meter i pràtica arquanti de questi consili, te seiti ancora preocupà de far un o due comentari, ricòrdate che Geovà el ghe dà tanto valor quando te fè el to meio. (Luc. 21:1-4) Far el to meio vol dir far quel che te sì bon. (Fil. 4:5) Alora, pensa in quel che te sì bon de far, gàpia un ogetivo e prega a Geovà che el te giute a seitar calmo. Fursi, el to primo ogetivo sìpia far un pìcolo comentàrio. w23.04 p. 21 §§ 6-8

El apòstolo Paolo el ga dito che noantri semo come soldadi che i ze atenti e i ga su le robe par la guera. Intanto che i fusse nela guera, i soldadi i gavea de esser pareciadi tuto el tempo. L’è cossita anca con noantri. Come che podemo esser sempre pronti par el giorno de Geovà? Ghemo de meter su la corassa dela fede e del amor e el capassete dela speransa. Cossita come la corassa la protege el cuor de un soldà, la fede e el amor i giuta a proteger quel che pensemo, quel che sentimo e quel che volemo. La fede e el amor anca i pol giutarne a seitar a servir a Geovà e a ndar drio el esémpio de Gesù. La fede la ne giuta a esser sicuri che Geovà el ricompensa quei che i va in serca de lu. (Ebr. 11:6) La fede anca la ne giuta a seitar leai a Gesù stesso che tribolemo. Come che podemo farla pi forte? Ghemo de vardar el esémpio de fradei e sorele che i ze leai a Geovà, ancora che i infronta perseghission o dificoltà coi soldi. E se noantri proemo far compagno quei che i ga dessidio viver con manco par far de pi par Geovà, no ndaremo mia amar i soldi gnanca el capital. w23.06 p. 10 §§ 8, 9

Controla quel che te senti e quel che te fè. Cossita, te sarè bon de far quel che l’è giusto, stesso che sìpia fadiga o che no te gàpie mia voia. Par quela che ghemo de domandar spìrito santo. Una qualità del spìrito santo de Geovà la ze el autocontrolo. Alora, se te lo domandi, Geovà el podarà giutarte. (Luc. 11:13; Gàl. 5:22, 23) No stà spetar fin che tute le robe le sìpia polito. In questo mondo, sempre ndaremo tribolar par causa de una roba o nantra. Alora, se seitemo spetar fin che sìpia tuto polito, pol esser che mai saremo boni de far gnente. Se ghe vol massa tempo e sforso par far quel che volemo, pol esser che restemo desanimadi e no saremo mia boni de rivarghe. Alora, proa pensar anca nele pìcole robe che te giutarà a far meio to laoro par Geovà. Par esémpio, se te vol gaver nantra bela qualità, proa scominsiar a mostrarla un pochetin ala volta. O se te vol leder tuta la Bìblia, scomìnsia a lederla pochi minuti al giorno. w23.05 p. 29 §§ 11-13

In questi ùltimi giorni, Geovà e la so organisassion i ze drio darne tuto quel che ne ocore par capir la verità sora la Parola de Dio e seitar a caminar nela “Strada dela Santità”. (Isa. 35:8; 48:17; 60:17) Tuti quei che i scomìnsia a studiar la Bìblia i pol caminar nela “Strada dela Santità”. Ghen’è de quei che i camina in questa strada par poco tempo e dopo i va via. Magari, ghen’è de quei che i vol sforsarse par seitar a caminar in questa strada. Ma cossa che lori i ndarà ricever? Arquanti i ndarà viver nel “paradiso de Dio”, che l’è nel cielo. (Apo. 2:7) E dopo i mila ani, tante altre persone le ndarà ricever la vita eterna e perfeta qua nela Tera. Se ti te sì drio caminar nela “Strada dela Santità”, no stà vardar quel che te ghè assà indrio e seita a caminar in questa strada fin el novo mondo. w23.05 p. 17 §§15, 16 p. 19 § 18

