Cossa che imparemo dela professia de Giacò? — Parte 2

1. Cossa che ndaremo imparar in questo stùdio?

PROA pensar in quel che ga sucedesto quando Giacò l’era drio parlar coi so fioi vanti de morir. Sicuro che tuti i scoltea atenti intanto che so pare el benedia a cada un de lori. Come ghemo visto nel stùdio prima, Giacò el ga dito a Ruben, Simeon, Levi e Giudà robe che lori no i spetea mia, e pol esser che i volesse tanto saver quel che Giacò el parlaria ai so altri fioi. In questo stùdio, ndaremo veder quel che podemo imparar de quel che Giacò el ga dito a Zebulon, Issacar, Dan, Gade, Aser, Naftali, Giusepe e Bengiamin.a

ZEBULON

2. Cossa che Giacò el ga dito a Zebulon, e come le so parole le ga pròpio sucedesto? (Génesi 49:13) (Varda anca el quadro “La professia de Giacò”.)

² Ledi Génesi 49:13.b Giacò el ga dito a Zebulon che i so dissendenti i viveria darente al mar, al nort dela Tera Prometesta. Come quel che Giacò el ga dito ga pròpio sucedesto? Intorno de 200 ani dopo, quei dela tribo de Zebulon i ga ricevesto tere intrà el Mar dela Galilea e el Mediteràneo. Come lori i era darente el mar, l’era pròpio fàcile vender e comprar tante robe. Cossita, se ga anca realisà quel che Moisè el ga dito: ‘Ò Zebulon, resta contento nei to negossi.’ (Deu. 33:18) Alora, sicuro che i dissendenti de Zebulon i podea restar pròpio contenti.

3. Cossa che pol giutarne a esser felici?

³ Cossa che noantri imparemo? Podemo esser felici, no importa ndove stemo o quel che ghemo nela vita. L’è vera che, dele volte, l’è pi fàcile pensar sol in quel che no ghemo o in quel che volarìssino. Par quela, par esser felici, ghemo de vardar le robe bone che ghemo nela vita e esser contenti con quel che belche ghemo. — Sal 16:6; 24:5; Gàl. 6:4.

ISSACAR

4. Cossa che Giacò el ga dito a Issacar, e come le so parole le ga sucedesto? (Génesi 49:14, 15) (Varda anca el quadro “La professia de Giacò”.)

⁴ Ledi Génesi 49:14, 15.c Giacò el ga lodà Issacar parché lu l’era un bravo laorador. Lu anca el ga dito al so fiol che lu el laorea come una bèstia tanto forte e che la ze bona de portar tanto peso. E Giacò el ga dito che Issacar el riceveria una tera tanto bona. Come quel che Giacò el ga dito ga sucedesto? I dissendenti de Issacar i ga ricevesto una tera tanto bona par piantar darente el rio Giordon. (Gios. 19:22) Sicuro che lori i ga laorà tanto su quela tera. Ma lori anca i ga fato el so meio par giutar i altri. (1 Rè 4:7, 17) Quando ghe volea soldadi par ndar ala guera, la tribo de Issacar la gavea caro de giutar. Par esémpio, lori i ga mandà soldadi quando el giuis Barache e la profetisa Dèbora i ga domandà aiuto par far guera contra Sìsera. — Giui. 5:15.

5. Parché che ghemo de sforsarse de esser bravi laoradori?

⁵ Cossa che noantri imparemo? Quando semo bravi laoradori compagno a quei dela tribo de Issacar, Geovà el resta tanto contento. (Ecl. 2:24) Par esémpio, i ansiani i laora tanto par tender dela congregassion. (1 Tim. 3:1) Anca se lori no i ga de ndar ala guera come le persone nel passà, lori i fà tuto quel che i pol par proteger i fradei e sorele de tuto quel che pol rovinar la so amicìssia con Geovà. (1 Cor. 5:1, 5; Giuda 17-23) Lori anca i laora tanto par pareciar discorsi e parte che ndarà incoraiar i fradei. — 1 Tim. 5:17.

