Sìpia sicuro che Geovà el ndarà darte consolo

1. Come che la era la vita dei giudei che i era in Babilònia?

PROA pensar in quel che ga sucedesto coi giudei che i ze stati menadi via a Babilònia. Par tanti ani, lori i gavea desobedio a Geovà. Par quela, lu el ga assà che i babiloni i finissesse fora Gerusalen e menesse via i giudei fin Babilònia. (2 Cró. 36:15, 16, 20, 21) E come che la era la vita dei giudei in Babilònia? Anca se lori i gavesse libertà par far arquante robe, la so vita no la era mia fàcile e lori no i era de star ndove i volea. (Ger. 29:4-7) Un de quei giudei el ga dito: ‘Noantri se ghemo sentà darente i rii de Babilònia e ghemo piandesto quando se ghemo ricordà de Sion.’ (Sal. 137:1) Vedemo adesso come quei giudei i ga ricevesto el consolo che ghe ocorea.

2-3. (a) Cossa che Geovà el ga fato par giutar i giudei che i saria menadi a Babilònia? (b) Cossa che ndaremo veder in questo stùdio?

² La Bìblia la dise che Geovà l’è “el Dio de tuto el consolo”. (2 Cor. 1:3) Geovà el ama i so servi e el vol darghe consolo. Par quela, l’è sicuro che lu volea consolar anca quei giudei che i era in Babilònia. Geovà el savea che arquanti de lori i ndaria ciamarse grami e i tornaria a adorarlo dela maniera giusta. (Isa. 59:20) Alora, intorno de 100 ani prima che i giudei i fusse menadi a Babilònia, Geovà el ga mandà che el profeta Isaia el desse ‘consolo al so pòpolo’. (Isa. 40:1) Cossita, par meso dele parole de Isaia, Geovà el ga dato el consolo che quei giudei i gavea de bisogno.

³ Cossita come quei giudei, anca noantri ghemo bisogno de consolo. In questo stùdio, ndaremo veder tre robe che Geovà el ga fato par darghe consolo a quei giudei: (1) lu el ga prometesto che el ndaria perdonar a quei che i se ciamesse grami, (2) lu ghe ga dato speransa, e (3) lu li ga giutadi a no restar ansiosi. Noantri anca ndaremo veder come che Geovà el ne dà consolo ancoi.

GEOVÀ EL NE PERDONA

4. Come che Geovà el ga mostrà misericòrdia e compassion a quei giudei? (Isaia 55:7)

⁴ Geovà l’è “el Pare dele grande compassion”. (2 Cor. 1:3) Lu el ga dito a quei giudei in Babilònia: ‘Par causa del me grando amor leal, mi vao mostrar misericòrdia a valtri.’ (Isa. 54:8) Ma come che lu el ga mostrà misericòrdia e compassion a quei giudei? Lu el ga prometesto che el ndaria perdonar quei che i se ciamesse grami. (Ledi Isaia 55:7.a) E anca se lori i era drio sofrir par causa dele brute dessision che i gavea fato, Geovà ghe ga prometesto che i restaria in Babilònia sol par un tempo. (Isa. 40:2) Sicuro che queste parole ga incoraià e consolà tanto quei giudei che i se gavea ciamà grami!

5. Parché che podemo esser pròpio sicuri che Geovà el ne perdona?

⁵ Cossa che noantri imparemo? Quando femo un pecato, Geovà el ga caro de perdonarne del tuto. E noantri podemo esser pròpio sicuri che Geovà el ne perdona. Parché? Parché come Isaia el gavea dito, Geovà el ga mandà el so caro Fiol qua ala Tera par dar la so vita come sacrifìssio par i nostri pecati. Cossita, tuti quei che i se ciama grami i pol esser perdonadi del tuto. (Ati 3:19; Isa. 1:18; Efe. 1:7) L’è tanto bel servir a un Dio che l’è pròpio misericordioso!