Se te pensi in tuto quel che Geovà el ga fato par ti, te volarè dedicar la to vita a lu. (Sal. 116:12-14) La Bìblia la dise che Geovà el ne dà “tuti i presenti boni e perfeti”. (Tia. 1:17) E la vita de Gesù l’è stà el presente pi grando che lu el ne ga dato. Parché? Parché l’è stà par causa de questo sacrifìssio che podemo esser amighi de Geovà e gaver la speransa de viver par sempre. (1 Gio. 4:9, 10) Alora, se ghe demo valor a tuto quel che Geovà el ga belche fato e el ndarà far par noantri, sicuro che volaremo dedicar la nostra vita a lu e mostrar che lo amemo. — Deu. 16:17; 2 Cor. 5:15. w24.03 p. 5 § 8

Nela època de Lò, le persone le fea aposta robe che disgustea tanto a Dio. (2 Pie. 2:7, 8) Ma, Lò el odiea quele brute robe parché el amea a Geovà e el gavea tanto rispeto par lu. Ancoi, l’è drio suceder la stessa roba. Tante persone intorno a noantri le ga poco gnente rispeto par quel che Dio el dise che l’è giusto. Ancora cossita, podemo far quel che Geovà el vol se seitemo a amarlo e imparemo come rispetarlo. (Pro. 14:2) Nel libro de Proverbi, Geovà el ne insegna cossa ghemo de far par amarlo e mostrar che ghemo tanto rispeto par lu. Alora, no vol mia dir se semo òmini o done, gióveni o veci, tuti noantri podemo imparar tanto coi consili che catemo in Proverbi. Se tememo a Dio, o sia, ghemo un grando rispeto par lu, mai ndaremo esser amighi de persone che le fà robe sbaliade. w23.06 p. 20 §§ 1, 2; p. 21 § 5

Pol esser che te ghè tribolà parché la to fameia la volea che te te fermessi de servir a Geovà. O fursi te ghè assà de guadagnar tanti soldi e tante robe par esser bon de meter el Regno in primo posto nela to vita. (Mat. 6:33) Se te ga sucedesto robe cossita, sìpia sicuro che Geovà el ga visto tute le bele robe che te ghè fato par lu. (Ebr. 6:10) Fursi te ghè visto nela to vita quel che Gesù el ga dito: “Nissun ga assà casa, fradei, sorele, mare, pare, fioi, o campi, par causa de mi e par causa dele bone notìssie, che no’l riceva sento volte de pi adesso, in questo tempo, case, fradei, sorele, mare, fioi, e campi, con perseghission, e nel mondo che el ga de vegner la vita eterna.” (Mar. 10:29, 30) Le benedission che te ghè ricevesto le ze tanto pi grande che quel che te ghè assà indrio, mia vera? — Sal. 37:4. w24.03 p. 9 § 5

Quando ghen’è stà una bruta fame nela Giudea, i fradei dela Antiochia i era dessididi de giutarli ‘de acordo con quel che cada un el podea, e i ga mandà ai fradei dela Giudea quel che i gavea de bisogno’. (Ati 11:27-30) Tuti noantri podemo mostrar compassion ai nostri fradei ancoi quando sucede una desgràssia. Ma cossa che ti te pol far par giutar? Prega par questi fradei che i ze drio sofrir, giuta coi to donativi par la òpera mondial e fà presto domandarghe ai ansiani cossa che te pol far par giutarli. Par quela, gavaremo de mostrar compassion parché pol esser che i fradei i ghe ocorerà del nostro aiuto par gaver quel che i ga de bisogno. Cossita, quando el nostro Rè Gesù Cristo el vegnarà par giulgar le persone, el ne convidarà par “ereditar el Regno”. — Mat. 25:34-40. w23.07 p. 4 §§ 9, 10; p. 6 § 12