DAN

6. Che laoro la tribo de Dan la gavea? (Génesi 49:17, 18) (Varda anca el quadro “La professia de Giacò”.)

⁶ Ledi Génesi 49:17, 18.d Giacò el ga dito che Dan l’era come una bissa che bechea bèstie tanto pi grande de lu, come un caval che l’era doperà nte una guera. E quei dela tribo de Dan i fea pròpio questo, parché i era sempre pareciadi par far guera contra i nemighi de Israel. Par esémpio, quando le tribo de Israel le ze ndate ala Tera Prometesta, quei dela tribo de Dan sempre i ze restadi de drio par proteger a tuti. (Nùm. 10:25) Alora, el so laoro l’era tanto importante, anca se i altri no i vedesse quel che i fea.

7. Cossa ne ocore ricordarse quando femo un laoro nela organisassion?

⁷ Cossa che noantri imparemo? Pol esser che te ghè belche fato laori nela organisassion che nissun ga visto. Par esémpio, fursi te ghè giutà a rangiar su un Salon del Regno, te ghè laorà nte un congresso o assemblea, o fato altri laori. Se te ghè giutà cossita, volemo lodarte tanto! Ricòrdate sempre che Geovà el vede e el dà valor a tuto quel che te fè par lu. Geovà el resta ancora pi contento quando el vede che te sì drio far el to meio parché te lo ami, e nò parché te vol esser lodà par i altri. — Mat. 6:1-4.

GADE

8. Parché che saria fàcile che i nemighi de Israel ghe vegnesse contra Gade? (Génesi 49:19) (Varda anca el quadro “La professia de Giacò”.)

⁸ Ledi Génesi 49:19.e Giacò el ga dito che la tribo de Gade saria atacada par ladroni. Intorno de 200 ani dopo, la tribo de Gade la ga ricevesto la tera al leste del rio Giordon, darente de nassion nemighe. Alora saria fàcile che nemighi ghe vegnesse contra. Anca cossita, quei dela tribo de Gade i volea ndar de star lì parché ghen’era bei prà par le bèstie. (Nùm. 32:1, 5) Cossita capimo che quei dela tribo de Gade i era tanto coraiosi e i se fidea che Geovà el ndaria giutarli a proteger quela tera. Par tanti ani, lori i ga fin mandà che el so esèrsito el giutesse altre tribo a far guera contra nassion nemighe che stea nela Tera Prometesta. (Nùm. 32:16-19) Lori i era sicuri che Geovà el protegeria le so done e i so fioi intanto che i fusse nela guera. Come lori i era coraiosi e i era sempre pronti par giutar i altri, Geovà el ga pròpio benedio la tribo de Gade. — Gios. 22:1-4.

9. Come tanti i ze drio mostrar che i se fida del tuto in Geovà?

⁹ Cossa che noantri imparemo? Sol saremo boni de seitar a servir a Geovà quando infrontemo dificoltà se se fidemo del tuto in lu. (Sal. 37:3) Tanti ancoi i fà cambiamenti nela vita par far de pi par Geovà. Par esémpio, arquanti i va de star ndove ghen’è bisogno de aiuto nela predicassion o i giuta a far su Saloni del Regno e altri posti che la organisassion la dopera. Dele volte, no l’è mia fàcile far i cambiamenti, ma questi fradei e sorele i ze sicuri che Geovà el ndarà sempre tenderli. — Sal. 23:1.