6. Come che pensar sora la misericòrdia de Geovà pol giutarne? (Varda anca la ilustrassion.)

⁶ Pol esser che ancora se sentimo in colpa par causa de un pecato che ghemo fato nel passà. E fursi se sentimo tanto pedo se ancora semo drio sofrir par causa de questo pecato. Alora, le parole de Geovà in Isaia 55:7 pol consolarne tanto. Ghemo de ricordarse che, se ghemo parlà a Geovà del nostro sbàlio e no lo ghemo pi fato, podemo esser sicuri che lu el ne ga perdonà. E quando Geovà el perdona, lu el desside no ricordarse pi del nostro sbàlio. (Varda anca Geremia 31:34.) Alora, se Geovà no’l seita a ricordarse dei pecati che ghemo fato nel passà gnanca noantri no gavarìssino de farlo. Par Geovà, quel che semo drio far adesso l’è pi importante che i sbali che ghemo fato nel passà. (Eze. 33:14-16) E nel novo mondo, el nostro caro Pare el ndarà finir cole dificoltà che ghemo par causa dei sbali che ghemo fato nel passà.

7. Cossa che ndarà giutarne a parlar coi ansiani se semo drio sconder un pecato?

⁷ Cossa che ghemo de far se noantri se sentimo in colpa parché semo drio sconder un pecato che ghemo fato? La Bìblia la dise che ghemo de ndar parlar coi ansiani par domandarghe aiuto. (Tia. 5:14, 15) Ma pol esser che sìpia fadiga parlar sora el pecato che ghemo fato. Alora, cossa che pol giutarne? Ghemo de ricordarse che Geovà el ga scoliesto questi òmini par giutarne e che lori i ndarà tratarne come lu el vol, con amor e misericòrdia. Varda come che Geovà el ga doperà i ansiani par giutar un fradel de nome Arthur.b Questo fradel l’era drio sentirse in colpa par causa de un pecato che el gavea fato. Lu el ga dito: “Par un ano, mi go vardà pornografia. Ma dopo che go scoltà un discorso che el ga parlà sora la cossiensa, mi go contà ala me dona e ai ansiani quel che ero drio far. Anca se dopo son restà pi tranquilo, ancora me sentia in colpa par causa del pecato che gavea fato. Alora, i ansiani i me ga ricordà che Geovà ancora el volea esser me amigo e che lu el dissiplina quei che el ama. Quel che i ansiani i me ga dito me ga giutà a veder che Geovà el me gavea pròpio perdonà.” Ancoi, Arthur el laora come pioniero e servo ministerial. Sicuro che ne dà tanto consolo saver che Geovà el perdona tuti quei che i se ciama grami!

GEOVÀ EL NE DÀ SPERANSA

8. (a) Che speransa Geovà el ga dato a quei giudei in Babilònia? (b) De acordo con Isaia 40:29-31, come che la speransa che Geovà el ga dato a quei giudei li ga giutadi?

⁸ Le persone de altre nassion che le era menade a Babilònia come schiave mai le podea ndar via. Par quela, pol esser che i giudei pensesse che no i saria mai boni de tornar ala so cità. (Isa. 14:17) Alora, Geovà el ghe ga dato una speransa. Lu el ga prometesto che el ndaria liberar quei giudei e che gnente podaria intrigarlo de far quel che el gavea prometesto. (Isa. 44:26; 55:12) Par Geovà, quei babiloni i era come un poco de polver, parché bastea un sufion par finirli fora. (Isa. 40:15) Sicuro che la promessa che Geovà el ga fato a quei giudei ghe ga dato tanto consolo. Ma questa speransa li ga giutadi anca de nantra maniera. Isaia el ga scrito: “Quei che i speta in Geovà i gavarà forsa nantra volta.” (Ledi Isaia 40:29-31.c) Alora, la speransa che Geovà el ga dato a quei giudei li ga assadi sicuri che i gavaria forsa de ‘zolar alto come le àghie’.

