Parché che Dio el assa le persone sofrir?

COME CHE DIO EL SE SENTE QUANDO SOFRIMO?

Milena: Bon giorno, Sofia!

Sofia: Bon giorno, Milena!

Milena: Che bel catarte. La ùltima volta che son vegnesta ghemo parlà sora Dio, se lu el se importa col nostro sofrimento. Me ricordo che te ghè dito che te te domandi sora questo, ancora de pi dopo che to mama la ga bio quel assidente de auto. Ah, come vala?

Sofia: Dele volte la stà ben, dele volte nò tanto. Ma ancoi l’è tuto a posto.

Milena: Che bon che la stà ben ancoi. L’è mia fàcile infrontar tuto questo, nò?

Sofia: Te digo mi! Dele volte me domando fin quando che la ndarà sofrir.

Milena: Si, l’è fadiga pròpio. Me ricordo che la ùltima volta che se ghemo parlà, ndarìano veder la risposta ala domanda: Se Dio el ga tanto poder, parché che lu el assa le persone sofrir?

Sofia: Me ricordo, sì.

Milena: Ma vanti de veder la risposta che ghen’è nela Bìblia, ndemo ricordarse de quel che se ghemo parlà.

Sofia: Va ben.

Milena: Prima, gavemo visto nela Bìblia che fin un omo fedele del passà el se ga domandà parché Dio el ne assa sofrir. Ma Dio mai el ghe ga dito su parché lu el ghe ga domandà questo e gnanca el ga dito che lu no’l gavea mia fede.

Sofia: Ah l’è vera, vanti mi no savea de questo.

Milena: E gavemo visto anca che Geovà Dio el resta disgustà quando noantri sofrimo. Par esémpio, la Bìblia la dise che quando el so pòpolo el ga tribolà, “anca lu el ga sofrio”.a L’è tanto bon saver che Dio el se importa col nostro sofrimento, mia vera?

Sofia: Sì, l’è tanto bon!

Milena: E anca ghemo parlà che el nostro Creador el ga tanto poder. Alora, lu el podaria far qualcossa par finir col nostro sofrimento a qualche ora.

Sofia: Ma l’è pròpio questo che no capisso. Parché che Dio el assa suceder tante robe rugne se lu el ga poder par finir coi problemi?

CHI CHE L’ERA DRIO DIR LA VERITÀ?

Milena: Podemo capir questo quando ledemo quel che dise el primo libro dela Bìblia, Génesi. Cognòssito la stòria de Adon e Eva e el fruto che Dio el ga proibio che lori i magnesse?

Sofia: Sì, go imparà nela ciesa. Dio el ga dito che lori no i gavaria de magnar el fruto de una pianta. Ma lori i ze stati desobedienti e i ga magnà stesso.

Milena: Pròpio cossita. Alora, vedemo parché Adon e Eva i ga pecà. Questo ne giuta a capir parché noantri sofrimo ancoi. Te pol leder qua in Génesi 3:1-5?

Sofia: Sì. “La serpente la era la pi furba de tute le bèstie de mato che Geovà Dio el gavea fato. Alora, la ga dito ala dona: ‘L’è stà pròpio cossita che Dio el ga dito, che no gavé de magnar de tute le piante del giardin?’ La dona la ga rispondesto ala serpente: ‘Podemo magnar del fruto dele piante del giardin. Ma, quanto al fruto dela pianta che la ze in meso del giardin, Dio el ga dito: “No gavé de magnarlo, nò, gnanca gavé de tocarlo. Se valtri lo magné, ndaré morir.”’ Alora la serpente la ga dito ala dona: ‘Sicuro che valtri no ndaré morir. Parché Dio el sà che, nel medèsimo giorno che valtri magné de questo fruto, i vostri oci i se verderà e valtri saré come Dio, savendo quel che l’è bon e quel che l’è mal.’”

Milena: Gràssie. Adesso, pensemo un pochetin in questi versìcoli. Prima, gavemo visto che la bissa la ga parlà con Eva. La Bìblia la mostra che l’era Sàtana, el Diaol, che el ga parlà par meso dela bissa.b Sàtana el ga domandà a Eva sora la òrdine che Dio el gavea dato de no magnar de una pianta. Gheto visto cossa che Dio el ga dito che ndaria suceder con lori se i magnesse de quela pianta?

Sofia: Lori ndea morir.

Milena: Pròpio questo! Dopo, Sàtana el ga parlà una roba pròpio bruta sora Dio. Varda quel che lu el ga dito: “Sicuro che valtri no ndaré morir.” Sàtana el ga dito che Dio l’era un busier.

Sofia: Mi no gavea mai sentio quela roba lì.