ASER

10. Cossa che la tribo de Aser no la ga fato? (Génesi 49:20) (Varda anca el quadro “La professia de Giacò”.)

¹⁰ Ledi Génesi 49:20.f Giacò el ga dito che la tribo de Aser saria siora. Come quel che lu el ga dito ga sucedesto? Quei dela tribo de Aser i ga ricevesto arquante dele meio tere che ghen’era par piantar. (Deu. 33:24) Lori anca i stea darente al mar Mediteràneo e al grando porto de Sìdon. Ma, lori no i ga mia mandà via i cananei dela tera. (Giui. 1:31, 32) Alora, pol esser che, par causa dei soldi che i gavea e de quei cananei, la tribo de Aser ga scominsià a far cada volta manco nela adorassion a Geovà. E quando el giuis Barache el ga domandà che i vegnesse giutar a far guera contra i cananei, quei dela tribo de Aser no i ga mandà gnanca un omo. Par quela, nissun de quela tribo ga visto i bei miràcoli che Geovà el ga fato par giutar i israeliti a vinser la guera. (Giui. 5:19-21) Sicuro che lori i ga sentio tanta vergogna de scoltar Barache e Dèbora cantar la mùsica de vitòria che la disea: ‘Aser el se ga sentà pacìfico darente el mar.’ — Giui. 5:17.

11. Cossa che volemo sforsarse de far?

¹¹ Cossa che noantri imparemo? Come volemo dar a Geovà el nostro meio, ghemo de star atenti par mai ndarghe drio le persone del mondo e pensar che i soldi e el capital i ze le robe pi importante dela nostra vita. (Pro. 18:11) L’è vera che ne ocore soldi par viver, ma mai ndaremo pensar che imuciar su soldi e gaver robe che no ne ocore mia l’è pi importante che servir a Geovà. (Ecl. 7:12; Ebr. 13:5) Invesse, volemo sforsarse de doperar el nostro tempo e la nostra forsa par servir a Geovà, e ricordarse che gavaremo una bela vita in Paradiso. — Sal. 4:8.

NAFTALI

12. Come quel che Giacò el ga dito sora Naftali fursi se ga realisà? (Génesi 49:21) (Varda anca el quadro “La professia de Giacò”.)

¹² Ledi Génesi 49:21.g Giacò el ga dito che la tribo de Naftali ndaria “parlar robe bele”. Pol esser che quel che lu el ga dito se ga realisà in Gesù. Come cossita? Gesù, che l’è stà tanto bravo de predicar e insegnar, el ga vivesto tanto tempo in Cafarnaun, ndove stea la tribo de Naftali. (Mat. 4:13; 9:1; Gio. 7:46) Isaia el ga dito che Gesù el saria come una “luce” par le persone de Zebulon e Naftali. (Isa. 9:1, 2) E podemo esser sicuri che Gesù l’è stà una ‘vera luce che la ga sciarà tuti i tipi de persone’ par meso de quel che el ga insegnà. — Gio. 1:9.

13. Come che podemo assar Geovà contento par meso de quel che parlemo?

¹³ Cossa che noantri imparemo? Geovà l’è atento a quel che parlemo ai altri. Alora come che podemo assarlo contento par meso de quel che parlemo? Ghemo de dir sempre la verità. (Sal. 15:1, 2) Podemo anca sforsarse de lodar i altri par le bele robe che i fà e mai parlar mal de nissuni. (Efe. 4:29) E podemo anca sforsarse de esser cada volta pi bravi de ciacolar coi altri e insegnarghe sora Geovà.

GIUSEPE

14. Come la professia sora Giusepe la ga sucedesto? (Génesi 49:22, 26) (Varda anca el quadro “La professia de Giacò”.)

¹⁴ Ledi Génesi 49:22,h 26.i Giusepe l’era el primo fiol che Giacò el ga bio con Rachel. Giacò el gavea tanto orgòlio del so fiol. Lu el ga dito che Giusepe l’era stà scoliesto intrà i so fradei e che l’era un ramo de una pianta che la dà fruti. Giacò l’era drio dir che lu stesso l’era una pianta e che Giusepe l’era un ramo. Lu anca el ga dito che Giusepe el riceveria le tere che saria de Ruben, che l’era el primo fiol de Giacò cola so dona Lèia. (Gén. 48:5, 6; 1 Cró. 5:1, 2) Come quel che Giacò el ga dito ga sucedesto? I due fioi de Giusepe, Efrain e Manassè, i ze deventadi due tribo e tute due tribo le ga ricevesto tere. — Gén. 49:25; Gios. 14:4.

