Sfòrsate par deventar mauro parché el giorno de Geovà l’è darente

“Seitemo avanti fin esser mauri.” — EBREI 6:1.

1, 2. Parché i servi de Dio in Gerusalen i ga bio de scampar e come lori i ze stati boni?

QUANDO Gesù l’era nela tera, i so dissìpoli i ghe ga domandà: “Qual che sarà el segnal dela to presensa e del fin del sistema de cose?” Gesù el ga rispondesto ala domanda con una professia. La prima parte de questa professia la sucederia ancora quando i so dissìpoli i era vivi. Gesù el ga dito che una roba strània sucederia, e che questo ndaria mostrar che Gerusalen suito la saria finida fora. In quela ora i so dissìpoli i gavaria de ricordar de quel che Gesù el gavea parlà e scampar par i monti. — Mat. 24:1-3, 15-22.

² Intorno de trenta ani dopo, nel ano 61 dopo de Cristo, el apòstolo Paolo el ga dato un consìlio forte ai servi de Geovà che i era de star in Gerusalen e darente de lì. Gnanca lori e gnanca Paolo i savea, ma el segnal de che ndaria scominsiar una “granda tribolassion” ndaria suceder in sinque ani. (Mat. 24:21) Nel ano 66 dopo de Cristo, Sèstio Galo e soldadi romani i ga atacà Gerusalen. Ma de colpo i romani i ze ndati via, cossita quei che i era de star lì i ga bio la oportunità de scampar via e esser salvi.

3. Che consìlio Paolo el ga dato ai ebrei che servia a Geovà, e parché?

³ Paolo el ga dito ai Ebrei: “Adesso che ghemo assà indrio i primi insegnamenti sora el Cristo, seitemo avanti fin esser mauri.” (Ebr. 6:1) Parché che Paolo el ga dito queste parole? Parché i servi de Dio i ghe ocorea capir che quel che l’era drio suceder in Gerusalen l’era pròpio quel che Gesù el gavea dito. Arquanti de lori no i ga scoltà e i ze deventadi “duri de récie”. I era come bambini che gavea bisogno de “late”. (Ledi Ebrei 5:11-13.) Ancora che arquanti de lori i servia a Geovà fea tanto tempo, lori i era cada volta pi distante de Dio. (Ebr. 3:12) Quel che Gesù el gavea dito presto ndaria suceder, sol che arquanti no i ndea pi ale riunion. — Ebr. 10:24, 25.

4. Parché che l’è importante restar atenti cola nostra amicìssia con Geovà, e cossa ne giutarà far questo?

⁴ Semo drio viver nela parte final dela professia de Gesù che la ze drio realisarse. “El grando giorno de Geovà l’è darente”, o sia, el giorno che lu ndarà finir fora con tuto el sistema de Sàtana. (Sof. 1:14) Par quela l’è importante restar atenti cola nostra amicìssia con Geovà. (1 Pie. 5:8) Sarà che semo drio far cossita? Esser mauri, o sia, capir la Bìblia e far quel che la dise, ne giutarà a ricordarse che semo drio viver nel tempo del fin.

Cossa vol dir esser una persona maura

5, 6. (a) Cossa vol dir esser mauri? (b) Che due robe ghemo de far par deventar persone maure?

⁵ Paolo el ga dito ai servi de Dio in Gerusalen che lori i gavaria de esser mauri. E lu el ghe ga spiegà come esserlo. (Ledi Ebrei 5:14.) El ga dito che le verità sémplisse dela Bìblia le ze come “late”. Sol che ghemo de ver anca el “alimento sòlido”, o sia, studiar pi fondo la Bìblia par deventar persone maure. (1 Cor. 2:10) Anca, persone cossita le se sforsa tanto par meter in pràtica quel che le impara. Questo le giuta a saver quel che l’è giusto e quel che l’è sbalià. Alora, quando le ga de far una dessision, le pol doperar quel che le ga imparà dela Bìblia.

⁶ Paolo el ga scrito: “L’è par quela che ghe vol darghe ancora de pi atension ale robe che scoltemo, par mai perder la strada giusta.” (Ebr. 2:1) La nostra fede la pol restar fiaca sensa che se nicordemo. Ma questo no ndarà suceder se ghe demo ancora de pi atension quando studiemo la Bìblia. Podemo domandarse: ‘Stùdio sol le robe fàcile dela Bìblia? La ledo sensa pensarghe sora? Come posso far pi forte la me fede?’ Ghemo de far due robe: cognosser ben la Bìblia e imparar a far quel che la dise.