Compagno a Geovà, Gesù no l’era massa duro gnanca el spetea che le persone le fusse perfete. Par esémpio, l’è vera che Gesù l’era ‘stà mandà sol ale piégore perse de Israel’, ma lu el ga scoltà una dona che no la era mia israelita, e el ga curà so fiola. (Mat. 15:21-28) Anca quel che ga sucedesto con Piero mostra che Gesù no’l spetea massa dele persone. Gesù el gavea dito: ‘Mi vao dir che no cognosso mia quei che i dise che no i me cognosse.’ (Mat. 10:33) Ma dopo che Piero el ga dito tre volte che no lo cognossea mia, Gesù lo ga perdonà, parché el ga visto che Piero el gavea fede e el se gavea ciamà gramo. Dopo, quando Gesù l’è stà ressussità, lu l’è ndato parlar con Piero par assarlo sicuro che lo gavea perdonà e che lo amea. (Luc. 24:33, 34) Geovà e Gesù no i ze mia massa duri e sempre i càmbia quando ghe vol. Geovà el vol che anca noantri femo cossita. w23.07 p. 21 §§ 6, 7

Come che podemo giutar quei che i pensa che questa promessa mai la ndarà suceder? Prima, podemo mostrar che l’è stà Geovà che el ga fato questa promessa. El libro de Apocalisse el dise: “Varda! Son drio far nove tute le robe.” Geovà anca ga la sabedoria e el poder par far quel che el ga prometesto. Secondo, par Geovà, l’è come se tute le so promesse le gavesse belche sucedesto. Par quela che lu el ga dito: ‘Queste parole le ze fedele e vere. Le me parole le ga sucedesto.’ Terso, Geovà el ga dito: ‘Mi son el Alfa e el Ómega.’ (Apo. 21:6) Questo ne insegna che nissuni pol intrigar Geovà de far quel che el ga scominsià. Alora, semo sicuri che lu el ndarà mostrar che Sàtana l’è un busier e che nissuni pol intrigarlo. Alora, se qualchedun te dise: ‘Imaginarsela! Massa fadiga de creder’? Te pol leder Apocalisse 24:5, 6, e spiegar che l’è stà come se Geovà el gavesse assà par scrito una garansia che tuto quel che el ga prometesto ndarà pròpio suceder. — Isa. 65:16. w23.11 p. 7 §§ 18, 19

Abraon el gavea belche 75 ani e no’l gavea mia fioi quando Geovà el ghe ga dito: “Farò de ti una granda nassion.” (Gén. 12:1-4) Sarà che Abraon el ga visto suceder quel che Geovà el gavea prometesto? Lu el ga visto sol una parte de questa promessa. Come cossita? Dopo de 25 ani, lu l’è ndato a quel’altra banda del Rio Eufrate e el ga bio Isache par meso de un miràcolo. Sol dopo altri 60 ani, Abraon el ga visto nasser so due neti, Esaù e Giacò. (Ebr. 6:15) Magari, Abraon no’l ga mia visto i so fioi deventar una granda nassion e ciapar la Tera Prometesta come eransa. Ancora cossita, lu el ga seità fedele, e la so amicìssia con Geovà la ze restada ancora pi forte. (Tia. 2:23) Sicuro che quando Abraon el sarà ressussità, lu el restarà tanto contento de saver che, par causa dela so fede e dela so passiensa, tute le nassion dela Tera le ze state benedide! (Gén. 22:18) Cossa che imparemo? Fursi no vederemo suceder tuto quel che Geovà el ga prometesto. Ma se semo boni de portar passiensa, Geovà el ndarà benedirne ancoi e ancora de pi nel futuro. — Mar. 10:29, 30. w23.08 p. 24 § 14