9. Parché che i giudei i podea esser sicuri che Geovà el ndaria giutarli?

⁹ I giudei i podea esser pròpio sicuri che Geovà el ndaria far quel che el gavea prometesto. Parché? Lori i gavea belche visto realisarse tante dele professie de Geovà. Par esémpio, lori i savea che la Assìria la gavea tolto el poder dele diese tribo de Israel e che la gavea menà via el pòpolo. (Isa. 8:4) Lori anca i gavea visto i babiloni finir fora con Gerusalen e menar via i giudei. (Isa. 39:5-7) Lori i ga savesto che el rè de Babilònia el gavea assà el rè Zedechia orbo e lo gavea portà a Babilònia. (Ger. 39:7; Eze. 12:12, 13) Alora, tuto quel che Geovà el gavea dito ga pròpio sucedesto. (Isa. 42:9; 46:10) Par quela, quei giudei i podea esser sicuri che Geovà el ndaria pròpio liberarli.

10. Cossa che pol giutarne a gaver ben in mente la speransa che ghemo par el futuro?

¹⁰ Cossa che noantri imparemo? Quando semo desanimadi, la nostra speransa la pol darne consolo e forsa. L’è vera che vivemo in giorni pròpio bruti e infrontemo la perseghission de nemighi poderosi de Geovà. Ma no ne ocore restar massa ansiosi parché Geovà el ne ga dato la speransa de viver par sempre e con pace. Alora, ne ocore sempre pensarghe sora la bela speransa che ghemo. Se no femo cossita, saria come se fora dela nostra casa ghen fusse un posto pròpio bel ma che no semo boni de vederlo parché el viero l’è tanto sporco. Alora, cossa pol giutarne a esser boni de veder ben la speransa che ghemo par el futuro? Ghemo de torse el tempo par pensarghe sora come sarà la nostra vita in Paradiso. Podemo leder artìcoli, vardar vìdei e scoltar mùsiche che parla sora la speransa che ghemo. E podemo anca parlar a Geovà sora le promesse che semo premosi de veder suceder.

11. Cossa che ga giutà una sorela malada a gaver forsa?

¹¹ Varda come la nostra speransa ga dato forsa e consolo a una sorela de nome Joy, che la ga bruti problemi de salute. Ela la ga dito: “Quando mi resto tanto desanimada, mi ghe conto tuto quel che son drio sentir a Geovà, e son sicura che el me capisse. Dopo, mi sempre sento che Geovà el me dà ‘el poder che l’è pi grando del normal’.” (2 Cor. 4:7) Joy anca la pensa sora come sarà la so vita in Paradiso, quando nissun pi ndarà dir: “Son malà.” (Isa. 33:24) Alora, se noantri parlemo a Geovà tuto quel che semo drio sentir e ghe pensemo sora la nostra bela speransa, gavaremo la forsa che ne ocore.

12. Parché che podemo esser sicuri che Geovà el ndarà far tuto quel che el ga prometesto? (Varda anca la ilustrassion.)

¹² Cossita come i giudei in Babilònia, anca noantri podemo esser sicuri che Geovà el farà tuto quel che el ga prometesto. Parché? Parché semo drio veder le professie realisarse. Par esémpio, noantri vedemo che la Potensa Anglo-Americana la ga una ‘parte forte’ e una ‘parte fiaca’. (Dan. 2:42, 43) Noantri anca savemo che l’è drio suceder tanti ‘teremoti nte un posto dopo l’altro’ e che le ‘bone notìssie del Regno le ze drio esser predicade a tuta la tera’. (Mat. 24:7, 14) Queste professie ne dà consolo e le fà pi forte la nostra fede che Geovà el farà tuto quel che el ga prometesto.

GEOVÀ EL NE GIUTA A NO RESTAR ANSIOSI

13. (a) Che dificoltà i giudei i ndaria infrontar prima de esser liberadi? (b) De acordo con Isaia 41:10-13, come che Geovà li ga giutadi a no restar ansiosi?