Cognossi ben la Bìblia

7. Come che cognosser la Parola de Dio ne giuta?

⁷ Paolo el ga scrito: “Tuti quei che i continua bever late no i cognosse la parola dela giustìssia, parché i ze bambini”. (Ebr. 5:13) Par deventar mauri ghemo de cognosser ben la Parola de Dio. Come la Bìblia la ze el messàgio de Dio par noantri, ghemo de esser boni studianti dela Bìblia e dele publicassion del “schiavo fedele e prudente”. (Mat. 24:45-47) Far questo ne giutarà a imparar come Dio el pensa e ndaremo trenar la nostra capacità de pensar. Varda el esémpio de una sorela che la ga nome Orchid.a Ela la dise: “Quando go scominsià a leder la Bìblia tuti i giorni, questo ga cambià la me vita. Ghe go metesto due ani par leder tuta la Bìblia, ma go sentio che mi era drio cognosser a Geovà par la prima volta. Go imparà tante robe sora lu, quel che ghe piase e quel che no ghe piase, el so poder e la so sabedoria. Leder la Bìblia tuti i giorni me ga giutà nele situassion pi difìcile dela me vita.”

8. Come che leder la Bìblia pol giutarne?

⁸ Se ledemo la Bìblia tuti i giorni, ela ‘la gavarà poder’ sora noantri. (Ledi Ebrei 4:12.) Questo pol giutarne a cambiar la nostra personalità, e assaremo Geovà pi contento. Sarà che te toca torte de pi tempo par leder la Bìblia e pensarghe sora?

9, 10. Cossa vol dir cognosser ben la Bìblia? Parla de un esémpio.

⁹ Nel tempo de Paolo i servi de Geovà in Gerusalen i savea quel che la Bìblia la disea. Ma lori no i la metea in pràtica. Lori no i pensea nela Bìblia quando i gavea de far dessision nela so vita.

¹⁰ Cognosser ben la Bìblia vol dir saver quel che la dise e meter in pràtica. Quel che ga sucedesto con una sorela de nome Kyle pol giutarne. Kyle la ga bio una discussion con una colega de laoro. Cossa che la ga fato par risolver el problema? Ela la dise: “Suito me go ricordà de quel che la Bìblia la dise in Romani 12:18: ‘De acordo con quel che podé, fé el vostro meio par star in pace con tuti.’ Alora go domandà ala me colega se podeino catarse dopo del laoro.” Lore le ga bio una bona ciàcola, e la colega de laoro la ze restada maraveiada parché Kyle la ga volesto meter a posto le robe. Kyle la dise: “Go imparà che se femo quel che la Bìblia la dise le robe sempre le ndarà meio.”

Impara a far quel che la Bìblia la dise

11. Come che savemo che obedir nte una situassion difìcile pol esser fadiga?

¹¹ Dele volte l’è fadiga meter in pràtica quel che la Bìblia la dise. Par esémpio, pena dopo che Geovà el ga liberà i israeliti de esser schiavi nel Egito, lori i ga sbrontolà con Moisè e i seitea “meter Geovà a prova”. Parché? Parché ghe manchea àqua par bever. (Éso. 17:1-4) Manco de due mesi dopo che i ga prometesto de obedir a Geovà, lori i ga desobedio e i ga adorà un ìdolo. (Éso. 24:3, 12-18; 32:1, 2, 7-9) Fursi i israeliti i ga bio paura parché Moisè el ga tardigà de vegner do del monte Orebe. Fursi i ga pensà che i so nemighi i ndaria atacarli, e Moisè no’l saria lì par protégerli, come el gavea fato vanti. (Éso. 17:8-16) No importa el motivo, i israeliti no i ga volesto obedir. (Ati 7:39-41) Paolo el ga dito ai servi de Geovà che i gavea de sforsarse par no far compagno ai israeliti che no i ze ndati rento la Tera Prometesta parché i ga bio paura. — Ebr. 4:3, 11.

12. Come che Gesù el ga imparà a obedir, e qual che l’è stà el risultà?

¹² Se volemo esser mauri ghemo de sforsarse tanto par obedir a Geovà. Cossita come Gesù, podemo imparar a obedir par meso de quel che sofrimo. (Ledi Ebrei 5:8, 9.) Vanti de vegner ala tera, Gesù el ga fato quel che so Pare el volea. Ma l’era fadiga par lu obedir qua nela tera parché el gavea de soportar dolor fìsico e emossional. Gesù l’è stà bon de obedir stesso che el sofria, par quela el ga merità ricever la nova responsabilità che Geovà ghe gavea dato de esser Rè e Sasserdote Prinsipal.

13. Cossa che mostra se ghemo imparà o nò a obedir a quel che la Bìblia la dise?

¹³ E noantri? Semo dessididi a far quel che Geovà el dise stesso quando le robe no le va ben con noantri? (Ledi 1 Piero 1:6, 7.) Geovà el ne dà consili ciari sora la nostra maniera de comportarse, esser onesti, doperar bele parole, leder e studiar la Bìblia, ndar ale riunion e predicar. (Gios. 1:8; Mat. 28:19, 20; Efe. 4:25, 28, 29; 5:3-5; Ebr. 10:24, 25) Femo queste robe anca se semo drio infrontar dificoltà? Se la risposta la ze ‘si’ vol dir che semo persone maure.