Ancora de gióveno, Uzia l’era ùmile e el ga imparà a gaver tanto rispeto par el vero Dio. Lu l’è morto con 68 ani e, par quasi tuta la so vita, Geovà lo ga benedio. (2 Cró. 26:1-4) Uzia l’è stà bon de vinser tante nassion nemighe e el ga fato tante robe par proteger Gerusalen. (2 Cró. 26:6-15) Sicuro che Uzia l’era tanto contento de saver che Geovà l’era drio giutarlo. (Ecl. 3:12, 13) Come l’era rè, Uzia sempre el disea ai altri cossa i gavea de far. Cossita, pol esser che el gàpia pensà che el podaria far quel che el volesse e che no ghe tochea obedir a Geovà. Alora, un giorno, Uzia l’è ndato rento el témpio e el ga brusà insenso nel altar, che l’era una roba che i rè no i podea mia far. (2 Cró. 26:16-18) Quando el prinsipal sasserdote Azaria el ghe ga dito che lu l’era drio far una roba sbaliada, Uzia l’è restà pròpio cativo. Par quela, lu no’l ga seità leal a Geovà e l’è stà castigà cola lepra. (2 Cró. 26:19-21) Se Uzia el fusse seità ùmile, la so vita podaria esser stata tanto meio. w23.09 p. 10 §§ 9, 10

Nel ano 36, Dio el ga mandà che el apòstolo Piero el parlesse con Cornèlio, che no l’era mia un giudeo. Quela volta, Cornèlio l’è stà scoliesto par ndar al cielo. Cossita, tuti i ga visto che Dio el trata compagno tute le persone e che anca quei che no i era mia giudei i podaria star intrà i so adoradori. (Ati 10:34, 44, 45) Alora, Piero el ga scominsià a magnar insieme a quei che no i era giudei. Ma, arquanti dissìpoli de Gesù che i era giudei i pensea che questo no l’era mia giusto. Alora, quando Piero l’era in Antiochia, lu el se ga fermà de magnar insieme a quei che no i era giudei parché el gavea paura dei altri. Par quela, el apòstolo Paolo ghe ga dato un consìlio davanti de tuti. (Gàl. 2:13, 14) Cossita, vedemo che Piero el ga fato sbali anca dopo che l’è stà scoliesto par ndar al cielo. Ma lu el ga seità a proar far quel che l’era giusto. w23.09 p. 22 § 8

Se te ghè visto che te ocore cambiar arquante robe, no stà restar desanimà, parché ‘el Signor l’è bon’ e el te giutarà. (1 Pie. 2:3) Varda la garansia che el apòstolo Piero el ne ga dato: ‘Dio el ndarà pareciarve del tuto par servir ai altri. Lu el ve farà forti.’ De scomìnsio, Piero el pensea che no’l meritea mia restar darente de Gesù. (Luc. 5:8) Ma lu el se ga sforsà tanto e l’è stà bon de seitar ndarghe drio. Cossita, Geovà el ga assà che Piero el ndesse “rento el Regno eterno del nostro Signor e Salvador Gesù Cristo”. (2 Pie. 1:11) Alora, se te perseveri compagno a Piero e te assi che Geovà el te insegne, anca ti te ‘gavarè la to salvassion’. — 1 Pie. 1:9. w23.09 p. 31 §§ 16, 17

El tabernàcolo el gavea un cortivo che l’era ndove i sasserdoti i fea el so laoro. Nel cortivo, ghen’era el altar de rame, ndove se fea i sacrifissi de bèstie e un cadin de rame che i sasserdoti i doperea par lavarse e deventar puri. (Éso. 30:17-20; 40:6-8) Ancoi, i untadi che no i ze gnancora ndati al cielo i serve nel cortivo del grando témpio spiritual qua nela Tera. El cadin de rame che ghen’era nel cortivo del tabernàcolo el giuta i untadi a ricordarse che ghe toca esser puri in quel che i pensa e in quel che i fà. Ma ndove che i altri servi de Dio i ze drio adorarlo? Quel che el apòstolo Gioani el ga dito ne giuta a capir che lori i ze drio adorar a Geovà nel cortivo dela parte de fora del témpio. Gioani anca el ga dito che lori i ze drio servir a Geovà “giorno e note nel so témpio”. (Apo. 7:9, 13-15) Sicuro che tuti noantri restemo pròpio contenti adorar a Geovà nel so grando témpio spiritual. w23.10 p. 28 §§ 15, 16