15. Cossa che Giusepe el ga fato quando i so fradei i lo ga tratà mal?

¹⁵ Giacò anca el ga dito che ‘archeri i ga atacà e i ga odià’ Giusepe. (Gén. 49:23) Questo ga sucedesto quando i fradei de Giusepe i ga scominsià a gaver invìdia de lu e lo ga fato sofrir tanto. Ancora cossita, Giusepe no l’è restà inrabià con lori e gnanca el ga dato la colpa a Geovà de quel che el ga infrontà. L’è stà par quela che Giacò anca el ga dito che ‘el arco de Giusepe el ga seità nel so posto’ e che lu el podaria atacar svelto. (Gén. 49:24) Anca se Giusepe el podesse difenderse contra i so fradei, lu no’l ga fato gnente. Invesse, Giusepe el se ga fidà in Geovà e el ga assà che le dificoltà che el ga infrontà lo giutesse a deventar una persona meio. (Sal. 105:17-19) Cossita, lu l’è stà bon de perdonar i so fradei e li ga sempre tratà con bontà. (Gén. 47:11, 12) Par quela che Geovà el ga doperà Giusepe par far robe tanto importante.

16. Come che podemo far compagno a Giusepe quando infrontemo dificoltà?

¹⁶ Cossa che noantri imparemo? Quando semo drio infrontar dificoltà, no podemo assar che gnente rovine el nostro amor e la nostra amicìssia con Geovà e coi fradei. Ghemo de ricordarse che Geovà el pol insegnarne quel che ne ocore intanto che semo drio infrontar problemi. (Ebr. 12:7) Par esémpio, pol esser che lu el vol giutarne a mostrar de pi misericòrdia o a perdonar. (Ebr. 12:11) Se seitemo leai, Geovà el ndarà benedirne, cossita come el ga benedio Giusepe.

BENGIAMIN

17. Come quel che Giacò el ga dito sora Bengiamin ga sucedesto? (Génesi 49:27) (Varda anca el quadro “La professia de Giacò”.)

¹⁷ Ledi Génesi 49:27.j Giacò el ga dito che quei dela tribo de Bengiamin i saria bravi soldadi de ndar ala guera. Par quela che lu el ga dito che lori i era come un lobo. (Giui. 20:15, 16; 1 Cró. 12:2) Come quel che Giacò el ga dito ga sucedesto? El primo rè de Israel, che l’è stà Saul, l’è vegnesto dela tribo de Bengiamin. Lu l’è stà un soldà tanto coraioso quando el ga fato guera contra i filistei. (1 Sam. 9:15-17, 21) E tanti ani dopo, la regina Ester e el so primo cusin Mordecai, che i era dela tribo de Bengiamin, i ga salvà i israeliti de esser copadi par la Pèrsia. — Est. 2:5-7; 8:3; 10:3.

18. Come che podemo far compagno a quei dela tribo de Bengiamin?

¹⁸ Cossa che noantri imparemo? Sicuro che tuti dela tribo de Bengiamin i ze restadi contenti de saver che Saul, che l’era dela so tribo, deventaria rè de tuta la nassion. Ma anca quando Geovà el ga scoliesto Davi, che l’era dela tribo de Giudà, par esser rè, lori i ga seità a giutar de volentiera. (2 Sam. 3:17-19) Arquanti ani dopo, quando le altre diese tribo le ze ndate contra Giudà, quei dela tribo de Bengiamin i ze stati leai al rè che Geovà el gavea scoliesto. (1 Rè 11:31, 32; 12:19, 21) Cossita, noantri imparemo che ghemo de seitar leai a quei che Geovà el ga scoliesto par tenderne. — 1 Tes. 5:12.

19. Come imparar sora le professie de Giacò sora i so fioi ne ga giutà?

¹⁹ Le professie che Giacò el ga fato sora i so fioi pol insegnarne tanto. Quel che ghemo imparà in questo stùdio ne ga giutà a esser ancora pi sicuri che Geovà el ndarà far tuto quel che el ga prometesto nela Bìblia. E questo stùdio ne ga anca giutà a saver come assar el nostro caro Pare cada volta pi contento.