Milena: Interessante, nò? E quando el ga dito questo, Sàtana el ga fato vegner fora un dùbio che ghe volaria tanto tempo par saver se l’era vero o nò. Ma, parché che ghe volaria tanto tempo par risolver questo?

Sofia: No sò mia dirte.

Milena: Alora, femo un esémpio. Metemo dir che mi te digo che go pi forsa che ti. Come che ti te me mostri che mi son sbaliada?

Sofia: Fursi se podaria proar par veder chi che ga pi forsa.

Milena: Vero. Noantre podarìssino ciapar qualcossa che la ze ben pesada e veder chi che saria bona de alsarla. Veder chi che l’è pi forte l’è fàcile.

Sofia: L’è vera.

Milena: Ma se invesse de parlar sora chi de noantre ze pi forte mi te digo che ti no te sì de fidarse, questa saria nantra stòria, mia vera?

Sofia: Penso che si.

Milena: Te vedi che provar che te sì una persona de fidarse, no l’è come provar che te sì pi forte.

Sofia: Eco! L’è ben difarente.

Milena: La ùnica maniera de far vegner fora la verità, l’è spetar un tempo par veder se te sì pròpio una persona de fidarse.

Sofia: Go capio.

Milena: Adesso, vedemo nantra volta quel che dise qua in Génesi. Sarà che Sàtana el ga dito che l’era pi forte che Dio?

Sofia: Nò. No’l ga mia dito cossita.

Milena: Se fusse cossita, Dio el podaria gaver provà in quela ora lì che Sàtana l’era sbalià. Invesse, Sàtana el ga dito che Dio no l’era una persona de fidarse. O sìpia, lu el ga dito a Eva: ‘Dio l’è un busier, ma mi son drio dirte la verità.’

Sofia: Ciò, varda che te ghè pròpio rason.

Milena: Dio l’è stà tanto sàbio. Alora, lu el ga visto che ghe volaria tempo par provar che Sàtana l’era sbalià. Col tempo, restaria ciaro chi che l’era drio dir la verità e chi che l’era un busier.

UNA QUESTION IMPORTANTE

Sofia: Ma quando Eva la ze morta, questo no’l ga belche provà che Dio l’era drio dir la verità?

Milena: Sì. Ma Sàtana no’l ga sfidà a Geovà sol con questo. Varda nantra volta el versìcolo 5. Gheto visto nantra roba che Sàtana el ga dito a Eva?

Sofia: Ah, lu el ga dito che se ela la magnesse el fruto i so oci i ndaria verderse.

Milena: Sì. E lu el ga dito che ela la ‘saria come Dio, savendo quel che l’è bon e quel che l’è mal.’ Alora, Sàtana el ga dito qua che Dio l’era drio sconder una roba bona dele persone.

Sofia: Adesso go capio.

Milena: E questa anca no la era una roba sémplisse de provar.

Sofia: Ma come cossita?

Milena: Quando el ga dito questo, Sàtana el volea che Eva e tute le persone le credesse che lore le viveria meio sensa la orientassion de Dio. Geovà el ga mostrà che savea pròpio come risolver questa situassion. Lu el ga assà che Sàtana el comandesse par mostrar se el gavea rason o nò. Ancoi l’è Sàtana che comanda el mondo, nò Dio, par quela che ghen’è tanto sofrimento.c Ma mi go una bona notìssia par ti.

Sofia: Gheto bone notìssie? Lora dime.

Milena: La Bìblia la ne insegna due bele verità sora Dio. La prima la ze che Geovà ne giuta quando sofrimo. Par esémpio, varda quel che el rè Davi el ga dito qua nel Salmo 31:7. Davi el ga patio tanto nela so vita, ma varda quel che lu el ga dito quando el ga pregà a Dio. Te pol leder questo testo?

Sofia: Sì. “Gavarò una granda alegria par causa del to amor leal, parché ti te vedi la me aflission. Ti te cognossi la me granda tristessa.”

Milena: Alora, quando Davi l’era drio sofrir, ghe dea consolo saver che Geovà l’era atento al so sofrimento. Anca se i altri no i ne capisse, l’è tanto bon saver che Geovà el vede el nostro sofrimento e el capisse quel che semo drio sentir.

Sofia: Sì, l’è vera.

Milena: E ghen’è anca nantra bela verità. Dio no’l va assarne sofrir par sempre. La Bìblia la dise che suito Dio ndarà finir col governo de Sàtana e lu anca ndarà desfar tute le robe rugne anca quel che ga sucedesto con ti e cola to mama. Ma come che podemo esser sicuri che Dio ndarà finir fora suito col nostro sofrimento?d Posso tornar qua stimana che vien par spiegarte?

Sofia: Sì, go caro che te vegni.