Geovà el pol darne forsa anca par meso dei ansiani. (Isa. 32:1, 2) Alora, se te ghè massa pensieri, conteghe quel che te sì drio infrontar e aceta suito quando lori i proa giutarte. Par meso dei ansiani, Geovà el ndarà incoraiarte. La nostra speransa de viver par sempre, sia nel cielo o nela Tera, la vien dela Bìblia. Questa speransa la ne dà tanta forsa. (Rom. 4:3, 18, 19) La nostra speransa anca la ne giuta a seitar fedeli quando vien fora una dificoltà, quando ghemo de parlar ai altri sora la Bìblia e quando ghemo de giutar i nostri fradei e sorele dela congregassion. (1 Tes. 1:3) L’è stà questa speransa che ga giutà el apòstolo Paolo. Lu el ga dito che l’era fiaco compagno un vaso de baro. Lu el gavea infrontà diverse dificoltà, perseghission e quasi l’è morto. (2 Cor. 4:8-10) Paolo sempre el pensea nela so speransa par gaver la forsa che ghe ocorea. (2 Cor. 4:16-18) Paolo el seitea a pensar in quel che ndaria suceder parché el savea che la so speransa de viver par sempre nel cielo la era ‘una glòria granda e eterna’. Cossita, lu l’era bon de gaver la forsa che ghe ocorea a cada giorno par via dela so speransa. w23.10 p. 15, 16 §§ 14-17

Podemo domandarse: ‘Sarà che la ze la ora giusta par Geovà risponder ala me orassion?’ Fursi pensemo che saria meio che Geovà el ne rispondesse pi presto che se pol. Ma, l’è Geovà che el sa la ora giusta de far le robe. (Ebr. 4:16) Alora, se no ga mia sucedesto quel che te ghè domandà a Geovà, no stà pensar che la so risposta la ze: “Nò.” Invesse, te pol pensar che la risposta la ze: “Nò gnancora.” Par esémpio, pensa nte un fradel che l’è drio pregar che Geovà lo giute a restar meio dela so malatia, ma lu no’l resta meio. Se Geovà el fesse un miràcolo par curarlo, Sàtana el podaria dir che el fradel sol el seitaria a servir a Geovà par causa de quel miràcolo. (Giò 1:9-11; 2:4) E savemo che Geovà el ga la ora giusta par finir fora con tute le malatie. (Isa. 33:24; Apo. 21:3, 4) Par quela, fin che rive quel tempo, no ghemo mia de spetar che lu fae un miràcolo. Alora, invesse de domandar che Geovà lo curesse, quel fradel el podaria domandar che Geovà ghe desse forsa e pace. Cossita, lu el saria bon de dàrghene fora con quela dificoltà e seitar a servir a Geovà. — Sal. 29:11. w23.11 p. 24 § 13

L’è vera che Sanson el gavea fato un bruto sbàlio. Ancora cossita, lu no’l se ga fermà de servir a Geovà. Invesse, lu el volea el aiuto de Geovà par ndar contra i filistei. (Giui. 16:28-30) Lu el ghe ga domandà a Geovà: “Assame vingarme dei filistei.” Alora, Geovà ghe ga rispondesto e ghe ga dato nantra volta una granda forsa. Cossita, lu l’è sta bon de copar de pi persone lì che in tuta la so vita. Sanson el ga bio tante dificoltà par causa del so sbàlio, ma lu no’l ga mai desistio de servir Geovà. Questo pol suceder anca con noantri. Anca se ghemo perso un laoro che feino nela congregassion, mai ndaremo assar de servir a Geovà. Invesse, ndaremo ricordarse che lu l’è sempre pronto par perdonarne. (Sal. 103:8, 9) Alora, no vol mia dir el sbàlio che ghemo fato, Geovà sempre el ndarà darne forsa par far quel che el vol, compagno el ga fato con Sanson. w23.09 p. 6 §§ 15, 16