Parché che esser mauri ne giuta?

14. Parla de un esémpio de come esser mauri pol esser una protession.

¹⁴ Quando noantri pensemo come Geovà ghemo la protession dele robe sbaliade che le persone che no le serve a Geovà le fà. (Efe. 4:19) Par esémpio, un fradel che el ga nome James sempre el ledea le nostre publicassion e le ghe piasea tanto. Lu el ga scominsià a laorar nte un posto che ghen’era sol done. Tante de lore no le se comportea ben, ma ghen’era una dona che la gavea rispeto e la mostrea interesse par imparar sora la Bìblia. Lu el ga dito: “Un giorno, quando no ghen’era nissuni darente de noantri, ela la me ga domandà par far sesso. Mi catea che la era drio schersar, ma go capio che la volea pròpio far sesso. In quela ora me go ricordà de una stòria che gavea ledesto nela Sentinela sora un fradel che el ga infrontà una tentassion compagna ala mia. La revista ga doperà el esémpio de Giusepe e la dona de Potifar.b Suito go parà via la me colega, e ela la ga coresto via.” (Gén. 39:7-12) James l’è restà contento che no ga sucedesto gnente de bruto e el ga seità con una bona cossiensa. — 1 Tim. 1:5.

15. Come che esser mauri ne giuta a seitar leai a Geovà?

¹⁵ Esser mauro ne giuta a seitar leai a Geovà e no assa che ‘insegnamenti strani e difarenti i ne porte via’. (Ledi Ebrei 13:9.) Quando cognossemo la Bìblia e metemo in pràtica quel che la dise, metemo in primo posto “le robe pi importante”. (Fil. 1:9, 10) Cossita, saremo ancora pi grati par tuto quel che Dio el ne ga dato. (Rom. 3:24) Un servo de Geovà che l’è mauro nela maniera de pensar el impara a ringrassiar de pi e el ga una bona amicìssia con Geovà. — 1 Cor. 14:20.

16. Cossa che ga giutà una sorela a gaver coraio e forsa?

¹⁶ Una sorela che la ga nome Louise la ga dito che dopo del batésimo la so pi granda preocupassion l’era contentar i altri. Ela la dise: “Mi no fea gnente de sbalià, ma mi no gavea zelo gnanca voia de servir a Geovà. Go visto che mi gavea de cambiar e far dela adorassion a Geovà la roba pi importante dela me vita.” Dopo de sforsarse, Louise la ga bio el coraio e la forsa che la ghe ocorea quando la ze restada malada. (Tia. 5:8) Ela ancora la dise: “Go bio tanta ansietà, ma son restada pi darente de Geovà.”

Ghemo de obedir de cuor

17. Parché che l’è stà tanto importante obedir nel primo sècolo?

¹⁷ El consìlio che Paolo el ga dato de ‘esser mauri’ el ga salvà la vita de quei che i era de star in Gerusalen e nela Giudea. Quei che i ga scoltà Gesù i ga visto el segnal che lu el gavea dato de scampar par i monti. Quando i ga visto “la roba schifosa che la rovina fora tuto in pié nel posto santo”, o sia, el esèrsito de Roma che l’era intorno de Gerusalen, i savea che la era la ora de scampar via. (Mat. 24:15, 16) I servi de Dio che i ga scoltà quel che Gesù el ga dito i ze ndati via de Gerusalen vanti che la fusse destruta. Eusèbio, un studioso de stòria, el ga dito che lori i ze ndati nela cità de Pela, nela region de Gileade. Cossita lori i ga salvà la so vita e i ga scampà dela peso destrussion che ga sucedesto cola cità de Gerusalen.

18, 19. Parché che obedir l’è tanto importante ancoi?

¹⁸ Esser mauro ne giutarà a obedir, e far questo ndarà salvar la nostra vita quando la professia de Gesù sora la “granda tribolassion” la se realisarà. (Mat. 24:21) Sarà che ndaremo obedir a tute le istrussion che ndaremo ricever del Corpo Governante? (Luc. 12:42) L’è tanto importante imparar a obedir de tuto el cuor! — Rom. 6:17.

¹⁹ Par deventar mauri ghemo de trenar la nostra capassità de pensar. Femo questo quando se sforsemo de cognosser de pi la Bìblia e imparemo a obedir a quel che la dise.

[Nota]

Cossa che te ghè imparà?

• Cossa vol dir esser mauro, e come podemo esserlo?

• Parché che cognosser la Bìblia l’è importante par deventar mauri?

• Come che imparemo a obedir?

• Come che esser mauri ne giuta?

[Stampa]

Meter in pràtica i consili dela Bìblia ne giuta esser mauri quando infrontemo i problemi

[Stampa]

Seghir el consìlio de Gesù ga salvà la vita dei servi de Dio del primo sècolo