¹³ Sicuro che la speransa che Geovà el ga dato ai giudei in Babilònia li ga consoladi tanto. Ma lu el savea che lori i infrontaria tante dificoltà vanti de esser liberadi de Babilònia. Parché? Geovà el gavea dito che un rè tanto poderoso el ndaria tor el poder dele nassion intorno de Babilònia e el ndaria rento la cità. (Isa. 41:2-5) Sarà che i giudei i gavea de restar spauradi par causa de questo? Nò! Geovà el ghe ga dito: “No stà gaver paura, parché mi son con ti. No stà mia preocuparte, parché mi son el to Dio.” (Ledi Isaia 41:10-13.d) Ma cossa che Geovà el volea dir quando el ga dito: “Mi son el to Dio”? I giudei belche i savea che i gavea de adorar a Geovà. Alora, lu no l’era drio dir che i gavea de adorarlo. Invesse, Geovà l’era drio dirghe che lu l’era dela so banda e che el ndaria giutarli. — Sal. 118:6.

14. De che nantra maniera Geovà el ga giutà i giudei a no restar ansiosi?

¹⁴ Geovà el ga giutà i giudei a no restar massa ansiosi anca de nantra maniera. Lu el ghe ga mostrà che el gavea tanto poder e sabedoria. Come? Lu el ga domandà che i giudei i vardesse le stele in cielo. Cossita, quei giudei i ga capio che Geovà el ga bio el poder de crear le stele e che el savea el nome de cada una. (Isa. 40:25-28) Se Geovà el cognosse el nome de cada stela e el ga bio el poder de crearle, l’è sicuro che el cogosse el nome de tuti i so servi e el ga el poder de giutarli. Alora, i giudei no i gavea mia bisogno de restar spauradi o massa ansiosi.

15. Come che Geovà el ga parecià i giudei par le dificoltà che i infrontaria?

¹⁵ Geovà anca el ga parecià el so pòpolo par le dificoltà che i infrontaria prima de esser liberadi de Babilònia. Par meso de Isaia, Geovà el ga dito al pòpolo: “Ndé rento ai vostri quarti, me pòpolo, e seré le vostre porte de drio de valtri. Resté sconti una scianta, fin che quela ràbia la va via.” (Isa. 26:20) Pol esser che i giudei i ga obedio a questa orientassion quando el rè Siro l’è ndato rento Babilònia. Un omo che el stùdia la stòria el ga dito che quando Siro el ga tolto el poder de Babilònia, lu el ga dito ai so soldadi che i copesse tuti quei che i fusse fora de casa. Proa pensar come l’è stà bruto par le persone che le vivea in Babilònia. Ma i giudei che i ga obedio ala orientassion de Geovà no i ze stati copadi.

16. Parché che no ne ocore restar massa ansiosi con quel che sucederà nel futuro? (Varda anca el ritrato.)

¹⁶ Cossa che noantri imparemo? Suito ndaremo infrontar la pi bruta tribolassion che ghen sarà nela Tera. Quando questa tribolassion la scominsiarà, le persone le restarà tanto spaurade e no le saverà cossa far. Ma noantri gavaremo coraio e seitaremo firmi parché Geovà l’è el nostro Dio e ‘la nostra salvassion’. (Luc. 21:28) Anca quando un per de nassion le volerà finir fora coi servi de Dio, noantri seitaremo a fidarse in lu. Geovà el ndarà darne orientassion che le salvarà la nostra vita e el doperarà i àngeli par protegerne. L’è vera che no savemo come che Geovà el ne darà queste orientassion, ma pol esser che le vegnarà par meso dele nostre congregassion. Alora, podemo dir che le congregassion le ze come “i quarti”, ndove gavaremo protession. Ma come che podemo pareciarse par le dificoltà che infrontaremo? Ne ocore gaver una bela amicìssia coi nostri fradei e sorele, sempre obedir ale orientassion dela organisassion e esser sicuri che Geovà l’è drio doperarla par tenderne e protegerne. — Ebr. 10:24, 25; 13:17.

17. Cossa che te ghè de far par ricever el consolo de Geovà?

¹⁷ Geovà el ga dato el consolo che i giudei in Babilònia ghe ocorea, e lu el ndarà far la medèsima roba con noantri. Alora, no importa quel che sucede nela to vita, domanda che Geovà el te dae el consolo che te ocore e sìpia sicuro che lu el ga tanta misericòrdia e compassion. Sfòrsate de gaver ben in mente la bela speransa che ghemo par el futuro. Ricòrdate che Geovà l’è el to Dio e che no te ocore gaver paura!