Quando seitemo a perseverar assemo Geovà contento. Ma ne ocore capir che Geovà no’l resta contento de vederne tribolar. Invesse, lu el resta contento de veder che noantri seitemo leai a lu. L’è tanto bel saver che Geovà el ghe dà valor ala nostra perseveransa! (Sal. 5:12) Geovà el restea tanto contento de veder che Abraon el seitea a perseverar. Par quela, lu lo vedea come un amigo e un omo giusto. (Gén. 15:6; Rom. 4:13, 22) Geovà el pol veder anca noantri come so amighi e persone giuste. Lu el resta tanto contento quando el vede che semo drio perseverar con fede. Alora, no stà pensar che Geovà sol el restarà contento con ti se te fè tante robe o se te ghè laori importanti nela organisassion. No importa se semo gióveni o veci, quel che ghemo nela vita o le nostre abilità, tuti noantri semo boni de perseverar. Sito drio perseverar par causa de qualche dificoltà? Alora, ricòrdate che Geovà l’è tanto contento con ti. Quando se ricordemo che Geovà el ghe dà tanto valor ala nostra perseveransa, la nostra speransa la resta pi forte. w23.12 p.11 §§ 13, 14

Un bravo servo de Geovà el sa parlar e scoltar i altri. (Pro. 20:5) Alora, impara a star atento ala maniera che i altri i parla, ala so fàcia e ala so voce par capir come che i se sente. Ma, mai te sarè bon de esser cossita se no te discori coi altri. Par quela, invesse de restar sempre su par el telèfono o par la internet, sfòrsate de catarte coi fradei par ciacolar. (2 Gio. 12) Un bravo servo de Geovà anca l’è bon de tender de lu stesso e anca dela so fameia. (1 Tim. 5:8) I gióveni i pol imparar un laoro con qualchedun dela so fameia o nela scola. Ma el pi importante l’è imparar quel che ghe ocore par gaver un laoro. (Ati 18:2, 3; 20:34; Efe. 4:28) Alora, sfòrsate de esser un bravo laorador e de finir del bon quel che te scominsi. Cossita, i altri i vederà che te sì de fidarse e sarà pi fàcile catar un laoro. w23.12 p. 27 §§ 12, 13

Quando la Bìblia la dopera le parole “giorno de Geovà”, la ze drio parlar del tempo che Geovà el finisse fora coi so nemighi e el salva i so servi. Nel passà, Geovà el ga castigà arquante nassion. (Isa. 13:1, 6; Eze. 13:5; Sof. 1:8) E nei nostri giorni, el “giorno de Geovà” el ndarà scominsiar quando i governanti i finisse fora con Babilònia, la Granda. Dopo, el ndarà finirse col Armagedon. Se volemo seitar vivi dopo questo “giorno”, ne ocore pareciarse adesso. Ma Gesù el ga insegnà che no ne ocore sol esser pronti par la “granda tribolassion”. Invesse, lu el ga dito che ghemo de seitar pronti. (Mat. 24:21; Luc. 12:40) Nela prima carta che Paolo el ga scrito ai tessalonissensi, lu el ga doperà diverse ilustrassion par giutar i fradei a seitar pronti par el giorno de Geovà. Paolo el savea che el giorno de Geovà no’l vegnaria mia in quela època. (2 Tes. 2:1-3) Ancora cossita, lu el ga dito che quei fradei i gavea de pareciarse par questo giorno come se el vegnesse suito. E anca noantri ghemo de far quel che Paolo el ga dito. w23.06 p. 8 §§ 1, 2

Nel ano 1978, un prèdio de 60 andari el ga scominsià a esser fato nela cità de Tokyo, nel Giapon. Fursi le persone le se domandea se quel prèdio el restaria in pié con tuti i teremoti che sucede là. Maz, ancora che quel prèdio el fusse pròpio firme, l’è stà fato de una maniera che el podaria moverse un pochetin par cada banda quando sucedesse un teremoto. Cossita, quel prèdio el seitaria in pié. Anca noantri ghemo de esser compagno. Come cossita? Un servo de Geovà el ga de esser firme e echilibrà. Cossa che vol dir esser firme? Seitar leal e esser sempre ‘pronto par obedir’ a tute le lege de Geovà. E cossa che vol dir esser ‘echilibrà’? Mai pensar che tute le robe le ga esser fate dela maniera che pensemo che l’è giusto gnanca pensar che podemo far tute le robe che volemo. — Tia. 3:17. w23.07 p. 14 §§ 1, 2

Quando l’è vegnesto ala tera, Gesù el ga infrontà brute dificoltà, parché Sàtana no’l volea che lu el desse la so vita perfeta par salvar le persone. Par quela, Gesù el ga bio de sforsarse tanto par mai cascar nele tràpole de Sàtana. (Mat. 4:1-11) Ma Gesù el ga bio de infrontar anca altre dificoltà. Par esémpio, i so nemighi i seitea a perseghirlo e i ga fin proà coparlo. (Luc. 4:28, 29; 13:31) Lu anca el ga bio de dàrghene fora coi sbali che i so dissìpoli sempre i fea. (Mar. 9:33, 34) E quando lu l’è stà giulgà, i so nemighi ghe ga dato bote e ghe ga dito su. Dopo, lu el ga tribolà tanto vanti de morir. (Ebr. 12:1-3) Gesù el ga bio de infrontar queste dificoltà nel fin dela so vita sensa la protession de Geovà. (Mat. 27:46) Sicuro che Gesù el ga sofrio tanto par dar la so vita par salvarne. E quando pensemo in tuto quel che ghe ga tocà far, lo amemo ancora de pi. w24.01 p. 10, 11 §§ 7-9

La passiensa anca la ne giuta a gaver bone amicìssie. Par esémpio, la ne giuta a star atenti intanto che i altri i ze drio parlar con noantri. (Tia. 1:19) La passiensa anca la ne giuta a esser in pace coi altri parché, anca se ghemo massa pensieri, no ndaremo parlar sensa pensar gnanca dirghe su. E se una persona la ne assa disgustadi, no ndaremo risponderghe de maniera stùpida. Invesse, ‘seitaremo a soportar i altri e a perdonarli’. (Col. 3:12, 13) La passiensa anca la ne giuta a far bone dessision. Come cossita? Invesse de far la prima roba che ghemo in mente, ndaremo torse tempo par pensar nela meio dessision. Metemo dir che ne ocore catar un laoro. Fursi volemo acetar el primo laoro che vedemo. Ma, se ghemo passiensa, ndaremo pensar se el laoro el ndarà intrigar la nostra amicìssia con Geovà e el tempo che ghemo cola nostra fameia. Cossita vedemo che, se portemo passiensa, saremo boni de far sempre la meio dessision. w23.08 p. 22 §§ 8, 9

Pol esser che te resti desanimà se te vien voia de far robe sbaliade. Alora, pensa sora la promessa che te ghè fato a Geovà quando te te ghè dedicà a lu. Cossita, te gavarè forsa par seitar a far quel che ghe piase a lu. Come cossita? Dopo che te te batesi, te dessidi viver nò par far quel che te vol ti. Questo vol dir no ndar drio la voia de far robe sbaliade gnanca far qualcossa che disgusta a Geovà. (Mat. 16:24) Alora, quando te vien voia de far qualcossa de sbalià, no te ocore star lì pensar cossa che te ndarè far, parché belche te sè che te toca seitar leal a Geovà. Te ndarè far la medèsima dessision che Giò el ga fato. Anca quando lu l’era drio infrontar una bruta dificoltà, lu el ga dito: “Mi mai ndarò renunsiar ala me integrità!” — Giò 27:5. w24.03 p. 9 §§ 6, 7

Geovà, “el Dio de amor”, el se preocupa con noantri e l’è sempre dela nostra banda. (2 Cor. 13:11) Semo sicuri che ghemo el so amor leal. (Sal. 32:10) Par quela, ghemo de seitar a pensarghe sora come che Geovà el mostra che el ne ama. Cossita, ndaremo esser ancora pi sicuri che lu el se preocupa con noantri e restaremo cada volta pi darente de lu. Alora, podemo seitar a pregar sensa gaver paura. Noantri podemo dirghe tuto quel che sentimo parché savemo che lu el ne capisse e l’è premoso de giutarne. (Sal. 145:19) Cossita come l’è bon star darente el fogo nte un giorno fredo, l’è tanto bon esser cada volta pi darente Geovà quando ghemo dificoltà. El amor de Dio el pol darte consolo e pace. Semo tanto contenti de saver che Geovà el ne ama, mia vera? Sicuro che tuti noantri volemo dir: “Mi amo a Geovà!” — Sal. 116:1. w24.01 p. 31 §§ 19, 20

Nela època de Gesù, i giudei i savea el nome de Dio. Ma Gesù el ga fato de pi che sol parlar el nome de Geovà. Lu el ga giutà le persone cognosser come Geovà l’è. (Gio. 1:17, 18) Par esémpio, le Scriture Ebraiche le spiega che Geovà l’è un Dio de “misericòrdia e compassion”. (Éso. 34:5-7) Gesù el ga mostrà che Geovà l’è pròpio cossita quando el ga contà la stòria del toso che l’è ndato via de casa e che dopo el se ga ciamà gramo. Quando el so pare lo ga visto de distante, lu l’è ndato de carera catarlo, ghe ga dato un strucon e lo ga perdonà del tuto. Cossita, podemo capir pròpio ben come che Geovà el ga misericòrdia e compassion. (Luc. 15:11-32) Sicuro che Gesù ne ga giutà a verder come che Geovà l’è. w24.02 p. 10 §§ 8, 9

Cossita come l’è bel bever un bicier de àqua fresca quando ghemo sen, l’è tanto bel gaver el consolo de Geovà quando semo drio infrontar una dificoltà. Ma come che podemo consolar i altri compagno a Geovà? Ndemo veder adesso un per de qualità che ndarà giutarne a gaver compassion dei altri e darghe consolo. Cossa che ndarà giutarne a seitar a amar e a consolar i nostri fradei? Noantri ghemo de meterse nel posto de lori e gaver compassion e amor. (Col. 3:12; 1 Piero 3:8) Quando ghemo compassion par i nostri fradei e se preocupemo con lori anca gavaremo una forte voia de consolarli quando i ze drio tribolar. (1 Tes. 4:18) Gesù el ga dito che ‘la boca la parla quel che ghen’è nel cuor’ e che ‘el omo bon el parla robe bone’. (Mat. 12:34, 35) Semo sicuri che consolar i nostri fradei l’è una maniera tanto importante de mostrar che li amemo. w23.11 p. 10 §§ 10, 11

Se volemo capir le professie dela Bìblia, ghemo de esser ùmili e domandarghe el aiuto de Geovà. (Dan. 2:28; 2 Pie. 1:19, 20) Metemo dir che te sì drio viaiar e te ciapi una strada che no te cognossi mia. No te restarissi contento de gaver un amigo insieme che el cognosse tanto ben la strada e che el sa ndove te ghè de ndar? Sicuro che si! Geovà l’è come questo amigo parché el sa ben in che època semo drio viver e el cognosse ben el nostro futuro. Par quela che ghemo de domandarghe el so aiuto par capir le professie dela Bìblia. Sicuro che un pare e una mare i vol che i so fioi i sìpia felici. Anca Geovà el vol che so fioi i sìpia contenti e i gàpie un bel futuro. (Ger. 29:11) Lu el ga volesto che le professie le fusse scrite nela so Parola parché el vol contarne robe importante che le ndarà suceder. — Isa. 46:10. w23.08 p. 8 §§ 3, 4